“ʻOku Ou Fie Hangē ko Koé,” Liahona, Sepitema 2025.
Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻOku Ou Fie Hangē ko Koé
Naʻá ku ongoʻi ha taulōfuʻu ʻo e loto-hohaʻá ko e tupu mei heʻeku ilifia he ongoʻi taʻefeʻungá—kae tālunga mo ʻeku lotú.
Tā fakatātaaʻi ʻe David Malan
Hili ha ʻaho lōloa mo faingataʻa ʻo e fekuki mo hono tokangaʻi ʻo ha fānau iiki ʻe toko tolú, ko e meʻa pē naʻá ku fakaʻamu ke faí ko e kaukau peá u mohe.
Na‘á ku mihiʻi lahi ʻeku mānavá peá u ʻalu ki hoku lokí ke u kiʻi mālōlō. Ko e taimi ia naʻe hū mai ai ʻema kiʻi taʻahine taʻu nimá ʻo fakamanatu mai ko hono taimi ʻeni ke fai ai e ʻinitaviu fakataautaha fakamāhina kuó u kamataʻi mo hoku husepānití mo ia mo homa foha taʻu tolú. Te ma fai ange ha ngaahi fehuʻi kiate kinaua fekauʻaki mo e meʻa ʻokú na manako taha aí mo e meʻa naʻá na saiʻia ai ʻi he ako tokamuʻá pe ʻi he lotú. Pea te ma fakamanatu ange kiate kinaua ko ha fānau kinaua ʻa e ʻOtuá pea naʻá ma ʻofa ʻiate kinaua.
Naʻá ku fiefia ʻi he fanga kiʻi pōtalanoa ko ʻení, ka naʻe ʻikai ke u ongoʻi mālohi fakatuʻasino mo fakaeʻatamai ke fakahoko ia. Naʻe kamata ke u talaange ki hoku ʻofefiné te mau toki talanoa he pō ʻapongipongí, ka naʻá ku ʻiloʻi hono mahuʻinga ʻo e fepōtalanoaʻaki ko ʻení kiate iá.
Naʻá ku talaange pē mo ʻeku helaʻiá, “Sai, ta ʻalu ʻo ui ʻa Teti.”
Naʻa mau tangutu toko tolu ʻi he mohengá ʻo kamata ʻemau talanoá. Hili ha mavahe taimi nounou hoku husepānití mei he lokí, naʻá ku fehuʻi ange ki hoku ʻofefiné “ʻOkú ke fie hoko ko e hā ʻi hoʻo fuʻu lahí?”
Naʻe ʻikai ke u mateuteu ki heʻene talí: “Hangē ko koé.”
Naʻe kamata ke u fakatē loʻimata, pea naʻe ongo moʻoni ia ki hoku lotó. Naʻe ongo kiate au ʻa e founga ʻoku vakai mai ai hoku ʻofefiné kiate aú, ka naʻe lōmekina au ʻe he loto-hohaʻa naʻe tupu mei heʻeku ilifia ʻi he ongoʻi taʻefeʻungá. Naʻá ku fakakaukau ki he ngaahi ʻuhinga kotoa pē naʻe ʻikai ke u hoko ai ko ha sīpinga lelei ki heʻeku fānaú, pea naʻá ku ʻiloʻi lelei ʻeku ngaahi tōnounoú.
Kimui ange ʻi he pō ko iá ʻi heʻeku lotú, naʻá ku kolea fakamātoato ki he Tamai Hēvaní ke tokoniʻi au ke u hoko ko ha sīpinga lelei ange ki hoku ʻofefiné pea ke u taau mo ʻene vakai maí. Naʻe fakafokifā pē kuo fakafonu ʻaki au ʻa e ongoʻi fiemālie, ʻamanaki lelei, mo e ʻofa. Naʻe fakaʻau ke u fakatokangaʻi ʻa e houngaʻia ʻa ʻeku Tamai Hēvaní mo e Fakamoʻuí ʻiate au koeʻuhi pē ko ʻeku hoko ko ha faʻē naʻe feinga ke lelei angé. Naʻá Na ʻafioʻi ʻeku ngaahi ngāué pea naʻá Na ʻi ai ke tokoniʻi au ke u hoko ko e faʻē mo e ʻofefine naʻá Na ʻafioʻi ʻiate aú.
ʻOku ou ʻiloʻi ʻaki hoku lotó kotoa ʻoku ʻafioʻi mo ʻofeina kitautolu ʻe he ʻOtuá pea ʻoku fakafou ʻi he “ivi malava ʻo e Fakalelei ʻa e Fakamoʻuí,” ʻa ʻetau malava ke aʻusia ʻa e tuʻunga totonu ʻoku tau ʻamanaki ke aʻusiá.