Nyankopɔn ne nhyehyɛɛ wɔ hɔ ma wo

Ɔsor Egya nye nhyehyɛɛ no ne dzikamfo. Ɔyɛ wo sunsum n’Egya, na Ɔdɔ wo. Ɔpɛ dɛ ɔma wo Ne nhyira mu kɛsenara—onnyiewiei nkwa a yɛnye No tsena. Sɛ yɛrekã a, Ɔpɛ dɛ ebɛyɛ tse dɛ Ɔno ara yie na itsena ase enyigye mu, wɔ enyimnyam asetsena a Ɔwɔ mu no. Ɔwɔ tum nyina na Onyim adze nyina. Ibotum enya awerɛhyɛmu wɔ No mu, mber mpo a abrabɔ ayɛ dzen no.

Jesus Christ na Ɔma nhyehyɛɛ no otum dzi dwuma. Ansaana Wɔrobɔ wiadze no, Ɔsor Egya saan mu yii No dɛ Ɔmbɛyɛ w’Agyenkwa. Jesus Christ yɛ onyia nnkotoo a Obotum nye wo asan aba w’Egya a ɔwɔ Sor hɔ. Iyi nye siantsir a yɛsan mu yi dɛ yɛbɛka No do no. Biribiara gyina dɛm nsanmuyi no do!

Awar na ebusua yɛ adze tsitsir ma Nyankopɔn ne nhyehyɛɛ. Ekã Nyame N’ebusua ho, na No sunsum mba nyina dua enã na egya mu ba asaase no do. Nyame pɛ dɛ Ne mbabaa na mbabanyin bɔmu tu mpon kɔ onnyiewiei emudziyɛ mu. Mbanyin na mbaa mu baako biara wɔ afamudzi pɛpɛɛpɛr yɛ ma nkabɔmu awar a ɔdɔ wɔ mu. Ebusua abrabɔ wɔ asaase yi do—n’esintɔ ahorow nyina ekyir mpo no—otum dze enyigye kɛse ba. No botae nye dɛ ɔbɔboa wo ma ayɛ ahoboa ma onnyiewiei abrabɔ a yɛnye Nyankopɔn tsena.

Nya onnyiewiei nhumu. Ber biara a ihyia nsɔhwɛ, abagura, anaa nsanmuyi a ɔyɛ dzen no, kaa woho Nyankopɔn ne nhyehyɛɛ no. Hwɛ mbrɛ onnyiewiei nokwar horow a inyim fa Ne nhyehyɛɛ ho no botum aboa wo ma ahwɛ wo haw horow wɔ akwan fofor binom do.

Hwehwɛ Nyankopɔn Ne nsa wɔ w’abrabɔ mu. Hyɛ akwan horow a Nyame dze rihyira wo no nsew. Bia ɔbɛyɛ ayamuyie ndzeyɛɛ bi ofi obi hɔ, asomdwee mber kumabaa, anaa mpaabɔ ho nyiano.

San mu yi dɛ ibedzi Nyame ne nhyehyɛɛ do. Sũa dza wo Ɔsor Egya pɛ dɛ eyɛ. Hwehwɛ No kwankyerɛ ber a ikenkan kyerɛwsɛm, nkɔnhyɛfo atseasefo hɔn nsɛm, ebusua dawurbɔ no, na wo patriarch nhyira. Iyi bɔboa wo ma ayɛ ahoboa asom Ewuradze, dɛ asɛmpasomafo na w’abrabɔ nyina mu. Ma wo som ma Ewuradze, onnyiewiei awar, na mba hɔn ntsetsee nyɛ wo dza ohia papaapa. Yɛ w’afamudze dɛ ibenya ebusua a hɔn enyi gye sesei ber a idzi Jesus Christ ne nkyerɛkyerɛ do.

Ibotum edze akokodur na enyidado wɔ Christ mu ehyia abrabɔ yi mu nsɔhwɛ horow no. Osiandɛ inyim Nyankopɔn n’onnyiewiei nhyehyɛɛ ho nsɛm ntsi, ewɔ edwindadze a ɔsom bo a obotum aboa wo wɔ nkõdze mber mu. Pii wɔ abrabɔ yi mu ɔbor dza osi wɔ awoo na owu ntamu. Inyim wo nyimpa ban ankasa, wo botae, na onyia a ibotum dze Agyenkwa no mboa abɛyɛ. Jesus Christ yɛ w’ahoɔdzen!

Ibotum enya onnyiewiei nkwa ber a eka Jesus Christ do. Ɔbɛma wo tum a abɛyɛ tse dɛ Ɔno ara yie, asan akɔ wo sor awofo hɔ, na enye w’adɔfo atsena ase enyigye mu ara afebɔɔ. Nya awerɛhyɛmu wɔ Jesus Christ mu.