“Naʻe Tataki Au ʻe he ʻEikí ki ʻApi,” Liahona, Sepitema 2025.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe Tataki Au ʻe he ʻEikí ki ʻApi
ʻI heʻeku muimui ki ha ueʻi fakalaumālie ke u foki ki Poliviá, naʻe tataki au ʻe he ʻEikí ki ha ngaahi tāpuaki fakafāmili taʻengata.
Tā fakatātaaʻi ʻe David Malan
Lolotonga ʻeku ngāue ki hoku mataʻitohi toketaá mo faiako mūsika ʻi he ʻIunaiteti Siteití, naʻá ku faifeinga ke moʻui ʻaki e ongoongoleleí mo ongoʻi e ivi tākiekina ʻo e ʻOtuá ʻi heʻeku moʻuí. Naʻá ku mamaʻo mei ʻapi peá u faʻa ongoʻi taʻelata he taimi ʻe niʻihi, ka naʻá ku ongoʻi ʻEne ʻofá mo Hono leʻó ʻokú Ne tataki ʻeku ngaahi filí.
ʻI ha ʻaho ʻe taha, naʻá ku ongoʻi ʻoku totonu ke u foki ki hoku fonua tupuʻangá ki Polivia. Ko e fokí [ki ʻapí], ʻoku ʻikai ko ha fili ia naʻá ku toʻo maʻamaʻa. Naʻe lelei pē e meʻa kotoa. Kae hili ʻeku lotú, naʻá ku ongoʻi mālohi ʻoku totonu ke u foki he naʻe fakatatali mai ha meʻa mahuʻinga kiate au.
Hili ʻeku fokí, naʻe ʻatā mai ha polokalama mataʻitohi BA ʻi he mūsiká ʻi he taha ʻo e ngaahi ʻunivēsiti lelei taha ʻo Poliviá, ʻa ia naʻá ku maʻu ai ha ngāue ke hoko ko ha palōfesa.
Taimi nounou pē mei ai, naʻá ku fetaulaki mo ha finemui naʻe teʻeki ke u sio ai kimuʻa, ʻi hoku uooti totonú. Naʻe papi ului ʻene ongomātuʻá ki he Siasí lolotonga ʻeku teuteu ke mavahe ki he ʻIunaiteti Siteití ʻi he ngaahi taʻu kimuʻá. Naʻe kamata ke ma kaumeʻa peá ma mali, ʻa ia kuo hoko ia ko ha tāpuaki maʻongoʻonga ki heʻeku moʻuí.
ʻI he taʻu ʻe ua kuohilí, naʻe ʻilo ai ʻoku kanisā ʻeku kui fefiné. Naʻá ma fuʻu vāofi ʻaupito. ʻI heʻeku kei siʻí, naʻá ne faʻa talamai, “Te ke nofo maʻu pē mo au, pea ʻoku ou ʻilo te ke tokangaʻi au.”
Koeʻuhí ko ʻeku foki ki ʻapí, naʻá ku ʻi ai ʻi heʻene fiemaʻu aú, ʻo feohi mo ia he ʻaho kotoa pē lolotonga hono ngaahi māhina fakaʻosí. Naʻe ʻikai ke ne kau ki he Siasí kimuʻa peá ne maté, ka naʻá ne manako ʻi he makasini Liahoná, ko e Tohi ʻa Molomoná, mo e konifelenisi lahí. Naʻá ne pehē, “ʻOku ou tui ki ai kotoa.”
Kimui ange aí, naʻá ku maʻu e tāpuaki ke hū ʻi he Temipale Cochabamba Bolivia mo ʻeku ongomātuʻá ʻi he taimi naʻe silaʻi ai ʻeku kui fefiné ki hono husepānití, ʻa ia naʻe mate kei talavoú. Naʻe ʻikai pē ke ne toe mali. Naʻá ku ongoʻi naʻá na ʻi he temipalé mo kimautolu, ʻo toe fiefia fakataha. Ko ha meʻa fakaʻofoʻofa ia ke mamata atu ki heʻeku ongomātuʻá ʻi he loki silá ʻokú na tuʻu ko e fakafofonga maʻanauá.
ʻOku ʻikai ke tau ʻilo pe ʻe iku fēfē e ngaahi meʻa ʻi heʻetau moʻuí, ka ʻoku ʻafioʻi ʻe he ʻEikí ʻa e feituʻu ʻoku totonu ke tau ʻi aí. ʻOkú Ne ʻafioʻi foki ʻa e founga ke tāpuakiʻi ai kitautolú, pea te Ne tataki kitautolu ke tau ngāue ʻo fakafofongaʻi Ia ke tāpuekina ʻa e niʻihi kehé. Kapau te tau falala ki Hono potó mo e fakahinohinó, ʻoku ou ʻiloʻi te Ne lava ʻo fakahoko ha meʻa lahi ange ʻi heʻetau moʻuí ʻo laka ia ʻi he meʻa te tau lava pē ʻiate kitautolú.