Te Ara are Kam Na Weteaki Iai

E reirei nakoira beretitenti Russell M. Nelson bwa, te moan bwai ae E tangiria te Uea bwa kam na ataia moa bon kinaakimi ni koaua: ngaira natin te Atua, inanon te berita, ao ana reirei Iesu Kristo. A kona taian ara riki tabeua ni kataorikaakira.

I reiakina aio iroun natiu te mwaane ngke moan reke ana tareboon. E rang ingainga, ao ni karini araia raoraona ma ana utu n ana tareboon. N te bong teuana, I ataia ae tinana e tareboon. I aon te tikuriin ao e mwakoro te ara ae “Tinau.” E rang tamaroa anne—ao, I ataia, bwa e karinea tinana ni mwengara. Ni bon arona, I a kan ataia Tera te ara ae e anganai?

I kakaea arau ibuakoia raoraona ma ana utu, ao n taku irou bwa ngkana e korea “Tinau” bwa Wendy, ao tao ngai ngkanne “Tamau.” Ma bon akea ikekei. I a manga kakaea te ara ae “Dad.” Ma bon akea naba. E a moanna n roko irou te raraoma. “Tera arau irouna tao ‘Corey’?” E aki. Au kabanea ni ukeuke, I taku, “E mamate nanora n te butiboora—tao e a kan aranai bwa ‘Pelé.’” I kimarimari n au iango. Tokin te tai, I a bon tareboonia ana nambwa, ao a kaoti uoua taeka i aon ana tareboon; “Tiaki Tinau”!

Tariu ao mwaneu, antai arami ae kam weweteaki iai?

Iesu e weteia taan Iriiria n araia aika mwaiti: Ana reirei Iesu. Natin te Atua aika Mwaane ao Aine. Natia Burabeti. Tiibu. Raou. Otan te Aba. Aika Itiaki. N tatabeua nako a uota kakawakin taian ara aikai n tei ibukin ara reitaki ma te Tia Kamaiu.

Ma ibuakon ara aikai, e rianako te ara teuana ibuakoia ake nikirana—te ara ae Kristo. N ana boki Moomon, te Uea Beniamina e kakorakora n reirei:

“Bon akea te ara riki teuana are e na reke mai iai te kamaiuaki; mangaia ae I tangiringkami bwa kam na katoka i aomi aran Kristo. …

“Ao e na koro bukina bwa ane karaoa aio ao e na kuneaki i angatain te Atua, bwa e na ataa te ara are e na anganaki; bwa e na aranaki n te ara ae Kristo.”

Naake a katoka iaoia aran Kristo a bon riki bwa Ana reirei ao ana taan kakoaua. N te boki ae Mwakuri, ao ti warekia bwa imwiin Mangautin Iesu Kristo, a nakonako taan kakoaua ake a rineaki iroun te Atua n reirei ao ni kakoaua bwa ngkana ti kakoaua Iesu, ti riai ni bwabetitoaki, ao e karekea te Tamnei ae Raoiroi ao a na kabwaraaki ara bure. Naake a karekei otenanti aika tabu aikai n ikotaki ma te Ekaretia, a riki bwa ana reirei, ao a aranaki bwa Kiritian. Ana Boki Moomon e kabwarabwara naba bwa taan kakoaua Kristo bon Kiritian ao aomatan te berita bwa “natin Kristo, natina mwaane, ao natina aine.”

Tera ae nanonaki n te araara iroun Kristo? E bon nanonaki ikai karaoan ao kawakinan berita aika tabu, ururingnga n taainako, kawakin Ana tua, ao te nano “ni kan … tei bwa te tia kakoaua te Atua n taainako ao ni bwaai nako.” Nanona n tei ma burabeti ma abotoro n aia tai ni uota ana rongorongo Kristo ni kabuta te aonaba, ma ana reirei, berita, ao otenanti—ni kabuta te aonaaba. E nanonaki naba ni buokiia tabemwaang ni kabebetea korakaia, n riki bwa te ota ao n uota te kaantaninga inanon Kristo nakoia aomata ni kabane. Ao eng, tina kateimatoa aio inanon maiura. E reirei te Burabeti Iotebwa Timiti bwa “ti a roko n te tai aio ae akea te aomata temanna ae e a tia n roko iai.”

Ibukina bwa e matoa te borau irouia ana reirei Iesu ao e kainanoa te kekeiaki “teutana i mwin teutana, te reirei teuana i mwin teuana,” e bebete iroura bwa ti na reke n ana kabwakabwaka te aonaba. Ma a bon aki teimaan baikai ao n aki tau bwa a na tei i bon irouia. Te kaboaki ao te maiu are akea tokina e bon ti kona n reke “rinanon te Mesia.” Ma ngaia, are iriiran taian taetae ni burabeti ao moanibwaian arora n riki bwa ana reirei Iesu e kainanoa te tai ma te iango, riki inanon te tai ni mangaongao. Aio bon nanon ana reirei te Uea ae Beniamina ngke e taku, “Uringnga n taua aran [Kristo] ao e na koreaki n taainako inanomi, … bwa kam aonga n ongo ao ni kinaa te ara are kam na weteaki iai, ao riki, te ara are e na weteingkami iai.”

I a tia n noora aei n au utu. Tibutoru te unimwaane ae Martin Gassner e bitaki maiuna n aki toki ibukina bwa e kaeka ana wewete te Tia Kamaiu te beretitenti n te mwaanga ae nanorinano. N 1909 i Tiaman, n taai ni karawawata akanne, ao n aki tau te mwane. E mwakuri Martin bwa te tia tomatoma n te teuana te tabo ni katoma bwaibu. Ni bon oin ana karinrin, angiin bong ni bwakabwai a bane n te moi mangin, moko, ao kabobwai n tabo n takakaro. E tua nakoina kainabana bwa ngkana e aki bitaki, ao e na kitanna.

Te bong teuana, e kaitibo Martin ma raoraona i aon kawaina nakon te tabo n takakaro ma te boki n taekan te aro ae uarereke inanon baina. E kunea iaon te kawai ao e tuanga Martin bwa iai te bwai ae namakinna ae okoro imwiin warekan te beeba ae uarereke ae atunaki Was wissen Sie von den Mormonen?, ke Tera ae ko ataia n rongorongoia kain te Moomon?” I bon koaua bwa e a tia ni bitaki atuuna.

Te atureti are e titambwanaki mai bukina e bon kona n nooraki are kaota te tabo are e mena iai te ekaretia. E raroanako kakioan te tabo n taromauri, e kamwanangaia te bwai are a warekia ao a baireia bwa na toka n te turein n te Tabati anne n nako n nooria. Ngke a roko, a kunea bwa te tabo are a roko iai bon tiaki te tabo n taromauri, ma aia tabo n botaki mate. E rawa Martin—ibukina, eng, e ikotaki te taromauri ma botakian te mate.kaanga e a bon riao ni kanoan te boraraoi.

Ma i eta, bon te ruu ae kabooaki, ike a kuneia iai aika Itiaki ni botaki.n te kurubu ae uarereke. Te mwaane temanna e kaoia nakon te bootaki ni kaoti koaua. E rotaki n te Tamnei ae Raoiroi Martin ao e anaaki nanona n taian koaua, ake a kaotaki n tain te taromauri. Ao ikekei, n te tabo ae aki kaantaningaia, ao e taku bwa e a kaman ataia bwa e bon koaua.

Imwiina, te mwaane e kaota arana ae ngaia te beretitenti n te mwaang ngkana a kan manga oki. E kabwarabwara Martin bwa e nang raroanako aia tabo ao e kangaanga bwa e na mwananga ma ana utu ni katoa Tabati. E kaeka nakoina te beretitenti n te mwaanga, “Nakomai irai.”

A nakonako tabeua te buraoki nakon te tabo ni karaobwai ae uakaan are e mwakuri iai raraon te beretitenti n te mwaanga. Imwiin te maroro ae uarereke, e a reke aia mwakuri Martin ao raoraona. Imwiina, e kairiia te beretitenti n te mwaang nakon taian auti ni maeka ao ni kabaea aia auti ibukia ma aia utu.

E tia bwaai aikai inanon ti uoua te aoa. Te wiiki are imwiina a mwaing Martin ma ana utu. Onoua te namwakaina imwiina a bwabetitoaki. Te aomata ae kinaaki bwa e rang ni kinimanging e a kinaaki ngkai bwa te tia boutoka nakon te onimaki are boou, are a aranna aomata, tao te ara ae aki rang tatangiraki, bwa te, “tia reirei”

I aki kona ni mwanewea aran, te beretitenti n te mwaanga—iaki kona n uringa bwa e a rang maan te tai. Ma i aranna bwa ana reirei, te tia tei, te Kiritian, te I-Tamaria ae raoiroi, ao te rao. Ti noora mwiin ana mwakuri are karaoia 116 te ririki imwiina, ao I kan toua mwiin te bwai are karaoia.

E taku te taeka teuana bwa ko kona ni wareki koraan taian aroka aika taian aboro, ma ko aki kona ni wareki taian aboro ake a na otinako man teuana te koraa. Te koraa are unikaki iroun te beretitenti n te mwaanga aio e bon kariki uaa aika mwaiti. E aki ataia bwa 48 te ririki imwiina, kanoan Martin n iteran te rabuna aika uoua a kabaeaki n te Bern Switzerland Tembora.

Te reirei ae tamaroa bon tiaki ake ti ongo ma ti nooria, a manena ara mwakuri nakoia aomata, ake a kan riki ai aron Iesu, ao ni karaoa ae raoiroi. Te bwai ae karaoia te beretitenti n te mwaanga bon tiaki mwakoron ana kanoa ni bong. E maiuakina te euangkerio n aron are kabwarabwaraki n ana boki Aramwa: “Aki kanakoia … ake a baki, ke ake a taka, ke ake a aoraki, … a bon akoi nakoia aomata ni kabane, ake a kara ao ake a ataei, … te mwaane ao te aine.” Ao, ti riai n aki motikitaeka, bwa aki kanakoia ake “mai tinanikun te ekaretia ke mai i nanon te ekaretia.”

E taekinna Iotebwa Timiti, bwa naake a katoka iaoia aran Kristo a kinaaki bwa, ““te mwaane ae kaonaki n ana tangira te Atua, e aki rauaki n ti kakabwaiaia ana utu, ma n te aonaaba ae bwanin, e ingainga ni kakabwaiaia reeti n aomata ni kabane.”

Aio aron Iesu ngke e maiu. Ni koauana, E bati ae karaoia n te aro bwa aikoa kona ni korei mwiin Ana reirei. E koreia te Abotoro ae Ioane: “Ao bon bai riki aika bati ake E karaoi Iesu, ao ngkana tao a na bane ni koreaki, I taku ba e aki tau aonaba ba neni boki aika a na koreaki.”

Tia kekeiaki n iriira bannan Kristo, ni karaoa ae raoiroi ao moanibwaia arora n riki bwa ana reirei Kristo inanon maiura bwa n te aro are ngkana ti buokia raora, a na namakina ana tangira te Atua ao kamatoan mwaakan te Tamnei ae Raoiroi. Ngkanne tina raona tibutoru te unimwaane ma mirion riki mwaane ao aine ake a kaotiotia, ai aron Anterea, “Ti a kunea te Mesia.”

N tokin te tai, e na bon aki kabwarabwarai rikira te aonaba. Otenanti ake ti karekei a kabwarabwarai arora n riki bwa ana reirei Iesu, te berita ae tabu are ti kawakin, ao kaotiotan ara tangira nakon te Atua ma kain rarikira man karaoan ae raoiroi. Ngke e reirei Beretitenti Nelson, ngaira bon natin te Atua ni koaua.nati ni berita, ana reirei Iesu Kristo.

I Kakoaua bwa E maiu Iesu Kristo ao e a tia ni kabooira. Bon ngaia ae taku, “I weteiko n … aram; bon au aomata ngkoe.” N aran Iesu Kristo, amen.