Ana Euangkerio Iesu Kristo: Te Bwanaa ni Kaungaunga
Te euangkerio ae e tia ni kaokaki e uota te kaantaninga ao te kimwareirei nakoimi inanon am borau ni karekea te maiu ae akea tokina.
Otan te Kaantaninga, iroun Simon Dewey
Inanon au tai ni beku bwa te tia kairiri n te mition i Tiaban tabeua te ririki n nako, I kaira te intawiu ma te mmwane ae e a tibwa kaina te Ekaretia te ririki are mai imwaina ao e ukora karekean ana rekomente n te tembora.
Inanon ara marooro, te membwa ae boou aio e kabwarabwara korakoran kakaitauna ibukin kakabwaia ake e a tia ni karekea moa man te ririki are e bwabetitoaki iai. I bon irou, e kaota te nanomatoa n te berita ae tabu are e reke man ataakin te euangkerio, are e a tia n matoa wakaana inanona. Ngaia ana reirei Iesu ae rairaki ae e a tia n karekea te bitaki n te nano ae korakora (taraa Motiaea 5:2).
Imwiin te intawiu, I tuanga te beretitenti n te mwakoro aron kukureiu irouia mitinare ma membwa bwa a tia ni kunea, ao n ribana raoi tamnein, te aomata ae korakora te konabwai irouna.
I kubanako ngke I reiakinna bwa ngke e moan kaitiboo ma mitinare ao n iriira te taromauri, bon te aomata ae akea mwengana ao n aitara ma kangaanga aika kabwaranano. Ana kamatebwai te tari aio iaon te euangkerio ma rairakina inanon namwakaina aika bati e kairia nakon te bitaki ae kamimi, ao n toka iaon kawain te toronibwai n tamnei ao n rabwata ao te kimwareirei.
Te euangkerio e angan te tari aio te tamnei ae mataata iaon te kaantaninga ibukin maiuna. Koaua n te euangkerio aika bebete man kakawaki a uota nakoina kaekaan titiraki aika kakawaki ibukin te maiu ae mamate. Kakabwaia n aron aikai a tauraoi naba nakoim ao ni kabane natin te Atua rinanon ana euangkerio Iesu Kristo.
Kaantaninga ibukin te Maiu
Ana Euangkerio Iesu Kristo e a tia ni kaokaki rinanon te Burabeti Iotebwa Timiti. N ana kabanea n kakoaua nakon te Ekaretia, Beretitenti M. Russell Ballard (1928– 2023), te Bonomwi ni Beretitenti n aia Kooram Abotoro n te Tengaun ma Uoman, e taekinna:
“Ti ataia bwa antai te Atua; antai te Tia Kamaiu, ibukina bwa iai Iotebwa. …
“… Ti kakabwaiaaki n ata te bwai ae ti ataia iaon te kaantaninga n te maiu, bwa bukin tera ti roko ikai, tera ae ti riai ni karaoia n kakoroa nanona ni katoaa bongin maiura. .”
Ibukiia membwa n Ana Ekaretia Iesu Kristo ibukiia Aika Itiaki ni Boong aika Kaitira, te ataibwai anne e irianaki ma ataakin ana “kainibaire ae kororaoi” ni kamaiu te Atua, ae e ataaki naba bwa te “babaire ni kakukurei are e korakora,” “babaire ni kaboomwi,” ao te “babaire n nanoanga” (Aramwa 42:8, 11, 15). Ana kainibaire te Atua “uoti nako kamimin te maiu ao te nanououa man ara bong aika a na roko.” Boton te iango ma te kantaninga n te maiu bon “ana reirei Kristo.”
Rinanon te euangkerio, ti ataia bwa ngaira natin te Atua, aika a karuoaki nakon te aba bwa ti na kataaki ao ni katauraoaki nakon te mangauti (taraa Reirei ao Berita aika Tabu 76:39). Ti atai tuua ao n reiakinaki n “ataa te raoiroi man te buakaka” (2 Nibwaai 2:5). Ti ataia bwa ti roko ikai bwa ti na tangira ao n beku ao te Tia Kamaiu e a tia ni weteira bwa tina tokanikai iaon te aonaaba ao ni buokiia raora bwa ana karaoia naba (taraa Ioane 16:33).
Te bwai are e aranna Iotebwa Timiti bwa “bwanaan ana Euangkerio ara Uea Iesu Kristo ni kaungaunga” e na kakorakoraira inanon boong aika a karawawata ao n uota nakoira ma raora te kaantaninga.
Otenanti ao Kakabwaia
Te Atua e a tia n anganiira te inaomata n rinerine bwa ti aonga ni kona n bon bukinaki ibukin ara rinerine (taraa Reirei ao Berita aika Tabu 101: 78; taraa naba 2 Nibwaai 2:16). Ni mwakoron are “kaitaraan bwaai ni kabane” (2 Nibwaai 2:11), e kona Tatan n kariirira bwa ti na kabongana buaka inaomatara n rinerine.
N ara bong, te Uea Iesu Kristo e wetea Iotebwa Timiti ao “ n taetae nakoina mai karawa,ao n anganna tua” (Reirei ao Berita aika Tabu 1:17). E teimatoa n reitinako te Uea ni kaoti Ana tua ao nanona nakoia Ana burabeti n boong aikai ibukina bwa E tangiria ni kairiira nakon te kukurei n te maiu aio ao mimitongin te tiretio n te maiu ae e na roko.
Te Uea ae Beniamina e Kabwarabwara nakoia Nibwaite,, iroun Gary L. Kapp
Reireia te Reirei ae Koaua,, iroun Michael Malm
E Kabwarabwara Iotebwa Timiti, iroun Sam Lawlor
Te ongeaba nakon ana tua te Atua e riai n roko man ara kakaonimaki ao ara tangira Ibukina. E reirei te Uea Iesu Kristo, “Ngkana kam tangirai, ao kam na tou mwin au tua” (Ioane 14:15). Mwiin kaotan ara tangira ibukin te Uea ae korakora man kawakinan Ana tua bon te kakabwaia ae uota te kukurei ao te kimwareirei (taraa Reirei ao Berita aika Tabu 130:20–21).
Ma te mataata iaon oin rikira mai ieta ao konabwaira, ti ataia bwa “bwaai ake [ti] karaoi inanon te maiu ae mamate aika tamaroa mai iai a kona n titebo ma bwaai ake [ti] na karaoi inanon te maiu are akea tokina ni karekea te tamaroa mai iai!”
Te Kimwareirei inanon Kawaim
Teuare e a tibwa rairaki are I katiboo ma ngaia i Tiaban n ririki aika nako e kunea ana euangkerio Iesu Kristo ae e a tia ni kaokaki rinanon botumwakana ao botumwakaia mitinare ao membwa. E karekea te kaantaninga ae e karababaaki ana taratara iaon te babaire ni kakukurei are e korakora, are e uota nakoina kakabwaia ao te kimwareirei are e uotiarake n te aro n rabwata ao n tamnei.
E a tia n reireiniira Unimwaane Patrick Kearon man te Kooram n Abotoro n te Tengaun ma Uoman:
“Ibukin ana babaire n tangira Tamara are i Karawa ibukiia natina n tatabemaniia, ao ibukin maiuna n kamaiu ao ana mition ara Tia Kamaiu, Iesu Kristo, ti konaa—ao n riai—n riki bwa aomata aika a rangi n kimwareirei i aon te aba! E ngae ngke e taoniira angibuakan te maiu aei n taainako, ti kona ni kanakoraoa te rikirake ao n tiku ma namakinan te kimwareirei ao te rau n nano man ara kaantaninga iroun Kristo a ataakin nnera i nanon te babaire ni kakukurei ae tamaroa.”
I anga au kakaitau ibukin, ao au kakoaua iaon, ana euangkerio Iesu Kristo ae e a tia ni kaokaki ao ana babaire ni kakukurei are e korakora. I kaoi ngkami bwa kam nna katoonga uaan te euangkerio ao n namakina te kimwareirei iaon mwanangami ni karekea te maiu ae akea tokina.