परमेश्वरको प्रकाशमा हिँड्नुहोस्

तपाईंहरूले पवित्र आत्मालाई निरन्तरको साथी बनाउन सक्नुहुन्छ । जब तपाईंहरूलाई चर्चको सदस्यका रूपमा प्रमाणित गरियो, तपाईंहरूलाई “पवित्र आत्मा प्राप्त गर्न”का लागि आमन्त्रण गरियो । आत्मालाई तपाईंहरूको निरन्तर साथीका रूपमा प्राप्त गर्ने अवसर परमेश्वरले तपाईंहरूलाई दिनुभएको सबैभन्दा महान् उपहारहरूमध्येको एक हो ।

सही छनोट गर्नाले आत्मालाई महसुस गर्ने तपाईंहरूको क्षमतामा सुधार हुन्छ । यस संसारमा धेरै असल र हितकर वस्तुहरू छन् । जसरी तपाईंहरूको शरीर तपाईंहरूले खाने र पेय पदार्थले प्रभावित हुन्छ, त्यसरी नै तपाईंहरूको मस्तिष्क र आत्मा तपाईंहरूले पढ्ने, हेर्ने र सुन्ने विषयले गहन रूपमा प्रभावित हुन्छन् ।

प्रत्येक दिन परमप्रभुका लागि समय निकाल्नुहोस् । उहाँका सम्बन्धमा सिक्नुहोस् । सदैव उहाँको स्मरण गर्नुहोस् । आफ्ना स्वर्गका पितालाई प्रार्थना गर्नुहोस् । पवित्र धर्मशास्त्रहरू र जीवित अगमवक्ताहरूका वचनहरू अध्ययन गर्नुहोस् । त्यसपछि तपाईंहरूले सिकेका विषयअनुसार जिउने प्रयास गर्नुहोस् ।

आत्मालाई उत्थान गर्ने, प्रेरणा दिने र आमन्त्रण गर्ने विषय खोज्नुहोस् । के हेर्ने, पढ्ने, सुन्ने वा सहभागी हुने भन्ने सम्बन्धमा छनोट गर्दा, यसले तपाईंहरूलाई कस्तो महसुस गराउँछ भन्ने सम्बन्ध सोच्नुहोस् । के यसले असल विचारहरूलाई आमन्त्रण गर्छ ? पवित्र विषयहरूको खिल्ली उडाउने वा अनैतिक कुनै पनि विषयवस्तुबाट टाढा रहनुहोस् । हिंसा, मदिरा र हानिकारक लागूपदार्थ जस्ता आत्माप्रति तपाईंहरूको निर्णय वा संवेदनशीलतालाई कमजोर बनाउने कुनै पनि वस्तु सेवन नगर्नुहोस् । भिडियो वा खेल बन्द गर्ने, चलचित्र वा नृत्यबाट बाहिर निस्कने, सङ्गीत परिवर्तन गर्ने वा आत्मासँग मेल नखाने कुनै पनि विषयबाट टाढा रहने साहस राख्नुहोस् ।

उत्थानका लागि सामाजिक सञ्जाल प्रयोग गर्नुहोस् । सामाजिक सञ्जाल एक प्रभावशाली सञ्चार उपकरण हुन सक्छ । यदि तपाईंहरूले यसलाई प्रयोग गर्नुहुन्छ भने, प्रकाश, आस्था र सत्यमा ध्यान केन्द्रित गर्नुहोस् । आफ्नो जीवनलाई अरू मानिसहरूले अनुभव गरिरहेको जस्तो देखिने विषयसँग तुलना नगर्नुहोस् । तपाईंहरूको मूल्य सामाजिक सञ्जालबाट नभई स्वर्गका मातापिताका सन्तति हुनुबाट आउँछ भनेर स्मरण रहोस् ।

हितकर अनुभवहरू र वास्तविक, दिगा सम्बन्धहरू खोज्नुहोस् । तपाईंहरूको प्रविधि र मिडियाको प्रयोगले परिवार र साथीहरूसँग व्यक्तिगत समय बिताउने कार्यलाई प्रतिस्थापन गर्दैन भन्ने विषयमा होसियार रहनुहोस् । सामाजिक सञ्जाल र अन्य प्रविधिले धेरै महत्वपूर्ण प्रतिफल नदिई तपाईंहरूको अधिकांश समय लिन सक्छन् । भर्चुअल संसारबाट विश्राम लिनुहोस् र वास्तविक जीवनका मानिसहरूसँग जोडिनुहोस् ।

तपाईंहरूसँग सदैव आत्मा हुन सक्छ । यो प्रतिज्ञा तपाईंले हरेक पटक प्रभुभोज ग्रहण गर्दा तपाईंले गर्ने करारको अंश हो । आत्माले तपाईंहरूलाई स्वर्गका पिता र येशू ख्रीष्टको गवाही दिने छ । उसले तपाईंहरूलाई सान्त्वना दिने छ, मार्गदर्शन गर्ने छ, चेतावनी दिने छ र पवित्र पार्ने छ । उसले तपाईंहरूलाई सत्य पहिचान गर्न र संसारका असल वस्तु देख्न सहयोग गर्ने छ ।