Naʻe ʻOmi ʻe he ʻOtuá ʻa e Nonga Kiate Au

ʻI heʻemau teuteu ke hiva lolotonga ha sēsini fakatapui ʻo e Temipale Concepción Chile ʻi he 2018, naʻe tatau pē ʻa e taumuʻa ʻa e mēmipa kotoa ʻo e kuaea kakai lalahi kei talavou naʻá ku tatakí: ke fai e ngāue fakamūsika mo fakalaumālie ʻoku fiemaʻú ke ʻave ki he ʻOtuá ʻemau foaki lelei tahá.

ʻI he omi ʻa e kau mēmipa ʻo e kuaeá mei he siteiki ʻe ua ʻi he kolo lahi ʻo Silaní, naʻá ku tukupā ke u aʻusia e tuʻunga maʻa taha te u ala lavá. Naʻá ku fakaʻamu ke hoʻata atu e Maama ʻa Kalaisí ʻi heʻeku moʻuí. Naʻá ku fakaʻamu ke aʻu e foaki te mau ʻoatu ki he ʻOtuá ʻi Hono fale māʻoniʻoní ki he tuʻunga haohaoa taha ʻe ala lavá. Naʻá ku ʻiloʻi kapau te mau fai homau tafaʻakí, ʻe tokoniʻi kimautolu ʻe he Tamai Hēvaní, pea te mau hiva ʻo hangē ko ia naʻá Ne finangalo ke mau hiva ʻakí.

Lolotonga e fakatapuí, naʻa mau hiva ʻaki homau ngaahi leʻó mo homau lotó. ʻOku ou tui naʻa mau hiva fakataha mo e kau ʻāngeló. Naʻe fakaʻofoʻofa ʻaupito e ongo ʻo e kuaeá. Naʻa mau ongoʻi naʻe ʻiate kimautolu e ʻaloʻofa ʻa e ʻOtuá pea naʻá Ne hōifua ʻi heʻemau foakí. Naʻe tolonga e ongo ko iá ʻiate au ʻi ha taimi lōloa.

Hili hono fakatapui ʻo e temipalé, naʻá ku ongoʻi naʻe fafanga fakalaumālie au pea naʻá ku taha pē mo e Tamai Hēvaní. Naʻá ku ongoʻi ha fehokotaki mālohi ange mo Ia ʻo laka hake ʻi ha toe aʻusia kimuʻa. Naʻe mālohi fau e fehokotaki ko iá naʻá ku ongoʻi ai naʻe tataki fakalaumālie au ki he meʻa ke u kolea ʻi heʻeku lotú (vakai, 3 Nīfai 19:24).

ʻI he taimi naʻe fakatapui ai e temipalé, naʻá ku lolotonga feitama uike ʻe nima ai. Hili pē ha ngaahi māhina siʻi mei ai, naʻá ku tamatō. Ko ha taimi fakamamahi moʻoni ia. Naʻá ku ongoʻi loto-mamahi ʻaupito, tautautefito ki he taimi naʻá ku ʻilo ai ʻe malava pē ke mole hoku faingamālie ke u toe maʻu ha fānaú.

Ka naʻe hoko ʻa e aʻusia faingataʻa ko ʻení ʻi ha taimi naʻá ku ongoʻi mālohi fakalaumālie ʻaupito ai. Naʻe mahino kiate au kuo teuteuʻi au ki he momeniti ko ʻení ʻi he ngaahi founga ʻo e foaki naʻe mau ʻoatu ʻi he temipalé. Naʻe tokoniʻi au ʻe he ivi fakalaumālie naʻá ku aʻusiá ke u ikunaʻi e faingataʻa ko ʻení he naʻe ʻiate au ʻa e Tamai Hēvaní pea naʻá Ne ʻomi kiate au ha nonga.

Hili ha taimi nounou mei ai, naʻe tāpuakiʻi ʻe he ʻOtuá au mo hoku husepānití ʻaki ha mana. Naʻe hulutuʻa ʻema fiefiá ʻi hono maʻu ʻe homa foha ko ʻAlatuló ha kiʻi tuofefine ko Teniela.

Naʻe ʻikai ke u mei lava ʻo matatali e aʻusia ko iá kapau naʻe ʻikai e fehokotaki vāofi naʻá ku fiefia ai mo e Tamai Hēvaní. Naʻá ku ʻiloʻi ʻe lelei ʻa e meʻa kotoa pē pea ʻe hoko pē ʻo fakatatau mo Hono finangaló. ʻOku kei fakafonu pē hoku lotó ʻi he fiefia mo e houngaʻia ʻi hono manatua ʻo e ngaahi meʻa ko ʻení.