“Kuo fokotuʻutuʻu ʻe he ʻEikí ʻa e fāmilí ke hoko ko e tefitoʻi ʻiuniti ʻo e Siasí mo e sosaietí.”
Kuo afeʻi taʻu hono talaki ʻe he kau palōfitá mo e kau ʻaposetoló ʻa e toputapu ʻo e fāmilí mo fakatokanga ki he ngaahi fakamamahi ʻe hoko ki he niʻihi fakafoʻituituí, ngaahi puleʻangá, pea mo e māmaní kapau ʻoku ʻikai fakatolonga mo maluʻi e ngaahi fāmilí. Ko ha ngaahi lea fakalaumālie ʻeni ʻe niʻihi mei he kau palōfitá mo e kau ʻaposetoló fekauʻaki mo e fāmilí mo e mahuʻinga ʻo e “Ko e Fāmilí: Ko Ha Fanongonongo ki Māmani.”
Ko e Fāmilí Ko e Uho Ia ʻo e Palani ʻa e ʻOtuá
Palesiteni Russel M. Nelson
Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní
“ʻOku mahuʻinga ʻa e fāmilí ki he palani ʻa e ʻOtuá. Ko hono moʻoní, ko e taumuʻa ʻo e palaní ke hakeakiʻi ʻa e fāmilí. Naʻe fakatupu ʻa e māmaní ke tau lava ai kitautolu, ko e fānau fakalaumālie ʻo ʻetau Tamai Hēvaní ʻi he maama fakalaumālié, ʻo haʻu ki he māmaní pea maʻu ai ha ngaahi sino fakamatelie. ʻOku tau ʻi hení ke ʻahiʻahiʻi mo siviʻi ai kitautolu [vakai, ʻĒpalahame 3:24–25 ]. ʻOku tau ʻi hení ke ‘fili ʻa e tauʻatāiná mo e moʻui taʻengatá … pe fili ʻa e pōpulá mo e maté’ [2 Nīfai 2:27 ]. Pea ko e lelei tahá, he ʻoku ʻatā ke tau feʻofaʻaki, ke tau mali, pea ke fakaafeʻi ha fānau ki hotau ngaahi fāmilí” (“Faith and Families ,” Ensign , Mar. 2007, 39).
ʻOku Fakavaʻe ʻa e Fanongonongo ki he Fāmilí ʻi he Tokāteline ʻOku Taʻengata
Palesiteni Dallin H. Oaks
Tokoni ʻUluaki ʻi he Kau Palesitenisī ʻUluakí
“Ko kinautolu ʻoku ʻikai maʻu ha mahino kakato ki he palani ʻofa ʻa e Tamaí ki Heʻene fānaú, te nau ala lau ʻa e fanongonongo ko ʻeni ki he fāmilí ko ha fakamatalaʻi pē ʻo e tuʻutuʻuní ʻe ala malava pē ke liliu. ʻI he tafaʻaki ʻe tahá, ʻoku mau fakapapauʻi ko e fanongonongo ki he fāmilí, ne fakavaʻe ʻi he tokāteline taʻetoe ueʻiá, ʻokú ne fakaʻuhingaʻi ʻa e faʻahinga fetuʻutaki fakafāmili ʻoku lava ke hoko ai ʻa e konga mahuʻinga taha ʻo ʻetau fakalakalaka taʻengatá” (“ʻOfa Fakalangi ʻi he Palani ʻa e Tamaí ,” Liahona , Mē 2022, 103).
ʻOku Teuteuʻi Kitautolu ʻe he Moʻui Fakafāmili Fakamatelié ki he Taʻengstá
Palesiteni Henry B. Eyring
Tokoni Ua ʻi he Kau Palesitenisī ʻUluakí
“ʻOku ʻikai ngata pē ʻi he mahuʻinga ʻo e ʻiuniti ʻo e fāmilí ki he sōsaietí pea mo e Siasí, ka ki heʻetau fakaʻānaua [foki] ki he moʻui taʻengatá. ʻOku tau kamata ke akoako ia ʻi he fāmilí, ko e ʻiuniti ia ʻoku siʻisiʻi angé, ʻa e meʻa ʻe toki mafola atu mei ai ki he Siasí pea ki he sosaieti ʻoku tau nofo ai ʻi he māmaní, ʻa ia ko e meʻa ia kuo tau fakahoko ʻi he ngaahi fāmili kuo haʻi fakataha ke taʻengata ʻaki ʻa e ngaahi fuakavá pea mo e angatonú” (“The Family ” [Brigham Young University devotional, Nov. 5, 1995], 8, speeches.byu.edu).
ʻOku Fakatatali ʻa e Feohi Fafale Fakaesinó ki he Nofomalí
Palesiteni Jeffrey R. Holland
Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá
“ʻOku toki fakahoko pē ʻa e feohi fafale ʻa e tangatá mo e fefiné ʻe ha ongo meʻa mali koeʻuhí he ko e fakaʻilonga taupotu taha ia ʻo e fakataha kakato, ko ha fakataha mo ha faaitaha ne tuʻutuʻuni mo fakaʻuhingaʻi ʻe he ʻOtuá. Naʻe fakataumuʻa e malí talu mei he Ngoue ko ʻĪtení ʻo hokohoko atu ai, ki hono fakatahaʻi kakato ʻo ha tangata mo ha fefine—hona lotó, ʻamanaki leleí, moʻuí, ʻofá, fāmilí, kahaʻú, mo e meʻa kotoa pē. … Ko ha faaitaha kakato moʻoni ʻeni ʻoku tau fakaʻaongaʻi ki ai e foʻi lea ko e sila ke fakahaaʻi hono talaʻofa taʻengatá” (“Personal Purity ,” Ensign , Nov. 1998, 76; Liahona , Jan. 1999, 91).
ʻE Lava Ke Faitoʻo ʻe he Fakamoʻuí ʻa e Ngaahi Vā Fetuʻutaki ʻo e Mātuʻá mo e Fānaú
ʻEletā Dieter F. Uchtdorf
ʻO e Kōlomu ʻo e Kau ʻAposetolo ʻe Toko Hongofulu Mā Uá
“Ko e ʻofa ʻa e mātuʻá ki he fānaú ko e taha ia ʻo e ngaahi ivi mālohi taha ʻi he ʻunivēsí. Ko e taha ia ʻo e ngaahi meʻa siʻi ʻi he māmaní ʻe lava ke taʻengata moʻoní.
“Mahalo ʻokú ke ongoʻi ko hoʻo vā fetuʻutaki mo hoʻo fānaú ʻoku ʻikai ko e lelei tahá. Ko e taimi ia ‘oku hū mai ai ʻa e mālohi ʻo e Fakamoʻuí. ʻOkú Ne fakamoʻui ʻa e mahakí, pea te Ne lava ʻo fakaleleiʻi ʻa e ngaahi vā fetuʻutakí. ʻOkú Ne fakalahi ʻa e maá mo e mataʻi iká, pea te Ne lava ʻo fakalahi ʻa e ʻofá mo e fiefiá ʻi homou ʻapí” (“Ko Sīsū Kalaisi ʻa e Mālohinga ʻo e Mātuʻá ,” Liahona , Mē 2023, 56).
Fakamālohia e Ngaahi Fehokotakiʻanga Fakafāmilí, Naʻa mo e Taimi ʻE Ala Motuhi Ai Ha Niʻihí
ʻEletā David A. Bednar
ʻO e Kōlomu ʻo e Kau ʻAposetolo ʻe Toko Hongofulu Mā Uá
“Ko kimoutolu [kakai lalahi kei talavou] kuo aʻusia e loto-mamahi ʻo ha vete mali ʻi ho fāmilí, pe ongoʻi e mamahi ʻo hono maumauʻi ʻo e falalá, kātaki ʻo manatuʻi, ʻoku kamata ʻiate koe! Neongo kuo motuhi e fehokotakiʻanga ʻe taha ʻo ho ngaahi toʻu tangatá, ka ʻoku kei mahuʻinga ʻo taʻengata ʻa e ngaahi fehokotakiʻanga angatonu ʻoku toé. Te ke lava ʻo fakamālohia [hoʻo] fehokotakiʻangá pea mahalo te ke lava foki ʻo tokoni ke fakafoki ʻa e ngaahi fehokotakiʻanga ne motuhí. ʻE fakahoko takitaha e ngāue ko iá” (“Ko ha Fehokotakiʻanga Mālohi ” [fakataha lotu fakaemāmani lahi maʻá e kakai lalahi kei talavoú, 10 ʻo Sepitema 2017], Gospel Library).
ʻOku Mahuʻinga Tatau Pē ʻa e Ngaahi Fatongia ʻo Fafine mo Tangatá
ʻEletā Quentin L. Cook
ʻO e Kōlomu ʻo e Kau ʻAposetolo ʻe Toko Hongofulu Mā Uá
“ʻOku ʻa e houʻeiki fafiné mo e houʻeiki tangatá ha tufakanga mahuʻinga ʻo hangē ko hono fakamatalaʻi ʻi he ‘Ko e Fāmilí: Ko Ha Fanongonongo ki Māmani,’ ka ʻoku tuʻunga tatau ʻena ngāué mo hono mahuʻingá. ʻOkú na maʻu e mālohi tatau ke maʻu fakahā maʻa hona fāmilí. Ko e taimi ʻokú na ngāue fakataha ai ʻi he ʻofa mo e angatonú, ʻoku tāpuekina ʻena ngaahi filí mei langi” (“ʻOfa Lahi ki he Fānau ʻa ʻEtau Tamaí ,” Liahona , Mē 2019, 79).
ʻOku Totonu ke Tataki ʻe he Mātuʻá ʻa e Fānaú ki ha ʻAmanaki Lelei ʻia Kalaisi
ʻEletā D. Todd Christofferson
ʻO e Kōlomu ʻo e Kau ʻAposetolo ʻe Toko Hongofulu Mā Uá
“Naʻe tuʻutuʻuni ʻe he ʻOtuá ʻoku totonu ke mali e tangatá mo e fefiné pea fāʻeleʻi ha fānau, ʻo kaungā ngāue ai mo e ʻOtuá ʻi hono fakatupu ha ngaahi sino fakaemāmani ʻoku mahuʻinga ki he siviʻi ʻo e moʻui fakamatelié mo ʻaonga ki he nāunau taʻengata mo Iá. Naʻá Ne tuʻutuʻuni foki ki he ngaahi mātuʻá ʻoku totonu ke nau faʻu ha ngaahi fāmili mo ohi hake ʻenau fānaú ʻi he māmá mo e moʻoní, [vakai, Tokāteline mo e Ngaahi Fuakava 93:36–40 ], pea taki kinautolu ke nau ʻamanaki lelei ʻia Kalaisi” (“ʻUhinga ʻo e Malí, ʻUhinga ʻo e Fāmilí ,” Liahona , Mē 2015, 51).
ʻOku Fehokotaki Lelei ʻa e Ngaahi Tefitoʻi Moʻoni ʻo e Fanongonongo ki he Fāmilí
ʻEletā Neil L. Andersen
ʻO e Kōlomu ʻo e Kau ʻAposetolo ʻe Toko Hongofulu Mā Uá
“Kapau te tau filifili pē ʻa e meʻa te tau tali ʻi he fanongonongó, ʻoku puli meiate kitautolu ʻa ʻetau vakai taʻengatá, ʻo fakamahuʻingaʻi ange ʻa ʻetau aʻusia ʻi he moʻui ní. ʻI hano fakalaulauloto ʻi he faʻa lotu e fanongonongó ʻo vakai atu ʻi he tuí, ʻoku mahino lelei ange kiate kitautolu e anga ʻo e fehokotaki lelei ʻa e ngaahi tefitoʻi moʻoní, ʻo fepoupouʻaki mo fakahaaʻi mai e palani ʻetau Tamaí ki Heʻene fānaú” (“Ko e Vakai Atu ʻi he Tuí ,” Liahona , Mē 2019, 35–36).