Iesu Kristo ao Am Waaki ae Boou

Iesu “e nakonako ni kakaraoa ae raoiroi.” Ti wareka te ribooti ae bebete anne i nanon te boki ae Mwakuri. E bon aki kamataata bonganan te rongorongo! E koaua ae e bon kakaraoi mwakuri aika a raoiroi Iesu! Bon Ngaia raoi boton—ao oin—te raoiroi! E anga maiuna ae mamate ibukin karaoan ae raoiroi. E bon “ataitaiaomata ao n akoi, e iremwe n un, ao e bati te nanoanga,” n akea tokin raoiroina n te nanoanga.

Kataakin kabwarabwaraana ke kakimototoan raoiroina ao ana nanoanga bon akea tiana! E koaua, n aron are e kataia ni kamataata te Abotoro are Ioane, ngkana ti kataia n taui mwiin taai ao baika a kaotaki ibukin raoiroin te Te Kamaiu, “e aki tau aonaba ba neni booki aika a na koreaki.”

Katooto tabeua aika iai iroura ni katamneian rongorongon Iesu rinanon koroboki aika tabu ngke e “karaoa ae raoiroi” a karika te kubanako ao te mimi, riki ngkana ti karaua n iangoa ara namakin ngke arona bwa ti mena ikekei, ni kakoauai Ana kakai, ni butimwaai Ana reirei, ao n rinanon Ana kamaiu. E maroro ma naake a katinanikuaki, E ringiia aoraki ao ake a bareka, E uota te kabebeteaki nakoia ake a kua, E reirei te koaua ae kainaomata, ao E weteia taan bure bwa a na rairannano. Nakoia reebera n tatabemaniia, te mwaane ae matakii, te kabekaau n aine; nakoia mwauku, bonokau, babanga n taetae; nakoia ni kabane tiina ake a rawaawata, taama aika a raraoma, te aine ae akea buuna ae tanginiwenei; nakoia taan motikaki taekaia, taan kamamaeaki, naake a rawawata; nakoia ake a mate rabwataia ke a mate tamneia, tera ae anganiia bon te moan waaki ae boou. Eng, bon teuana naba te rongorongo ae aki bwanin!

Bwaai ni kabane ake E taekin ao ni karaoi e katauraoa te moan waaki ae boou ibukiia n tatabemaniia naake E a tia n katokii aroakiia, ni kakabwaiaia, n reireiniira, ao n kaakeai aia bure. E aki kitaniia, ao e koaua ae e na bon aki naba kiitaniko. Iangoia n te tai aei bwa aongkoa ko ongo Ana taeka ni kamaiu aikai:

“Natiu, a kabwaraaki am bure.”

“Te teinaine, I taku nakoim, uti.”

“Ko na itiaki.”

“Ao Ngai I aki motika naba taekam: ko na nako, tai manga bure.”

“Natiu, e kamaiuko am onimaki; naako ma te rau.”

A kimototo Ana taeka te Tia Kamaiu nakoia aomata aikai, ma man ana taeka aikai ao e kamataata kakukurein te kabwarabure, te kamaiu, kaokan bwaai, te rau, ao te maiu ae akea tokina. Ao te rongorongo ae mimitong bwa E katauraoa te waaki ae boou nakoim ao nakoiu. Ti kona ni bane ni karekea te waaki ae boou rinanon, ao ibukin Iesu Kristo. Ao ngkoe naba. Waaki aika a boou bon boton ana babaire te Tama ibukiia natina ni kabane. Aio bon te ekaretia ibukin waaki aika boou! Aio bon te ekaretia ibukin moanakin te waaki ae boou!

N te bwebetitio ma te ran ao te Tamnei ae Raoiroi, ti a “manga bungiaki” ao ni kona n “nakonako n te maiu ae boou.” Mwaitira te kantaninga ae kona n reke man te manga waaki ae boou nakon temanna ae e a tia n nakonako n rawawatan te bure ke n rotaki ni korakoran te maiu ae e aki rau ke man reitaki aika a nakobuaka? E aki kainnanoa kabwaraakin ana bure Iesu ke te manga waaki ae boou ni maiuna, ma E bwabetitoaki, ao ni kaota nakoira te kawai nakon te manga waaki ae boou are E a tia ni katanea ibukira.

Ao ara waaki aika boou a aki riki n tii teuana te tai. N ara iango ao ara bwabetito bon tii ara tai ae onoti ni moana ara waaki ae boou. Ma bon tiaki. Tiaki tii teuana ara tai. Ara waaki aika a boou aikai a kona n riki ni katoa bong! Ao e koaua ae ni katoa wiiki ngkana ti butimwaea te toa ni kauringa ana bwaintangira ara Tia Kamaiu ae kororaoi, are e mate bwa ti aonga ni kona n kabooui ara waaki nakon mwaitin are ti kainnanoia! E anganiira ara tai Iesu Kristo ni manga kaboouii ara waaki nakon mwaitina ake ti kainnanoia

Ma te tangira ao te kakaonimaki nakon te motinnano nakon te maiu ae boou iroun Kristo, ti kona n riki bwa te “aomata ae tibwa karikaki naba ngkai,” ike a riki ba bwaai naba ngkai. Tera te ibuobuoki ae e na reke man te kauoua ni kakatai anne nakon te nano ae kekeiaki, rinanon teimatoan rinean te onimaki ni mwaakan ara Tia Kabomwi n katoki aoraki ao n kaoki arora, e ngae ngke a mwaiti kakaitara n te aonnaba ae bwaka? E aki bwarannanoa ana motinnano te Tia Kamaiu are e na kakoroa nanon te Tama ao ni katabwanina Ana mition ni kamaiu ae kakannato, n rinanon te maraki ae e karika iai Ruruna, te rara ae wawanako man bwangabwangan kunna, te maraki n rabwatana ao n tamneina, ao n tataro bwa e na anaaki mai irouna te mwangko ae mao. E a manga kaota riki nakoira bwa tera aron te kakaonimaki ae teimatoa ma te Atua.

Ma berita aika tabu ake ti karaoi ao ti bekumwaaka ni kawakin, ti kona ni karekea “te nano nabangkai” ao n kabwanina riki “te tamnei nabangkai.” Teutana imwiin teutana, ngkana ti teimatoa ni kaoa raoiroina nako nanora ao ni katinanikui bwanaa ni kamamaara man ara iango, ti na riki bwa Ana aomata ibukina bwa ti karikia raoi bwa Atuara. E rangi n tangiria Iesu bwa e na riki bwa ara Uea ao te Tia Kawakin Tiibu ao ara Uea n Raoi, ao ti riai rineia n karikia bwa Ngaia i nanora ao n ara iango.

E kauki mataroa te rairannano nakon ara moan waaki aika a boou, moan bobou ao kabouan te waaki. Ana reirei ara Beretitenti Nelson ae tangiraki a tia ni kamataatai aki oota iaon te bwaintangira ae kakannato ae te rairannano, ao I taku bwa ti a moanna n taneiai n karekea.

E kakukurei ongoraeakinan aia kabwarabwara kairake n nanon te rairannano irouia. Tabeua te tai n nako ao I ongo ana taeka te ataeinnaine ma te moangare, “Ngkana I iangoa te rairannano, I namakina te kimwareirei ao te kaantaninga ae moan te korakora. I namakina ana tangira ao kukurein Tamau are i Karawa ao au Tia Kamaiu. I aki maaku ni kawara Tamau are i Karawa n te tataro ao ni bubuti Ana ibuobuoki ma taian angabuaka ake I kaitibo ma ngaia. I ataia bwa A aki kataia ni kuneai ni karaoa te bwai ae kairua. A arori baia. Aio bon te rairannano nakoiu irou,” e taku. E ataa anne te ataeinnaine anne bukin Iesu Kristo, ae e kona ni waakina ae boou!

Ko kainnanoa te waaki ae boou? Ko kona ni karaoa te waaki ae boou, ngkoe naba? Iangoiia aomata ake e kawariia Te Tia Kamaiu—aomata ake E reiakiniia, kamaiuia man te aoraki, tabekiia, kabwarai bureia, ao ni kaokaki aroia. E rineiia man te karinan n aomata ni boboto iaon aia konabwai ke maiuia? E karaoa te kakaokoro i mareia aika raoiroi ao taan bure? E katebenakoia aomata ibukina bwa a kakaonimaki ke n tangiraki riki? E aki.

A roko tabeman nakoina ma te onimaki ae korakora, n onimakina mwaakana ni kamaiu—n aiaron te aine are e nraara,, te tautia n Rom are e a kan kabuanibwai ana toro, te rebera, Tairati, ao Batimea te matakii. A uaia n tuoi aia onimaki, ao ni kantaningaia bwa raoiroin ao mwakan te tia kairiiri mai Natareta e na biti maiuia ao aia aroia. Ao E karaoia. E kariaia butinakon Ana kamaiu.

Ma e kakabwaiaia naba ake a kekeiaki n aia onimaki Iesu, n ai aron taman te ataei are aoraki are takarua, tao n ai arom, “Te Uea, I onimaki; kakorakora riki au onimaki ae karako.” Ao e kaota ana nanoanga ae korakora nakoia naake a aki ukoria, n ai aron te aine ae kuneaki ngke e wene ni bure, te aine ae e mate buuna ae kaain te kaawa are Nain, te mmwaane ae mwauku irarikin te nei are Beteteta, ao te mwaane ae bungiiaki ni matakii. Ko a tia n namakinna n karaoa ae raoiroi i nanon maium e ngae ngke ko a tia n aki Ukoria ke n Iriiria?

Nakoia ni kabane banna aikai i nanon koroboki aika tabu, ao nakoia ni kabane ake a kan ongo ao n kaeka, E anga te manga moan waaki ae boou, bwa tao te maiu ae boou ni kabwaraakin bure ke te maiu ae boou ike e a tia n kamaoaki aorakim, ke te maiu ae boou n kautan te mate.

Tera nanon aio iroum ao irou? Raoiroina ma ana atataiaomata ao ana tangira ma ana akoi bon akea tiaia. Waaki aika a boou bon boton ana babaire te Tama! Waaki aika boou bon ana mition te Nati! Waaki aika boou, karaki aika boou i nanon maiura, ao kakatai aika boou bon ngaiia boton te rongorongo ae kakukurei n te euangkerio!

Ngaia are, ko a tia n kiitan am berita aika a tabu i nanon te tai ae maan ao ko a aki tau n karekea te manga waaki ae boou? I Tuai. Ko a tia ni karaoa aei ke anne n taai aika mwaiti n anganaki riki am tai? I Tuai. Ko a tia n rangi n kararoako ma Kristo ao E a aki kona ni buokiko ni korea am karaki ae boou man te tai aei? I Tuai. Te kaaitara bon tii ngaia ae tokanikai n te kantaninga ae ko a bwaka i nano. Ko aki ngkoe.

Ao waaki aika a boou a bon rangi ni kakaawaki riki nakon bure ma kairuara. Rinanon raoiroin ao mimitongin te Tia Kamaiu, ti kona ni manga moanna mai moana n te aro bwa e na kaungaaki bitakin iango ni kawai, anua aika a aki raraoi, te anua n kiunuun, iango aika a kataorikaaki, namakinan ae akea korakoram, ao te anua n ibukibuki ao te rawa n reke n te bure. Ko bon kona n bitii anuam aika a tia n kabwakako i nanon ririki aika bati. Ko kona ni manga moan waakinna rinanon korakoran te Mataniwii ni moan waaki nako. E aki kona ni kua n anganiira manga moan karaoan ae boou.

Nakoia naake a rinanon te korakai man karaoakin te bure ae e okioki ke taian totoko aika a okioki, ko na teimatoa ni waaki. Akea te bwai n tutuki ae e a tia ni katikua ni kawaim. Akea tiam ae e anganiko ibukin te manga moan waaki mai moana. Ko na waaki nako. Ko na teimatoa ni keiaki. Ko na ukora te ibuobuoki mai irouia ake i rarikim. Ao ko onimakina te manga moan waaki are e mena irakim ni katoaa te tai are ko rairaki iai nakon Tamam ma te nano ni koaua. Kitana karaoan te bure,kaokiokan te kabwarabae, ao te kakaitara ni kamoamoa. Ko aki kainnanoia bwa ko na tiku n arom are mai imwaina. Butimwaea am moan waaki, am ka uoua ke ka teniua ke ka aua—ke am ka tebubua—n tai, are ko anganaki rinanon raraan Iesu Kristo ni kamaiu.

I kakaitau n ae riaon kabwarabwaraana ibukin te moan waaki ae boou are I a tia n anganaki ao ibukin ake N na manga anganaki.

E taekina ana kabanea n rongorongo ara Tia Kamaiu, n akean te rongorongo aio ao e na bon akea boton te kantaninga ke te kimwareirei n te bong aei. Imwiin te rawawata ae moan te bati i Ketetemwane ao ni banena i aon te kaibangaki, E taku, “E a tia.” A kakoroaki nanon taeka ni burabeti ibukin te Tia Kamaiu, ao a kabooaki mwiin aia bure ao korakaia aomata nako. E taekinna “e a tia” Ana anganano ae akea tiana ao akea tokina. E ngae n anne e na bon aki bwanin Ana Mwakuri ni Kamaiu tii ngkana e rinanon te maiu ae boou n ana katenibong, te moan waaki bwa te aomata ae mimitong, ae uti man te mate are riki man mwaakan te Tama.

Ibukina bwa E kakaonimaki ni karaoi bwaai ake e na kukurei iai Tamana, ao ibukina bwa E “a tia ni kainnano iai ibukin nanon Tamau ni bwaai ni kabane mai i moana,” ngkoe ao ngai ti kona ni manga waakina ae boou. Taiaoka karekea moanan am waaki ae boou, n te bong aei, n te tai aei. Iesu Kristo bon te tia Karika ao te tia Kakoroa ara onimaki, are e koroi karaki aika a mwaiti ao ni boou ma ngaira. Ngaia te Moa ao te Toki—tokin te kamaemaeaki ma te rawawata ao moan te maiu ae boou i Nanona, are kariaia bwa ti na karekea Ana akoi, n katikui bwaai ake ngkoa ao n waakina ae boou nakon mwaitin are ti kainnanoia. E koaua Ana “raoiroi ma ana atataiaomata e na bon [iririra] n ua tokin [ara bongi ni maiu].” n aran Iesu Kristo, amen.