Mirinnhia, Yongsung Kim yɛɛ nsaano mfonyin no. Havenlight hɔn adom do
5.
Nantsew Nyame ne kan mu
Galatiafo 5:25
Eyɛ nsanmuyi yie ber a itum hu ndzɛmba pefee ara yie. Dɛm ntsi na kandzea no ho hia papaapa no, kan ma ɔyɛ mberɛw dɛ ibohu anamɔnkwan tɔɔtsen no. Ɔsor Egya ama wo kan a ofi sor ho kwan—Sunsum Krɔnkrɔn n’akyɛdze—dɛ ɔbɔboa ma ehu dza oye na omuo, dza ɔtsen na ɔnntsen pefee.
Onnyiewiei Nokwar horow
Ibotum enya Sunsum Krɔnkrɔn no dɛ daa daa adamfo. Sɛ wosi wo pi dɛ Asɔrba a wɔto nsa frɛ wo dɛ “gye Sunsum Krɔnkrɔn no.” Kwan a itum nya Sunsum no dɛ wo daa daa adamfo no yɛ Nyankopɔn akyɛdze kɛse kor ma wo.
Iriyɛ nsanmuyi horow pa tu w’ahom a itum dze tse Sunsum no nkã no mpon. Ndzɛmba apapa na odzi mu pii wɔ wiadze yi mu. Tse dɛ mbrɛ dza idzi na enom nya nsunsuando wɔ wo honandua do no, dza ekenkan, na ehwɛ, na etsie nya nsunsuando kɛsenara wɔ w’adwen na wo sunsum do.
Nsa To horow
Nya mber ma Ewuradze dabiara. Sũa No ho asɛm. Kaa No aber nyina. Bɔ mpaa ma Wo Ɔsor Egya. Sũa kyerɛwsɛm no na nkɔnhyɛfo atseasefo hɔn nsɛm. Nkyii bɔ mbɔdzen dɛ dza esũa no edze bɔbɔ bra.
Hwehwɛ dza opegyaw, onkenyan, na ɔto nsa frɛ Sunsum no. Ber a eyɛ nsanmuyi horow wɔ dza ehwɛ, ekenkan, itsie, anaa edze woho hyɛ mu no, dwen atsenkã a ɔma inya ho. Anaa ɔma edwen adwen pa? Twe woho fi biribiara a osi dza ɔyɛ krɔnkrɔn no atwetwe anaa ɔyɛ ɔbra bɔn ho. Mfa woho nnhyɛ biribiara a obofura w’atsɛmbu anaa wo Sunsum atsenkã do, tse dɛ begyabegyayɛ, nsãdzen, na ndur bɔn. Nya akokodur dɛ ibodum video no anaa agodzi no, ebɛnantsew efi cene anaa dance ase, anaa ibɛdan efi biribiara a ɔnnye Sunsum no nnsaa ho.
Fa social media pegya binom. Social media botum ayɛ nkitssahodzi edwindadze a ɔyɛ ndam. Sɛ edze dzi dwuma a tsim wɔ kan, gyedzi na nokwar do. Mma mmfa w’abrabɔ nntoto dza nkorɔfo binom yɛ dɛ ma worudua mu. Kaa dɛ isom bo osiandɛ eye ɔsor awofo hɔn ba, na nnyɛ wo gyinabew wɔ social media do na ohia.
Hwehwɛ sũahu a odzi mu na ɔyɛ nokwar, na nkitahodzi horow a otsim. Yɛ ahwɛyie dɛ abaefo mfir na social media a wɔdze dzi dwuma no nnkɛhyɛ erohwer mber enyim na enyim a enye ebusua na anyɛnkofo. Social media na abaefo mfir nkaa no gye wo mber kɛse a nnya mu mfaso biara. Twe woho fi internet wiadze na enye nkorɔfo a wɔwɔ wiadze ankasa yi mu no ndzi nkitsaho.
Nhyira horow a Wɔabɔ ho Anohoba
Ibotum enya Sunsum no wɔ wo nkyɛn aber nyina. Anohoba yi kã ahyɛmu a idzi ber biara idzi sacrament no. Sunsum no gye Ɔsor Egya na Jesus Christ ho dase kyerɛ wo. Ɔbɛma wo awerɛkyekye, kwankyerɛ, abɔ wo kɔkɔ, na Ɔatsew woho. Ɔbɔboa wo ma ehu nokwar no na ehu papa a ɔwɔ wiadze yi mu.
Nsɛmbisa na Nyiano
Mibesi dɛn botum ehu dɛ mirinya Sunsum Krɔnkrɔn noho atsenkã a? Erusũa ehu dɛ Sunsum no wɔ hɔ no gye mber, ndzeyɛɛ, na abotar. Ɔson mbrɛ Osi nye nkorɔfo asorɔtoo kasa. Mma mmbu enyi nngu ndzɛmba nketseabaa do—asomdwee atsenkã a inya ber a etse obi ne dasegye anaa atsenkã konsẽe a inya ayɛ nsanmuyi bɔn ekyir no. Hwehwɛ kyerɛwsɛm no mu fa hu akwan ahorow a Sunsum no dua do dze kasa kyerɛ, bɔ ho mpaa, na kɔ do hwehwɛ akwan horow a ibɛtse Sunsum no ne nkã.
Ebɛnadze nye ehuhuw mfonyin?’ Dɛn ntsi na ɔsɛ dɛ mokwetsir? Ehuhuw mfonyin yɛ ngyinahɔmadze wɔ mfonyin anaa nsɛmfua mu a wɔawen no dɛ obekenyan awardze atsenkã. Ehuhuw mfonyin wɔ mu ahorow pii, a video, mfonyin, mbuukuu, agodzi, na ndwom kã ho. Obotum so ayɛ asɛm anaa mfonyin a anyɛnkofo dze mema hɔn ho. Ndzɛmba a wɔyɛ krɔnkrɔn no—hɛn nyimpadua na awardze atsenkã—ehuhuw mfonyin bu no enyimtsia a ɔmma no obu. Ibotum ekopue ehuhuw mfonyin do a anngye enyim. Sɛ egyee enyim anaa anngye enyim dze, ekopue ehuhuw mfonyin do no, ntsɛmara dan fi ho. Bia ibɛpɛ dɛ enye wawofo anaa panyin bi ewɔ awerɛhyɛmu wɔ no akasa. Agye enyim ara rohwɛ ehuhuw mfonyin no yɛ bɔn na ɔhaw wo tum a edze bɛtse Sunsum no ne nkã. Ɔma w’ahohyɛdo yɛ mberɛw na ɔtoto kwan a edze hu woho na binom. Jesus Christ wɔ tum dɛ Ɔbɔboa wo ma egyina etsia ehuhuw mfonyin na enu woho. Dan bra No hɔ na dan fi sum ho. Wo bishop botum aboa wo ma enya ahoɔdzen na bɔnfakyɛ edua Agyenkwa no mu. Jesus Christ yɛ w’ahoɔdzen!
Hwɛ Ndwom 119:105 (Nyame n’asɛm yɛ kandzea ma m’anan); Amos 5:14 (hom nhwehwɛ papa); Galatiafo 5:22–23 (Sunsum no n’aba); Moroni 7:18–19 (Christ ne kan); Nkyerɛkyerɛ na Ahyɛmudzi 6:23 (Ewuradze kã asomdwee nsɛm); 20:77, 79 (the sacrament mpaabɔ).
Temple Recommend Nsɛmbisa
-
Ewuradze ase dɛ ɔwɔ dɛ “[wɔ]yɛ ndzɛmba nyina wansawansa” wɔ N’enyim (Nkyerɛkyerɛ na Ahyɛmudzi 42:41). Ana ebɔ mbɔdzen dɛ w’adwendwen na wo ndzeyɛɛ bɛyɛ wansawansa su?