येशू ख्रीष्टले तपाईंहरूलाई सहयोग गर्नुहुने छ

येशू ख्रीष्टले तपाईंहरूलाई मजबुत बनाउनुहुने छ । तपाईंहरूको चाहना, विचार र कार्यहरू परिवर्तन गर्नका लागि उहाँले तपाईंहरूलाई सहयोग गर्नुहुने छ । जब तपाईंहरू चिन्तित, भयभीत भएको वा कुनै पनि तरिकाले सङ्घर्ष गरिरहनुभएको हुन्छ, उहाँले तपाईंहरूलाई सान्त्वना दिनुहुने छ । तपाईंहरूको जीवनका सबै पक्षहरूमा उहाँले तपाईंहरूलाई सहयोग गर्नुहुने छ । तपाईंहरू उहाँमाथि भरोसा गर्न सक्नुहुन्छ ।

पश्चात्ताप पापका लागि दण्ड होइन; यो मुक्तिदाताले हामीलाई पापबाट मुक्त गर्ने तरिका हो । पश्चात्ताप गर्नु भनेको परिवर्तन हुनु—पापबाट टाढा जानु र परमेश्वरतर्फ फर्कनु हो । यसको अर्थ सुधार गर्नु र क्षमा प्राप्त गर्नु हो । यस प्रकारको परिवर्तन एक पटकको घटना होइन; यो निरन्तर प्रक्रिया हो ।

येशू ख्रीष्टलाई आफ्नो जीवनको केन्द्रबिन्दु बनाउनुहोस् । तपाईंहरूले गर्ने सबै कार्यमा उहाँको सहयोग खोज्नुहोस् ।

पश्चात्ताप गर्नुहोस् । सुधार गर्ने चाहनाका साथ परमप्रभुतर्फ फर्कनुहोस् । जब तपाईंहरूले केही गलत गर्नुभएको छ, परमेश्वरका अगाडि र आवश्यकताअनुसार तपाईंहरूका बिशप र तपाईंहरूले हानि गर्नुभएका जो कोहीसामु पनि इमानदारितापूर्वक स्वीकार गर्नुहोस् । सम्भव भएसम्म सबै कार्यहरू सही बनाउनका लागि कार्य गर्नुहोस् ।

राम्रो गर्न र राम्रो बन्नका लागि उपहारमा आनन्दित हुनुहोस् । सजिलो नभए पनि र तपाईंहरूले अपेक्षा गरेको भन्दा बढी समय लागे तापनि, प्रयास गर्न कहिल्यै नछोड्नुहोस् । परमप्रभुमा कार्य गरिरहनुहोस् र भरोसा राख्नुहोस् । उहाँले तपाईंहरूलाई मार्गका हरेक पाइलामा सहयोग गर्नुहुने छ ।

पश्चात्ताप गर्दा स्वर्गका पिताले तपाईंहरूलाई क्षमा गर्नुहुने छ र चङ्गाइ प्रदान गर्नुहुने छ । उहाँले तपाईंहरूको दोषलाई शान्ति र प्रसन्नतामा परिवर्तन गर्नुहुने छ । उहाँले तपाईंहरूका पापहरूलाई पुनः कहिल्यै सम्झनुहुने छैन । येशू ख्रीष्ट तपाईंहरूको सामर्थ्य हुनुहुन्छ र उहाँको शक्तिले, उहाँका आज्ञाहरू पालना गर्ने तपाईंहरूको चाहना वृद्धि हुने छ ।

उहाँले तपाईंहरूको हृदय र तपाईंहरूको जीवन परिवर्तन गर्नुहुने छ । बिस्तारै, तपाईंहरूको उन्नति हुँदै जाने छ र उहाँ जस्तै बन्नुहुने छ ।