Te Kakoaua Te Bwai n Tangira ae Akea Tokina

E ataibwai ao moan te mwaaka. Rinanon Otan Kristo ao n ana mwakuri te Tamnei ae Raoiroi, E rooti n taabo n kabane. Rikina bwa E na kakabwaiaira.

E noori arora ngkoa, ngkai, ao tokin kawaira ae akea tokina. Akea te bwai ae konaa ni karabaaki mai Irouna.

Ana kakao Beretitenti Russell M. Nelson bwa “iango n tiretio” e kaumakiira bwa ti na katotonga ana taratara ao anuan Tamara are i Karawa.

Ibukin arona n Rikina n atua aikai, Tamara are i karawa e anganira bwaintangira n kabane aika raraoi, n airi ma ana nonoori ae akea tokina ao nanona ibukira.

Bon te mwioko naba bwa ti na rinerine raoi.

Iesu Kristo e anga maeuna bwa boon te kariaiakaki anne man rarana.

Tabetai tina kona n taku bwa te inaomata n rinerine bon karaoakin are ti taku bwa ti kan karaoia. Ma ngkai te koaua ae e a tia ni kabwarai baera nanona te Inaomata n rinerine bon te bwaintangira ae tabu.

Ngaira bon taan karaoi mwakuri, ao ngkai taan karaoi mwakuri iai bukinara ni bwaai nako. N aio, ao ti bon bukintaeka n ara rinerine ake ti karaoi ni kaineti iaon te atatai are iroura ma bwaai n tangira ake ti anganaki. Ti aki konaa n karaoi rinerine ao n aki bukintaeka man mwiin baike ti rinei.

Bukin tera ngkai iai inaomatara n rinerine?

N rinea te raoiroi.

N rinea Kristo.

N rinea te maeu ae akea tokina—n taainako n taainako.

Te kakoaua mai iroun te Tamnei ae Raoiroi e korakora riki nakon te nooraba. Bon te moan tia kakoaua ibukin Te Tama ao Te Nati. E reirei Beretitenti Russell M. Nelson bwa, “I nanon boong aika i mwaira, e na bon aki kona ni kamaiuaki te tamnei n akean te kairi, te kaetieti, karaunano, ao ana kairoro ae reitinako te Tamnei ae Raoiroi.”

Tariu ao mwaneu, aio bukina ae ti bane n kainanoa mwaakan te Tamnei ae Raoiroi n te bong aei.

Te kakoaua rinanon te Tamnei ae Raoiroi e kona n roko n kawai aika bati. N ai aron te Taura n te ruu ae rotongitong, e kona n kaotaa n te tai ae tawe man baiti. E kona n roko n ai aron karauraun otintaai n te moaningabong. E kona n roko n ai aron oota aika irariki, n uarereken kabonganakin bwaai n rabakau. Tao n te kawai raa, e roko rinanon te Tamnei ae Raoiroi.

I ikawarake n te aba ae tamaroa ae Jamaica; E bon rang kaunga man Tamaroa. E ngae n anne, ngke I waaki n te kauarinan, tabeman kaain au kiraati ao raoraou aki konaa n oota n au rinerine n riki bwa kain ana Ekaretia Iesu Kristo. “Ko kanga n kaina te aro anne?” aki toki n titirakinai. “Ko kanga n kakoaua te karaki anne?”—a nanona te Moan Kaotioti. “Ko kanga n wareka te Boki anne?”—a nanona Ana Boki Moomon. “Ko kakoauai ni kabane bwaai akanne?” Ao “Bukin tera ngkai ko a bon kabanebuaka maeum iai?”

E kamaraki, moarara riki ngkana e roko mai irouia ake I tangiria.

Ma te bwai ae aki ataia bon aio: I tia n karekea te kakoaua mai iroun te Tamnei ae Raoiroi. N aron te kakoaua are kaona nanou, e kamabubui maraki n boong akekei, ao “ibukin te tai ae uarereke, tamnein karawa e [kaoti] imoau.”

Tao ko a tia n titirakinaki tabeua man taian titiraki aikai. Tao n te tai aio ko a tia n rinanon are I a tia rinanona.

Ana bwaintangira ao ana kakoaua te Tamnei ae Raoiroi e tauraoi nakoia aomata n kabane.

Jamaica irou kanga ai aron Palmyra nakon Iotebwa Timiti. Bon au Buakonikai ae Tabu. I aki ataa raoi te tabo are e mena iai Iotebwa ngke e katorobubua n tataro n te Buakonikai ae Tabu, ma I ataa raoi te tabo ae I mena iai ngke e a rabwata iai au Buakonai ae Tabu. E riki n Four Grove Road, Mandeville, Jamaica, inanon au ruu n tebotebo, te aoa 6:00 a.m. nte Katenibong teniua te ririki imwiin au babetito. Te taneiai ae tabu aio e riki man ana kakao te mitinare te aine uoua te wiiki n nako bwa N na wareka Ana Boki Moomon. Titita Audrey Krauss e bon ira ngkai te tetere n te bong aio ma ana utu, ao e teimatoa tangirana.

Te taneiai anne e bon bitai.

Tariu ao mwaneu, te kakoaua ane iroum e aki babane taina ibukin kabonngakina. Te bwaintangira ae mairoun Tamara are i Karawa e nanonaki bwa e na akea tokina ibukina bwa te tia anga akea tokina. Te Kakoaua e na riai n akea tokin taina. E riai n aki mamaara ke n kerikaaki ibukina bwa iai te bwai ae bitaki inanon maeu ke iai te bwai ae bitaki n te aonaaba. E riai n tabe n korakora ibukina bwa, n ai aron ana tarena te toro n te kaikonaki, au kakoaua ae onoti bon te bwaintangira are e na karakaaki—a aki taunaki.

N uringii boong ni kataakiu ao bwainikirinau aika matoatoa ake I rinanoi ngke I uarereke e a tia ni buokai n roko n te tabo are I a ataia raoi ibon irou. I aki tii kakoaua, kantaningaia, ke n onimaki, e ngae ngke aikai bon kanoan kawain te onimaki nakon te koaua ae nene. I kamoamoai ngkami n karaoakin kawaimi i bon iroumi man tabekan titiraki, kamatebwai, tataro, ao n aki mamatam, ao te karaurau n iango. Taiaoka tai katokia. E aki matebuaka ami konabwai ni karekean te kawai nakon te Kakoaua. Antai ke tera ae kona kariaia bwa ena kona n anaa anne? Tera riki te kakoaua ae e korakora ae e na reke iroum nakon are mai iroun te Atua?”

Ni kabane natin te Atua mwane ao aine a kona n karekea te ataibwai ae nano riki, matoa riki, ao n nene raoi ibukiia. N aron Iotebwa Timiti, are e tia n kamatoa ana kakoaua n aki tabe ma kaitara, ti kona n taekinna ma te matoatoa, “I ataia, ao I ataia bwa te Atua e ataia, ao I aki kona ni kaakea, ke ni kataia n aki karaoia.”

Tariu ao Mwaneu aika a tangiraki, kariaia bwa te ati ae uarereke nte koaua ena rikirake inanom n karokoa are bwebwerake n akea tokina nte mimitong ao te ataibwai ae nene.

Ngkana ko bwabetitoaki ao n kamatoaki bwa kaain ana Ekaretia Iesu Kristo ibukiia Aika Itiaki ni Boong aika Kaitira ma ko teimatoa n tabeiaianga ma, “I aki koaua raoi ngkana I ataia,” taiaoka uringa te berita are n tataron te toa: “Bwa ena memena tamneia irouia n taainako.” Ibukin te berita aei, ngaira aikai n kabane ti na kona n uakina te kawai nakon te kakoaua ma te ataibwai n koaua.

Ao aio te koaua ae kakawaki: N aron karekean te kakoaua n kawai aika a bati—Tao e karauaki n raumeaki n aron moan otintaai ke tao e roko nte kaotioti ae mimitong—e bon kainanoa naba te rinerine n karekean te bwaintangira ae kakawaki aei.

Taekinan “I rineia bwa nna kakoaua” e kabebetea riki bwa ena karekeaki te kakoaua mai iroun te Atua. Ngkana ti kunea bwa ara onimaki e a mamaara, uringa bwa am rinerine ake ko karaoi a kamemerea mwaakan te Kakoaua. Ma te kakoaua eaki konaa nako. Tina ti kainanoia bwa tina rinea te manga toma ma ngaia.

Te rinerine bwa ko na kakoaua bon te kawai ae wanawana ao ni korakora ni kabonganaan inaomatara n rinerine.

I aki konaa n noora te kawai ae tamaroa riki n kabonganan inaomatau n rinerine nakon kamanoan au Koaua.

E reirei Beretitenti Nelson: “I bubutiko bwa ko na tabeakina am koaua. Mwakuriia. Bwaibwai iaona. Tararuaia. Nabeakinna bwa e aonga n rikirake. Kamwarakea nte koaua.”

Irou, te taeka barongaiko, mwakuri, tabeakinna, bwaibwai iai, nabeia, ao kamwarakea kanga ai aron te tia tei ibukin te katabeaki n te bwai ae kakawaki man bongana.

N moan tein te Ekaretia, Parley P. Pratt n aki raunnano iroun te Burabeti Iotebwa Timiti ao e rineia bwa e na kabuakaka te Burabeti ao te Ekaretia. “Ngke John Taylor, are e reireinaki te euangkerio iroun Parley e roko n aia kawa, E kairaki iroun Parley ao n tuanga bwa e na aki iriira Iotebwa. E taku John Taylor nakon Parley:

“Imwain kitanan Canada, ko tibwaua am koaua ae matoatoa iaon Iotebwa Timiti bwa bon ana Burabeti te Atua, … ao ko taekinna bwa ko atai bwaai aikai man ana kaotioti te Tamnei ae Raoiroi.

“… Ngkai ao I karekea te kakoaua ae aekakin are ko kimwarerei ngkoa iai. Ngkana e koaua te mwakuri onoua te namwakaina n nako, e bon koaua naba n te bong aei. Ngkana Iotebwa Timiti te burabeti ngkekei, bon ngaia te burabeti n te tai aei.”

I anga au kakoaua bwa Iotebwa Timiti bon ana burabeti te Atua ao te rabuna n burabeti are e karekea e reitinako n te tai aio. Iesu Kristo e kaira te mwakuri aei.

I kaoi ngkami bwa kam n na iangoa kawaimi nakon te kakoaua ae matoa iroun Iesu Kristo ao Ana Euangkerio. Tabeakina am kakoaua; kabongana inaomatami n rinerine n iango raoi ao n uringa te tia anganiko ma Arona ni kabane aika mimitong. I tibwaua au kakoaua bwa te mwaaka anne e mena iroumi. Akea ae kona n rinerine ibukim. Ao akea ae kona n anaa te bwaintangira aei mai iroum. Ko konaa n rineia bwa kona kakoaua.

I berita bwa ngkai kam karaoa aei, ami kakoaua e na riki bwa “te mwanibwa n ran n kamaeu, ae koburake nakon te maeu ae akea tokina.” E na riki bwa te atinroo ao te kaunganano, ao e na konaa kamatoako rinanon taai aika a kangaanga. E na anganiko te konaa n karikirakei bwaintangira n tamnei. E na buokiko n am mwakuri ma am beku. E na riki bwa te Bwaini-buaka n kaaitara Taatan ma kakaitaraam. Ami Koaua e na riki bwa te kimwareirei ngkana ko noora katotongana irouia natim, tibum, ao tibu-torumi ao rinanoia ake ko tangiriia ao n beku ibukiia. E na rang ni mwaakaroiroi ngkana ko tibwauia ao n kabongana n kakoaua.

Ngkana ko ataia, ao ko bon ataia. I ataa anne I ataia. Ti kainanoia riki taan kakoaua iroun Iesu Kristo ao ana Euangkerio. Rooko ikekei! Ukoria! E bon rang kakawaki! Aio bon te kabanea ni bong n tararua—te tai n kakoroan bwaninin bwaai ni kororaoin te tai.

Iesu Kristo e katuruturua te Koaua aei: “Ana mauna Karawa ma Aonaaba, ma au taeka ana bon aki mauna.”

Tariu ao Mwaneu, te kakoaua iroun Iesu Kristo e bon aki nanonaki bwa te bwaintangira ae kai bane taina. Akea mai iai ae babane taina—tiaki te tia aanga, tiaki te bwaintangira, ao tiaki te tia nikira te bwaintangira, ao tiaki ibukina bwa antai ana bwaintangira. Tera ngkana a kona n kabwarabwaraaki am koaua n aron aio. E ngae ngke “ana mauna karawa ma aonnaba,” am koaua ao am kakoaua n ana Euangkerio Iesu Kristo ana bon aki mauna nako. Ngkai bon te tai ni kamatoaa te bwaintangira ae kakawaki aei. N aran Iesu Kristo, amen.