Pōpoaki Toetuʻu ʻa e Kau Palesitenisī ʻUluakí

ʻE Peluki ʻa e Tui Kotoa Pē, tā fakatātaaʻi ʻe Dan Wilson

Lolotonga e faʻahitaʻu fakafiefia ko ʻeni ʻo e Toetuʻú, ʻoku tau kau fakataha mo e kau muimui faivelenga ʻo e Fakamoʻuí ʻi hono fakamanatua ʻa e Toetuʻu ʻa hotau ʻEiki ko Sīsū Kalaisí. Ko e Toetuʻú ko ha meʻaʻofa ia ki he fānau kotoa ʻa e Tamai Hēvaní kuo nau moʻui ʻi he māmaní.

ʻOku mau fakamoʻoni ʻoku foaki ʻe Sīsū Kalaisi ʻa e fiemālie kiate kinautolu ʻoku “mafasiá” (Mātiu 11:28). ʻOkú Ne ʻafioʻi e “founga ke tokoniʻi ai ʻa hono kakaí ʻo fakatatau ki honau ngaahi vaivaí” (ʻAlamā 7:12) koeʻuhí naʻá Ne toʻo kiate Ia ʻetau mamahí mo e ngaahi angahalá. “Kuó ne toʻo kiate ia ʻa ʻetau ngaahi ngaahi vaivaí, ʻo ne fua ʻetau ngaahi mamahí … pea ʻi hono ngaahi tā ʻoku tau moʻui ai” (ʻĪsaia 53:4–5).

Ko kinautolu ʻoku fakaʻaongaʻi ʻa e tui kiate Iá, tauhi ʻEne ngaahi fekaú, mo maʻu ʻa e ngaahi ouau fakamoʻuí mo hakeakiʻí te nau “maʻu ʻa e ʻamanaki leleí ʻi he fakalelei ʻa Kalaisí pea mo e mālohi ʻo ʻene toetuʻú, ke fokotuʻu hake ki he moʻui taʻengatá” (Molonai 7:41).

ʻOku mau fakaafeʻi e kakai kotoa pē ke nau haʻu kia Sīsū “ke nau maʻu ʻa e moʻuí, pea ke nau maʻu ia ʻo lahi ʻaupito” (Sione 10:10). ʻI hono haʻi kitautolu kiate Ia ʻo fakafou ʻi hono fakahoko mo tauhi ʻa e ngaahi fuakavá, ʻoku tāpuekina ai ʻetau moʻuí ʻi he taimí ni pea taʻengata. Fakatauange te mou maʻu ʻa e ʻamanaki leleí, fakamoʻuí, mo e fiefiá ʻi hoʻomou ʻunu ke ofi ange ki he Fakamoʻui ʻo e māmaní ʻi he faʻahitaʻu Toetuʻu ko ʻení.

Kau Palesitenisī ʻUluakí