तपाईंहरूको शरीर पवित्र छ

तपाईंहरूको शरीर परमेश्वरको स्वरूपमा छ—ब्रह्माण्डमा सबैभन्दा महिमित प्रभावशाली प्राणी । धर्मशास्त्रहरूले हाम्रो शरीरलाई पवित्र मन्दिरसँग तुलना गर्छन्, एक स्थान जहाँ आत्माले बास गर्न सक्छ । अवश्य पनि तपाईंहरूको शरीर अहिले पूर्ण छैन । परन्तु तपाईंहरूले आफ्नो शरीर हुँदाको अवस्थामा महसुस गर्नुभएका अनुभवहरूले तपाईंहरूलाई एक दिन पूर्ण, पुनरुत्थान भएको, महिमित शरीर प्राप्त गर्नका लागि तयार हुन सहयोग गर्न सक्छ ।

तपाईंहरूको प्राण तपाईंहरूको शरीर र तपाईंहरूको आत्मा मिलेर बनेको छ । यस कारण शारीरिक स्वास्थ्य र आध्यात्मिक स्वास्थ्यको अन्तरसम्बन्ध छ । मुक्तिदाताले तपाईंहरूको शरीरको हेरचाह गर्ने सिद्धान्तहरू सिकाउन अनि शारीरिक र आत्मिक आशीर्वादहरूको प्रतिज्ञा गर्न ज्ञानका वचन प्रकट गर्नुभयो ।

खुसी विवाह र अनन्त परिवारहरू सिर्जना गर्ने यौन भावनाहरू परमेश्वरको योजनाका एक महत्त्वपूर्ण अंश हुन् । यी भावनाहरू पापपूर्ण छैनन्—तिनीहरू पवित्र छन् । यौन भावनाहरू यति पवित्र र शक्तिशाली भएकाले परमेश्वरले तपाईंहरूलाई यी भावनाहरूलाई उहाँको चाहनाअनुसार प्रयोग गर्नका लागि तयार पार्न पवित्रताको आफ्नो नियम दिनुभएको छ । परमेश्वरले विवाहित पुरुष र महिला बीच मात्र यौन क्रियाकिलापलाई अनुमोदन गर्नुहुन्छ भनेर पवित्रताको नियमले बताउँछ । धेरै मानिसहरूले परमेश्वरको नियमलाई बेवास्ता गर्छन् वा खिल्ली उडाउँछन् तर परमप्रभुले हामीलाई उहाँका शिष्य बन्न र उच्च मापदण्डमा जिउन आमन्त्रण गर्नुहुन्छ ।

आफ्नो शरीर—र अरूको शरीर—लाई सम्मानपूर्वक व्यवहार गर्नुहोस् । तपाईंहरूले आफ्नो लुगा, कपालको शैली र स्वरूपका सम्बन्धमा निर्णय लिँदा आफूलाई सोध्नुहोस्, “के मैले मेरो शरीरलाई परमेश्वरको पवित्र उपहारका रूपमा सम्मान गर्दै छु ?” स्वर्गका पिताले केवल भौतिक शरीरहरूका रूपमा मात्रै नभई दैवी गन्तव्य भएका उहाँका प्रिय सन्तानहरूका रूपमा पनि हामीले वास्तवमा नै हामी को हौँ: भनेर एकअर्कालाई अवलोकन गर्न सक्षम बनौँ भन्ने चाहनुहुन्छ । अनन्त भविष्य भएका परमेश्वरका सन्ततिका रूपमा तपाईंहरू को हुनुहुन्छ भन्ने विषयको सट्टा अनुपयुक्त रूपमा तपाईंहरूको भौतिक शरीरमा जोड दिने वा ध्यान दिने शैलीहरू परित्याग गर्नुहोस् । नैतिक स्वच्छता र परमेश्वरप्रतिको प्रेमले तपाईंहरूका छनोटहरूलाई मार्गदर्शन गर्न दिनुहोस् । आफ्नो परिवारबाट सल्लाह लिनुहोस् ।

त्यसलाई हानि पुर्‍याउने वा क्षति पुर्‍याउने कार्यहरू नगरी त्यस्ता कार्यहरू गर्नुहोस् जसले तपाईंहरूको शरीरलाई मजबुत बनाउने छ । परमेश्वरले प्रदान गर्नुभएका धेरै असल वस्तुहरूको कृतज्ञताका साथ आनन्द लिनुहोस् । स्मरण रहोस् कि रक्सी, सुर्ती, कफी, चिया र अन्य हानिकारक वस्तु र पदार्थहरू तपाईंहरूको शरीर वा तपाईंहरूको आत्माका लागि होइनन् । डाक्टरदारा स्वीकृत औषधि जस्ता उपयोगी पदार्थहरू पनि सही तरिकाले प्रयोग नगरिएमा विनाशकारी हुन सक्छन् ।

यौन र यौन भावनाहरूलाई पवित्र राख्नुहोस् । तिनीहरूलाई उपहास वा मनोरञ्जनका विषय बनाउनु हुँदैन । पुरुष र महिला बीचको विवाह बाहेक, अर्को व्यक्तिको शरीरको निजी, पवित्र अङ्गहरू छुनु गलत हो, चाहे त्यो लुगामाथि नै किन नहोस् । तपाईंहरूले के गर्नुहुन्छ, के पढ्नुहुन्छ, के सुन्नुहुन्छ, के सोच्नुहुन्छ, के पोस्ट गर्नुहुन्छ वा के सन्देस पठाउनुहुन्छ भन्ने सम्बन्धमा आफ्ना छनोटहरूमा अरूमा वा आफूमा जानाजानी कामुक भावना जगाउने कुनै पनि कार्य परित्याग गर्नुहोस् । यसले कुनै पनि रूपमा अश्लील साहित्य समावेश गर्छ । यदि तपाईंले परिस्थिति वा क्रियाकलापहरूले प्रलोभनहरूलाई मजबुत बनाउँछ भन्ने महसुस गर्नुभयो भने त्यसलाई परित्याग गर्नुहोस् । यी परिस्थिति र क्रियाकिलापहरू के हुन् भनेर तपाईंहरूलाई जानकारी छ । अनि यदि तपाईंहरू निश्चित हुनुहुन्न भने यसलाई बुझ्नका लागि आत्मा, तपाईंहरूको परिवार र तपाईंहरूका अगुवाहरूले तपाईंहरूलाई सहयोग गर्न सक्नुहुन्छ । तपाईंहरू जीवन सिर्जना गर्ने पवित्र शक्तिलाई सम्मान र आदर गर्नुहुन्छ भनेर स्वर्गमा रहनुहुने तपाईंहरूका पितालाई देखाउनुहोस् ।

तपाईंहरूले आफ्नो व्यवहार, स्वरूप र पहिरनद्वारा आफ्नो शरीरलाई सम्मान गर्दा आफू र अरूका लागि तपाईंहरूको सम्मान वृद्धि हुने छ ।

ज्ञानका वचन पालना गर्नेहरूलाई परमप्रभुले ज्ञानको ठूलो खजानाको प्रतिज्ञा गर्नुभएको छ । लतबाट मुक्त स्वस्थ शरीरले व्यक्तिगत प्रकाश प्राप्त गर्ने, स्पष्ट रूपमा सोच्ने र परमप्रभुको सेवा गर्ने तपाईंहरूको क्षमतालाई पनि वृद्धि गर्छ ।

पवित्रताको नियम पालना गर्नाले परमेश्वरको अनुमोदन र व्यक्तिगत आत्मिक शक्ति प्राप्त हुन्छ । यसले तपाईंहरू र तपाईंहरूका भावी परिवारको सुरक्षा गर्छ । जब तपाईंहरू विवाहित हुनुहुन्छ, यो नियमले तपाईंहरूको विवाहमा अझै बढी प्रेम, विश्वास र एकता ल्याउने छ । यो नियम पालना गर्नाले तपाईंहरूलाई अनन्त रूपमा प्रगति गर्न र तपाईंहरूका स्वर्गका पिता जस्तै बन्न सम्भव हुने छ । येशू ख्रीष्टका शिष्यका रूपमा जीवन बिताउँदा तपाईंहरूको आत्मविश्वास वृद्धि हुने छ ।