Kaonaki n te Anua n Taningamarau

N Meei 2021, n kawaran mwakurian kaboouan te Salt Lake Tembora, e miimi Beretitenti Russell M. Nelson n korakoraia bwaeoniia ake, ma aia bwai n mwakuri aika karako ma te onimaki ae e aki mamaara, a katea te kateitei ae tabu, te kateiei ae anaaki n te tamnei are e a tia n tei n te tai ae maan. Ma, e noora naba mwiin te kanakinako, are e a tia ni karika taian marena i marenan moan atiibun aan te tembora ao aki matoan burikina, e mataata man kanikinaa aikai kainanoan manga kamatoaan rabwatana.

E reireiniira ara burabeti ae tangiraki iroura bwa n aron ae riai ibukin karaoakin mwakuri ni kakorakoraa aan te tembora bwa e na kona ni kaitarai angibuaka, ngaira naba ti riai n kakorakorai ara kakatauraoi—tao kakatauraoi aika ti tuai karaoi mai mwaina—ni kakorakorai oin aan tamneira iroun Iesu Kristo. E katikui nakoira titiraki aika uoua bwa ti na iangoi: “Matoara aami ? Ao tera kakorakoraakin ami kakoaua ao ami atatai n te euangkerio ae kam kainnanoia?”

E katauraoi nakoira aanga aika a roko mai ieta ao aika korakora Ana euangkerio Iesu Kristo ni kaitarai kanakinakoan tamneira, korakoraa ni kamatoaa aara ao ni buokiira n aki karekei marena inanon ara onimaki ao te aki matoa n ara kakoaua ao ara atatai n koaua aika tabu n te euangkerio. Teuana te tua ae riai ibukin karekean te kaantaninga aei e kuneaki mwakoro 12 n Reirei ao Berita aika Tabu, te kaotioti ae karekea te Burabeti Iotebwa Timiti ibukin Joseph Knight, te mwaane ae raoiroi are e ukora te mataata n nanon te Uea, tiaki ibukin taraakina ma teina n aki mwaingiing n rikina bwa ana reirei Iesu—“matoa n ai aron bouani karawa”. E katanoata te Uea:

“Nooria, I taetae nakoim, ao nakoia naba naake a tangira wakinan ao katean te mwakuri aei;

“Ao akea ae kona n ibuobuoki n te mwakuri aei tii ngkana e nanorinano ao n onrake n te tangira, n iai te onimaki, te kantaninga, ao te tangira ae kororaoi, n taubaang ni bwaai ni kabane, ni bwaai nako are e onimakinaki iai n ana tararua.”

Ana kairi te Tia Kamaiu, ae koreaki n te kaotioti ae tabu aei, e kauringiira bwa te taningamarau bon te mwakuri ni kakorakora ae kakaawaki ibukin aara ae matoa iroun Iesu Kristo. Bon teuana mai buakon anua aika a riai, tiaki ti bukiia ake a tia n weteaki bwa ana beku ma ibukiia ni kabane ake a tia ni karaoi berita aika tabu ma te Uea ao ni butimwaia bwa a na kakaonimaki n Iriiria. Te taningamarau e inanoi raoi man kakorakorai anuan Kristo ake a taekinaki n te kaotioti aei: te taotaonakinnano, onimaki, kaantaninga, tangira ae kororaoi,ao te tangira ae itiaki are e bwaro mai Irouna. N reitaki ma anne, karekean te taningamarau n te aro ae boongana ibukin kamanoan tamneira ni kaitarai kanakinakoan tamneira ae e raba ma e teimatoa n riki man ana kariiri te aonaaba ake a kona n kamemerea aara iroun Iesu Kristo.

Ibuakon anua ake a karekei taan iriira Iesu ni koaua, e tei te taningamarau bwa bannan te Tia Kamaiu i bon Irouna, uaan te Tamnei ae kakawaki, a tauraoi nakoia ni kabane ake a kaukii nanoia nakon kairakiia mai ieta. Bon te anua ae uota te rau nakon te nano, ni kairii nanora ma ara namakin ma te wanawana ao te rau. Ni koroboki aika tabu, e kaotaki te taningamarau bwa mwakoron rikirakera ae kakaawaki inanon mwanangara n tamnei, ni kairiira nakon te taotaonakinnano, te aro n atua, te nanoanga ni katamaroaan ara namakin, ara taeka, ao ara mwakuri.

A na rikirake n nanorinano ao n onrake n te tangira taan iriira Kristo ake a kekeiaki ni karikirakea anuan Kristo aei. E rikirake i nanoia te korakora ae rau, ao e rikirake konabwaia n taobarai uniia, n ribanaa te nanorinano, ao a reitaki ma aomata ma te taotaonakinnano, karinerine, ao te kakatonga, e ngae ngkana e kare ni korakora angin te kakaitara. A kekeiaki n aki iraanako nanoia ma a rineia bwa a na mwakuri ma te wanawana n tamnei, ni kairaki n nimamanein ao ana kairi ae marau te Tamnei ae Raoiroi. N te aro aei, a kauarerekea kanakinakoan tamneia bukina bwa, n aron are reireia te Abotoro Bauro, a ataia bwa a konai bwaai ni kabane iroun Kristo, are kakorakoraia inanon riki kaaitara ma kataaki ake ana roota aia koaua Ibukina.

N ana reta Tito, e taekin reirei aika tabu Bauro ibukin konabwaia ake a tangiria n riki bwa taan tei ibukin te Tia Kamaiu ao ni karaoa Ana kantaninga ma te onimaki ao te nanomatoa. E taekinna bwa a riai n atataiaomata, e na taua bangina, e na taua bukin te taeka are koaua n ai aron reireiana, ao n tabu—anua aika kaota raoi aron te taningamarau.

Ma, e kauringiira Bauro bwa “e na tai rarawa, e na tai kai un,, … [ao] e na tai kai oro.” Aekaki n anua aikai a kaitarai ana kaantaninga te Tia Kamaiu ao a kamemerea rikiraken tamneira. N ae taekinaki n koroboki aika tabu, “e na tai rarawa” bon temanna ae e aki mwakuri ma te kainikatonga ao te kamoamoa; “e na tai kai un” bon temanna ae e kararoa ma te nano n aki kan taotaonakinnano ao ni kai ebu; ao “e na tai kai oro” e nanonaki iai temanna ae e katannako man te kakauntaeka, iowawa, ao anua n kaikoaki rinanon te taetae, te rabwata, ao te namakin. Ngkana ti keiaki ni bitii anuara rinanon te onimaki ao te taotaonakinnano, ti kona n atinrooaki nakon bwaan Ana akoi ae matoatoa ao n riki bwa bwaai ni mwakuri aika itiaki man nakoraoi inanon Baina aika tabu.

N taraakin kainanon karikirakean te anua n taningamarau, I kauringaki n ana taeka Aana, tinan te burabeti are Tamuera—te aine ae korakora ana onimaki are, e ngae inanon ana tai ni kataaki, e anga ana anene n kakaitau nakon te Uea. E taku, “Kam na tai manga taetae ni bati ni kainikatonga; Ke e tai oti nako te kainikatonga mai wim: Ba te Atua ae ataibwai Iehova, Ao a tauaki mwin rawawatani mwakuri i Rouna” Ana anene bon tiaki ti te tataro—bon te kakao nakoina bwa e na mwakuri ma te nanorinano, te taotaonakinnano, ao te taubang. E kauringiira Aana bwa te korakora n tamnei ni koaua e aki kaotaki rinanon aroaro n aki taubang ke taeka aika aki raraoi ma n anua n taningamarau, n iango raoi aika kaineti ma wanawanan te Uea.

N angiin te tai, e kamoamoai anua aika karika te iowawa te aonaaba, te kainikatonga, te aki taotaonakinnano, ao te aki taubang, ao n angiin te tai e tarai anua aika a reke man karawawatan te maiu n te bong ae koraki ao anuaia n tangira kamoamoakiia ma kinaakia. Ngkana ti tannako man te anua n taningamarau ao ni katinanikui ana kairi te Tamnei ae Raoiroi aika aamarau mani beebete rinanon arora n mwakuri ao n taetae, ti kai bwaka n ana kamwamwane te kaaitara, are e na kairiira n taekin taeka ao n karekei anua aika ana uota te uringaaba korakora nakoira, inanon reitakira ma aomata, ara utu, ao n te ekaretia. E kaoira Ana euangkerio Iesu Kristo bwa ti na kammwakura te anua ae riai aio, bwa bon inanon taai aikai are e na oti iai anuaia aomata ni koaua. N aron ae taekinna ngkoa Martin Luther King Jr., “Tokin taraakin te mwaane e aki mena inanon taai n mwengaraoi ao n angaraoi, ma n taai are e mena iai inanon te kangaanga ma te kakaitara.”

Ngkai aomatan te berita ae tabu ngaira, ti weteaki bwa ti na maeka ma nanora aika unikaki ni matoa i nanon berita aika tabu ake ti a tia ni karaoi ma te Uea, moarara riki n banna ake E katei rinanon Bannana ni katooto ae kororaoi. Ni boon mwiin anne, E tia ni berita, “E koaua, e koaua, ae I taekinna nakoimi, bwa aio au reirei bwa ane e kateitei i aon aio ao e boni kateitei i aon au bwa, ao e na bon aki tokanikai mataroan moone ni kaaitaraa.”

Ana mwakuri te Uea i aon te aba e mwakenaki man te anua ae itiaki n te taningamarau i nanon arona nako. N ana katooto ae kororaoi, E reireiniira bwa ti na “bwaina te taotaonakinnano n tain te karawawata, n aki kabuakaka ni kaaitaraia taan kabuakaka.” Ngkai E reireiniira bwa ti na aki kai un n kauntaeka ao n itabaraara, E taekina: “Kam riai n rairananomi, ma n riki bwa kanga te teei ae uarereke.” E reireiniira naba bwa naake iai nanoia n Nakoina ma nanoia ae bwanin a riai n raoikiniia ma naake a un irouia ke ma naake iai uniia irouia. Ma te anua n taningamarau ao te nano ae nanoanga, E kakoaua nakoia bwa ngkana e karaoaki nakoira te iowawa, te aki akoi, te aki karinerine, ke te aki riai, Ana aoki e na aki kitaniira, ao Ana berita n rau ae tabu e na aki kamwaingaki man maiura.

Tabeua ririki n nako, ngai ao kainnabau e reke tibwangara ae tabu ni kaitiboo ma tabeman membwa aika kakaonimaki n te Ekaretia i Mexico City. E mwaiti ibuakoia, i bon irouia ke mairouia aika tangiraki irouia, a tia n rinanon kataakia aika akea kabotauaia, n aron te kimoaaki, te tiritiri, ao tabeua riki karawawata aika kauruaki nano.

Ngke ti tarai ubuia Aika Itiaki aikai, ti aki noora te un, te kairiiribai, ke tangiran te kaboomwi. Ma, ti noora te nanorinano ae mabu. Moaia, e ngae ngkai e oti iai te rawawata, a kaotanakoa te nano n tangira te kamaiuaki ao te karaunano. E ngae ngke a uruaki nanoia n rawawataia, ma Aika Itiaki aikai a reitinako inanon te onimaki iroun Iesu Kristo, n rineia bwa a na aki reke taian marena n aia onimaki man rawawataia ke ni karika te aki matoa inanon aia kakoaua n te euangkerio.

N tokin bootakira ae tabu arei, ti kamauriia n tatabemaniia. Ara iobai ni bane, ingara ni bane a riki bwa te kakoaua ae mabu bwa man ana ibuobuoki te Uea, ti kona n rineia bwa ti na reitaki ma te taningamarau nakon karawawataan ao kangaangan te maiu. E oti bannaia ae mabu man rinano bwa te kakao ao te aamarau bwa ti na nakonako ni kawain te Tia Kamaiu ma te taningamarau ni bwaai nako. Ti namakinna bwa ai aron ae ti mena ibuakoia anera.

Iesu Kristo, te kabanea ni korakora ibuakora, e maraki ibukira ni karokoa E waanako rarana man bwangabwangan kunna, ma E aki kariaia rinin unna i nanona, ke tao ni katinakoi taeka n iowawa, kaunuun, ke taeka aika buakaka mai Wiina, n ana tai ni karawawataaki. Ma te taningamarau ae kororaoi ao te nimamannei ae akea kabotauana, E aki ti iangoia i bon Irouna ma e iangoia natin te Atua n tatabemaniia—n rimoa, ngkai, ao n taai aika ana roko. E kakoaua te Abotoro Betero n anuan Kristo ae rianako arona ngke e taekinna: “Ngke E taetaebuakaki, ao E aki manga taetaebuaka; ngke E kamarakaki, ao E aki kareke kaia; ma E anga nakon teuare motiki taeka n te raoiroi.” E ngae ibuakon Marakina ae korakora, e kaota bannan te taningamarauna ae kororaoi mai ieta te Tia Kamaiu. E taekinna, “E ngae n anne, te mimitong nakon te Tama, ao I nimma ao ni katia au katauraoi ibukia natia aomata.”

Tariu ma mwaneu aika kam tangiraki, I kanakoa te kakao nakoira ni kabane bwa tina kaoni ara iango ma nanora n anuan Kristo n maiunan te riai, bwa te kaeka ae tabu nakon ana wewete ni burabeti ara Beretitenti Russell M. Nelson. Ngkai ti keiaki mwaaka ma te onimaki ao te botumwaaka n karina te taningamarau n ara mwakuri ao taetaera, I kakoaua bwa ti na kakorakoraira man atinrooi maiura nakon aan ara Tia Kabooi Maiura.

I kaota au koaua ma nanou ni bane bwa te teimatoa ni karekea te taningamarau e na kaitiaki tamneira ao ni katabui nanora imatan te Tia Kamaiu, n amarau ni katitikiira ni kaaniira Nakoina ao ni katauraoira, ma te kaantaninga ao te rau, imwain te bong are mimitong are ti na kaitibooaki Mangaia ni Kauaokina. I tibwauaia taeka aika tabu aika n aran ara Tia Kamaiu, Iesu Kristo, amen.