“Itinalaga ng Panginoon ang pamilya bilang pangunahing yunit ng Simbahan at ng lipunan.”
Sa loob ng libu-libong taon, ipinahayag na ng mga propeta at apostol ang kasagraduhan ng pamilya at nagbabala tungkol sa mga kalamidad na sasapit sa mga indibiduwal, bansa, at mundo kung hindi mapapangalagaan at mapoprotektahan ang mga pamilya. Narito ang ilang inspiradong salita ng mga propeta at apostol tungkol sa pamilya at sa kahalagahan ng “Ang Mag-anak: Isang Pagpapahayag sa Mundo.”
Ang Pamilya ang Sentro sa Plano ng Diyos
Pangulong Russell M. Nelson
Pangulo ng Ang Simbahan ni Jesucristo ng mga Banal sa mga Huling Araw
“Mahalaga sa plano ng Diyos ang pamilya. Sa katunayan, ang layunin ng plano ay para dakilain ang pamilya. Nilikha ang mundo upang tayo bilang mga premortal na espiritung anak ng ating Ama sa Langit ay maisilang sa lupa at magkaroon ng pisikal na katawan. Narito tayo para subukin at subukan [tingnan sa Abraham 3:24–25 ]. Narito tayo para ‘[piliin ang] kalayaan at buhay na walang hanggan … o piliin ang pagkabihag at kamatayan’ [2 Nephi 2:27 ]. At higit sa lahat, pinahihintulutan tayong umibig, mag-asawa, at mag-anyaya ng mga anak sa ating pamilya” (“Faith and Families ,” Ensign , Mar. 2007, 39).
Ang Pagpapahayag tungkol sa Pamilya ay Nakasalig sa Walang-Hanggang Doktrina
Pangulong Dallin H. Oaks
Unang Tagapayo sa Unang Panguluhan
“Ang mga hindi lubusang nakauunawa sa mapagmahal na plano ng Ama para sa Kanyang mga anak ay maaaring ituring ang pagpapahayag na ito sa pamilya na isang patakaran na maaaring baguhin. Kabaliktaran nito, pinagtitibay namin na ang pagpapahayag sa pamilya, na nakabatay sa hindi mababagong doktrina, ay naglalarawan sa uri ng mga ugnayan ng pamilya kung saan nangyayari ang pinakamahalagang bahagi ng ating walang-hanggang pag-unlad” (“Banal na Pagmamahal sa Plano ng Ama ,” Liahona , Mayo 2022, 103).
Inihahanda Tayo ng Buhay-Pamilya sa Mortalidad para sa Kawalang-Hanggan
Pangulong Henry B. Eyring
Pangalawang Tagapayo sa Unang Panguluhan
“Ang pamilya ay mahalaga hindi lamang sa lipunan at sa Simbahan kundi maging sa ating pag-asa para sa buhay na walang hanggan. Sinisimulan nating gawin sa pamilya, ang mas maliit na yunit, ang lalaganap sa Simbahan at sa lipunang ating ginagalawan sa mundong ito at siyang gagawin natin sa mga pamilyang pinagbuklod magpakailanman sa pamamagitan ng mga tipan at katapatan” (“The Family ” [Brigham Young University devotional, Nob. 5, 1995], 8, speeches.byu.edu).
Ang Pisikal na Intimasiya ay Nakalaan Pagkatapos ng Kasal
Pangulong Jeffrey R. Holland
Gumaganap na Pangulo ng Korum ng Labindalawang Apostol
“Ang intimasiya ay nakalaan para sa magkasintahang ikinasal sapagkat ito ang pinakadakilang simbolo ng lubos na pagsasama, ang kabuuan at pagsasama na inorden at itinakda ng Diyos. Mula pa sa Halamanan ng Eden, ang pagpapakasal ay talagang nangangahulugang ganap na pagsasama ng isang lalaki at isang babae—ng kanilang mga puso, inaasam, buhay, pag-ibig, pamilya, hinaharap, at lahat ng bagay. … Ito ay isang lubos na pag-iisa kaya ginagamit natin ang salitang buklod para maipahatid ang walang-hanggang pangako nito” (“Personal Purity ,” Ensign , Nob. 1998, 76; Liahona , Ene. 1999, 91).
“Ang pagmamahal ng isang magulang sa anak ang isa sa pinakamalalakas na puwersa sa sansinukob. Isa ito sa iilang bagay sa mundong ito na tunay na maaaring maging walang hanggan.
“Ngayon, pakiramdam ninyo marahil ay hindi perpekto ang relasyon ninyo sa inyong anak. Diyan pumapasok ang kapangyarihan ng Tagapagligtas. Pinagagaling Niya ang maysakit, at mapaghihilom Niya ang mga relasyon. Pinararami Niya ang tinapay at isda, at mapag-iibayo Niya ang pagmamahalan at kagalakan sa inyong tahanan” (“Si Jesucristo ang Lakas ng mga Magulang ,” Liahona , Mayo 2023, 56).
Patibayin ang mga Ugnayan ng Pamilya, Kahit Maaaring Naputol ang Ilang Dugtong sa Kawing ng Pamilya
Elder David A. Bednar
Ng Korum ng Labindalawang Apostol
“Sa inyo[ng] [mga young adult] na nakaranas ng sakit ng diborsyo sa inyong pamilya o nakadama ng pagdurusa ng nasirang tiwala, alalahanin sana na nagsisimula itong muli sa inyo! Maaaring naputol ang isang dugtong sa kawing ng inyong mga henerasyon, ngunit ang iba pang matitibay na dugtong at ang natitira sa kawing ay walang hanggan din ang kahalagahan. Maaari [ninyong] mapatibay ang [inyong] kawing at marahil ay maibalik pa ang naputol na mga dugtong. Magagawa iyan nang paisa-isa” (“Isang Matibay na Dugtong ” [pandaigdigang debosyonal para sa mga young adult, Set. 10, 2017], Gospel Library).
Ang mga Tungkulin ng Kababaihan at Kalalakihan ay Pantay ang Kahalagahan
Elder Quentin L. Cook
Ng Korum ng Labindalawang Apostol
“Ang kababaihan at kalalakihan ay may magkaibang mga tungkulin na ibinalangkas sa ‘Ang Mag-anak: Isang Pagpapahayag sa Mundo,’ pero ang kanilang mga responsibilidad ay pantay ang kahalagahan at importansya. Mayroon silang pantay na kapangyarihan na tumanggap ng paghahayag para sa kanilang pamilya. Kapag nagtutulungan sila nang may pagmamahal at kabutihan, ang kanilang mga desisyon ay pinagpapala ng langit” (“Malaking Pagmamahal para sa mga Anak ng Ating Ama ,” Liahona , Mayo 2019, 79).
Dapat Hikayatin ng mga Magulang ang mga Anak na Umasa kay Cristo
Elder D. Todd Christofferson
Ng Korum ng Labindalawang Apostol
“Inorden ng Diyos na ang mga lalaki at babae ay dapat makasal at magkaroon ng mga anak, nang sa gayo’y makalikha, sa pakikipagtuwang sa Diyos, ng mga pisikal na katawan na mahalaga sa pagsubok ng mortalidad at kailangan sa walang-hanggang kaluwalhatian sa piling Niya. Inorden din Niya na ang mga magulang ay dapat bumuo ng mga pamilya at palakihin ang kanilang mga anak sa liwanag at katotohanan [tingnan sa Doktrina at mga Tipan 93:36–40 ], na maghihikayat sa kanila na umasa kay Cristo” (“Bakit Dapat Mag-asawa at Bumuo ng Pamilya ,” Liahona , Mayo 2015, 51).
Maganda ang Pagkakaugnay sa Isa’t Isa ng mga Alituntunin ng Pagpapahayag tungkol sa Pamilya
Elder Neil L. Andersen
Ng Korum ng Labindalawang Apostol
“Kapag pinipili natin ang gusto lang nating tanggapin sa pagpapahayag, pinalalabo natin ang ating pananaw na pangwalang-hanggan, nag-uukol [tayo] ng labis na importansya sa nangyayari sa atin dito at ngayon. Kapag pinagninilayan natin nang may panalangin ang pagpapahayag sa pamamagitan ng mata ng pananampalataya, mas nauunawaan natin kung paano magandang nagkakaugnay ang mga alituntunin, sumusuporta sa isa’t isa, naghahayag sa plano ng ating Ama para sa Kanyang mga anak” (“Ang Mata ng Pananampalataya ,” Liahona , Mayo 2019, 35–36).