Bwa Aonga ni Uaia ni Karikirakeaki

Ngkai kaain Ana Ekaretia Iesu Kristo ibukiia Aika Itiaki ni Boong aika Kaitira, ae ti kakabwaiaaki n raonaki ma temanna kaain te Utu n Atua, ti kona ni karekea te buoka mai iroun te tia reirei ae moan te manena. E atai bwaai nako te Tamnei ae Raoiroi, kaotii kakoaua, ao e na “kaururing i [nanora] bwaai ni kabane” E aki toki n taetae Beretitenti Russell M. Nelson iaon kakawakin te ongo nakon bwanaan te Uea. E reireiniira aron kaoan ana kairi te Tamnei ae Raoiroi ao e kaokioka ana bubuti nakoira ni kakorakoraa ara konabwai ni maiura n tamnei ni karekea te kaotioti.

N te tai aei I kaoi ngkami bwa kam na iangoa taben te Tamnei ae Raoiroi, riki ni kaineti nakon reiakinan te euangkerio ao te reirei n te mweenga ao n te taromauri. Te Tamnei ae Raoiroi ti anganaki man te tataro n onimaki man kekeiaki ni maiuna te kororaoi man te bwaintutuaraoi aei. Ana boki n reirei te Ekaretia ae kairaki n te tamnei Reirei n Ana Kawai te Tia Kamaiu e kaotii tuua aika mwaiti are e a tia ni kateia te Uea ni buoka kaoan te Tamnei ae Raoiroi bwa ara tia reirei.

Teuana mai ibuakon tuua aikai bon kaoa te botumwaaka ni kamatebwai. N taai aika nako, tao ti a tia ni iangoa te anga reirei bwa aia tai kaaro ke tia reirei ni kaoa te Tamnei inanon aia katauraoi ao imwiina n tibwaa are a tia n reiakinna ma ataei ke kaain te kiraati, ake tabeia bwa a na ti ongora. Ma ae e na rangi ni mwakuri riki ngkana ngaira, ae taan reiakinaki, ti roko naba n tauraoi ao ngkana ti a reirei a karika namakinan te reiakinaki are karekea oin te kaotioti nakon nanora ao ara iango. Imwiina, ngkana tia anganaki te tai n tibwaa are ti reiakinna rinanon ara kamatebwai ao mairoun te Tamnei ae Raoiroi, ti buokiira i marenara n reireinaki ao ni karikiraekeaki. Ngkana ti kamwakura te tuan te euangkerio, e na kona riki te Tamnei ni kaota koauaiia.

Ao n aron bwaai ni kabane, bon te banna ni katooto ae kororaoi Iesu Kristo. E a tia ni kaoira n tatabemaniira bwa ti na botumwaaka ni kamatebwai ao ni bon tararua oin ara koaua E kaoiia ana reirei bwa a na katauraoiia n reiakinaki, n tibwa are a tia n reiakinna, ao ni mwakuri n te onimaki. E tataro ibukiia, e nora konabwaia ae akea tokina, ongora irouia, ao ni buokiia n ataia ae a tangiraki ao ni kainanoaki

Ngkai ngaira tia reirei, ti kona ni kabotoa ara taratara i aon rikirakeia, karekean kainanoia, ao ni buokiia ni karikirakea aroia ni maiun tamneia rinanon nako maiuia. Ngkai taan reiakinaki, ngkana ti kamwakura inaomata n rinerine inanon reiakinara, ti kaotia nakon te Tamnei ae Raoiroi kukureira n reiakinaki mai Irouna.

I kakaitau iroun te tia reirei are e kaoai bwa N na riki bwa te tia reiakinaki ae tamaroa. Ngke I moana au reirei n te kuura, e kairua au iango are I taku bwa te reirei bon te bwai ae N na rinanona bwa I aonga ni karinaki n te tiim n takakaro. N te bong teuana, imwiin warekan te beeba are I koreia, e tuangai au burobetia bwa e ataia ae I tarena n aron iangoan bwaai ao ni kabwaranakoi nanoia. Bon akea au atatai bwa tera ae nanonaki n anne. E taku bwa man te kekeiaki ae barongaaki I kona n riki bwa ataein te reirei ae rianako. E bon aki reke te aeka ni iango anne irou mai imwaiina. Ana mwamwanano, kaungaakiu, ao ana kakao a bita waakin au reirei ao n rangi ni kakabwaiaa maiu.

Teuana riki te tua ae e irekereke ma kaoan te Tamnei ae Raoiroi bon reireian te reirei ae koaua. Nanon aei bwa ara kamatebwai n te euangkerio ao ara anga reirei a boboto iaon ana taeka te Atua ao ti na aki kataia ni karikia bwa e na anaa te nano ke ni ketina are e tuai ni kaotia te Uea. Irarikin anne, ti kabotoa ara taratara iaon tuan te euangkerio aika bongana ao akea tokiia, are e karika te Tamnei ni kona ni kaotii koauan taian koaua. Teuana riki, ti iriira ana banna ni katooto te Tia Kamaiu. E taku, “Au reirei tiaki au bwai, ma bon ana reirei Teuare e kanakomaiai.”

Reirei aika koaua a kuneaki inanon booki aika tabu ao n aia reirei burabeti aika ngkai. Ana kaumaki te Uea ni kamatebwaii koroboki aika tabu i bon iroura n tatabemaniira ao n ara utu ao ni kakaea te taromauri ni katoa wiiki ni kamatebwaia Ana euangkerio e katamneia n te waaki ae tamaroa aron reiakinan Ana reirei ao n ongo Bwanaana. Ti kamatebwaii koroboki aika tabu ni mataata n te karaki, reirei ake a reiakinaki, ao aron kamwakuran koaua aikai inanon maiura. Ai kakabwaiara ngaira ngkai a kaai n reke iroura boki aika tbu. Katamneia Atam ao Ewa, Abinataai, ke bon te Mataniwi n Tia Reirei Iesu Kristo ni kawara mweengara ke ara kiraati n reireiniira. A bon konaa ngkana ti kanuaira n ana taeka Kristo. Man ara kekeiaki ae teimatoa, ti kona n reiakinna ni mataata ao n tangirii booki aika tabu ao n onimaki ae iai inanoia kaeka nakon titiraki man te nano.

Iai tetaina imwain marera ngke kainabau, ae Kristi, e rangi ni korakai n namakina ana tangira Tamara are i Karawa ao ni mataata n Ana babaire ibukina. Ngke e tataro ibukin kairana, e roko te namakin bwa e riai ni kaea te intitute, ngaia are e a kabaea arana n te kiraati n te Nu Tetemanti. Aron tein te tia reirei n te intitute n reirei man booki aika tabu, ao bon arona n tauii, e kaotia bwa e rangi n tangira ana taeka te Atua. Ngke e iriiria, e wirikiriki te Tamnei ae Raoiroi nakoina bwa bon iai te bwai inanon booki aika tabu ae e kainanoia. Tangiran booki aika tabu iroun ana tia reirei ao ana wirikiriki te Tamnei ae Raoiroi e a anganna te nano ni moana ana kamatebwai ae nanonaki n ana taeka te Atua—are e a riki bwa te mwananga ni maiuna ae nene n te rairaki ao te ibuobuoki ae tabu.

N tokina, n Reirei n Ana Kawai te Tia Kamaiu e taekinna bwa, ara reirei ao kamatebwai a riai n tainako ni boboto iaon Iesu Kristo Ti kona n tainako n taetae ao n rangi ni karinerine ngkai ti taetae Iaona ao n ukorii taai ni kaota ara koaua, ni kakaitau, ao ara tangira Ibukina. Bwa tao ti mena iaa, ngkai ti Uringnga, ti kona ni karekea “Tamneina [iroura]”

Teuana te kawai ni karika Iesu Kristo bwa boton ara anga reirei bon katuruturuana ae bon Ngaia te banna ni katooto ae kororaoi. ni kamatataakin tuan nako te ekaretia. Engae ngkana E aki taekinna ni kaotaki inanon rongorongo ni koroboki aika tabu, ti bon kona ni kainetia bwa Ngaia katotoon te tua are e reiakinaki. Ti kona ni bon titiraki, “Ko kona ni iangoa te tai ngke Iesu Kristo e kaota aron te tua aei n Ana mwakuri?”

Ti kona naba ni kabotoa ara taratara Iaona ma reiakinan Nakoana, mwiokoana, ao aroarona, ni kataia n reiakina tiaki ti n reiakina te bwai are e karaoia ma ni bon mataata bwa antai raoi Ngaia. Te katooto, ngkana ko kamatebwaia te tua iaon te rairannano, e kakawaki atakina bwa ko na kanga n rairananom. Ma e bon kakawaki naba uringan ae tera ae e a tia ni karaoia Iesu Kristo bwa e na kona n reke te rairannano ao ni mataata bwa tera ae e reireiniira te rairannano iaon Kristo, antai raoi Ngaia ao aroarona. E kangaa reken ara tai n rairannano ni kaota aron Ana tangira, botumwaka, ao nanoanga, Ana koaua ni konabwaira ae akea tokina, kukureina ni mate ibukin ara bure, ao te kimwareirei ae E kunea n te kakabwarabure.? Ao te mataata n Nakoana—n aron ana Tibutetei te Atua, Tia Kabooi Maiura, ao te Tia Katokiaoraki—ni buokiira n nora te rairannano bwa Ana kakao ni kaitiaki, ni bitaki, ao ni kamarurungiira. Kabotoan ara taratara bwa tera ae E a tia ni karaoia ibukira ao antai raoi Ngaia e kona ni buokiira ni karekea te “onimaki nakon te rairannano.”

N tabetai, ti na aki kona n nora aroaron te Tia Kamaiu ni kaotaki n rongorongona ni booki aika tabu. Te katooto, ngkana ko wareka taekan Nibwaai ni kabaa te booti, ti bae ni kabotoa ara iango iaon Nibwaai. Ma kabotoan ara taratara iaon te Tia Kamaiu e kona ni buokiira n noria bwa te rekooti aei e aki kawakinaki n reiakiniira aron korakoran Nibwaai ma e kaota nakoira korakoran te Atua—bwa E anganiira korakorara ni kawakin Ana tua ao ni kainaomataira n taai ni kainnano.

Ti kona naba ni kabotoa ara taratara iaon bukinan Iesu Kristo n Ana babaire ni kakukurei ae kororaoi Tamara are i Karawa. E kona ni bita aron waakin maiura n norii baike ti rinanoi rinanon te nonori n Ana babaire ae akea tokina te Atua irarikin are noran te babaire rinanon taraana man baike ti rinanoi n te maiu aei. Te euangkerio bon tiaki karinanin bwaai ake a riai ni karaoaki; bon te rongorongo ae kakukurei bwa e tokanikai Iesu Kristo iaon te bure ao te mate. Bon rinanon karekean Ana akoi ae kamiimi rinanon ara berita ae tabu ma te Atua are ti kona iai ngkai ni maiu ma te kimwareirei ao ni katauraoi ibukin maiura are akea tokina ma Tamara are i Karawa. Ngkai ti reiakina noran Tamara are i Karawa ao ara Tia Kamaiu inanon booki aika tabu, ti na karekea kinakiia raoi ae tamaroa ao ti na nora Aia tangira ao aia kairoro ni katoa tai ao ni korakora inanon oin maiura.

N na aki toki n ururinga namakinan te Tamnei ngke I kairake ngke e reireiniira ara tia reirei taekan ara Tia Kamaiu n ana kabanea ni bong. E buokiira n nora kakawakin te bwai are e riki n te ruu ae i eta, Keketemwane, Korokota, ao te ruanimate ae akea kaaina. E tibwaa ana kakaitau ae korakora ibukin te Tia Kamaiu ao nanona ae korakora ni kan Iriiria. Ana reirei bon te kakao ibukin te Tamnei ae Raoiroi n kaota koauan Iesu Kristo. Ao te Tamnei are I namakinna n te kiraati anne e kamatoa au onimaki ao ni kakorakora au tangira ao au kakaitau ibukin te Tia Kamaiu. Ana kairoro te tia reirei anne e tiku irou rinanon nako maiu. Ngkai ti taekina te tia reirei are temanna, “Ti kona ni kaabueei baira man ain ana onimaki.”

Inanon mweengara ao ara bootaki n te Umwantabu, ngkai ti kabotoi ara iango iaon Iesu Kristo, reirei Ana reirei, ao ni reirei ma te kakaonimaki, ti kaoa te Tamnei ae Raoiroi ni kananoa riki ara onimaki iroun Iesu Kristo ao ni buokiira ni riki n Aiarona, are bon te kantaninga n reiakinan ao kamatebwaian te euangkerio ni kabane.

I kakaitau ibukiia tia reirei inanon maiu, mairouia kaaro aika tamaroa ao taan kairiiri n te tabo ao tia reirei ake mwaane ao aine ake a tia ni weteaki n reirei ao ni kaota aia kakoaua man te tabo n taetae aei, ake a tia ni buokiira n ataa ao ni iriira Iesu Kristo. Ao I kakaitau ibukin te Tamnei ae Raoiroi, te Tia Reirei ae kororaoi. Bon rinanon te Tamnei ae Raoiroi ae I ataa iai Ana tangira Tamara are i Karawa ao iai Ana babaire ae kororaoi ibukira, bwa Iesu bon te Kristo, te Tia Kamaiu ao te Tia Kabooa te aonaaba; ao bwa e a tia ni kaokaki Ana euangkerio ao Ana Ekaretia. I kakaitau ao ni kakoauai bwaai aikai n aran Iesu Kristo amen.