Wɔdze Asɔfodzi nsaafee na tumdzi hyira wo

Asɔfodzi nsaafee na tumdzi nyina dua Jesus Christ mu ba. Obiara a okitsa asɔfodzi botum no akyerɛ no tumdzi kwan no asan ebesi No do. Agyenkwa na Ɔkyerɛ nyia ɔbɛgye tumdzi yi na nyia ɔbɛgye asɔfodzi nsaafee. Yɛwɔ awerɛhyɛmu wɔ Ne nyimdzee a odzi mu no.

Jesus Christ dze N’asɔfodzi no asan ananmu aba wɔ hɛn nda yi mu. Ɔno na ɔkyerɛ mbrɛ wobesi dze asɔfodzi no bedzi dwuma. Adam, Moses, Peter, na nkɔnhyɛfo binom so a wɔwɔ abakɔsɛm mber mu no gyee asɔfodzi nsaafee. Hɛn nda yi mu no, Joseph Smith gyee asɔfodzi nsaafee no fii John Onumanyi, Peter, Moses, Elias, na binom so hɔ. President a Odzi Kan na n’Apamfo kuw mba na Asomafo Duebien no hɔn Quorum no kuw mba no kitsa asɔfodzi nsaafee a ɔwɔ wiadze mu ndɛ ne nyinara. Sɔn mu asɔfodzi baanodzifo na quorum presidentfo so kitsa hɔn ɔfrɛ horow ho asɔfodzi nsaafee. Asɔfodzi nsaafee na wɔdze hwɛ Nyame edwuma do. Wɔma ho kwan na wɔma mbanyin na mbaa tum ma wɔdze boa wɔ dɛm edwuma no ne nyɛɛ mu.

Asɔfodzi tumdzi hyira Nyankopɔn ne mba nyina. Osiandɛ asɔfodzi a wɔdze asan ananmu aba no, ebotum agye ayɛdze na enye Nyame edzi ahyɛmu. Ibotum ayɛ adze wɔ Nyame ne dzin mu ber a agye edwuma anaa ɔfrɛ fi obi a ɔwɔ tumdzi hɔ.

Gye Asɔr ɔfrɛ horow na som nokwar mu. Sɛ egye Asɔr ɔfrɛ a, wɔdze tumdzi fi Nyame hɔ nye wo si hɔ dɛ ibɔsom wɔ dɛm dzibew no mu. Ibotum so enya kwankyerɛ fi Nyame hɔ ma wo som no. Ber a isom no, igyina Jesus Christ anan mu. Ma No wo mbɔdzembɔ kɛse papaapa no.

Ma hɔn a Nyame afrɛ hɔn dɛ wɔnsom no tsĩpia. Erema tsĩpia n’ase kyerɛ bor erema wo nsa do ara ber a wɔbɔ dzin bi wɔ Asɔr nhyiamu ase. Ɔkyerɛ dɛ erema abamba na eroboa. Hwehwɛ akwan a edze bɛkyerɛ dɛ ema nkorɔfo a Jesus Christ afrɛ hɔn dɛ wɔnsom wɔ N’Asɔr mu no tsĩpia.

Yɛ edwuma nyina a Asɔr baanodzifo dze ama wo no—a dza ofi wo quorum anaa class presidency kã ho. Wɔwɔ tumdzi fi Nyame hɔ, a wɔdze ma wo wɔ dɛ fayɛ dɛm edwuma no. Wobotum ama wo edwuma dɛ som obi, ma nkorɔfo a wɔba sacrament nhyiamu ase no akwaaba, anaa boa wɔ dwumadzi bi mu. Mbrɛ edwuma no tse biara no, hwɛ no dɛ ɔyɛ kwan a ibotum ayɛ Jesus Christ osuanyi na asom Nyame ne mba.

Ibotum enya awerɛhyɛmu dɛ ayɛdze a egye no Jesus Christ ama ho kwan. Iyi yɛ adze kor a ɔma Jesus Christ N’Asɔr no yɛ soronko no. Nyankopɔn no tum dua asɔfodzi ayɛdze do da edzi.

Ibɛyɛ edwindadze wɔ Ewuradze Ne nsamu. Ber a edze Ewuradze No tumdzi som No na wɔ N’asomfo a wokitsa asɔfodzi nsaafee no hɔn kwankyerɛ ase no, Ɔbɔboa wo ma ehu mbrɛ ibesi bɔsom nkaafo wɔ N’edwuma mu. Jesus Christ yɛ w’ahoɔdzen! Wo som bɔboa wo ma atwe abɛn No yie na ɔdze enyigye abrɛ wo.