A Kabwaia Taan Raoi

Ti a iangoia bwa ao ngkoa ngkoe te kairake n ataei iaon Kaberenaaum, irarikin naman Kariraia, inanon ana tai Iesu ni mmwakuri. E buta nako taekan te rabi—te tia reirei—aika e kauaanoiia aomata man ana reirei. Kaain kaawa ake a uakaan a barongai mwanangaia nakon te tabuki ietan te nama ao n ongoraa mai Irouna.

Ko ira buakon te rianna n kawain Kariraia ae bubu aona. N rokom ikekei, ko mimi n noora rianakoia aomata n ikotaki bwa a na ongora nakon Iesu. Tabemwaang a wirikiriki n te bwanaa ae mamaara “te meesia.”

Ko ongoraa. Ana taeka e riinga nanom. Inanon te rianna n okirikaaki, ko aki kan kakaraki ma ko tangiria n kainabwaabu.

Ko iangoi baike a rangi ni kamimi—baike a riaon te iango n aomata ma ake n ana tua Moote. E taekina taekan ae te raira tabam ane teuana ao tangirakiia am kairiribai. E berita, “A a kabwaia taan raoi: bwa a na atongaki bwa natin te Atua.”

N norakina iroum, n namakinan rawawata n boong aika bubuaka—n akean am koaua ke te maaku—e roko are e a raroanako te raoi.

Ko taon waem, ko roko n mweengam ma buan ikem. A ikotaki am utu, e titiraki am karo, “Tuangiira tera ae ko ongo ao n namakinna.”

Ko tibwauaia n ae E kaoko bwa ko na kaotaa am oota nakoia tabemwaang, ao n ukoukora ae raoiroi e ngae ngke ko kabuakakaaki. E ruru bwanaam ngke ko taekinna riki: “A a kabwaia taan raoi: bwa a na atongaki bwa natin te Atua.”

Ko titiraki, “I kona n riki bwa te tia raoi ngkai te aonaaba e a minotaki, ngkai e a on nanou n te maaku, ao ngkai e rang kanganga aron reken te raoi?”

Tamam e taraa nako tinam ao n kaeka ma te karaurau , “Eng. Ti moanna bon man te tabo ae kakawaki—mai i nanora. Imwiina i nanon mweengara ao n ara utu. Ngkai ti moana karaoakina mai ikanne, karaon te raoi e na kona n rababa nako n ara kaainga ao n ara kaawa.”

2,000 te ririki imwiina. Ti aikoa tangira ae ti na katautau—aio ae ai bon ngaira. E ngae ngke kanganga aika a namakin te roro ae tabe n rikirake n boong aikai a kaokoro ma ake iroun te kairake n ataei are i Kariraia—te kanaokoroaki, kerikaakin te onimaki, kaikuaki, kiriwe, ao kamwiinibaa iaon te tiotioo mitea—a kaai roro aikai n aitara ma kanganga man taian bubuaka ao untabaraaraa.

Ti kakaaitau, ara kairake n ataeinimmwaane ao n ataeinaine a kabanei nanoia nakon Ana reirei Iesu Krsito: tieminari, Maungatabu Ibukin Kakorakoraaia Kairake, ao Nakomai, Iriirai. Ikai ao a karekea te kakao ae reitinako mai iroun te Uea: bwa a na kaoti aia oota i mataia aomata, a na ukora te raoiroi e ngae ngkana a kabuakakaaki, ao n tangiriia aia kairiribai.

N raonaki ma anne a karekei taeka n kaunganano mai irouia burabeti aika maiu n Kaokan-bwaai: “Taan Raoi a Kainnanoaki.” Totoko ma nanom ae e aki un. Raira te uneaki ao te kamoamoa nakon te ikabwarabure ao te tangira. Katanei kawai aika kawain te ikarekebai ao te uaia n mataata, ma tiaki aika waaki n totoko ao kamaenakoan te aba. Ao manga te berita naba are: “A a kabwaia taan raoi: bwa a na atongaki bwa natin te Atua.”

Nanoia te roro ae rikirake n boong aikai a kakanoa ma kakoaua ibukin Iesu Kristo ao te kaantaninga ibukin taai aika a na roko. E ngae n anne a bon titiraki naba, “I konaa raoi n riki bwa te tia raoi ngkai te aonaaba e reimaurua, nanou e onrake n te maaku, ao n tara n raroa reken te raoi?”

Te kaeka ae korakora bon ngaia naba are eng! Ti butimwaea Ana kaeka te Tia Kamaiu: “I katuka te rau i roumi, I anganingkami au rau. … Ke a tai rawawata nanomi, ke a tai maaku.”

Ni boong aikai, karaoan te raoi e teimatoa n moa man te tabo ae moan te kakaawaki—are i nanora. Imwiina ao n mweengara ao n ara utu. Ngkai ti moana karaoakina mai ikanne, karaoan te raoi e na kona n rababa nako nakoia kaain rarikira ao ara komiuniti.

Ti a tarai riki taabo aika teniua ike e karaoa iai te raoi te Aomata ae Itiaki n Boong aika Kaitira.

Te moan bon mai i nanora. Ana mmwakuri Kristo e kabwarabwaraa aroia ataei n kaniia ma Ngaia. Ikanne ao ti noora te kawai. Kamwatauan taraakin itiakin ma kororaoin nanoia ataei ni karaoan te raoi e kona n riki bwa te bwai ae ti na uaiakinna inanora. Aikai tabeua aron aia kaeka ataein te buraimwarii “Aekara te riki n tia raoi?”

N na tibwauai aia kaeka ake a nako mai i nanoia! E taku Ruuka, “Buokiia tabemwaang n taai nako.” Nei Grace e tibwauaa kakawakin te ikabwarabure i marenara, e ngae ngkana ti taonaki te aki kukurei. E taku nei Anna, “I noora temanna ae akea raona n takakaro, ngaia are I a nako naba n takakaro ma ngaia.” E kaotia Lindy bwa te riki n tia raoi bon te kona n buokiia tabemwaang. “Imwiina ko a manga karaoia nakon are imwiina. E na reitinako n arona anne.” E taku ten Riam, “Tai buakaka nakoia aomata, e ngae ngkana a buakaka nakoim.” E taekinna London, “Ngkana iai ae bwainataeiko ke ni buakaka nakoim, atonga ae kaangai nakoina, ‘Taiaoka e a tau.’” E kunea Trevor bwa, “Ngkana ai tii teuana te tonati n tiku ao kam kan kanna, tibwaia.”

Aia kaekaeka ataei aikai e kaotia nakoiu bwa ti bane ni bungiaki ma te namakin n tamnei n kona n maiuakina te aakoi ao te nanoanga. Ana euangkerio Iesu Krsito e ribanai ao rarangai taian anua n tamnei aikai, n raonaki ma karaoan te raoi, nako nanon nanora, n kakabwaiaira n te maiu aei ao are imwiina.

Te kauoua, karaoan te tia raoi i nanon mweengara n kabonganaan Ana banna te Uea n katamaroa ara reitaki n tatabemaniira nako: te kairoro, te korakai ae maan, te karaurau, te aakoi, te nanorinano, ao te tangira ae aki kewe.

Aio te karaki ae na kaira te iango ae kabwarabwaraa aron teuana te utu ni karika te anua ae karaoan te tia raoi bwa kabaeaia n aia utu, ao aroia ni kakaraoan anua aikai.

A korakai ataei n te utu n aia reitaki ma te ikawai are aki raoiroi anuana n taainako, e kakeai bonganaia aomata, ao n unuun. Ataei aikai, ma marakin ao bwaran nanoia, a tabe ni iangoia bwa tao bon tii te kawai ae tamaroa kaokan naba te katei ae ai aron anne.

N te tairiki teuana a ikotaki ni marooro te utu ni kaotii kanganga aika a riki ma aron aia urubwai. Ao mai i kanne e kaoti te iango—ae tiaki tii katokan te kanganga, ma te bwai ae e na maiuakinaki.

A aki tangiria ni kan kainabaabu ke ni kabooimwii ataei aikai ma a rineia bwa a na karaoa ae tamaroa ao man kaota te akoi. Tiaki tii kakaotan te nanorinano, ma taekinan taeka n akoi man roota te nano ao tatabe irouia aomata, n aki tabe bwa tera ae e karaoaki nakoia. A banei ni kariaia karaoakin aio i nanon te tai ae a baireia, ao imwiina a na manga ikotaki n noora mwiina.

E ngae ngke iai aika a tuai n tauraoi nakon aei, ma a motinnanoia bwa a na anga nanoia nakon ae a tia n baireia.

Tera ae e riki imwiina e rang kakukurei.

A moanna n marau nako bwaai ni kabane. Te moangare e onea mwiin te matanokunoku. Te ikawai, are e teiararoa ngkoa ao man kaebu, e a moanna ni bitaki. Ataei, ake a tia ni kakorakoraaki man aia rinerine ae aanaki n te tangira, a kunea te kimwareirei i nanon te bitaki. E rianako tamaroan te bitaki n te aro are a akea kainnanoan te manga ikotaki ni maroro. Te aakoi e a tia n karaoa ana mmwakuri ae e raba.

Inanon taina, e reke te reitaki ni iraorao, ao ni kakukureiia ni kabane. Te riki bwa taan raoi, ti na kabwarai aia bure tabeman ao man buokiia ma tiaki n ae ti na aki kubariia.

Te kateniua, Karaoan te Raoi i nanon Ara Komiuniti. N ririki ni bubuaka n tain te Kauoua n Buaka n te Aonaaba, e reireiniira Unimwaane John A. Widstoe: “Te kawai ni katean te maeka ae rau bon karikaia mmwaane ao aine aika a tatangira ao ni kakaraoa te raoi. N tatabemaniia nako, rinanon Ana reirei Kristo … iai inanon baina te raoi ibukin te aonaaba ae [bwanin].”

Te karaki ae i mwiina e katamneia taekan te bae e riki anne n te aro ae tamaroa.

Tabeua ririki n nako, uoman mmwaane—te Muslim imam ao te Christian bwaatita mai Nigeria—a aitara n booia iaon te ikatikitiki n aia koaua. A kaai n rangi n rootaki. Ma rimwi, rinanon mwaakan te ikabwarabure, a uaia n rineia bwa a na kaai n toua te kawai ae tii teaina.

Te Imam ae Muhammad Ashafa ao Bwaatita James Wuye a uaia n riki bwa rao ngaiia ao ni ikarekebai ibukin karekean te raoi. Ngaiia ni ikotaki, a katea te tabo ni bootaki ibukiia taan onimaki. A a reiakiniia tabemwaang oneakin te riribai nakon te kaantaninga. Man kauaokin rineakiia bwa taan karekea te Nobel Peace Prize, a uaia n riki bwa taan moan karekea te Commonwealth Peace Prize.

Kairiribai ngkoa aikai a uaia ngkai ni mwamwananga bwa taan karekea te raoi, ni kaai n riki bwa taan kakoauaa ae ana kakao te Tia Kamaiu nakon te riki n tia raoi e aki tii konaa n riki—ma e korakora.

Ngkana e reke iroura ataakin mimitongin te Atua, ngkanne “ e na aki reke te nano ni kan kaikuaka temanna, ma tii te kan maeka i nanon te rau.” Inanon ara bobotaki ke ara komiunitii, ti bia konaa n nooriira n tatabemaniira nako bwa ngaira natin te Atua.

Ni kauarerekeana, I anga te kakao. Karaoan te raoi e kainnanoa te mmwakuri—kanga baikara mmwakuri akanne, aika ti konai n karaoi, ni moanaki man ningaabong? Ko kona n iangoa te teuana-ni-wiiki, tenimwaneka ni kawai ibukin te tia raoi?

1. Te mweenga ae akea iai te kauntaeka: Ngkana e moanaki te kakauntaeka, tei moa ao kauringko man taeka aomwakuri aika a raraoi.

2. Katean te buriiti i aon bwaai n reitaki: Imwaain ae ko katokatoka, ko kaeka, ke ni koroboki i aonraain titirakiniko moa, Aio e buoka katean te buriiti? Ngkana e aki, katokia. Tai kanakoa. Onea mwiina, tibwai baika a tamaroa. Korea taekan te raoi n onea mwiin te riribai.

3. Kanakoraoa ao Kateimatoa te reitaki: Kaain te utu n tatabemaniia a kona n ukora te reitaki ae iraorao bwa e aonga n reke te kabwarabure, te ibuobuoki, karekean te rau, ao te katiteuanaaki.

Teuana namwakina n nako ao I karekea te namakin n kan tibwaa te rongororngo ae: “A Kabwaia Taan Raoi.” N kabanean au maroro, nna tibwai namakin ake I karekei i nanon taai aikai.

Karaoan te raoi bon anuan te riki ni Kristo. A konaa n taaraaki taan raoi bwa koraki aika a bangabwai ke n akea korakoraia. Ma, te riki n tia raoi tiaki nanona bwa ko mamaara ma ko korakora n te aro ae akea ae noora korakoram. Karaoan te raoi e kainnanoa te korakora ao kakeaan bwaai tabeua ma e aki kainnanoa kakeaan reirei aika raraoi. Karaoan te raoi bon te konaa ni kairiri ma te nano ae raoiroi, ma tiaki ma te iango ae buakaka. Bon te konaa ni kawara temanna ma baai n ibuobuoki, ma tiaki timoi aika a nene. Karaoan te raoi tiaki bae e boou, oin maroro iaon bebwa n kaongora. E reiakinna Iesu Kristo bon Ngaia, nakoia ake n te Baibara ao n Ana Boki Moomon. Karaoan te raoi e a tia n moa reiakinana mai i rouia burabeti aika ngkai man moan te tai are a Kaokaki iai Bwaai ao n karokoa te bong aei.

Ti kakoroi nanon mwiokoara mai karawa ngkai ngaira natin Tamara are I-karawa n rki bwa taan raoi. I kaoti koaua ibukin Iesu Kristo, ae te Uea n Raoi, Natin te Atua ae maiu, n aran Iesu Kristo, amen.