Yɛ nkenyan nsanmuyi ahorow

Ma Mbabun Enya Ahoɔdzen mu no, hom bohu Jesus Christ na No nkɔnhyɛfo hɔn nkyerɛkyerɛ. Nokwar yinom reyɛ hom kwankyerɛ no, hom botum ayɛ nkenyan nsanmuyi horow a obehyira hom sesei na mbersantsen nyina mu.

Eyɛ Nyame No sunsum mu dɔba. N’enyigye nhyehyɛɛ nwanwa no ma itum nyin sunsum mu na itu wo nkrabea krɔnkrɔn no no mpon. Ɔsomaa Christ dɛ Ɔmbɛyɛ w’Agyenkwa.

W’Egya a ɔwɔ Sor wɔ awerɛhyɛmu wɔ wo mu. Ɔama wo nhyira pii, a asɛmpa ne mãhyɛ kã ho na ayɛdze na ahyɛmudzi krɔnkrɔn a ɔtakyer wo fam No na ɔdze No tum ba w’abrabɔ mu. Ahyɛmudzi horow yinom dze enyigye na asodzi kã ho ba. Onyim dɛ ibotum ayɛ nsesã wɔ wiadze, na dɛm no hia, wɔ akwan horow pii mu, dɛ ebɛyɛ soronko fi wiadze no ho. Hwehwɛ wo Ɔsor Egya no kwankyerɛ ber a eyɛ nsanmuyi horow. Ɔdze nkenyan bodua Sunsum Krɔnkrɔn no do ehyira wo.

Jesus Christ nye kwan a wɔdze kɔ onnyiewiei nkwa. Ber a edze w’ahotɔ san mu yi dɛ ibɛka Jesus Christ do no, nna ewɔ anamɔnkwan a ogya kɔ onnyiewiei dɛwdzi no do. Ma Jesus Christ nyɛ wo gyinapɛn, wo botan fapem-tsim. Tow w’abrabɔ wɔ Ne nkyerɛkyerɛ do, na fa to wo nsanmu horow ho Ahyɛmu horow a idzi enuma ber, sacrament ber, na wɔ temple mu no nye abo a wɔdze tow fapem a ɔyɛ dzen wɔ Christ mu. Ibɛda ho ara ehyia aperdzi na nsɔhwɛ ahorow, mbom Ɔsor Egya na Agyenkwa no bɔboa wo ma edua ne nyina mu.

Ma Mbabun Enya Ahoɔdzen no botae nnyɛ dɛ ɔbɛma wo nyiano “nyew” anaa “oho” ma gyinabew biara a bia ibehyia no ho. Mbom Ewuradze roto nsa afrɛ wo ma abɔ bra wɔ kwan krɔnkrɔn a ɔkrɔn do—abrabɔ otsim onnyiewiei nokwar horow na Ewuradze ne nhyira a Ɔabɔ ho anohoba no do. Iyi nye No kwan. Kwankyerɛ yi bɛkyerɛkyerɛ wo No kwan ho nsɛm. Ɔkyerɛkyerɛ nokwar a Oeyi akyerɛ no mu. Ma nokwar horow yinom nyɛ wo kwankyerɛ a edze yɛ nsanmuyi horow—nsanmuyi etsitsir horow, tse dɛ iridzi ahyɛmu wɔ temple na erosom asɛmpakã, na daa daa nsanmuyi horow, tse dɛ mbrɛ isi hwɛ nkaafo anaa mbrɛ isi hwer wo mber.

Binom botum aboa wo dze, naaso wo sunsum mu nyinii yɛ ankorankor. Ɔyɛ w’asodzii. Bɔ woho mbɔdzen dɛ ibotu mpon da biara, sie Nyame ne mbrasɛm na dzi w’ahyɛmudzi no nyi, na boa binom ma wɔmbra Agyenkwa no Ne nkyɛn ara yie.

Hwɛ Mosiah 4:29–30 (bɔn n’akwan wonnkotum akan, ntsi otwar dɛ yɛweɔn hɛnho); Helaman 5:12 (tow wo fapem wɔ Christ do); Nkyerɛkyerɛ na Ahyɛmudzi 45:57 (fa Sunsum Krɔnkrɔn no nyɛ wo kwankyerɛfo); 25:13 (suo ahyɛmu a edzi no mu yie).