Akea Ae Na Tekateka n Ti Ngaia

Inanon 50 te ririki, I a tia ni kamatebwaia te katei, n raonaki ma te katei n te euangkerio. I moanna ma te kukii ni katekeraoi.

N te Chinatown i San Francisco, aia katairiki te utu ae te Gong e momotikaki ma te kukii ni katekerai ao takean ni wanawana n aron “Te mwananga ae tengaa te maire e moanaki man teuana te mwaneka.”

Ngke I kairake, I kakaraoa te kukii ni katekeraoi. Ma nangoan baiu aika mainaina, I rukumma ao ni kamnronronna te kukii ae kabuebue man te ai n umumm.

I kubanako, ngke I reiakinna bwa ngaia te kukii ni katekeraoi bon tiaki te moan katei ae moanaki mai Tiaina. N ata te kaokoro ni katein te kukii ni katekeraoi mai Itiaina, Amerika, ao Eurobe, I kakaei kukii ni katekeraoi man aaba aika mwaiti—n aron ae temanna e kabonganai taabo aika kakaokoro ni mwabena te ura n te buakonikai. Taabo n amwarake i San Francisco, Los Angeles, ao New York a anganako kukii ni katekeraoi, ma tiaki aekan ake i Beijing, London, ke Sydney. Bon ti i Amerika ae bukamarua te National Fortune Cookie Day. Bon ti Tiaina ae katanoataa kanakoan “Authentic American Fortune Cookies”

Kukii ni katekeraoi bon katooto aika bebete, aika kaunga. Ma te tua ae aiaron anne ni kabotau waaki aika kakaraoaki ni katei aika kakaokoro e kona ni buokiira n ata kaokoron te katei n te euangkerio. Ao ngkai e karekei taai aika boou te Uea n reiakin katein te euangkerio n aron kabootau n Ana Boki Moomon ao kaikonaki n te Nutetemanti ni koron nanon taetae ni burabeti.

A mwaing man tabo nako aomata. E ribotinna te United Nation bwa 281 te mirion aika a mwaing n aaba ni kabutaa. Aio bon 128 te mirion rakan riki te aomata nakon are n 1990 ao n riaon teniua te tai riki man 1970 ae katautauaki. N taabo nako, e mwaiti kurikuri taan rairaki ake a kunea Ana Ekaretia Iesu Kristo ibukiia Aika Itiaki ni Boong aika Kaitira. Ni katoa Tabati, membwa ao raao man 195 aaba ao mwakoro ake a bungiaki iai a ikotaki n 31,916 bootaki n taromauri. Ti taetae n 125 taetae.

N aki maan n nako, i Albania, North Macedonia, Kosovo, Switzerland, ao Tiaman, I noriia membwa aika boou ni kakoroa nanon te kabotau n Ana Boki Moomon iaon te kai ae te oriwa. Ni Iakobwa 5Uean te onikurebe ao ana toro a kakorakoraa boton ao mwangan te kai te oriwa n uaia ni ikotii ao ni kaewei ake man taabo aika kakaokoro. Ni boong aikai natin te Atua a ikotaki n teuana ikotaki n teuana inanon Iesu Kristo; te Uea e anga raoi te kawai ae tamaroa ni karababai maiura n ae bwanin ao ni mataata n Ana euangkerio ae kaokaki.

Katauraoakira ibukin abanuean karawa, e taekina te taetae ni kaikonaki Iesu iaon te baka n amwarake ae bubura ao te amwarake n te mare. N taian kaikonaki aikai, irua ake a kaoaki a karekei angaia n aki kan roko. Te mataniwi e tuangiia ana toro bwa a na “kawaetata n nako ni kawain te kawa aika rababa ao aika raereke” ao “nanoni kawai ma oo” ni “kairiia mai” akana aki kaubwai ma akana a uruaki bwain rabwataia ma mauku ma mataki. Taekana n te aro n tamnei, bon ngaira n tatabemaniira.

E taekinaki n booki aika tabu:

“A na bane aaba nako ni kaoaki” nakon “te amwarake n umwan te Uea.”

“Katauraoa kawain te Uea … bwa e aonga abanueana ni waaki nako i aon te aonaaba, bwa aonga kaaina ni karekea, ao n tauraoi ibukin boong aika a na roko.”

N taai aikai naake a kaoaki nakon ana baka n amwarake te Uea a roko man taabo ao man katei nako. Aika kara ao ni kairake, kaubwai ao ni kanaaka, man taabo ao aonaaba ni kabutaa, ti karika ara bootaki n Taromauri n aiaron ara komiunite.

Ngke te mataniwi n Abotoro, e nora karawa Betero bwa e kaukaki ae “ai aron te kunnikai ae abwabwaki ae nnaki rio ni naminganingana ake aua, … ao a bane ni mena iai … manin aonaaba.” E reirei Betero: “I ataia bwa bon te koaua bwa te Atua E bon aki nanonano n tarakin aroia aomata. … Ma e tangiraki i Rouna ane maka [te Uea], ma ni karaoa te raoiroi, ibuakoia botananomata ni kabaneia.“

N te kaikonaki are te I-Tamaria ae raoiroi, e kaoira Iesu n roko nakoia raoraora ao n nakon Ana auti n iruaa—Ana Ekaretia. E kaoira bwa ti na riki bwa rao aika tamaroa. E berita te I-Tamaria ae raoiroi bwa E na oki ao n kabwaka boon kawakinara irouia naake n Ana auti n iruaa. Maiuakinan ana euangkerio Iesu Kristo e raonaki ma karaoan ruu n Ana Ekaretia ae kaokaki.

N ana kairi te tamnei n te “ruu n te auti n iruaa” e raonaki ma “akea ae na tekateka n ti ngaia.” Ngkana ko roko n te umwantabu, ao ko nora temanna n ti ngaia, ko kona n taiaoka ni kangai mauri ao tekateka ma teuanne ke neienne? Aei tao bon tiaki kateim. Tao e na kaokoro teina ke ana taetae ma ngkoe. Ao eng, n aron taekan te kukii ni katekeraoi, “Te mwananga n te reitaki ao te tangira n te euangkerio e moanaki man atongan moa mauri ao akea ae tekateka n onoti.”

“Akea ae na tekateka n onoti” e nanonaki naba bwa akea ae na tekateka n onoti n te namakin ke n te maiu n tamnei. I mwananga ma te karo ae uruaki nanona ni kawara natina te mwaane. Ririki mai imwaina, e rangi ni kukurei te nati te mwaane n riki bwa te rikan ae boou. Kanoan te tai ae kakawaki anne bwa a na utu a kaboa a na moan kau ae e boou.

Ma n te taromauri, a ngareakinna raona n rikan. A boou a na kau, ma bon te katei rimoa. Ma te maamaa ao te uruaki n nano, e taekinna te rikan ae kairake bwa e na aki manga nakon te taromauri. E taonaki nanou n te rawawata ibukina ao ana utu.

Iaon kawain Ieriko ae onrake n te bubu, ti a tia ni ngareakinaki ngaira n tatabemaniira, maamaa ao n uruaki nanora, ke tao ni kaenanaaki ke ni bwainikirikaki. Ao man bukina aika a kakaokoro, ti a tia ngaira n tatabemaniira ni katinanikuaki, n aki kubaraki ke ni mwannanoaki, ke tao ni bon nanona kaikuakan temanna. E bon riki ibukina bwa ti a tia ni kaikuakaki ao ni kaikuakiia tabeman are e a uotiira ni kabane Iesu Kristo nakon Ana auti n irua. N Ana Ekaretia ao rinanon Ana otenanti ao berita aika tabu, ti kawariira i marenara ao n nakon Iesu Kristo. Ti tangira ao ti tangiraki, ti ibuobuoki ao ti buokaki, kabwarai buure ao ni kabwaraaki ara bure. Taiaoka uringnga, “akea nanokawakin te aonaaba ae aki kona ni kamaoa karawa”; e kabebeteaki rawawatan aonaaba—e bon koaua kimwareirein ara Tia Kamaiu.

N 1 Nibwaai 19, ti warekia: “N aiaron naba Atuan Iteraera are [ngaiia] a toua i aan waeia; … a kaakea. … Mangaia ae a na bwainikirinna, ao e na kariaia; ao a na oroia, ao e na kariaia. Eng, a na bawareia, ao e na kariaia.”

E taku raraou Professor Terry Warner bwa motikan taekam, te bwainikirinaki, te oreaki, ao te bawareaki bon tiaki bwaai aika a ririki ma a riki n ana tai ni maiu Kristo i aon te aba. Te waaki ae ti karaoia imarenara—riki naake a baki, naake a taka, naake a katukaki n ti ngaiia—bon waaki ae ti karaoi Nakoina.

N ana Ekaretia ae kaokaki, ti rangi n nakoraoi ngkana Akea ae na tekateka n ti ngaia. Tina bon aki karaoa anne ke ni kariaia bwa e na riki. Ti a bubutimwaai ma te kokoaua, ni kinaiia, n ibuobuoki, n tangira. A na aki riki raoraora, mwanera, tarira bwa iruaa ke ianena ma bon te nati n te mweenga.

N te tai aei, a mwaiti aika a namakina ae a maroaa ao ni katinanikuaki. Bwaai n reitaki ao te wanawana n te kaombiuta e kona ni katikuira ni ingainga nakon te reitakira ao tomaakira ma aomata. Ti tangiria n ongo bwanaara i bon imarenara. Ti tangira ae ti kaaina ni koaua ao n akoi.

A rangi ni mwaiti bukin ae ti namakina ae ti aki tau n te umwantabu—anne, taekan kabotauan, ae ti tekateka n ti ngaira. Tao ti raraoma n aron ara ee, kunikai, baike a rinanona ara utu. Ke tao ti namakina ae e aki tau arora; ti bumokomoko, tangira te maiu ae itiaki, e uruaki ara tangira ma temanna ao n namakin te maraki ao te maamaa, ti raraoma ibukin ana kaetieti te Ekaretia aei ke arei. Tao akea buura, ti raure, a mate kainabara. A rangi ni beroro natira; akea natira. Ti aki nako ni mitinare ke ti oki man te mition ni moantaai. E reitinako aika a karinanaki.

Ti kaoaki ni Motiaea 18:21 bwa ti na booti nanora n te nano ae ti teuana i nanon te tangira imarenara. I kaoira bwa ti na kakerikaaka te raraoma, kauarerekea te motiki taeka, kakerikaaka imanonoakin temanna—ao, ngkana e kainanoaki, ni kauarerekea bukinakira i bon iroura. Ti aki katea Tion n ti tebongina. Ma taekinan “mauri,” moara ni bubutimwaai, e kaniia riki Tion. Tia onimakina riki te Uea ao n rineia ma te kimwareirei n ongeaba nakon Aan tua ni kabane.

Man ara reirei, inanon te mweenga ae onimaki ao aia iraorao Aika Itiaki, Akea ae na tekateka n ti ngaia ibukin te berita ni kaainakina iroun Iesu Kristo.

E reirei te Burabeti Iotebwa Timiti, “E a bon nakoira n noria, ni ira buakona ao ni buoka karabinoan te mimitong ni boong aika Kaitira, ‘inanon tain bwaninin koron boong … ,’ ngke a na ikotaki ana Aomata te Atua aika Itiaki n tii teuana man aaba nako, ao kanoa, ao botanaomata.”

Te Atua, “bon akea te bwai ae kakaraoia ma ti bwaai aika a na kawaaka te aonaba; … bwa e aonga ni kairia aomata ni kabane mwaane [ao aine] nakoina, …

“… E weteia ni kabane bwa a na nakoina ma ni katoonga ana raoiroi; … ao titebo aroia ni kabane imatan te Atua.”

Te rairaki iroun Iesu Kristo ti kantaningaaki bwa ti na kanakoa te aro n aomata ao katein te aonaaba. E reirei Beretitenti Dallin H. Oaks, ti na kanakoi taneiai ao kateira n abara aika kaitara nakon ana tua te Atua ao n riki bwa Aika Itiaki ni Boong aika Kaitira. E kabwarabwaraa, “Iai te katei n te euangkerio ae onoti, rinanin aroaro ao kantaninga ao mwakuri aika ti tearona nakoia membwa n Ana Ekaretia Iesu Kristo ibukiia Aika Itiaki ni Boong aika Kaitira.” Te katei n te euangkerio n raonaki ma maiuakinan te itiaki, kakaean te taromauri ni katoa wiiki, katokan anaakin te kamanging, te baakee, te ii, ao te kobee. N raonaki ma te kokoaua ao karaoan ae raoiroi, n ataia bwa ti waaki n nako mooa, tiaki n ako eeta ke n nako naano, n taian wewete n te Ekaretia.

I reiakinna mai irouia membwa ao rao aika kakaonimaki man aaba ao katei n tatabeua nako. Kamatebwaian koroboki aika tabu n taetae aika mwaiti ao te nonori man taian katei a kananoa te mataata n te euangkerio. Kakaokoron kaotakin anuan Kristo e kananoa au tangira ao mataatau iroun au Tia Kamaiu. Ti bane ni kakabwaiaaki ngkana ti taekina kinaakira n ara katei, n aron are e reireia Beretitenti Russell M. Nelson, bwa ngaira bon natin te Atua, naati n te berita ae tabu, taan iriira Kristo.

Ana rau Iesu Kristo bon ibukira n tatabemaniira. N aki maan n nako e titiraki te kairake ni mwaane, “Unimwaane Gong, I bon kona naba n nako karawa?” E iangoia ngkana e bon kona ni kabwaraaki ana bure. I titirakinna arana, ongora ma te karaurau, ao ni kaoia bwa e na marooro ma ana bitiobi, I rabwatia ma te korakora. E bonako ma te kaantaninga iroun Iesu Kristo.

I taekina te kairake n ataeinimwaane n te tai teuana. Imwiina, I karekea te reta ae aki tiainaaki are e kangai, “Unimwaane Gong, Ngai ao kainabau ti a tia ni karikirakeia ruaman natira … ao ni beku n uoua mition.” Ma “I aki toki n namakina ae N a aki kariaiakaki inanon te abanuea ae Tiretio … ibukina bwa au bure ngke I kairake a bon rangi ni buakaka!”

E reitia n te reta, “Unimwaane Gong, ngke ko taekina aron te kairake ni mwaane ae karekea te kaantaninga ni kabwarakin ana bure, I kaonaki n te kimwareirei, ni moanna n ataia ae tao e [kona ni kabwaraki au bure].” E kainaki te reta ma, “Ao ngkai I a bon tangirai ibon irou!”

Kaainakin te berita ae tabu e nano ngkai ti roko i marenara ao nakon te Uea inanon Ana auti n iruaa. E kakabwaiaira ni kabane te Uea ngkana akea ae na tekateka n ti ngaia. Ao antai ae ataia? Tao te aomata are ti tekateka irarikina tao e na riki bwa raoraora n te kukii ni katekeraoi. Ti a kunea ma te nanorinano ao ni karaoa te tabo Ibukina ao ibukira n tatabemaniira n ana katairiki te Tibutetei, Au tataro ni koaua n arana ae tabu Iesu Kristo, amen.