Kuó Ke Fakafiefiaʻi Hoʻo Kui Fefiné

Fai ʻe Shirley Ann Slade Brown, ʻAlesona, USA

Naʻe ʻikai teitei ʻilo ʻe he kāinga ʻo ʻeku kui fefiné ʻa e mahuʻinga lahi kiate au ʻene meʻaʻofá mo e pōpoakí.

laʻitā mali ʻo e kui fefine ʻa e tokotaha faʻutohí — Laʻitā mali ʻo e kui fefine ʻa e tokotaha faʻutohí

ʻI heʻeku tupu hake ʻi ha ongomātuʻa ʻoku tuli ʻena fanongó, naʻá ku ʻiloʻi lelei naʻe kehe hoku fāmilí. ʻI heʻeku kei siʻí, naʻe ʻikai ha taha ke fakatonulea maʻa ʻeku ongomātuʻá ʻi he ngaahi fakatahaʻanga pe ʻekitivitī faka-Siasí, ko ia ai naʻe ʻikai ke mau faʻa ō ki ai.

Naʻá ku ongoʻi maʻu pē ko ha taha au mei tuʻa ʻoku ou sio atu pē ki loto, ʻo fiemaʻu e meʻa naʻe maʻu ʻe he niʻihi kehe ʻi hoku uōtí—ko ha fāmili naʻa nau lotu mo ako fakataha.

Ka ʻi he fakaʻosinga ʻo hoku taʻu fakaʻosi ʻi he ako māʻolungá, naʻa mau mālohi ange ʻi he Siasí. Naʻe silaʻi ʻeku ongomātuʻá ʻi he Temipale Mesa Arizona, pea naʻe silaʻi au mo ha toko ua ʻi heʻemau fānau ʻe toko faá kiate kinaua.

Hili ha taʻu ʻe nima mei ai, naʻá ku teuteu ke maʻu hoku ʻenitaumení mo mali ʻi he temipalé. ʻI he pō kimuʻa peá u sila ʻi he temipalé, naʻe ʻalu ai hoku tuongaʻané mo hono uaifí ki he temipalé ke fakahoko ha ngāue fakafofonga maʻá e ongomātuʻa ʻeku faʻeé ko e teuteu ki heʻena sila ʻi he ʻaho hono hokó. Naʻe meimei taʻu ʻe 20 e hoko ʻeku faʻeé ko ha papi ului ʻi he taimi ko iá, pea naʻá ne vēkeveke ke kamata e ngāue hisitōlia fakafāmilí mo e ngāue fakatemipale maʻa hono fāmilí.

ʻI he ʻaho hono hokó, naʻe silaʻi fakataha ʻemau ongo kuí, ʻo toe fakafofongaʻi pē kinaua ʻe hoku tuongaʻané mo hono uaifí. ʻIo ko hoku ʻaho malí ia, ka naʻe mahuʻinga makehe ia kiate au. Naʻá ku vahevahe ʻa e ʻaho makehe ko ʻení mo ʻeku ongo kui naʻe teʻeki ʻaupito ke u fetaulaki mo kinauá.

Hili ha ngaahi ʻaho siʻi mei ai, lolotonga ʻema fakaava mo hoku husepānití e ʻū meʻaʻofa mei he ʻaho malí, naʻá ma fakaava ai ha meʻaʻofa makehe moʻoni mei he kāinga ʻo ʻeku kui fefiné. Ko ha fefine tui fakalotu ia naʻá ne vāofi ʻaupito mo ʻeku kui fefiné. Ko e meʻaʻofá ko ha laʻitā ʻo ʻeku kui fefiné ʻi hono ʻaho malí. Naʻe tohi ʻi ha kaati naʻe ʻomi fakataha mo ia ʻo pehē, “ʻOku mātuʻaki fiefia hoʻo kui fefiné ʻiate koe pea ʻokú ne vakai fiefia mai kiate koe.”

Naʻe ʻikai teitei ʻilo ʻe he kāinga ko ʻení ʻa e mahuʻinga lahi ʻo ʻene pōpoakí kiate aú. Pea naʻe ʻikai foki ke ne ʻilo ki he ngāue fakatemipale naʻe toki fakahoko maʻa ʻeku kui fefiné. Naʻá ku ʻiloʻi ʻi hoku lotó ʻi he momeniti ko iá naʻe fiefia ʻeku kui fefiné ʻiate au pea ʻokú ne fiefia ʻi he kamataʻi ʻe homau fāmilí ʻa e hala fononga mahuʻinga ʻo e hisitōlia fakafāmilí mo e ngāue fakatemipalé.

Naʻa mau hoko ʻeni ko ha fāmili taʻengata, ʻi he hala ki hono tānaki fakataha ʻo ʻemau ngaahi kuí pea naʻe tataki ia ʻe heʻeku faʻeé ʻi hono tāpuekina homau fāmilí ʻi he tafaʻaki ʻe taha ʻo e veilí.