“Maʻa Hotau Kuongá,” Liahona, Sepitema 2025.
Maʻa Hotau Kuongá
Hili ha taʻu ʻe tolungofulu mei hono fakafeʻiloaki ʻo e fanongonongo ki he fāmilí ki he māmaní, ʻoku ʻaonga mo fakaepalōfita ange hono ngaahi tefitoʻi moʻoni fakalangí ʻi ha toe taimi kimuʻa.
Ko Palesiteni Kōtoni B. Hingikelī ʻokú ne lea ki ha haʻofanga lotu ʻi Sanitiako, Silei
ʻI he ʻaho 23 ʻo Sepitema 1995, naʻe lea ai ʻa Palesiteni Kōtoni B. Hingikelī (1910–2008) ki ha fakatahaʻanga ʻo e houʻeiki fafine ʻi he Fineʻofá ʻo fakafeʻiloaki ʻa e “Ko e Fāmilí: Ko ha Fanongonongo ki Māmani.” Ko ha konga ʻeni ʻo e ngaahi meʻa naʻá ne lea ʻakí ʻi he fakatahaʻanga ko iá:
“ʻOku ou tui ʻoku totonu ke hoko ko ha tāpuaki ki he fānau kotoa pē ʻa hono fanauʻi ʻi ha ʻapi ʻoku talitali lelei ai ia, tokangaʻi, ʻofaʻi, mo tāpuekina ʻaki ha ongomātuʻa, ko ha tamai mo ha faʻē, ʻokú na fetauhiʻaki līʻoa ʻiate kinaua pea ki heʻena fānaú. …
“Ko e pau ange hoʻo ohi hake hoʻo fānaú ʻi he ngaahi founga ʻo e ongoongolelei ʻo Sīsū Kalaisí, ʻi he ʻofa mo e ʻamanaki ʻoku māʻolungá, ko e lahi ange ia e faingamālie ke nau maʻu e nongá ʻi heʻenau moʻuí. …
“ʻI he lahi fau e ngaahi meʻa loi ʻoku lau ko e moʻoní, lahi fau mo e kākā fekauʻaki mo e ngaahi tuʻunga moʻuí mo e ʻulungaanga mahuʻingá, ʻi he lahi fau ʻo e fakatauele mo e olopoto ke tali māmālie ʻa e ʻuli ʻo e māmaní, ʻoku mau ongoʻi ai ke fakatokanga tokamuʻa atu. Ke fakahoko ʻení, ʻoku mau tuku atu ai ʻe kimautolu ko e Kau Palesitenisī ʻUluakí mo e Fakataha Alēlea ʻo e Kau ʻAposetolo ʻe Hongofulu Mā Uá, ha fanongonongo fakamafaiʻi ki he Siasí pea mo e māmaní kotoa ʻo fakahā pea toe fakapapauʻi atu ai ʻa e ngaahi tuʻutuʻuni, ngaahi tokāteline, mo e ngaahi ngāue ʻoku fekauʻaki mo e fāmilí ʻa ia kuo toutou fakahā atu ʻe he kau palōfitá, kau tangata kikite, mo e kau tangata maʻu fakahā ʻo e Siasí ni ʻi hono hisitōliá. …
“ʻOku mau fokotuʻu atu ki he taha kotoa ke lau fakalelei, ʻi he faʻa fakakaukau pea ʻi he faʻa lotu, ʻa e fanongonongó ni. Ko e mālohinga ʻo ha puleʻanga ʻoku fakavaʻe ia ʻi loto ʻi hono ngaahi ʻapí. ʻOku mau kolea hotau kakaí ʻi ha potu pē ke fakamālohia honau ngaahi fāmilí ʻo fakatatau mo e ngaahi tuʻunga ʻulungaanga fakaʻapaʻapaʻi fuoloa ko ʻení.”