Ana Burabeti te Atua

Nakomi te roronrikirake, ai tamaroara te tetere ni maungatabu aei! Ti a tia n ongora irouia teniman ana Abotoro Iesu Kristo aika a maiu. Ai bon kakabwaiara ngaira! Ao ti na manga ongora riki iroun temanna, Unimwaane Henry B. Eyring. E reitinako te baka n amwarake n te maiu n tamnei!

Ngke I taetae n te ririki ae nako, ti reiakina arora ni kaitara te aonaaba aei rinanon are e rinanona Tawita ma Koria. Uringii atibu ake nimaua? N te bong aei N na taekini karaki man te O Tetemanti are I wareki ngke rorou ngkami are I tangiria iai n riki bwa te aomata are n te karaki. E aki taekina aran neiei Te Baibara, ngaia are ti na aranna bwa ainen Tunem ibukina bwa anne aran ana kaawa.

Te bong teuana e rinanon Tunem te burabeti are Eritai, ao ti warekia bwa iai “te aine ae kakannato; ao e [butimwaea] teuaei bwa e na katoonga te kariki. Ao ngaia are, ngkana e rikekei n taainako, e titiku … n amwarake n te kariki.” I iangoa kukurein te burabeti Eritai ma te kakao n amwarake n ana auti neierei! E a tia n nako tabeua te tai man te kaawa, ao n te bong teuana e taku te aine nakon buuna, “Ngkai, noria, I ata teuaei bwa te aomata ae raoiroi ae ana aomata te Atua

E taku neierei, “Ngkai, I ataia.” E taraa n ae e kaoa Eritai nakon ana auti n aki ataia ae ngaia te burabeti, e karekea ana koaua rinanon te Tamnei ae Raoiroi ngke e kakauongo raoi nakon te bwai are e taekinna ao n reireia Eritai. (Uringnga, akea taian tamnei n te tai anne! Ngaia are e kangaanga bwa kona kina te burabeti man moamoana.)

Ma e aki toki te karaki ikanne. N te taina, e taku te aine nakon buuna, “Ti na karaoa te ru ae uarereke, … ao tina kaki te ne ni wene iai ba nena, ma te taibora, ma te kaintoka, ma kain te bae; ao ngkana e roroko iroura, ao e na titiku iai.”

E tauraoi nanon te aine ae kakaonimaki aei ni karaoa te ruu i nanon ana auti bwa e aonga n ae ngkana e rikekei te burabeti,, e na reke ana tabo n tiku!

N te bong aei ti kona ni karekea te reirei ae korakora man te taneiai aei.

E kakoaua te Uea nakon ainen Tunem bwa Eritai bon ana burabeti te Atua ao e butimwaia ni kauka ana auti bwa e na rin iai.

Ngaira naba ti kona ni karekea te kakoaua ae onoti iroun ana burabeti te Atua ni boong aikai ao ni kauki nanora ao ara iango—ara auti—nakon te rongorongo are e katauraoi ibukira Tamara arei Karawa ni boong aika kaitira.

Nakoimi kairake aika kam tangiraki, I kaoi ngkami bwa kam na titirakini ngkami te titiraki aei: Iai irou au koaua irouia ana burabeti te Atua aika a maiu?”

Tia moanna mai moana.

Tera te burabeti? Te burabeti bon te aomata are e weteaki iroun te Atua bwa e na taetae Ibukina. Iai burabeti i aon te aonaaba ni boong aikai, n ai aron taai ake ngkoa.

Burabeti bon taan mamata ao taan karekei kaotioti. Are nanona bwa a kona n noori bwaai aika aki kona n noori aomata, ao a kona n taetae ni burabeti ni bwaai aika a na riki n taai aika a na roko. A kona naba ni katauraoira imwain kangaanga aika ana riki. A karekei tuua ao kaotioti Burabeti mairoun te Uea. Te karuaia n taekan te onimaki e taekina reitinakon kaotioti ni boong aikai. E kangai, “Ti kakoauai bwaai nako ake e a tia ni kaoti te Atua, bwaai ni kabane ake E kaoti ngkai, ao ti kakoaua bwa E na manga kaoti bwaai aika mwaiti aika korakora ma ni kakaawaki aika kaineti ma Uean te Atua.”

E taekinna Unimwaane Gary E. Stevenson, “E teimatoa n reitinako te Uea ni kaoti Ana tua ao nanona nakoia Ana burabeti n boong aikai ibukina bwa E tangiria ni kairiira nakon te kukurei n te maiu aio ao mimitongin te tiretio n te maiu ae e na roko.”

A taetaekina naba te euangkerio Burabeti ao bon taan reirei aika anainano ao ana tia uarongorongon te Atua nakoia aomata nako i aon te aba.

Membwa n te Moan Beretitentii ao te Kooram n te Tengaun ma Uoman bon burabeti, taan mamata, ao taan kaotioti. Ni beku bwa te kauntira iaan ana kairiri te Uea; iai irouia te kariaiakai n raira te reirei ao ni katei tua ibukin Ana Ekaretia. A tataro mwaaka ma nanoia, ibukin te babaire ibukiia kooram aikai a bane n nanoraoi iai. N te aro aei, e kakoaua nakoira te Uea bwa e na karaoaki are E kantaningaia.

Burabeti a kakoaua Kristo—E Maiu, Ana Mwakuri n Ibuouoki, Arona n Atua.

Ti a wareki tabeua aia koaua ara burabeti man Ana Boki Moomon.

E katanoata Abinataai:

“E na ruo te Atua n oin rabwatana i buakoia natia aomata, ao e na kabooia ana botanaomata.

“Ao bukina ngkai e maiu n te rabwata e na aranaki bwa Natin te Atua.”

E kakoauaa naba Tamuera te Reimwanaite bwa Iesu Kristo bon “Natin te Atua, are Taman karawa ma aonaba, te Tia Karikibwai ni kabane mai moana.”

Ao e taku te burabeti Moronaai, “I a tia n noora Iesu ao … e a tia ni kaitara ma ngai ma n taetae ni kawai.”

Ngke e kawariia Nibwaite Kristo, te moan bwai are e karaoira E weteiia Abotoro ake Tengaun ma Uoman. Ao E taetae nakoia aomata, “Kam na kakabwaiaki ngkana kam ongo n aia taeka naaka tengaun ma uoman ake I a tia n rineia.”

Ngkai, N na tibwai tabeua taeka ibukiia karo ke kain te utu tabeman ake a kaikawaia ataei. Te Uea bon Ngaia are e reireiniia Atam am Ewa koauan te babaire ni kamaiu. Ao imwiina E taku nakoia, “I anga nakoimi te tua, bwa kam na reirei bwaai aikai n aki tiatianna nakoia natimi.”

Tera ae nanonaki n te angareirei n aki tiatianaki? Bon reiakinan koauan te euangkerio, karekean kakoauakiia i bon iroum, ao tibwaakin te atatai nakoia ataei. E bon kakaota aron taai n angareirei aika a karaoaki raoi ao aika a karaoaki n taabo tabeua. Bon maiuakinan te atatai ao te koaua.

Ana Boki Moomon e kabwarabwaraia 2,060 taan buaka aika kairake “bon mwaane aika a kokoaua man taua ma nanoia, bwa a tia n reireiaki bwa ana kawakin ana tua te Atua bwa a na nakonako ma te eti i matana.” Ataeinimwaane aika kairake aikai a ongeaba iroun Ereman, n te tai anne bon aia tia kairiiri n te taanga ni buaka ao aia burabeti naba, ao a ataia bwa tinaia a tia ni kaon nanoia n te koaua ao te onimaki.

Kaaro, n te aonaaba aei a mwaiti bwanaa ao n tabetai te rootongitong, E a tia n tuangiira te Atua bwa tina kaikawaia natira inanon te ota ao te koaua. E onimakiniira bwa tina katabeira n reireiniia natira ana kamaiu te euangkerio ae koaua. Ngkana ti kabwaka ni karaoia, e na bon aki karaoaki n te aonaaba.

Nakoimi Raou kairake, Iai au kakao nakoimi: , I kaoi ngkami bwa kam na katorobubua, kauki nanomi, ao tataro ma te onimaki nakon Tamara are i Karawa, ni bubutiia bwa e na kamatoa nakoimi bwa ana burabeti ae rineaki ao abotoro bon bwanana i aon te aba ni boong aikai.

E reireiniira ainen Tunem bwa ti kona ni karekea te koaua rinanon te Tamnei ae Raoiroi. I berita nakoimi bwa n te tai are ti ataia bwa ngaiia are e kabiriia te Atua, maiura a na kabebeteaki ni kaitaraan kakaewenako aika a reitinako, ngkai ti ongeaba nakon bwanaaia ma te onimakinaki, onimaki, ao te kantaninga. N ongora ao n ongeaba ni bwanaaia burabeti e kakaawaki te teimatoa nakon bwaai nako aika raraoi ni karokoa Kauaokin ara Tia Kamaiu.

E rikirake buakakan te aonaaba, ma Ana Ekaretia Iesu Kristo ao Abanueana a korakora riki nakon are mai imwaina. E karinii kunikai aika a tamaroa Tion, ao ana kaintokanuea Kristo e na bon aki bwaka. E kantaningaira te Uea bwa tina korakora n ara koaua, n onrake n onimaki, ao n rairannano ni katoabong. Ara Tia Kamaiu, Iesu Kristo, e wareniira bwa ti na reitanako Ana mwakuri.

N te taina, e taku te burabeti Iotebwa Timiti, “Tariu, tiaki tina waaki n te mwakuri ae rangi ni kakaawaki aei?” E ngae n anne, ngkai te rongorongo aei e kaineti nakoimi kairake, I tangiria ni kabongana te taeka ae te kairake ao tiaki taari. Tauraoi?

“[Kairake], tiaki tina waaki nako n te mwakuri ae korakora? Waaki nako ao tai keerikaaki. Ninikoria, [kairake]; ao waaki, nakon te tokanikai! E riai ni kimwareirei nanomi, ao n rangi n rianako kukureimi.

I kakaitau ibukin aia kairiiri ao aia mwakuri ae tabu burabeti aika maiu. I anganiko au koaua mai nanou bwa a weteaki iroun te Atua bwa a na waaki nako, katea, ao ni kaira abanueana iaon te aba ni boong aikai. Ae e na teimoatoa n akea tokina. N taainako bon te Uea are e na rineia Ana toro. N aran Iesu Kristo, amen.