मन्दिरका विधि र करारहरूले तपाईंहरूलाई परमेश्वरका आशीर्वादमा महान् पहुँच प्रदान गर्छ

अभिदान ज्ञान र शक्तिको उपहार हो । मन्दिरका अभिदानका विधिहरूमा तपाईंहरूले मुक्तिदाताको नामलाई अझै पूर्ण रूपमा लिनुहुन्छ । तपाईंहरू परमेश्वरको आज्ञा पालना गर्ने, उहाँको चाहना पूरा गर्न बलिदान दिने, येशू ख्रीष्टको सुसमाचार पालना गर्ने, पवित्रताको नियम पालना गर्ने र आफ्नो जीवन र परमेश्वरले तपाईंहरूलाई दिनुभएका सबै चीज उहाँको चर्चलाई अर्पण गर्ने—वा समर्पित गर्ने—प्रतिज्ञा गर्नुहुन्छ । यी तपाईंहरूका प्रतिज्ञाहरू हुन् । परमेश्वरले तपाईंहरूलाई अझै बढी ज्ञान, सुरक्षा र उहाँको शक्तिमा पहुँच प्रदान गर्ने प्रतिज्ञा गर्नुहुन्छ । उहाँले तपाईंहरूलाई उहाँसँग अनन्त जीवन दिने प्रतिज्ञा पनि गर्नुहुन्छ । अभिदानको अंशका रूपमा तपाईंहरूले पवित्र पादरित्वको वस्त्र लगाउने पवित्र विशेषाधिकार प्राप्त गर्नुहुन्छ । वस्त्र येशू ख्रीष्टको प्रतीक हो र तपाईंहरूलाई मन्दिरका करारहरूको स्मरण गराउँछ ।

मन्दिरमा बाँधिने कार्यले दम्पत्तिहरू र परिवारहरूलाई अनन्तकालका लागि एकताबद्ध गर्छ । मन्दिरको बाँधिने कार्यको विधिमा, तपाईंहरू र तपाईंहरूका जीवनसाथीले परमेश्वर र एकअर्कासँग करार गर्नुहुने छ । तपाईंहरू परमेश्वर र एकअर्काप्रति पूर्ण रूपमा इमानदार रहने, एकअर्कालाई प्रेम गर्ने र सेवा गर्ने अनि परमेश्वरका विधिहरू पालना गर्नका लागि सँगै कार्य गर्ने प्रतिज्ञा गर्नुहुने छ । यो तपाईंहरूको प्रतिज्ञा हो । परमेश्वरले तपाईंहरूका जीवनसाथी र तपाईंहरूका छोराछोरीहरूसँगको तपाईंहरूको सम्बन्ध सदैव रहन सक्छ भनी प्रतिज्ञा गर्नुहुन्छ । तपाईंहरूले आफ्नो करारहरू पालना गर्दा सेलेस्टियल अधिराज्यमा उहाँसँग सर्वोच्च महिमा प्राप्त गर्न सक्नुहुन्छ भनेर पनि उहाँले प्रतिज्ञा गर्नुहुन्छ । यो आशीर्वादलाई उत्कर्ष भनिन्छ ।

सदैव मन्दिर अनुमति-पत्र राख्नुहोस् । यो प्राप्त गर्नका लागि आफ्ना बिशपरिकका सदस्यसँग भेट्नुहोस् । उहाँले तपाईंहरूलाई उहाँको पवित्र गृहमा प्रवेश गर्नका लागि परमप्रभुको स्तरहरूअनुरुप कसरी जिइरहेको हुनुहुन्छ भन्ने सम्बन्धमा प्रश्नहरू सोध्नुहुने छ । यी प्रश्नहरूको बारम्बार समीक्षा गर्नुहोस् । (तपाईंहरूले तिनीहरूलाई यस मार्गदर्शनको परिशिष्टमा भेट्टाउन सक्नुहुन्छ ।) यदि तपाईंहरू मन्दिरबाट टाढा बस्नुहुन्छ भने पनि, तपाईंहरूको अनुमति-पत्र परमप्रभुप्रतिको तपाईंहरूको प्रेम र उहाँका स्तरहरू पालना गर्ने तपाईंहरूको प्रतिबद्धताको प्रतीक बनाउनुहोस् ।

सम्भव भएसम्म धेरै पटक मन्दिरमा जानुहोस् । तपाईंहरूको मन्दिर अनुमति-पत्रका साथ, तपाईंहरू परमप्रभुको गृहमा प्रवेश गर्न सक्नुहुन्छ र आफ्ना पुर्खाहरूका लागि बप्तिस्मा लिन सक्नुहुन्छ र प्रमाणित गर्न सक्नुहुन्छ ताकि उहाँहरूले पनि तपाईंहरूलाई दिइएका आशीर्वाद प्राप्त गर्न सक्नुहुन्छ । मन्दिरमा हुने हरेक अवसरको लाभ उठाउनुहोस् । उहाँको गृहमा परमप्रभुलाई खोज्नुहोस् । उहाँलाई विधिहरू, प्रतीकहरू र तपाईंहरूले महसुस गर्नुभएको आत्मामा खोज्नुहोस् । तपाईंहरूले उहाँलाई भेट्टाउनुहुने छ ।

परमप्रभुको गृहमा करारहरू निर्माण गर्न तयार हुनुहोस् । यसो गर्ने सबैभन्दा सही तरिका भनेको आफ्नो बप्तिस्माका करार पालना गर्नु हो । मन्दिरका विधिहरू प्राप्त गर्नु र आजीवन करार पालना गर्नुलाई आफ्नो मार्गदर्शक लक्ष्यहरूमध्येको एक बनाउनुहोस् । मन्दिरमा पालना गर्ने प्रतिज्ञा गर्नुभएका विधिहरू: परमेश्वरका आज्ञाहरू, बलिदान, येशू ख्रीष्टको सुसमाचार, पवित्रता र पवित्रीकरण अब जिउन सुरु गर्नुहोस् । तपाईंहरूको परिवार, बिशप र चर्चका अन्य अगुवाहरूले तपाईंहरूलाई सहयोग गर्न सक्नुहुन्छ ।

तपाईंहरू येशू ख्रीष्ट जस्तै बन्न सक्नुहुन्छ । धार्मिकताको ठूलो अनुयायी बन्नका लागि उहाँले तपाईंहरूलाई सहयोग गर्नुहुने छ । मन्दिरका विधिहरू र करारहरूले तपाईंहरूलाई परमेश्वरको उपस्थितिमा कसरी प्रवेश गर्ने र उहाँसँग अनन्त जीवन कसरी प्राप्त गर्ने भनेर सिकाउने छन् ।

तपाईंहरू परमेश्वरको शक्तिले सुसज्जित हुनुहुने छ । परमेश्वरको शक्ति र महिमा तपाईंहरूमाथि हुने छ भन्ने प्रतिज्ञासहित मन्दिरका करारहरू आउँछन् । उहाँका स्वर्गदूतहरूले तपाईंहरूलाई हेरचाह गर्ने छन् ।

मन्दिरमा बिताएको समयले तपाईंहरूलाई येशू ख्रीष्ट र पवित्र आत्मासँग अझै नजिकबाट जोड्ने छ । तपाईंहरूले परमेश्वरको शान्ति र आराम महसुस गर्नुहुने छ । तपाईंहरूले उहाँको वाणी अझै स्पष्ट रूपमा सुन्नुहुने छ । स्वर्ग तपाईंहरूका लागि खुल्ने छ र तपाईंहरूले उहाँका मार्गहरू राम्रोसँग बुझ्नुहुने छ । तपाईंहरूको हृदय उहाँसँग जोडिएको हुनाले तपाईंहरूसँग आफ्ना चुनौतीहरूको सामना गर्ने ठूलो शक्ति हुने छ ।