परमेश्वरको योजना तपाईंहरूका लागि हो

स्वर्गका पिता यस योजनाका लेखक हुनुहुन्छ । उहाँ तपाईंहरूका आत्मिक पिता हुनुहुन्छ र उहाँले तपाईंहरूलाई प्रेम गर्नुहुन्छ । उहाँ तपाईंहरूलाई—उहाँसँगको अनन्त जीवन, उहाँको सबैभन्दा महान् आशीर्वाद दिन चाहनुहुन्छ । अर्को शब्दमा, तपाईंहरू उहाँ जस्तै बन्नुहोस् र उहाँले जिउनुभएको प्रसन्नदायी, गौरवशाली जीवन बिताउनुहोस् भनेर उहाँ चाहनुहुन्छ । उहाँसँग सबै शक्ति छ र उहाँलाई सबै विषयहरूको ज्ञान छ । जीवन कठिन हुँदा पनि तपाईंहरू उहाँमाथि भरोसा गर्न सक्नुहुन्छ ।

येशू ख्रीष्टले योजनालाई सम्भव बनाउनुहुन्छ । संसार सृष्टि हुनुभन्दापूर्व स्वर्गका पिताले उहाँलाई तपाईंहरूका मुक्तिदाता हुन छनोट गर्नुभयो । येशू ख्रीष्ट मात्रै एक हुनुहुन्छ जसले तपाईंहरूलाई स्वर्गमा रहनुहुने तपाईंहरूका पिताकहाँ फिर्ता ल्याउन सक्नुहुन्छ । यसैले हामी उहाँलाई अनुसरण गर्ने छनोट गर्छौँ । सबै त्यो छनोटमा निर्भर गर्छ !

विवाह र परिवार परमेश्वरको योजनाका लागि आवश्यक छन् । तपाईंहरू परमेश्वरको परिवारको अंश हुनुहुन्छ र उहाँका सबै आत्मिक सन्ततिहरू आमा र बुबाद्वारा पृथ्वीमा आउँछन् । परमेश्वर आफ्ना छोरीहरू र छोराहरू अनन्त पूर्णतातर्फ सँगै प्रगति गरून् भन्ने चाहनुहुन्छ । पुरुष र महिला दुबैले प्रिय, एकताबद्ध विवाहमा समान रूपमा योगदान पुर्‍याउँछन् । पारिवारिक जीवनले—यसका सबै अपूर्णताहरू भए तापनि—यहाँ पृथ्वीमा महान् प्रसन्नता ल्याउन सक्छ । यो तपाईंहरूलाई परमेश्वरसँगको अनन्त जीवनका लागि तयार पार्न सहयोग गर्नका लागि हो ।

अनन्त दृष्टिकोण राख्नुहोस् । जब तपाईंहरू प्रलोभनहरू, परीक्षाहरू, निराशाहरू वा कठिन छनोटहरूको सामना गर्नुहुन्छ, परमेश्वरको योजनाका सम्बन्धमा आफूलाई पुनस्मरण गराउनुहोस् । उहाँको योजनाका सम्बन्धमा तपाईंहरूले जान्नुहुने अनन्त सत्यहरूले तपाईंहरूलाई आफ्ना चुनौतीहरूलाई भिन्न तरिकाले अवलोकन गर्नका लागि कसरी सहयोग गर्न सक्छ हेर्नुहोस् ।

आफ्नो जीवनमा परमेश्वरको प्रभाव खोज्नुहोस् । परमेश्वरले तपाईंहरूलाई आशीर्वाद दिइरहनुभएका तरिकाहरू स्मरण गर्नुहोस् । यो कसैबाट प्राप्त भएको कृपालु कार्य, शान्तिको क्षण वा प्रार्थनाको जवाफ हुन सक्छ ।

परमेश्वरको योजना पालना गर्ने छनोट गर्नुहोस् । तपाईंहरूका स्वर्गका पिताले तपाईंहरूलाई के गरून् भनेर चाहनुहुन्छ भन्ने सम्बन्धमा बुझ्नुहोस् । धर्मशास्त्र, जीवित अगमवक्ताहरूका वचनहरू, पारिवारिक घोषणा र तपाईंहरूको कुलपिताको आशीर्वाद अध्ययन गर्दा उहाँको मार्गदर्शन खोज्नुहोस् । यसले तपाईंहरूलाई सुसमाचार प्रचारकका रूपमा र तपाईंहरूको जीवनभर परमप्रभुको सेवा गर्नका लागि तयार हुन सहयोग गर्ने छ । परमप्रभुको सेवा, अनन्त विवाह र सन्ततिहरू हुर्काउनुलाई उच्च प्राथमिकता दिनुहोस् । येशू ख्रीष्टको शिक्षा पालना गरेर अहिले नै सुखी परिवारका लागि आफ्नो भूमिका निर्वाह गर्नुहोस् ।

ख्रीष्टमा साहस र आशाका साथ तपाईंहरूले जीवनका परीक्षाहरूको सामना गर्न सक्नुहुन्छ । किनकि तपाईंहरूलाई परमेश्वरको अनन्त योजनाका सम्बन्धमा जानकारी छ, तपाईंहरूसँग एउटा बहुमूल्य उपकरण छ जसले तपाईंहरूलाई कठिन समयमा सहयोग गर्न सक्छ । जन्म र मृत्युको बीचमा हुने कार्यहरू भन्दा जीवनमा धेरै महत्वपूर्ण कार्यहरू छन् भनेर तपाईंहरूलाई जानकारी छ । तपाईंहरू वास्तवमा को हुनुहुन्छ, तपाईंहरूको उद्देश्य के हो र मुक्तिदाताको सहयोगले तपाईंहरू को बन्न सक्नुहुन्छ भनेर तपाईंहरूलाई जानकारी छ । येशू ख्रीष्ट तपाईंहरूको समार्थ्य हुनुहुन्छ !

येशू ख्रीष्टलाई अनुसरण गर्दा तपाईंहरूले अनन्त जीवन प्राप्त गर्न सक्नुहुन्छ । उहाँले तपाईंहरूलाई उहाँ जस्तै बन्न, आफ्ना स्वर्गका मातापिताकहाँ फर्कन र आफ्ना प्रियजनहरूसँगै अनन्त रूपमा प्रसन्नतामा जिउन शक्ति दिनुहुने छ । येशू ख्रीष्टमा भरोसा गर्नुहोस् ।