Bol betik a rengum er a Dios, el betik a rengum er a ngar bita er kau

A Dios a betik a rengul er kau. Ngii a Demam. Sel cherrungel el beltkil a rengul a sebechel meklemesau el mo oubeltikelreng el mo er Ngii. Sel sekum a beltkil a rengum el mora Chedam er a Babeluades a kot el klou lodubech er a klengar er kau, eng betok el molib el tekoi a mo beot.

Erung el ngarbab el llach, a Jesus ulsisechakl, ke de moubeltik el reng el mora Dios e oubeltikelreng el mora ngar bita er kid. Ng techa ngar bita er kau? Rokui el chad! A rokui el osisechakl el ngara chedaol llechukl lokiu a reprofet a ulak el mora ika lerung el llach.

A rokui el chad a rodam me a rodos er kau—uldimukl, a re, chad el tir a kuk ngodech malechub e te diak losisiu a uldesuiu. A Chedam er a Babeluades a soal a re Ngelekel el mo kaubeltikelreng. Sel mosiou er a Rengelekel, e kau a mesiou er Ngii

Kochotii a beltik el reng el mora Dios sel kau oltirakl a Llechul. El ua tiakid, sel mongull er a Chedaol sils, uldimukl a blak a rengum el mengedmokl el mo melai er a chedaol belsoil, e kochotii el kmo kau a ngara rengum el mo odersii a ta el sils er a tal sandei el mo er Ngii. Sel molsengerenger em molecha ongeltacher me a uldars, e kochotii el mora Dios el kmo a Urerel a lmuut el klou a ultutelel merkau er a klalou er a beluulechad. Sel mousbech er a ngklel a Dios me a Kristo loba omengull, e diak morrekakl malechub e moubeot er ngii, e kau ochotii el kmo kemereng a saul er a rokui el Tir a mla remuul el merkau.

Bo mungil mora rokui el chad el ngelekel a Dios. Sel om chedal a Jesus Kristo, eng sebechem el omekrael omeruul lungil mora rokui el chad er a kakesous el beluu me a klechelid me a ngiidi el chelechad loba beltikelreng, e uldimukl er tir—tokuni tirkel sel bebil er a taem e te metemall er a ulecheracheb er a omelekoi me a omeruul. Bo momekerreu er ngike el di ngii el tang, cheloit, malechub a dikea rolel er ngii. Bom ngosuterir el mo melchesiu er a beltikel reng er a Chedam er a Babeluades lokiu kau.

Bom kerekikl me a tekoi el molekoi a olechotel a beltikelreng er a Dios me a rebebil—sel mongedecheduch el chelbangel er a chad ma lechub e ng ngokiu a melidiul. Molekoi a tekoi el mesebechakl—e diak lomii, melemall, mekngit, luldimukl er a ngellakel. A omolekoi a sebechel kmal mesisiich. Bo bechei me bol klisiich el kirel a klungiaol.

A oubeltik el reng el mora rengelekel a Dios a omuchel er a blai. Mrelii sel ngerchelem el rulii a blai el basio er a rokui el mo sebechir el melechesuar er a beltikelreng er a Osobel.

A deleuill er kau me a Dios a mo dmolech sel molecholt er a beltik el reng er kau e mongull a Llechul e murrekodel a telbilem el mo er Ngii.

A deleuill er kau me a rebebil a mo dmolech sel molecholt er a beltik el reng er kau lokiu a omesiou el di uai e a Kristo. Ke mo metik a deureng sel moruul er a beluulechad el mengai el mo ungil beluu.

Ker me a nger

Ak mekera e mo omelchesiu er a beltikelreng er a Dios? A beltkil a rengul a Chedam er a Babeluades a di blechoel el ngar ngii. Mongedecheduch er ngii el di blechoel lokiu a nglunguuch. Mouchais a omomelchesiu el mo er Ngii, e morrenges a ulekrael mei el mla er Ngii. Monguiu a Tekingel el ngara chedaol llechukl. Momdasu aikel rokui el Ngii a mla remuul el kirem. Bom choit a temem er a basio me a omeruul el ngarngii a Reng er Ngii.

A Rubak ng mengerechir er ngak el moubeltikel reng er a rokui el chad, ngii me tirkel loumekngit el merngak? A Rubak a mengerchir er kau el mo oubeltikel reng er a recherreuem e meluluuch el kirir tirkel tir a mekngit el merkau. Engdi, tia diak a belkul el uase ke kiei er a teletael el ngii a melemall a uldesuem, bedengem, me a lechub a reng. Bol ngarngii a ungil lolkael er a klechad er kau el mo mesebechakl er kau. Alsekum me ngarngii omcheracheb er kau ng melemall er kau—malechub e ke medengelii a chad el ngara choua tial tekoi—e mongedecheduch er a klou el chad el omoumerang er ngii.

Ng oingera e mekera bo kudengelterir a rechad el milechell el ngodech er ngak? A kot lungil teletael el bo dodengelterir a rechad a okiu kid el meral moungil sechelil a tang. Chelecha el omkekerei, e moleketek a ungil deleuill lobengterir a re betok el chad. A kuk bebil er a beluu, ea rengeasek a mo medengelterir a rebebil lokiu a ungil cheldull el omilil. A bol mukeroul a uldesuem me a chedaol klengar er kau e selbechakl, e a omilil el dikau ma kchimol chad a diak moruul er ngii dilmerekmo bom klou—el teriuch me a elolem a rekil a ungil kerbai. Mongedecheduch er a rechad er a blim me a roungerachel er a ikelesia. Bechei a deleuill er kau ma tal chad me sel bom klou. Mchoit a temem lobengterir tirkel lolengeseu er kau lurrekodel a telbilem el mora Jesus Kristo.

Ngerang sebechek el rulii alsekum me a blik a diak el ngarngii a beltikelreng? A Osobel a medengelii a omngarngii el tekoi, e Ngii a betik a rengul er kau. Bol klou a rengum, e molemolem el oltirakl a llechul a Dios, e bo mungil okesiu er mora telungalek er kau. Moleketek a deleuill er a chelsel a telungalek er a ikelesia. Mongedmokl er chelechang el mo meleketek er a telungalek er kau el mo kldoel er a osisecheklel a Jesus Kristo.

Mesa Isaia 58:3–11 (moktek er a olsengerenger); 58:13–14 (klengeltengat er a mengull er a Chedaol sils); Malachi 3:8–10 (klengeltengat er a melecha ongeltacher); Lukas 6:27–28 (moubeltikelreng er a cherreuem); 10:25–37 (ng techa ngarbita er ngak?); Johanes 3:16–17 (A Dios a betik a rengul er kid me nguldureklii a Ngelekel); 14:15 (kid a oltirakl a llach e le kid el betik a rengud er a Dios); 1 Johanes 4:19 (kid a betik a rengud er a Dios e le Ngii el betik a rengul er kid); Mosiah 2:17 (sel dosiou er a rebebil, e kid a mesiou er a Dios).

Ker el kirel a kengei el mora templo

Ke oltirakl a osisecheklel a Ikelesia er a Jesus Kristo sel dil kau me a teletelem er a bouai lobengterir a telungalek er kau me a rebebil?

Kau ke melasm el mengull er a Chedaol sils, sel om ngara blim me a Ikelesia; e mora rokui el miting; keldmokl el mo melai er a sakrament; e mesmechokl er a klengar kau el oltirakl a llechul ebangkelio?

Kau ke mui el melecha ongeltacher?