Nyame pɛ dɛ Ɔnye wo kasa

Sunsum no gya wo kɔ Ɔsor Egya na Jesus Christ hɔ. Iyi yɛ Sunsum Krɔnkrɔn no ne dzibew a ohia papaapa. Obekenyan wo so ma enu woho na aka Jesus Christ do ama eetum aagye No Werdambɔ ho nhyira horow. Ber a enu woho no Sunsum no tsew woho na Ɔboa wo ma esesa.

Sunsum Krɔnkrɔn no kasa kyerɛ w’adwen na w’akoma. Nsɛm a ofi Sunsum no hɔ no botum aba w’adwen mu wɔ akwan pii mu—odua nkenyan adwendwen, kɔkɔbɔ, ntseasee pefee, na sunsum mu nkaadze do. Sunsum Krɔnkrɔn no botum edua nkenyan atsenkã do tse dɛ awerɛkyekye, asomdwee, ɔdɔ, ahobrɛadze, enyisɔ, na abotar akasa akyerɛ w’akoma.

“Gye Sunsum Krɔnkrɔn no.” Nsɛm yinom na wɔkãa ber a wosii wo pi dɛ Christ N’Asɔr asɔrba no. Isi dɛn gye Sunsum Krɔnkrɔn no? Ber a eyɛ setsie ma Jesus Christ Ne kyerɛkyerɛ no. Ɔno nye w’ahoɔdzen. Ereka No do no to nsa frɛ Sunsum Krɔnkrɔn no ba w’abrabɔ mu.

Hwehwɛ wo Ɔsor Egya wɔ mpaabɔ mu. Hue w’akoma mu gu No do. Da No ase wɔ nhyira nwanwa a Ɔdze ama wo. Nye No nkyɛ w’enyigye, ɔhaw horow, na nsɛmbisa. Yɛ dzinn na tsie No mbuae a, ɔbɛba tse dɛ asomdwee ho atsenkã, adwendwen wɔ w’adwen mu, anaa nkenyan dɛ yɛ biribi.

Tsie Nyankopɔn Ne ndze wɔ kyerεwsεm no mu. Kyerɛwsɛm no yɛ Nyame ne nsɛm a Ɔdze ma wo! Sũa adze fi mu daa daa na kopue Ne ndze do na nya No dɔ ho atsenkã. Ber a erekenkan no, dwendwen dza bia ɔrekyerɛkyerɛ wo na kyerɛw dza ɔba w’adwen do no to hɔ. Yɛ daa daa su dɛ ibosũa kyerɛwsɛm no—nkankara Mormon Nwoma no—w’abrabɔ nyina mu.

Fa sunsum mu nkenyan a inya no dzi dwuma. Sɛ inya adwen bi anaa nkenyan bi dɛ yɛ ayamuyie adze bi a obehyira obi a, yɛ! Ndzɛmba pa nyina fi Nyame hɔ. Kyerɛ wo Ɔsor Egya dɛ Obotum enya awerɛhyɛmu wɔ wo mu dɛ ibedzi nkenyan a ofi No hɔ no do.

Sunsum Krɔnkrɔn no bɛkyekye wo werɛ na Ɔama wo kwankyerɛ. Wɔfrɛ no Ɔwerɛkyekyefo no. Ɔbɛma wo abamba wɔ nsɔhwɛ ber mu. Ɔbɔboa wo ma ehu dza ibɛkã anaa dza ibɛyɛ. Edze Ne nhyɛdo no, ibotum akã nsonsonee a ɔda dza ɔyɛ nokwar na dza ɔyɛ ator. Obotum aboa wo ma ehu papa a ɔwɔ nkaafo mu na wankasa wo mu. Sunsum no so botum abɔ wo kɔkɔ fa esian ho. Ɔbɛma wo kwankyerɛ aba Jesus hɔ na efi bɔn ho.

Ibotum agye sunsum mu akyɛdze horow. Nyankopɔn dua No Sunsum mu ma Ne mba akyɛdze pii. Binom a wɔabobɔ edzin wɔ kyerɛwsɛm mu no, nyikyerɛ, eregye Jesus Christ edzi, adze kyerɛ, nhumu, na nyansa kã ho. Bɔ mpaa bisa Ɔsor Egya fa sunsum akyɛdze horow a Ɔdze ama wo, na mbrɛ ibesi botu hɔn mpon na mbrɛ Ɔpɛ dɛ edze dzi dwuma boa nkaafo.