Ti a Maroroakina taekan te Mwane!
Moarara riki, tia wareka rongorongon Iesu ngke e reireia taekan te mwane.
Kamataata n te tamnei iroun Alyssa Petersen
E mwaiti te tai inanon koroboki aika tabu ae e reirei iai Iesu iaon taekan te mwane.
Taeka aika “kaubwai i karawa” (Mataio 6:20), te kaikonaki iaon te tarena (Mataio 25:14–30), ke “kam na kabane kabwiani bwai n urakin nakon te auti ni kaiko bwai” (Maraki 3:10) kam a tia n ongongo mai imwaina? Ti a rinanona!
Kainnanora ni kaitaraaki ma. Bwaai aika ti tangiri
E ataia Iesu ae e bati bwaai aika kam kainanoia (n aron, te amwarake) ao n tangiri (n aron, bwaai n takakaro). E reireiniira, “Ma kam na kaiko ami bwai nako karawa, ike e aki kangi bwaai iai te koa ma te rara” (Mataio 6:19–21). Angiin bwaai are e reke n te mwane e kai mane, ngaia are kaiangoraoiko n bwaai ake ko karekei.
Ko kona n kaiangoraoiko n kaboonganan am mwane ngkana ko kaokoroi kainnanom man bwaai ake ko tangiri. Iangoia i bon iroum, “I karekei bwaai aikai ibukina bwa I kainnanoia ke ibukin ae I tangiria?” Ngkana ko aki koaua, kataia n tataninga inanon teuana te namwakaina, ao imwiin anne, manga titirakiniko riki te titiraki anne. Man karaoan aio, ko kona iai n totokoa karekean bwaai ti bukin tangirana ao mataiakinana irouia aomata. Irarikin anne, karaoi rinerine aika raraoi iaon kawakinan ao kabonganan te mwane n ae riai.
Kabonganaan te Mwane ibukin Kakabwaiakiia Aomata
N te kaikonaki iaon taian tarena, E kabwarabwara taekan te toka Iesu ae e anganiia teniman ana toro te mwane (aranaki bwa “tarena”) ae kakaokoro mwaitiia. Uoman tooro a kataboroa mwaitin te mwane are a anganaki, ao te toro are temanna e tauna ana mwane. Ngke e oki te toka aio, ao e kukurei irouia ana toro ake uoman ake a tia n karikirakea mwaitin aia tarena ao n aki kukurei iroun ana toro are e aki (taraa Mataio 25:14—30).
N ai aron te toka n te kaikonaki aio are e anganiia ana toro te tarena, ngkana e kakabwaiako ma te mwane te Atua, E kantaningaiko bwa ko na kabongana am mwane ibukin kabwaiam ao aomata. Ngkana ko tararuaia raom, ko kakoroa nanon ana tua Iesu are “tangira raom n ai aron tangiram i bon iroum” (Mareko 12:31).
E raoiroi karekean bwaai aika a tamaroa, ma ko riai n iangoi kainnanom ao kainnanoia raom imwain karekeana. Ngkana ko iangoi kainanoia raom, e na buokiko te Atua n kaotako n aron kabonganaan am mwane n kakabwaiai maiuia aomata inanon maium.
Kakabwaia man te Kabwianibwai
Ngkana ko raraoma bwa e na aki tau am mwane imwiin kabwakaan am kabwianibwai, warekii taeka ni karaunano aikai mairoun te Atua: “Kam na kabane kabwianibwai n urakin nakon te auti ni kaiko bwai … ao kam na kataai ngkai n aei … ba tao N na kauki mataroan nako karawa nako imi, ma n nurakina kakabaiami, ni karokoa aki‑rekeni nena” (Maraki 3:10). Ngkana ko kabwaka am kabwianibwai, e na kakabwaiako n ae raka riki te Atua nakon are ko kantaningaia!
Ko na aki kakabwaiaaki n te anga n rabwata—ko na kona n aki tau am mwane n karekea te kunikai ae boobuaka are ko tangiria, ngaia are kona tangiria n taona nanom n kan ira-oin nanom. Ma e na bon kakabwaiako te Uea. Inanon taina, ko na kunea bwa e a bebete kabwakaan am kabwianibwai, ao tamneim e na korakora ni kaitarai raraomam n kaineti ma te mwane.
E na Buokiko te Atua
Onimakina ana taeka Beretitenti Russell M. Nelson ae: “Bon akea tian ao tokin ana buoka te Tia Kamaiu nakoim” (Okitobwa. 2024 maungatabu ni kabuta [Riaona, Nobembwa. 2024, 122]). Man iangoraoim n kabonganaan am mwane n karekei kainnanom, buokaia aomata, ao kabwakaan am kabwianibwai, ko na karekea te tangira ae nano ibukin te Atua ao ibukiia aomata ao te kakaitau ibukin are iai iroum.