N na Karekea Iaa te Raunnano Ngkana E Mate Temanna Are I Tangiria?

Ngke e motirawa tamau, te bwai ae rangi n ibuobuoki nakoiu bon au onimaki iroun Iesu. Bon ngaira Katorika imwain ae a kaaina te Ekaretia kaain au utu. I aki kan nanako n taromauri, ma e rangi ni kakaonimaki tinau. Imwiin maten tamau, I uringa tinau ae e taekinna bwa e aki kan manga kakoaua.

Iai raoraon tinau ae te membwa n Ana Ekaretia Iesu Kristo ibukiia Aika Itiaki ni Boong aika Kaitira, ao e kairiia mitinare nakon mwengara. Ti ikotaki n reireinaki ao n moana nanakora n taromauri. I a moanna n kakoaua Iesu ao te Atua ao au onimaki e a moanna n rikirake. E ngae ngke e a tia ni mate tamau, iai au onimaki bwa ti na kona n kaitiboo ma ngaia n te bong teuana. Ti kona n ikotaki n maeka i karawa rinanon Iesu Kristo.

Iesu Kristo e mena irarikim n taainako. Ngkana ko namakina te nanokawaki ke te raraoma ke e nakobuaka am bong, ko kona ni katan i Rouna ibukina bwa E tangiriko. E na tei ibukim n taainako.