Temple ayɛdze na ahyɛmudzi horow ma wo kwan ara yie wɔ Nyame ne nhyira ho

Endowment no yɛ nyimdzee na tum akyɛdze. Temple ayɛdze endowment mu no, efa Agyenkwa no Ne dzin to wo do emudzi mu. Idzi ahyɛmu dɛ ebɛyɛ setsie ama Nyankopɔn, abɔ afɔr dze ayɛ Ne pɛ, dze Jesus Christ asɛmpa no bɔbɔ bra, esie ahosie ho mbra no, edze—anaa—itu—wo nkwa na dza Nyame dze ama wo no nyina ma N’Asɔr. Iyinom nye w’anohoba horow. Nyame bɔ wo anohoba dɛ ɔdze nyimdzee kɛsenara, bambɔ, na kwan wɔ No tum ho behyira wo. Ɔbɔ anohoba so dɛ Ɔbɛma wo onnyiewiei nkwa wɔ ne nkyɛn. Dɛ ɔkã endowment ho no, inya ndzinoa krɔnkrɔn dɛ ibɛhyɛ asɔfodzi ne garment no. Garment no yɛ Jesus Christ ho sɛnkyerɛdze na wo temple ahyɛmu horow ho nkaadze.

Temple nsɔwano no kã awarfo na ebusua ebusua bɔ mu mfesantsen. Temple nsɔwano ayɛdze mu no, ɔwo na wo hokãfo nye Nyame bedzi ahyɛmu na wɔnye hɔnho edzi ahyɛmu. Hom bɔbɔ anohoba dɛ wobedzi nokwar turododo ama Nyankopɔn na homho nkorkor, hom adɔ na wɔasom homho, na wɔabɔ mu ayɛ edwuma esie Nyame ne mbrasɛm no. Iyi nye w’anohoba Nyankopɔn bɔ anohoba dɛ ɔwo na wo hokãfo na hom mba nkitahodzi no obotum etsim afebɔɔ. Ɔbɔ anohoba so dɛ ibotum enye No enya enyimnyam a ɔkrɔn kɛse no wɔ celestial ahenman no mu ber a esie wo ahyɛmudzi no. Nhyira yi wɔfrɛ no nkwagye ntowdo.

Ber biara nya temple recommend. Enye bishop na n’apamfo mu baako nhyia mfa ngye recommend no. Obebisa nsɛmbisa a ɔfa mbrɛ isi dze Ewuradze ne gyinapɛn a wɔdze hɛn Ne fie krɔnkrɔn no robɔ bra. Taa bobɔ nsɛmbisa yinom do. (Ibotum ehu no wɔ kwankyerɛ yi n’abɔekyir no mu.) Sɛ etse ekyir ekyir fi temple bi ho a, ma wo recommend nyɛ wo dɔ ma Ewuradze na wo pisi dɛ edze Ne gyinapɛn no bɔbɔ bra.

Kɔ temple mpen dodow a ibotum. Edze wo temple recommend no, ibotum ahɛn Ewuradze fie na woenuma wo na woesi wo pi ma w’ewuakɔr, ama woeetum eenya nhyira horow no a wɔdze ama wo no. Fa kwan biara a ɔbɛda hɔ a edze bɔkɔ temple no do na kɔ. Hwehwɛ Ewuradze wɔ Ne fie mu. Hwehwɛ No wɔ ayɛdze horow, nsɛnkyerɛdze, na Sunsum a etse no mu. Ibohu No.

Yɛ ahoboa dɛ ibedzi ahyɛmu wɔ Ewuradze Ne fie. Kwan kor a oye koraa a ibotum ayɛ iyi nye ibesie w’enuma ahyɛmu no. Ma ɔnyɛ wo kwankyerɛ no botae kor dɛ ebegye temple ayɛdze horow na ayɛ ahyɛmudzi siefo wo nkwa nda nyina mu. Hyɛ ase sesei dɛ edze mbrasɛm a ibɛbɔ ho anohoba wɔ temple mu dɛ ibedzi do no, bɔ bra: setsie ma Nyankopɔn mbrasɛm, afɔrbɔ, Jesus Christ asɛmpa no, ahosie, na etuhoakyɛ. W’ebusua, bishop, na Asɔr baanodzifo nkaa no botum aboa wo.

Ibotum abɛyɛ tse dɛ Jesus Christ ara yie. Ɔbɔ boa wo ma ayɛ ndzeyɛtsenenee ne kãdofo mapã. Temple ayɛdze na ahyɛmudzi horow no bɛkyerɛkyerɛ wo mbrɛ ibesi bɛhɛn Nyame n’enyim na enye No enya onnyiewiei nkwa.

Nyame no tum bɛyɛ w’akontar. Temple ahyɛmudzi horow no dze anohoba no dɛ Nyame no tum na enyimnyam bɔwɔ wo do. N’abɔfoe bɔhwɛ wo do.

Mber a idzi wɔ temple no bɛma atwe abɛn Jesus Christ na Sunsum Krɔnkrɔn no yie wɔ nkitahodzi mu. Ibɛtse Nyame n’asomdwee na ahomgye. Ebɛtse Ne ndze pefee ara yie. Ɔsorsor bobue ama wo, na ibenya N’akwan ho ntseasee ara yie. Ibenya ahoɔdzen kɛse dze ehyia wo haw horow osiandɛ w’akoma takyer Ne dze ho.