Houngaʻia ke ʻIlo Hono Finangaló

Tā fakatātaaʻi ʻe Bradley Clark

ʻI heʻeku kei ako ʻi he ʻunivēsití, naʻá ku ʻiloʻi ha ngāue maʻuʻanga moʻui pau ne u fie fakahoko. Naʻá ku palani kotoa ʻeku ʻū kalasí ʻo aʻu ki he fakaʻosi akó, pea naʻá ku maʻu ha faingamālie fakalele pisinisi naʻá ku mateuteu ke tali. Naʻe maau ʻa e meʻa kotoa pē.

Ka neongo ia, hili ʻeku fealēleaʻaki mo e Tamai Hēvaní ʻi he lotú, naʻá ku ongoʻi naʻá Ne folofola mai, “ʻOku ou finangalo ke ke muimui ʻi ha palani kehe.” Ne ʻikai fuoloa mei ai, naʻe ʻi ai ha faingamālie ke ngāue ki he Siasí. Naʻe mātuʻaki taʻeʻamanekina ia, ka naʻá ku fakatokangaʻi ko e halanga foʻou ia naʻá Ne teuteuʻi maʻakú.

Naʻá ku fakamatalaʻi ange ki hoku fāmilí naʻe ʻi ai ha faingamālie foʻou ke hoko ko ha pule ngāue ʻi he Senitā Akoʻanga Fakafaifekau ʻi he Pasifikí. Naʻe iku ʻeni ki ha lakanga ʻi ha taʻu ʻe tolu mei ai ko e talēkita ʻinisititiuti ʻi he Seminelí mo e ʻInisititiuti Fakalotú. Mahalo naʻá ku mei tuʻumālie fakatuʻasino ange ʻi heʻeku palani ngāue ʻuluakí, ka naʻá mau fili ke vakai ki he meʻa ʻe hoko ʻo kapau te mau falala ki he ʻEikí.

Naʻe iku ʻa e fili ko iá ki ha ngaahi tāpuaki ne hangē naʻe ʻosi teuteuʻi ʻe he ʻEikí maʻamautolú. Kuo fakaofo moʻoni ia. ʻOku ʻikai ke mau tuʻumālie, ka kuo mau maʻu maʻu pē ʻa e ngaahi meʻa naʻa mau fiemaʻú, pea kuo ohi hake ʻema fānaú ʻi ha ʻātakai fakaʻofoʻofa ʻo e ongoongoleleí.

Kuo teʻeki ai ke u fakaʻiseʻisa ʻi he fili naʻá ku fai ʻi he taʻu ʻe 23 kuohilí, neongo naʻe pau ke u liʻaki ha ngaahi meʻa pea mavahe mei ha kakai ʻe niʻihi, ngaahi feituʻu, koloa, mo e ngaahi lakanga. Ka kuo mau fiefia ke fakahoko ia maʻá e Tamai Hēvaní. Kuo hoko hono fai iá ko ha tāpuaki maʻongoʻonga.

Kuó u ako ko e taimi ʻoku tataki ai koe ʻe he ʻEikí ʻi ha huʻunga pau peá ke fakafanongo mo talangofuá, ʻoku fakatatali mai ha ngaahi tāpuaki. Hangē ko e akonaki ʻa Palesiteni Lāsolo M. Nalesoní: “ʻI he foʻi lea ko iá—‘Fanongo kiate Iá’—ʻoku ʻomi ai ʻe he ʻOtuá kiate kitautolu ʻa e sīpinga ke lavameʻa, fiefia, mo nēkeneka ʻi he moʻui ko ʻení. Kuo pau ke tau fanongo ki he ngaahi folofola ʻa e ʻEikí, tokanga kiate kinautolu, mo talangofua ki he meʻa kuó Ne fakahā kiate kitautolú!”

Ko e taimi ʻe niʻihi te tau feinga ke faleʻi ʻa e Tamai Hēvaní, ʻo fakakaukau, “ʻOku ou ʻiloʻi e lelei tahá.” Ka, ʻoku fiemaʻu ke tau fakaava hotau lotó pea fakafanongo kiate Ia, ʻo tānaki ha fakakaukau mo e mahino. Kapau te tau tafoki kiate Ia mo vahevahe mo Ia ʻetau ngaahi fiemaʻú mo e ngaahi holi ʻa hotau lotó, pea fakafanongo moʻoni leva, te tau ʻilo Hono finangalo maʻatautolú.