Ngkana A Taraa n Rangi ni Bubura Kataaki
Irian te maiu bon taian karawawata. Man te ibuobuoki, ti kona n nooriia man ana nonoori te Atua.
Te Maunga ae Timpanogos bon te maunga i Utah, USA ae 11,000 te buuti (3,353 m) rietana ao n onrake n taian bwaro n ran, atibu aika bwaa, uteute aika a mawaawa, ao maan aika a mwaiti iai. Te tei n aron aio mai aontano irarikin te maunga ko kona n namakinna ae ko rangi ni uarereke. Ko aki kona n noora aona ke ni katobibiia. E kona n taraa n rangi ni bubura ao n kangaanga tamarakeana.
Ma, te buti ae 10 te miniti te raroa man te Maunga Timpanogos ko a kona n nooria riki ni kaokoro. Man te nonoori aei, ko kona n noori taabo n nakonako ma kawai ake a tia ni koreaki rinanon te maunga. E kaotia aikai bwa a tia n roko aomata iai mai imwaaina ao bwa iai kawai aika a mano n riaona ao ni katobibia te maunga.
A konaa n namakinaki kataaki i nanon maium ngkai bwa kanga ai aron aei. A kona n namakinaki kaitaraan karawawata aika a matoatoa bwa kanga ai aron taraakin te maunga ae rangi ni bubura are ko aki kona n noora aona ao ai ni katobibia. A kona n taraa n rangi ni bubura ao tao n kangaanga bwa ko na tokanikai mai iai. A kona n anganiko kataaki akanne te namakin ae ko aki tau, ko rangi n un, maaku, ke ni maroaa.
Ma aio te bwai teuana riki ae ko na kataia. Anaa te rangata rikaaki ao kataia n noora kataakim man te taratara ae kaokoro—ana taratara te Atua.
Ma te nonoori aei, ko kona naba n ataia bwa ko bon aki kitanaki n ti ngkoe bwa ko na katoka am kangaanga nako. Iai Tamam are i Karawa ae tangiriko ao e na buokiko. Tabeman, riki te Tia Kamaiu, a tia n rianon taai naba aika a matoatoa. A tangiria n anganiko te kairi ae ko kainnanoia bwa ko na tokanikai iai man kataakim, riki kataaki ake a rangi ni bubura.
Ti Na Kanga ni Bita Aron Ara Taratara?
1 Iriira ana babaire Tamara are i Karawa.
Iesu Kristo bon ara banna ni katoto ae kororaoi. A rangi ni bebete taian reirei ake e reireia, a mwakaroiroi, ao ni kai oota te aba iai. E nanonaki n anne bwa a rangi n bebete iriiraia n taainako? Eng, e bon aki. Tiaki n taainako. Ma ni katoaa tai are ti waaki n iriiria i nanon te onimaki, a na moanna ni bitaki ara taratara. Ti na moanna n noori kangaanga bwa taai aika a tamaroa n nakon te Tia Kamaiu nakon taraakiia bwa katuuaa, kaairua, ke totoko ae a na kararoaira nako.
2Butiia te Atua buokam.
Te Atua bon ngaia Tamam i Karawa. E kinako, e tangiriko, ao n tauraoi ni buokiko n te tai are ko butiia iai. E reirei Beretitenti Russell M. Nelson bwa “ana taratara te Uea” e riaon wanawanam n aomata. E na kona ni kakuba Ana kaeka nakon am tataro ao e na buokiko n iangoa te abanuea ae te Tiretio.”
Ngkana ko tataro, E kona ni buokiko te Atua n noori bwaai ake ko aki norii n te tai aei. E kona ni kairiko rinanon kataakim ao n anganiko naba te rau ao te korakora ngkai ko iriiria.
3 Bubuti buokam nakoia tabeman.
E a tia te Atua ni katauraoia aomata aika a raraoi i nanon maium ake a kona ni buokiko. Ngkana ko korakai ma taian kangaanga ake a taraa n kakamaaku i mwaaim, iangoia ni marooro ma kaain te utu ae onimakinaki, te rao, te tia kairiiri n te Ekaretia, ke am bitiobi.
Butian te aomata ae e tau ae iai irouna te nakoanibonga ibukin te kakabwaia ibukin te rau ao te kairi bon te kawai ae tamaroa nakoim ao maium.
Otara taraana
N ai aron te maunga ae rangi ni bubura ae tei ni kawaim, a kona naba kataakim n riki n ai aron anne n tabetai. Ma ngkana ko maiu ni kaineti ma ana babaire te Atua ao n anganna ma tabeman bwa a na buokiko, ko kona n noora am kangaanga n te aro ae kaokoro.
Ko kona n anaa te rangata rikaaki ao n nooria bwa bon iai te kawai n tokanikai man kataakim. E katauraoa te kawai Iesu Kristo are ko na toua. N aki kangaai bwa buburara kataakim aika a kaoti, E korakora riki te Atua.