Raoiakini Nanomi ma te Atua

Inanon kamatebwaian koroboki aika a tabu, iai taeka aika I kaitiboo ma ngaai aika a katika nanou, ibukina ngke iai nanoia aika a raka n aron are I a tia n noori inanon au tai ni mmwakuri. E a tia n bane au tai n mmwakuri bwa te ooteta n te mwane. Man mwaataiu n ooteta, te taeka ae raoiakinaki e katika au kantaninga ngke I wareki koroboki aika a tabu. Tabeu bon kaboraoan waare ake man taian ribooti ao ake n te rekooti n kabonganai rabakau n ooteta ao ni kakaae. Ti konaa n kangai bwa, au kouru bon kaetakin ribooti iaon te mwane ma beebwa n kaetieti bwa a na iraki nanoia raoi. I kabanei raoi au tai n kakaei ao n kaetii kaokoro n te ware, ao e teretere bwa e bon kainnanoaki te tai ae mwaiti ibukin karaoan aei e ngae ngkana e rang uarereke te kaokoro.

Te Abotoro are Bauro e anga ana kaoriori nakoia I-Korinto bwa ana “raoiakinii nanoia ma te Atua.” Raoiakinan te nano ma te Atua bon kaboraoan nanora ma nanon te Atua ke kaokan ara reitaki ma te Atua are e a tia n aki nakoraoi ke n uruaki man ara bure ke ara mmwakuri. E kangai taekana ae bebete, raoiakinan nanora ma nanon te Atua, bon uarokoan nanora ao ara mmwakuri ma are E tangiria te Atua ke n aron are e reireia Beretitenti Russell M. Nelson, karimooan te Atua inanon maiura

N aron reiakinara ni koroboki aika a tabu, ti inaomata n karaoa ae ti taku ibukira, “n rinea te kawai nakon te mate are e aki totoki ke te kawai nakon te maiu are akea tokina.” Ma ngkana ti aki karaurau raoi, inaomatara n rinerine aei e na manga kona n uotiira nako man are nanon te Atua.

E reirei te burabeti ae Iakoba bwa ngkana ti ataia bwa ti tei raroa ma te Atua, tii kawaira n raoiakinara bon “raoiakin nanora ma te [Atua] rinanon ana mwakuri ni kamaiu Kristo.” Ti riai n ataia bwa te raoiakinaki e reke man te nanoanga, kakoauaan ae ana mwakuri ni kamaiu Kirsto e na kona n karekea te raoiakinaki.

Ngkai ko iangoa aron maium, kamwataua te tai are ko namakina iai raroam ma Tamam are Ikarawa ibukina ngke ko Kitanna. Te katoto, ko a tia n aki bati n rereitaki raoi ma Ngaia n te tataro ke ni kawakin Ana tua. Ngkai ti a tia n rinea ae ti na kararoaira ma te Atua, ti na riai n konaa n manga rinea raoiakinan nanora. E katurua katabeakira te Uea: “Kaaniiai ao N na kaanii ngkami; botumwaaka n ukoukorai ao kam na kuneai; bubuti, ao kam na karekea; karebwerebwe, ao e na kaukaki nakoimi.”

E kanga te Tia Kamaiu ni buokiira ni kaoka aron te reitaki ae kakawaki aei? Ngai irou, I karekea te tokanikai ae tamaroa n raoiakinan nanou ma te Atua ngkana I kakairi n ana reirei Beretitenti Nelson ao n raira maiu n katoa bong. Ibukina ngkai raoiakinan te nano e kanikinakea okin te reitaki are e a tia n uruaki, are imarenan te Atua ma aomata, man ana totoko te bure.

Teuana rongorongon te raoiakinaki are ti kona ni warekia n booki aika tabu bon karakinan Enoti. Iai te bwai ni maiuna ae aki ineti ma nanon te Atua. E anga bwa te katoto arona n onimakina Ana Mwakuri ni kamaiu Iesu Kristo ibukin raoiakinan te nano ma te Atua. E katerea tangiran ae e na raira nanona, ana nano rinano, katuruturuan, ao tauraoin nanona. E kamatoaaki ana reitaki ma te Atua ngke e roko te bwanaa nakoina n tuangnga,“Enoti, a na kabwaraaki am bure, ao ko na kakabwaiaaki.” Enoti e noora uaan te rairannano ao te raoiakinaki are e a tia ni karaoia ngke e taekinna, “Ao ngai, ae Enoti, I ataia bwa te Atua e aki kona ni kewe; ma ngaia a mauna namakian te bure mai irou.”

Te raoiakinaki e aki tii uota te kabebeteaki man namakinan te bure ma e uota naba te rau i nanora ao raora nako. E kanakoraoi aaro n reitaki, e kabebetei nano, e kamatoai nanora n kan iriiria, n karikirakea ara koaua i matan te Atua. Teuana te bwai ae uota te kaantaninga ao te onimaki bon uaan te raoiakinaki are kabwarabwaraaki iroun Enoti ngke e taku, “Ao ngke I a tia ngai ae Enoti, n ongo bwaai aikai ao e a rikirake korakoran au onimaki iroun te Uea.”

Ngke te ataeinimwane ngai, ao iai ana oo n tierii tibu te unimwane. E reke au tai n mwakuri n te onaroka aei, moarara riki n tain te kabuebue are a tawaa iai tierii aikai. Ngke I rang n uarereke, I kunea bwa reitakin mwiokoau bon ti anaakin ao uotakirakean te bwaketi ao n kinikii taian tierii.

E korakora te bitaki n aron kinikakin te tierii imwina ngke tibuu te unimwane e kabooi mitiin ibukin te kiniki tierii. Te mitiin aei e taua boton te aroka te tierii ao ni ioioia, ike a mmrara iai uaana nako aon te nete are taakinaki ibukin rawean tierii ngkana a bwakabwaka. I kunea bwa ngkana e ioa te aroka te mitiin aei, a bon kaan bane naba n mmrara taian tierii inanon tii tabeua te teekan. I noria naba bwa e ngae ngke e ioaki te aroka inanon ae 10 te teekan ke e kan koro te miniti, iai naba tierii tabeua aika a aki bwaka. A bon rang matoa n aki kan kounako.

A riki n bwaka taian tierii man te aroka imwiin kanakoan te kaeti ae te ethylene. Aio te bwai ae e riki imarenan te uaa ao te mwaanga are e a rikirake n akea korakorana. Ma ngaia are kain te tierii are e a mori a akea korakorana ao e kai kounako.

Ti reiakinaki n koroboki aika a tabu, bwa te kai are Iete bon kanikinaean te Mesia, Iesu Kristo, are taetae n burabetiaki bwa e na roko man te kanoa are Iete, taman te Uea are Tawita. N ai aron te ethylene are e kamaraua kain te tierii are e a tawaa, ai aron naba te aki ongoeaba, te nanououa, ao ara raraoma are a kona ni kamaraua ara reitaki ma te kai are Iete, ke Iesu Kristo, n kona n kai koutiira ao n kamaenakoira mai Irouna. Man arora n kakaonimaki, ti riai n tauraoi n kaitarai mamaran nako ara reitaki ma Iesu Kristo.

N Reirei ao Berita aika Tabu, ao a anganaki naba te kauring koraki ake a kakaonimaki: “Bwa e bon kona n bwaka te aomata n bwaka man te akoaki ao ni kitana te Atua ae E maiu.” Ao E reitia man taku te Uea, “Eng, ao a na riai naake a katabuaki n tarataraiia naba.” Ibukin totokoan te bwaka, E tuagiira te Uea, “Ngaia are kaain te ekaretia a na tarataraiia ao n tataro n taai nako, bwa a kawa n bwaka n te kariiriiaki.”

Temanna e kona n katitebooa arora n kai kamwaeiieaki ma are kabwarabwaraaki ni koroboki aika a tabu aroia ake a tai nakon te kamaunaaki man uaan aia mwakuri. E kona n kabonganaaki te mwakoro n taeka anne n kaota te mka, te mwakuri buaka, ke te kerikaaki are e na karika te bwaka ke te uruaki.

Tera ae e kaotia te tawaa aio? E nanonna n are ti a roko n te mwaneka are ti a aki kona ni bitaki? Tiaki, I taku bwa ae e nanonaki iai are ti a roko n te tai are ti a rawa n kan bitaki. Totokoan te riki n tawaa ao n urubekeaki bon karaoan baike a na kakorakoraa reitakira ma Iesu Kristo. N aron are e taekinaki, te rairannano e kaira Enoti nakon kamatoaan ana onimaki. Iai te korakora n te rairannano—ae karaoaki n taai aika a riai, rinanon te namakin. ao rairannano ake a katoa tai. N aron are reireiniira Beretitenti Russell M. Nelson: “Akea te taeka n reirei, ae karineaki riki, ke ni kakawaki riki nakon rikirakeia n tatabemaniira nako n tainako ni katoa bong ae boboto iaon te rairannano.”

N raonaki ma anne, ao e reireiniira te burabeti ae Iakoba bwa kinaakin bain te Atua inanon maiura, ukoran ao karekean te kaotioti, ao ongotaekara nakon te Atua ngkana e taetae e na kona ni buokiira bwa ti na bon aki kona n ioaki. E reireiniira naba Iakoba, “Ti ukoukori kanoan aia taeka burabeti, ao a mwaiti kaotioti ma tamnein taeka n burabeti; ao n nooran kakoaua aikai ao e reke iroura te kaantaninga, ao a aki kai kamwaeaki ara onimaki.” Ongotaekara ao karaoan nanon taeka ma kakao mai irouia burabeti ma abotoro a kona ni kaoniira ma te kaantaninga, onimaki, ao te korakora, ao n tokin te tai ena bon aki kona n kamwaeaki ara onimaki.

I a tia n reiakinna bwa nanora n kan raoiakin nanora ma te Atua e na riai ni kaairaki ma te nano n kan bitaki. Te rairannano ao karekean kakabwaia man ana Mwakuri n Kamaiu Iesu Kristo e na uotiira nakon te onimaki ae e aki konaa n kamwaeieieaki. Te onimaki ae e aki mwaeiei e na karekea tangiran raoiakinan nanora ma te Atua n taai nako. Ngaia aio bannana ae e a okioki naba.

I kaoi ngkamii tariu ao mwaneu, bwa kam na raoiakin nanomi ma te Atua rinanon Ana mwakuri n kamaiu Iesu Kristo. I kakakoauaa bwa karaoan ao kawakinan ara berita aika a tabu e na kakorakoraa riki reitakira ma ara Tia Kamaiu, ao man totokoira bwa ti na aki tawaa nakon te urubekeaki. I kakoauaa bwa raoiakinan nanora ma te Atua, rinanon Ana mwakuri n kamaiu Iesu Kristo, e na bon kamatoatoai ara onimaki.

I ataia bwa Tamara are Ikarawa E tangiriko ao E tangirai, ao E a tia n kanakoa Natina ae Te Riki Temanna, Iesu Kristo, bwa ara Tia Kamaiu, Tia Kabooira, ao te Tia Raoiakiniira. I kakoauaa Iesu Kristo ao aio are I a taekin n aran Iesu Kristo, amen.