Paghahanap kay Cristo at sa mga Tipan: Mga Susi ni Nephi sa Pagbabasa ng Lumang Tipan

Moses and the Brass Serpent [Si Moises at ang Ahas na Tanso], ni Judith A. Mehr; Christ on the Cross [Si Cristo sa Krus], ni Carl Heinrich Bloch

Ang Diyos ng Lumang Tipan

Dahil alam natin sa pamamagitan ng makabagong paghahayag na si Jesucristo ang Diyos ng Lumang Tipan (tingnan sa Doktrina at mga Tipan 110:3–4), makikita natin ang Kanyang kapangyarihan sa Paglikha at bilang Tagapagbigay ng Batas sa Bundok ng Sinai na nagtuturo sa Israel kung paano maging katulad ng Diyos. Nalaman natin ang tungkol sa Kanyang biyaya sa pagkatubos mula sa pagkaalipin sa Ehipto, ang Kanyang pagmamahal sa pangangalaga sa Kanyang mga tao sa ilang at pagdadala sa kanila sa lupang pangako, at ang Kanyang patuloy na pag-aalala sa pamamagitan ng pagpapadala ng mga propeta at pagpapatawad sa Israel nang pagsisihan nila ang kanilang mga kasalanan.

Maraming pagsasagisag (o representasyon) kay Jesucristo sa mga kuwento sa Lumang Tipan, na ang marami ay nagpapahiwatig ng Kanyang pagdating sa hinaharap tulad ng nakatala sa Bagong Tipan at sa Aklat ni Mormon. Ang kuwento tungkol kina Abraham at Isaac ay sagisag ng pag-aalay ng Diyos Ama sa Kanyang Anak na si Jesucristo. Iniligtas ni Jose ang kanyang mga kapatid mula sa pisikal na pagkagutom, tulad ng pagliligtas sa atin ni Jesucristo mula sa espirituwal na pagkagutom. Pinalaya ni Moises ang kanyang mga tao mula sa pagkaalipin tulad ng pagpapalaya ni Jesus sa atin mula sa kasalanan. Itinuro ng Panginoon sa mga anak ni Israel ang kapangyarihan ng pananampalataya sa Kanya at sa Kanyang Pagbabayad-sala sa kuwento tungkol sa ahas na tanso sa ilang. Naging halimbawa ng Tagapagligtas sina Elijah at Eliseo nang pagalingin nila ang maysakit at buhayin ang patay.

Abraham and Isaac [Abraham at Isaac], ni Harold Copping, © Look and Learn/Bridgeman Images

Si Jesucristo ay simbolikong nasa mga kuwento sa Lumang Tipan at sa batas ni Moises. Ang mga kuwento tungkol sa Paskua at sakripisyo sa batas ni Moises ay nakaturo kay Cristo. Bilang pagbabadya sa misyon ni Jesus, pinagaling ng mga propeta sa Lumang Tipan ang mga maysakit at binuhay ang mga patay. Sa pamamagitan ng propetang si Jeremias, nangako ang Panginoon sa atin ng isang “bagong tipan” (Jeremias 31:31; tingnan din sa talata 32).

Sa Bagong Tipan, dumating si Jesus bilang katuparan ng batas at ng mga propeta sa Lumang Tipan. Ibinigay niya ang bagong tipan sa Sermon sa Bundok at pinasimulan ang mga simbolo ng tipan sa pagkain sa Paskua sa Huling Hapunan. Tinuruan tayo ni Jesus na mahalin at paglingkuran ang isa’t isa nang pagalingin Niya ang maysakit at buhayin ang patay. Tinubos Niya tayo mula sa kasalanan at kamatayan sa pamamagitan ng Kanyang Pagbabayad-sala, at itinatag Niya ang Kanyang Simbahan sa lupa. Kapag kinilala natin si Jesus bilang Diyos ng Lumang Tipan, mas mauunawaan natin Siya sa Bagong Tipan.

Ang tipang Abraham ay sunud-sunod na mga pangako at pagpapalang ibinigay kay Abraham na nagpapatuloy hanggang sa panahong ito sa “bago at walang hanggang tipan” na ipinanumbalik ni Propetang Joseph Smith (tingnan sa Doktrina at mga Tipan 132:30–31). Itinuro ni Pangulong Nelson:

“Ang Panginoon ay nagpakita sa mga huling araw na ito upang sariwain ang tipang Abraham. Kay Propetang Joseph Smith, sinabi ng Guro:

“Si Abraham ay tumanggap ng mga pangako hinggil sa kanyang mga binhi, at ng bunga ng kanyang mga balakang—kung kaninong balakang kayo ay nagmula, … aking lingkod na si Joseph. …

“‘Ang pangakong ito ay inyo rin, sapagkat kayo ay mula kay Abraham’ [Doktrina at mga Tipan 132:30–31].”

Sa pamamagitan ng tipang ito, nilikha ng Panginoon ang isang matwid na pamilya kung saan maituturo Niya ang Kanyang ebanghelyo at madadala ang Kanyang mga anak kay Jesucristo. Itinuro sa atin ni Apostol Pablo na kung lalapit tayo kay Cristo, magiging bahagi tayo ng pamilya ni Abraham: “Kung kayo’y kay Cristo, kayo nga’y mga binhi ni Abraham, [at] mga tagapagmana ayon sa pangako” (Galacia 3:29; tingnan din sa talata 27). Sa pamamagitan ng tipang Abraham, ang mga miyembro ng Ang Simbahan ni Jesucristo ng mga Banal sa mga Huling Araw ay nagiging sambahayan ni Israel at mga tagapagmana ng mga pagpapala ng tipang Abraham.

Matututuhan natin ang ating papel sa tipan sa pamamagitan ng pagsusuri sa buhay ng mga tao sa Lumang Tipan, sa pag-aaral sa mga pangako ng Panginoon sa Kanyang mga anak sa mga kautusan, at sa pakikinig sa mga sinaunang propeta na nagsumamo sa mga anak ni Israel na magsisi at sundin ang kanilang mga tipan.

Sa pagbabasa natin ng Lumang Tipan, maaari nating hanapin ang mga pahiwatig na tinutupad ng Panginoon ang mga pangakong ginawa sa tipang Abraham. Ang tatlong pinakamahalagang pagpapala ay lupain, na sumisimbolo sa isang mana sa kaharian ng Ama sa Langit; mga inapo, na isang pangako ng walang-hanggang pag-unlad; at mga pagpapala ng ebanghelyo at ng pagkasaserdote, “na mga pagpapala ng kaligtasan, maging ng buhay na walang hanggan” (Abraham 2:11).

Pinangakuan si Abraham na sa pamamagitan ng kanyang binhi “lahat ng angkan sa lupa ay pagpapalain” (Genesis 12:3). Nangangahulugan ito na si Jesucristo ay paparito sa daigdig sa pamamagitan ng angkan ni Abraham at pagpapalain ang lahat ng bansa sa mundo sa pamamagitan ng Kanyang Pagbabayad-sala at Pagkabuhay na Mag-uli (tingnan sa Galacia 3:16).

Detalye mula sa Gethsemane [Getsemani], ni J. Kirk Richards, hindi maaaring kopyahin

Anong mga pagpapala ang nakikita ninyo sa inyong buhay ngayon dahil sa tipang Abraham?

Bukod sa mga pagpapala, kasama sa pagiging bahagi ng tipang Abraham ang ilang responsibilidad. Sa pamamagitan ng pag-aaral ng Lumang Tipan, natututo tayo kung paano mamuhay ayon sa ating mga tipan. Bilang pamilya ni Abraham, ang mga miyembro ng Simbahan ay tinawag upang tipunin ang Israel. Kapag nakikibahagi tayo sa gawaing misyonero, ministering, gawain sa templo, mga tungkulin sa Simbahan, at pagtuturo at pagpapalaki ng ating pamilya, tinitipon natin ang Israel sa pamamagitan ng paglalapit sa iba kay Cristo.

Itinuro ni Pangulong Nelson, “Sa bawat oras na gumawa kayo ng kahit ano na tutulong sa kahit sino—sa magkabilang panig ng tabing—na makalapit sa paggawa ng mga tipan sa Diyos at tanggapin ang kanilang mahalagang ordenansa ng pagbibinyag [at mga ordenansa] sa templo, tumutulong kayo na tipunin ang Israel.”