Raom te Atua n Taainako

Ngke waniua au ririki ni maiu, a kaitibo mitinare ma tibu te unaine ao ai tinau i nanon te kawai. Imwiin reiakinan taekan te euangkerio, ti bane ni bwabetitoaki. N 2020, e toki nanakora nakon te taromauri ibukin te COVID. E a bon bua ara koaua.

Uoua te ririki n nako, Ai akea au koaua iroun te Atua ke n ataia ngkana bon iai Ngaia. Te bong teuana imwiin bwaran te reirei, I tangiria ni mwananga man iteran te kawai nakon iterana are teuana bwa N na kaboa kanau. Ma e tuangai te bwanaa bwa N na riai n aki nakonako i nanon te kawai. I tei, ao a kurati uoua kaa bon i moau. Ngke arona bwa I toua nanon te kawai, N na bon okinakoaki ke tao ni mate. I ataia imwiina bwa e kinaai te Atua ao e tangirai. E ngae ngke I a tia n aki kakoauaa ao n aki roroko te taromauri n te tai anne, E bon teimatoa n tangirai ao ni kamanoai.

I moana manga warekan Ana Boki Moomon ao n ataia bwa bon ana taeka te Atua. I a moana okiran te taromauri naba. Ngkana I nakon te taromauri, I namakina te rau, ana tangira te Atua, ao Ana ibuobuoki. I namakinna bwa raou i rarikiu n taainako, ao anne ae anganai te kukurei.

Te anene man te boki n anene n taromauri ae mamaten nanou bon “Ngai natin te Atua” ibukina bwa e kauringai bwa E tangirai Tamara are i Karawa ao e buokiira. I tatangira naba te kibu ae 2 Nibwaai 2:27, are e taekina taekan arona bwa ti kanga n inaomata n rinerine imarenan te eeti ao ae bure.

N namwakaina aika a nako, e moana irirakiu mwaneu n nako n taromauri, ma imwiin tabeua te tai ao e toki rorokona. E raraoma ibukiia raoraona ao aron aia iango tabeman ibukina. E iango man taku bwa e kamaama te nakon ara taromauri, ma I tuangnga bwa akea bonganan aia iango raoraona. E bon ti kakaawaki riki ana iango te Atua.

A toki nanakoia au utu nakon te taromauri. I bon nako n ti ngai. Ibukina bwa akea kawain te bwati man te tabo are I maeka iai nakon ana tabo te Ekaretia, I ririanna tao 30 te miniti bwa I aonga n roko ikekei. A raraoma au utu bwa e na tera aia iango aomata ibukiia, ma I tuangiia bwa e aki kakaawaki anne ibukina bwa I ataia bwa e bon koaua.

Ngkana I kaitibo ma raoraou, a mooi koobe n tabetai. Ao ngkana I noora anne, I tangiria n mooi kobee naba n tabetai. Ma I ururingnga bwa e memena i rariku te Atua. E a tia n taua baiu ao e buokai. I ongo te bwanaa ae tuangai bwa N na aki karaoia, ao I ataia bwa e buokai te Atua n tokanikai man kangaanga aikai.

Ngke arona bwa N na anga te ibuobuoki ni marooro nakon te manna ae riki nakoina ae ai arou, N na kangai nakoia bwa ko rangi ni kakabwaiaaki, ao iai am onimaki ae mwaiti. Ma ko aki maroaa, bukina bwa a kona kaain te Ekaretia ao mitinare n anganiko te marooro ae tamaroa. E tangirikko te Atua. Ngkoe bon Natina te mwaane ke te aine, ao E tangiria ni buokiko.