4.
Jesus Christ bɔboa wo
(Ndwom 147:3).
Jesus Christ yɛ w’ahoɔdzen! Ɔayɛ biribiara a ohia ma wo dɛ ebenya enyigye wɔ abrabɔ yi mu na afebɔɔ. Sɛ isan mu yi Ɔno na N’asɛmpa a, nna irisan mu eyi onnyiewiei dɛwdzi na enyigye.
Ibɔ wo mbɔdzen biara dɛ ebɛyɛ nsanmuyi apapa mpo no, ɔtɔfabi a ibɛyɛ mfomdo. Ibɛyɛ ndzɛmba ahorow a nkyɛ epɛ dɛ annyɛ. Obiara yɛ bi. Sɛ iyi ba a, ɔyɛ mberɛw dɛ ibɛtse abagura nkã anaa ibɔdwen dɛ ana ibotum abɛyɛ papa ɔsɔ enyi a. Mbom asɛm pa bi wɔ hɔ—asɛm nwanwa a, ɔma enyidado! Osiandɛ Nyame dɔ wo ntsi, Ɔsomaa Ne Ba Jesus Christ, a Ɔfaa wo bɔn too Noho do ama eetum enu woho, wɔdze akyɛ wo, na akɔ do etu mpon.
Onnyiewiei Nokwar horow
Jesus Christ bɛhyɛ wo dzen. Ɔbɔboa wo ma asesa w’apɛdze, w’adwendwen, na wo ndzeyɛɛ. Sɛ biribi rehaw wo, isuro, anaa eridzi aper wɔ kwan biara do a, Ɔbɛma wo awerɛkyekye. Ɔbɔboa wo wɔ w’abrabɔ n’afã nyinara mu. Ibotum enya awerɛhyɛmu wɔ No mu.
Nnuho nnyɛ bɔn ho ntsẽa, ɔyɛ kwan a Agyenkwa no ma yenya ahotɔ fi bɔn ho. Ibonu woho kyerɛ dɛ ebɛsakyer―ebɛdan efi bɔn ho na atwe abɛn Nyankopɔn. Ɔkyerɛ dɛ ibotu mpon na enya bɔnfakyɛ. Dɛm nsakyer yi nnyɛ dza osi prɛkõpɛ ara; ɔyɛ dza ɔkɔ do.
Nsa To horow
Ma w’abrabɔ ntsim Jesus Christ do. Hwehwɛ No mboa wɔ dza eyɛ nyinara mu.
Nu woho. Dan bra Ewuradze hɔ a ewɔ pɛ dɛ ibotu mpon. Sɛ ayɛ biribi a omuo a, nokwar mu ara gye to mu wɔ Nyame enyim, na dɛ mbrɛ obehia no, wo bishop na obiara a ahaw no no. Bɔ mbɔdzen dɛ ibesiesie ndzɛmba yie.
Dzi dɛw wɔ akyɛdze no mu dɛ ibɛyɛ adze yie na ayɛ yie. Mpo sɛ ɔnnyɛ mberɛw na ɔgye mber kakra kyɛn dza ibɛpɛ a, mma nngyaa dɛ erobɔ ho mbɔdzen. Kɔ do yɛ ho edwuma na twer Ewuradze. Ɔbɔboa wo wɔ kwan no do anamɔn biara a ebotu no.
Nhyira horow a Wɔabɔ ho Anohoba
Ɔsor Egya dze bɛkyɛ wo na Ɔasa wo yarba ber a enu woho no. Ɔdze asomdwee na enyigye bɛsesa w’afɔdzi. Ɔrennkaa wo bɔn horow no bio. Jesus Christ nye w’ahoɔdzen, na edze N’ahoɔdzen no, wo pɛ dɛ ibesie mbrasɛm no bɔkɔ sor.
Ɔbɛsesa w’akoma na w’abrabɔ. Nkakrankakra, ibenyin na abɛyɛ dɛ mbrɛ Ɔtse no ara yie.
Nsɛmbisa na Nyiano
Mibesi dɛn ehu dɛ Nyame dze akyɛ me? Nyankopɔn abɔ anohoba dɛ Ɔdze hɔn a wonu hɔnho no hɔn bɔn bɛkyɛ hɔn. Sɛ etse awerɛkyekye nkã fi Sunsum no hɔ a, ibotum ehu dɛ Agyenkwa no ɔpom tum no reyɛ edwuma wɔ w’abrabɔ mu.
Ebɛn mber na mihia bishop no mboa dze enu moho? Wo bishop kitsa asɔfodzi nsaafee na ɔwɔ sunsum mu akyɛdze a ɔbɔboa ma enu woho. Ibotum ahwehwɛ no mboa na afotu mber nyina. Sɛ ayɛ mfomdo kɛse, tse dɛ ato ahosie ho mbra no a, kehyia wo bishop. Orunnbu wo fɔ Ɔyɛ Jesus Christ ananmusinyi na ɔbɔboa wo ehu mbrɛ ibesi bonu woho emudzi mu na agye Agyenkwa no N’ayarsa na dzenhyɛ tum.
Morobɔ mbɔdzen enu moho, mbom mokɔ do ara yɛ dɛm mfomdo kor noara bio. Ebɛnadze na ɔsɛ dɛ mehyɛ? Mma mmpa abaw. Dan bra Christ do, na fa wo gyedzi to No do. N’adom dɔɔ sõ. Yɛ no bio hwɛ. Ɔnnka wo nko wɔ wo mbɔdzembɔ dɛ ibotu mpon dabiarada. Aber biara Christ nye wo wɔ hɔ.
Hwɛ Enos 1:6 (wobotum apepa afɔdzi); Mosiah 4:3 (Nyame dua Sunsum Krɔnkrɔn no mu ma ihu dɛ enya bɔnfakyɛ); 26:30 (Agyenkwa no dze bɔn kyɛ mber dodow biara yebonu hɛnho no); Ether 12:27 (Agyenkwa n’adom botum ama dza ɔyɛ mberɛw ahyɛ dzen); Moroni 6:8 (hɔn a wonu hɔn ho no wɔdze hɔn bɔn kyɛ hɔn); 10:32 (hom ndzi mu wɔ Christ mu); Nkyerɛkyerɛ na Ahyɛmudzi 1:32 (Ewuradze dze hɔn a wonu hɔnho hɔn bɔn bɛkyɛ hɔn); 58:42–43 (ɔbɛkã no bɔn no akyerɛ na ɔatwe noho efi ho no kã nnuho ho).
Temple Recommend Nsɛmbisa
-
Ana ewɔ dasegye wɔ Jesus Christ No Werdambɔ no mu na Ne dzibew dɛ w’Agyenkwa na Pomfo?
-
Ana bɔn akɛse wɔ w’abrabɔ mu ohia dɛ enye asɔfodzi tumdzifo siesie a, ɔkã wo nnuhu ho?