परमेश्वरलाई प्रेम गर्नुहोस्, आफ्नो छिमेकीलाई प्रेम गर्नुहोस्

परमेश्वरले तपाईंहरूलाई प्रेम गर्नुहुन्छ । उहाँ तपाईंहरूका पिता हुनुहुन्छ । उहाँको पूर्ण प्रेमले उहाँलाई प्रेम गर्नका लागि तपाईंहरूलाई प्रेरित गर्न सक्छ । जब स्वर्गका पिताप्रतिको तपाईंहरूको प्रेमले तपाईंहरूको जीवनमा सबैभन्दा महत्त्वपूर्ण प्रभाव पार्छ, धेरै निर्णयहरू सहज हुन्छन् ।

सबैभन्दा महान् दुई आज्ञाहरू परमेश्वरलाई प्रेम गर्नु र आफ्ना छिमेकीलाई प्रेम गर्नु हुन् । अनि तपाईंहरूका छिमेकी को हुन् ? हरेक व्यक्ति ! धर्मशास्त्रहरूमा र अगमवक्ताहरूद्वारा सिकाइएका अन्य सबै विषयमा यी दुई आज्ञाहरूसँगै जोडिएका छन् ।

सबै मानिसहरू तपाईंहरूका दाजुभाइ दिदीबहिनी हुन्—अवश्य पनि, तपाईंहरूभन्दा फरक वा तपाईंहरूसँग असहमत व्यक्तिहरूसहित । स्वर्गका पिताले आफ्ना सन्ततिहरूले एकअर्कालाई प्रेम गरेको चाहनुहुन्छ । जब तपाईंहरू उहाँका सन्ततिहरूको सेवा गर्नुहुन्छ, तपाईंहरूले उहाँको सेवा गर्दै हुनुहुन्छ ।

परमेश्वरका आज्ञाहरू पालना गरेर उहाँप्रति प्रेम प्रकट गर्नुहोस् । उदाहरणका लागि, विश्रामको दिनलाई पवित्र राखेर, जसमा आस्थापूर्वक प्रभुभोजको तयारी र ग्रहण गर्ने समावेश छ, तपाईंहरू हप्ताको एक दिन उहाँलाई समर्पित गर्न इच्छुक हुनुहुन्छ भनेर तपाईंहरूले परमेश्वरलाई देखाउनुहुन्छ । जब तपाईंहरू उपवास बस्नुहुन्छ र दशांश र भेटीहरू तिर्नुहुन्छ, तपाईंहरूका लागि उहाँको कार्य भौतिक वस्तुहरू भन्दा बढी महत्त्वपूर्ण छ भनेर तपाईंहरूले परमेश्वरलाई देखाउनुहुन्छ । जब तपाईंहरूले व्यर्थ वा आकस्मिक तरिकाले नभई परमेश्वर र ख्रीष्टको नाम श्रद्धाका साथ प्रयोग गर्नुहुन्छ, तपाईंहरू उहाँहरूले तपाईंहरूका लागि गरेका सबै कार्यका लागि कृतज्ञ हुनुहुन्छ भनेर तपाईंहरूले देखाउनुहुन्छ ।

सबैलाई परमेश्वरका सन्ततिका रूपमा व्यवहार गर्नुहोस् । येशू ख्रीष्टका शिष्यका रूपमा, तपाईंहरू सबै जाति, धर्म र अन्य कुनै पनि समूहका मानिसहरू—विशेष गरी जो कहिलेकाहीँ हानिकारक शब्दहरू र कार्यहरूको शिकार बन्छन् तिनीहरूलाई प्रेम र सम्मानका साथ व्यवहार गर्नका लागि अगुवाइ गर्न सक्नुहुन्छ। एक्लो, पृथक वा असहाय महसुस गर्न सक्नेहरूलाई सम्पर्क गर्नुहोस् । तपाईंहरूद्वारा स्वर्गका पिताको प्रेम महसुस गर्न उहाँहरूलाई सहयोग गर्नुहोस् । उहाँले तपाईंहरूलाई दिनुभएका आशीर्वाद उहाँहरूसँग बाँड्नुहोस् र उहाँहरूलाई येशू ख्रीष्टलाई अनुसरण गर्न आमन्त्रण गर्नुहोस् ।

तपाईंहरूको भाषाले परमेश्वर र अरूप्रतिको तपाईंहरूको प्रेमलाई प्रतिबिम्बित गर्छ भनी सुनिश्चित गर्नुहोस्—तपाईंहरूले व्यक्तिगत रूपमा वा भर्चुअल रूपमा वार्तालाप गर्दै हुनुहुन्छ भने पनि । उत्थान गर्ने विषयहरू भन्नुहोस्—ठट्टामा गरिने कुनै पनि चीज विभाजनकारी, हानिकारक वा आपत्तिजनक नहुन सक्छ । तपाईंहरूका शब्दहरू प्रभावशाली हुन सक्छन् । तिनीहरूलाई सही कार्यका लागि प्रभावशाली हुन दिनुहोस् ।

आफ्नो परिवारलाई प्रेम प्रकट गर्नुहोस् । परमेश्वरका सबै सन्ततिहरूलाई प्रेम गर्ने कार्य घरबाट सुरु हुन्छ । आफ्नो घरलाई यस्तो स्थान बनाउन आफ्नो भूमिका निर्वाह गर्नुहोस् जहाँ सबैले मुक्तिदाताको प्रेम महसुस गर्न सक्नुहुन्छ ।

उहाँका आज्ञाहरू पालना गर्दा र उहाँसँगका आफ्ना करारहरू पालना गरी तपाईंहरूले आफ्नो प्रेम व्यक्त गर्दा परमेश्वरसँगको तपाईंहरूको सम्बन्ध गहिरो बन्ने छ ।

तपाईंहरूले ख्रीष्टको जस्तै सेवाद्वारा आफ्नो प्रेम व्यक्त गर्दा अरूसँगको तपाईंहरूको सम्बन्ध गहिरो हुने छ । संसारलाई अझै प्रिय स्थान बनाउनमा तपाईंहरूले प्रसन्नता भेट्टाउनुहुने छ ।