Ana Boki Moomon—te Kaubwai ae Akea n Ai Arona ni Mwanangara
Ngkai ti kanuaira n ana taeka Kristo man Ana Boki Moomon, te Tamnei e na buokiira n mataata n taian koaua ae akea tokiia.
Ko kona n uringa te tai are e anganiko te bwaintangira temanna are e bitaki iai maium? Te Okitobwa aio e mwaakena 40 te ririki n nako ngke I karekei te bwaintangira ae korakora inanon maiu. Ngke I mena n te reirei, I noora temanna raora n reirei ae e etei n okoro taraan moana ae kukurei riki nakoia tabeman raona ni kairake. I kukurei ni memena irarikina. N te bong teuana e tuangai bwa ngaia kaain Ana Ekaretia Iesu Kristo Ibukiia aika Itiaki ni Boong Aika Kaitira. Imwiina e anganai te bwaintangira ae ana boki Moomon .E kaoai bwa N na wareki tabeua iteraniba ao ni kaitibo ma uoman raraona ake a kona ni kaekai au titiraki. Rao akanne bon mitinare.
Ngke I kaitibo ma mitinare, a reireinai ana reirei Kristo ao a kaoai n tou mwiin ana kakao te burabeti Moronaai: “Ngkana a reke bwaai aikai iroumi, kaungai nanomi bwa kam na butiia te Atua, te Tama ae akea Tokina, n aran Kristo, ngkana arona bwa a koaua bwaai aikai; ao ngkana arona bwa kam bubuti ma te nano ae koaua ma nanomi raoi, ao te onimaki iroun Kristo, e na bon kaota te koaua nakoimi, ni mwaakan te Tamnei ae Raoiroi.”(Moronaai 10:4).
I wareki tabeua iteraniba man Ana Boki Moomon ao I tataro. E ngae ngke I tuai karekei mataata man bwaai ni kabane are a reireinai mitinare, I namakinna inanou bwa bwaai ake I wareki a tamaroa ao a roko mairoun te Atua. I karekei kamatoa man ana berita Moronaai: “Ao man mwaakan te Tamnei ae Raoiroi ao kam na kona n atai koauan bwaai ni kabane.” (Moronaai 10:5).
Imwiin bwabetitoakiu nakon ana Ekaretia Iesu Kristo Ibukiia Aika Itiaki ni Boong aika Kaitira, tabeman raorau n te reirei a tuangai bwa I a tia ni karaoa te babaire ae kairua. Ma ni katoa tai are I kaaitarai iai kakaewenako, I karekea te kamatoa rinanon kamatebwaian koroboki aika tabu ao n tataro n tiku ni koaua nakon te berita are I a tia ni karaoia ma te Atua. Imwiina ngkanne, Ana Boki Moomon e riki bwa toau ao n tia n riki bwa te kaubwai ae akea n ai arona ni mwanangau ae mamate.
Ana Boki Moomon e riaon riki ae ti te boki. Bon teuana kakoauan taekan Iesu Kristo, e koreaki mairouia burabeti ake ngkoa rinanon tamnein taeka ni burabeti ao ni kaotioti.
Te bwai ae kakawaki riki are koreaki i nanon Ana Boki Moomon bon taekan ana mwakuri ni ibuobuoki te Uea ae Iesu Kristo i buakoia Nibwaite i mwiin Mangautina. Ana Boki Moomon “e kamatataaki iai reirein te euangkerio, e kabwarabwara te babaire ni kamaiu, ao e tuangiia naba aomata bwaai aika a riai ni karaoi bwa e aonga n reke irouia te rau n te maiu aio ao te kamaiuaki ae akea tokina n te maiu ae e na roko” (introduction to the Book of Mormon).
Te moan etition n Ana Boki Moomon: Kakoauan Taekan Iesu Kristo e boreetiaki n te kaawa ae uarereke i New York ni Maati1830. Te Burabeti Iotebwa Timiti ai bon 23 ana ririki ngke e katiaa rairakin te boki inanon 1829. E raira te boki ni kabane ni kee iaan 75 te bong, ao karaoan te boreeti e kaniia itiua namwakaina.
N te bong aei, 80,000 mitinare aika a bwanin aia tai e raka iaon 150 aaba ike a mwakuri n ibuobuoki, n anga maiuia n anga te kakoaua bwa Ana Boki Moomon e bon koaua ao e taekina kakoauan Iesu Kristo.
N te tiemina ae tibwa karaoaki ibukiia beretitenti n te mition n Tuun n te ririki aei, ara burabeti ae tangiraki Beretitenti Russell M. Nelson, e tibwaua ana kakoaua n Ana Boki Moomon: ““Ana Boki Moomon …bon ana taeka te Atua. E reireiia ana reirei Kristo ao e kabwarabwarai riki taekan Ana Mwakuri ni Kamaiu te Tia Kamaiu nakon rki booki tabeua.”
I tangiria n anga tenua iango are e kona n buoka kamatoaan rairakira nakon Iesu Kristo rinanon kamatebwaian Ana Boki Moomon:
1. Bwaina te Nanomwaaka ao Teimatoa ni Kamatebwai ni Katoabong.
N aron Aramwa ao natin Motiaea mwaane, ti riai “[n ukoukori] koroboki aika tabu ma te nanomwaaka, bwa [ti] aonga n ataa ana taeka te Atua” ao ni kakorakoraaki n te koaua (Aramwa 17:2).
Ngke I beku bwa te tia kairiiri n te mition i Georgia Atlanta Mition, ngai ma kainnabau ti kaungaiia mitinare n tatabemaniira bwa a na kamatebwaia Ana Boki Moomon n aki kee iaan 30 te miniti ni katoabong. Te motinnano anne e karikirakea ara onimaki ao e buokiira n ukoukorii ao ni ni kantaningai taian kakai.
E tamaroa bwa imwin te mition tina aki karekea ara tai ae riai n tebongina ibukin kamatebwaian koroboki aika tabu, ma I berita bwa ni moanbwaian kamatebwaian Ana Boki Moomon n tataromwaaka ni katoabong, kona kunea korakoran te tamnei ao te kakoaua iroun te Uea ao Ana berita.
2. Karaoa am kamatebwai bwa e na manena man kanuaingkami n ana Taeka te Kristo.
E reirei Nibwaai: “Kakukurei ngkami n ana taeka Kristo; bwa taraia, a na tuangko ana taeka Kristo tera bwaai aika ko riai ni karaoi” (2 Nibwaai 32:3
Ni kanuaingkami nanona e raka riki iaon ti te wareware—e nanonaki te karaurau ni katamneia, iangoia, ao ni karaoa nanona. Ngkai ko kamatebwaia Ana Boki Moomon, iangoi kawai ni karika am kamatebwai ni koroboki aika tabu bwa ana uaana. Ibukin te katooto:
-
Kabonganai bwaai n ibuobuoki ibukin te kamatebwai iaon te Gospel Library app.
-
Kinaakin koaua aika akea tokiia are e buokiira ni mataata n ana babaire te Atua ao ni kairiira ni karaoi ao ni kawakin berita aika tabu ma Tamara are i Karawa.
-
Kawakin kiibu n taeka ake a kakaawaki ao tauii mwiin am namwakin n kawakin bwa tera ake ko reiakin inanon am kamatebwai.
Ana Boki Moomon iai mwaakana ni kaekai titiraki ake a mena inanora. N aron are e taku Nibwaai, ti riai ni “kabootaui kanoan koroboki aika tabu nakon maiura, bwa ti aonga n raka man reireinaki iai” (1 Nibwaai 19:23).
Ngkai kam kanuaingkami n ana taeka Kristo, ao a na kaukaki mataroan kaotioti ao ni kaotaki nakoim bwa tera ko kainanoia ni karaoia ni mwaitin kangaanga inanon maium man kaaniko Nakoina.
3. Kaota Am Kakoaua iaon Koauan Ana Boki Moomon.
N aron Riaai e tangiria n tibwaua uaan te kai ni kamaiu ma ana utu (taraa 1 Nibwaai 8:12), ngkana ti karekea te kakoaua n Ana Boki Moomon, ti tangiria ni karikirakea tibwauan te kimwareirei are e roko man ataakin ana euangkerio Iesu Kristo.
Temanna mairouia ara mitinare, Titita Benson, are e iriira n te tetere aei, e tibwaia ma ngai nanona ni kan buoka mwanena ae uarereke. N te tai anne, e katauraoi nakon te kaoreti ao e aki koaua raoi ibukin te nako ni beku n te mition. I namakina te kukurei ni kaoa Titita Benson bwa e na wareka Ana Boki Moomon inanon ana moan aua n namakaina n te mition, ni mwaakeni kiibu ake mamaten nanona, ao ni kanakoi kaobi nakon mwanena.
Titita Benson e kanakoi kaobiin ake e mwaaken man Ana Boki Moomon ao e kaoa mwanena bwa e na warekia ni katoa tairiki. Imwiina e tibwaia ma ngai: “Imwain au mition, mwaneu e aki koaua ngkana e tangiria ni beku n te mition ae bwanin-taina. Inanon te tai, e karaurau, ngkai e wareka Ana Boki Moomon, e kunea rikiraken te kimwareirei inanon maiuna ao e iangoia ni beku n te mition.”
Uoua te wiiki imwain bwanen ana mition Titita Benson, mwanena e a karekea wetena n te mition. Ngkai e beku bwa te mitinare i Mexico Tuxtla Gutierrez Mition. Rinanon Ana Boki Moomon, Elder Benson e namakina katamaroan tamneina inanon maiuna, ike e kairaki nakon ana babaire ni beku iroun te Uea ma te onimaki bwa a na nakoraoi bwaai nako. Te babaire anne bon Te kakai—n kairaki man mwaakan ana taeka Kristo.
Tariu ao mwaneu aika tangiraki, I kaungai ngkami n tatabemani ngkami bwa kam na kamatebwaia ana Boki Moomon bwa e na uaana. I ataia bwa ngkai ti kanuaira n ana taeka Kristo n ana Boki Moomon, te Tamnei e na buokiira n mataata n taian koaua ae akea tokiia ao n tibwauai ara koaua n te onimaki ae matoa nakoia koraki ake E a tia te Uea ni katauraoiia n ongo Ana rongorongo. E reirei te Uea, “Naake I a tia n rineia ongo bwanaau ao a aki kamatoai nanoia” (Reirei ao Berita aika Tabu 29:7). I kakoaua bwa koraki ake a butiia te Atua n onimaki ana karekea te kairi ae itiaki man Ana Boki Moomon man mwaakan te Tamnei ae Raoiroi. Man aei I kakoaua n aran Iesu Kristo, amen.