Taraa te Atua ma ni Maiu

I nanon Tuun te ririki aio, e riki te kabuanibwai ae rang bubura n te aba ae Lesotho i Aberika maiaki. E uotiia 20 kairake n ataeinaine ma itiman aia taan kairiri man te Maputsoe Branch te bwati ae uarereke n kaea kautun aba, ae Maseru, ibukin aia bootaki ataeinaiine man te Maseru Lesotho District. N touan kawaia ae uoua-nrain te moaningabong tewaana te kaa man te kawai are e kaitaraia, e kataia n rimoan te kaa tewaana ngke e a tokara nako ana rain te bwati are e buti i aona. Bon akea te maawa ke te tai ae e na konaa n totokoa te untaba, ao inanon tabeua teekan ao a untaba bao aikai, a rabino nako man te kawai, ao a kia n rebwe n urarake.

N anne, 15 aika a kabuanibwai maiuia iai, onoman kairake n ataeinaine, uoman aia taan kairiri n te bootaki n kairake n ataeinaine, ao te Beretitenti n te Mwaanga ae Maputsoe ma kainnabana. A kaoti nanoia ake reke maeuia, aia utu, ao raraoia te un, te mamara n rootakin aia iango, ao uringan kaairua. E ngae ngke iai namakin aikai ma tangiran kaekan titiraki aika bati, a kabebeteia i marenaia ao n tan nakon te Atua rinanon katangitangi aika tabu, koroboki aika a tabu, te tataro, are a kunea iai te mwengaraoi. E kaota ana kakoaua Sestso’ana Selebeli ae tebwi-ma-itiua temanna ae reke maeuna, “E tangiriira Iesu Kristo ao e mena i rarikira, e ngae ngke e rawawata nanora.”

Te kairake n ataeinaine ma te tia kairiri are a karinaki n te oo n aoraki ibukin kamaoan bueen rabwataia a uaia ni kamatebwaia ana Boki Moomon. E taku temanna, “Ti a tia ni wareware n Moronaai, ao Moronaai e taekina raoi te bwai ae I namakinna. … Ngke e taetae, ai aron ae kangai, ‘Ko a tia n reiakinii taeka aikai bukina bwa a koreaki ibukim ni buokiko n rinanon aei.’”

N te ikotaki n tao atama ibukia ake a bua maeuia, E anga ana reirei iai te Kaitingaun n te aono ae Unimwaane Siyabonga Mkhize, “Ti riai n bane n tan nakon te Uea n te tai aio ao n butia bwa e na raoiakina nanora ao … n kabebetea te maraki are ti namakinna.” E kaumaki te beretitenti n te Botaki n Ataeinaine man te mwaanga ae Leribe Branch, Mampho Makurai, “Tan nakon te Uea, ao karekea te korakora n butimwaea Nanona. Iesu Kristo bon ‘te tia karika ao te tia karokoa n te toki n ara onimaki. [Ebera 12:2]. Tai katan nako, ma katan Nakoina.”

Katan Nakoina. Ana taeka e kaoka ana reirei Aramwa nakon natina Ereman: “Taraia bwa ko taraa te Atua ao ni Maiu.” E taekina ana taneiai Riaai ao ana botanaomata Aramwa ma te Riaona: “na bon riai n rang beebete ibukim bwa ko na ongeaba nakon ana taeka Kristo, are e na kotea nakoim te kawai ae eti nakon te kakukurei ae akea tokina, n aekaia naba ara bakatibu bwa a na ongeaba nakon te kambwati, are e na kotea nakoia te kawai ae eti nakon te aba ni berita.” E taku Aramwa, “Ngkana a na taraia a kona ni kamauiaki. … Ao ngkana Ti … taraia ti ana kamauiaki n akea tokina.”

.N te tai teuana ae okoro, e taekina te katoto Aramwa are e tei ibukina te naeta te buraati are e kateia Moote ngke a rootaki tibun Iteraera man ana kamwane te naeta. E tuanga Moote te Uea bwa e na karaoa katotongan te naeta ao n tabekia rake iaon te kai ma te berita “bwa are a tenaaki, e na taraia, ao ni maiu.” E kabwarabwara Aramwa bwa te tamnei te buraati bon te kanikina ibukin Kristo, are tabekaki rake nako aon te kaibangaki. A mwaiti ake a taraia ao a kamaiuaki, ma tabemwaang, n aron ana taeka Aramwa, a “matoatoa” n te aro are a bon aki taraia ao a mate.

E titiraki Aramwa:

“Ngkana kam kona ni kamaiuaki ti man taratarami ni matami bwa ko aonga ni kamaiuaki, tiaki bwa kam na waekoa n taraia, ke kam kan kamatoai nanomi ni kakewea, man taningaroti, bwa kam rawa n taratara nako ni matami, bwa kam kan mate?

“… Moanna ni kakoaua Natin te Atua, bwa e na roko ni kabooia ana botanaomata, ao bwa e na maraki ma ni mate bwa e na karaoa te mwakuri ni kamaiu ibukin aia bure; ao bwa e na mangauti riki man te mate, ae e na kakoroa bukin te mangauti, bwa aomata ni kabane a na tei i matana, bwa a na motikaki taekaia n te kabanea ni bong ni motikitaeka, ni kaineti ma aia mwakuri.”

E koaua, te reirei ae “taraa te Atua ao kamauiaki” iai nanona ibukira ao tiaki ti ibukin te maiu ae akea tokina, ma e konaa n bita arora n kabane ao nakoraoin maiura ae mamate. Uringa ana taeka te titita ae kairake Selebeli i Lesotho are taekinna—“E tangirira Iesu Kristo ao e mena irarikira, e ngae a rawawata nanora.”

Bon aron rikin te aonnaba ae bwaka aio—are e maeka teuare e buakaka iai ao aomata n kabane aki kororaoi—e na iai te aki kukurei ma te kanganga, kainano ma nanokawaki, kabwaka ma kabua, te bwainikirinaki ao te aki tituaraoi. Bon ti man taraakin te Atua are aomata n tatabemania, utu, ao ai aba nako ana kona n rikirake. E reirei Beretitenti Nelson, “Ibukina bwa te tia Kamaiu, rinanon Ana Mwakuri ni Kamaiu ae akea tokina, e kaboira ni kabane man mamaarara, kairua, ao ara bure, ao ibukina ngkai E rinanon maraki ni kabane, raraoma, ao karawawata ake a reke iroum [taraa Aramwa 7:11–13], ngkanne ngkai ko rairananom ni koaua ao ni karekea Ana buoka, ko kona n tokanikai man kangangan nako te aonaaba.”

Akea riki te berita ae kakiokaki riki nakon aio n mwakoron Ana Boki Moomon: “Ngkana kam kaawakin au tua, ao kam na kakabwaiaki n te aba; ma ngkana kam aki kaawakin au tua, ao kam na kaakeaki mai matau.” N taneiaia n maeu aomata n ana Boki Moomon n tienture aika bati a kaota koauan taeka aikai. “Kakabwaiaki” e nanonaki kukureia n ana kairiri ma ana kakabwaia karawa i nanon mauia. “Maiuraoi” e nanonaki bwa karekean te maeuraoi are a kona iai ni mareaki, karikirakei aia utu, ao ni ibuobuoki nakon kainnanoia tabemwaang. “Kakabwaiakiia” bon te konaa n tokanikai iaon kainano ma kakatai. Rinanon ana nanoanga te Uea, “bwaai n kabane a [tia] reitaki n mwakuri ibukin [aia] raoiroi,” katamaroa, ao n kananoa aia reitaki ma Ngaia.

E kamataata Aramwa bwa te taratara nakon te Atua bon kawakinan Ana tua, teimatoa n tang nakoina ibukin Ana boutoka, maroro ma Ngaia n waaki n kabane, ao kariaia nanom bwa ena onrake n te karabwarabwa Nakoina n te ngaina ao te bong. Ana tua te Atua ma ana reirei a kuneaki rinanon booki aika tabu ao rinanon aia taeka Ana toro. Reirei ma kantaninga ake a kabwarabwaraki i nanon “Te Utu: Te Katanoata nakon te Aonnaba” bon te katoto ae onoti. Ao teuana naba e kuneaki man te kairiri n te booki ae Ibukin Kakorakoraia Kairake. Aia boto n iango Kairake n Ataeinimwane ma Kairake n Ataeinaine ibukin te ririki aei “Taraa Kristo” e karekeaki ma n ana kairiri n karaunano te Uea nakon Iotebwa Timiti ma Oliver Cowdery: “Tanimai nakoiu n ami iango n taai nako; tai nanououa, tai maaku.” Ibukin Kakorakoraia Kairake e taekin tabeua ibuakon ana tua te Atua aika kakawaki ma kairi n maeu ao n reireia aron ae tina tara te Atua n karaoan babaire aika raoiroi. Bon te kairi ae e aki ti kaineti nakoia Kairake ma bon nakoira n kabane.

Teuana te katoto ae kakawaki iai, Ibukin Kakorakoraia Kairake iai te kairi ae moan te kakawaki i nanon te mwakoro ae atunaki “E Tabu Rabwatam” E reirei: “Tararua rabwatam—ao rabwataia tabeman—ma te karinerine. Ngkana ko babaire aron am kunikai, karaoan iram, ao aron taraakim, titirakiniko, “I karinea ngkai rabwatau bwa te bwaintangira mairoun te Atua?”

Ibukin Kakorakoraia Kairake e kabwarabwara riki, “Tarai iango n bootaki ao namakin bwa a tabu. A riai n aki riki bwa atuun karaki n te manikangare ke te kakukurei. Itinanikun te mare imarenan te mwaane ao te aine, e bon bure ringan taabo aika raba, taabo aika a tabu ni mwakoron rabwatan temanna e ngae ngkana e raba n te kunikai. N am rinerine n bwaai ake ko karaoi, taraia, warekia, kakauongo iai, iangoia, katokaa taekana, ke kanakoa rongorongona, totokoi rikin bwaai ake a na karokoa te iangon tangako irouia tabeman ke bon ngkoe.”

E kaoka n au iango ana Kaoriori Beretitenti Nelson n taai aika nako:

“Tabeua bwaai a na roota maium n te tai ae tawe nakon ae ko nang urua te tuan [te itiaki]. Ibukia naake a tia ni karaoa aia berita ma te Atua, te anua ni kammaira bon teuana te kawai ae rangi n tawe ibukin kabuaan am onimaki.

“… Te mwaaka ni karekea te maiu bon man ara rinerine n rinea te maiu ni kakororaoaki iroun te Atua are tangiria Tamara are i Karawa bwa ti na kammwakuria. Ngaia are, te Atua e karaoi kainibaaire aika a mataata ibukin kabonganaan te mwaaka aei, ae mai i karawa. Te Katiteuanaaki n te rabwata e bon ti reke nakon te mwaane ao te aine ake a tia ni mareaki.

“A mwaiti man te aonnaba aio aika tuai ni kakoaua aei, ma koaua mai irouia aomata a bon aki motikaki raoi bwa a bon koaua. E a tia n katanoata te Uea bwa bon akea temanna te aomata ae aki kororaoi ae na karekea te abanuea ae te tiretio. … Ao ngkana ngkoe bwa ko aki kororaoi, I butiiko bwa ko na raira nanom. Nakomai nakon Kristo ao n butimwaea Ana berita n kabwarabure ae bwanin ngkana ko raira nanom man am bure [taraa Itaia 1:16–18; Reirei ao Berita 58:42–43]. ”

Uringa bwa te berita are n Ana Boki Moomon, kaitaraan te kakabwaia bon tiaki te maiu n kainano—ma bon te katinanikuaki ma i matan te Atua. I matana e kairira nakon ana kakairi tamneina n maiun temanna. Ni kabane a kanimwaki ma Otan Kristo n te tai are a roko iai n te aonnaba aei. N ikotaki ma aio, e kairia bwa ana bwabetitoaki ao n karekea te bwai n tangira ao n ikotaki ma otan te Tamnei ae Raoiroi. E uota te kaunganano ao te kairiri, e kakorakora man kabobonga ana konabwai temanna ma tarena, e buokia n totokoi ana kakairi te buakaka, babaire aika aki raraoi, ao tooki aika akea maneia.

N aekakimi, Ao I ataia ae iai a tia n namakina kakukurein te bwai n tangira ae Tamnei ae Raoiroi ma rinanon kabwaka n kawakin ana tua te Atua a kabuaa te kakabwaia anne mai irouia. E roko n au iango temanna ae bua rikina n kainan te Ekaretia man karaoakin te bure. E taekinna bwa ana moan kaeka nako iai bon namakinan te un. E taku bwa e baireaki taekana irouia taan kairiiri aika aki kororaoi. E ataia ae a kaairua ana mwakuri, ma e bebete riki bukinan kabwakaia ma kairuaia tabemwaang. Tabeua te tai imwiina, ao e moanna n namakina te mwengaraoi n aron te maiu i tinanikun te Ekaretia n akean ana kabaebae te wewete, te kairoro n kaeakin bootaki n taromauri ao mwakuri n kakawari.

Aio are e reitinako inanon te tai ae maan, ngke e a moanna n namakina buan te Tamnei ae Raoiroi—Ao Namakinan te Atua—i nanon maiuna. Man taneiana, ao e ataa te namakin ngkana iai irouna ana kamwengaraoi, kairiri ao ana kakoaua te Tamnei n te bong teuana ma teuana, ao namakina akean anne irouna. N tokina, e karaoa are e kainanoia n rairananona ao n tau nakon te ran ni bwabetito ao te Tamnei.

Taraan ae akea tokin oin bukina irouia aomata bwa a ana kakaea bukin bwaai, kukurei ao te buoka. A mwaiti aika “Taraa are i aon te tia.” Ma ti riai n aki riki bwa “ataei, n katiotioaki ma ni kakamwaieieaki nako n te ang ae te reirei nako [katei n onono]. N tatarakin te Atua, ti kona n karekea te rau n tain te kanganga ao e na rikirake ara onimaki taai n nanououa ma kangangan te Tamnei. Ti kona n karekea te korakora imatan te kakaitara ma te kaokoroaki. Ti kona n kaioka te kantaninga ma aron te maiu ae ngkai. Ni koauana, bon akea riki te kawai teuana irarikin are e tia n katabua te Atua: ”Kam na tani mai nako Iu,ao kam na kamaiuaki, ngkami aika kaain tabon aonaba: bwa bon te Atua ngai, ao akea naba temanna.”

Ara taratara nakon te Atua e nanonaki bwa tiaki Ngaia teuana mai i buakon ara iango, ma Ngaia bon ara kabanea n rietata n iango. I kaoka nakon ami iango riki te kabuanibwai are kananokawaki i Lesotho n Tuun ae nako. Man ana kainiwene n te oo n aoraki, temanna ma i buakoia aia taan kairiri Ataeinaine are e reke maeuna, bwa e aki kakoaua iroun te Atua imwian kaainakin te Ekaretia, e taekinna bwa ngkai e na kakaea bukin ae kawakinaki maeuna. E taekinna, “Teimatoan au beku ibukin te Atua ena uotai nakon kaekana, ngkana I roko n kaekana. “I iaiangoia ngkoa bwa I tangira te Atua, ma ngkai I a bon rang, rangi ao n rang tangiria. Ngkai ai bon te [moan bwai] Ngaia n taainako i nanon maiu.”

I anga au kakoaua ibukin te Tama, te Nati, ao Te Tamnei ae Raoiroi are n te katiteuanaaki ae kororaoi n te taeka, te iango, te tabe, ma aia mwakuri, bon te Atua ae Temanna are rinanoia ti na kona n noori bwaai aika raraoi n kabane. I anga au Kakoaua n ana mwakuri n kamaiu Iesu Kristo, ae roko ma iai te mwaka ibukin kakoroan nanon te berita: “Tarai, ao teimatoa n uaa te toki, ao kam na maiu; bwa ane e teimatoa n uaa te toki ao N na anganna te maiu ae akea tokina.” N aran Iesu Kristo, amen.