Otan Taai i nanon Au Bongbuaka

E aki maan nako, I rinanon te bwai teuana ae rangi ni kangaanga. A maenako ke n raure tamau ao tinau, ao e mwakuri tinau n te aba teuana. I ikawairake ma tibu te unaine—bon ngaia are e kairai nakon te euangkerio ao te Ekaretia. Ma te ririki aei, e karina ni motirawa maiuna.

Bon ngaia te kabanea n aomata ae I aki tangiria bwa e na mate. N tabetai ao I iangoia bwa N na moan mate imwaaina ibukina bwa e rangi ni marurung! E bon aki kakaota mamaarana ao e kakorakora n taainako nakoiu. I aki konaa ni maiu n akeana irarikiu.

Imwiin matena, N tabetai I angoia bwa I kan mate naba. E roko irou taian iango ibukin kabuaan maiu. Ma n te tai ae aki maan ao I nakon te bootaki n te titeiki ibukiia kairake ike ti a karekea te reirei ibukin te babaire ni kamaiu.

I kaman ataa taekan te babaire ni kamaiu, ma tao mataatau iai e aki rangi ni oota ibukin te bwai are e riki nakon tibu te unaine. Ngke I kakauongo, ao I ango, “I a tia ni mwanuokina taian kakabwaia man ana mwakuri n anga karea Iesu Kristo i bukiu.”

I a tibwa iangoia bwa e mate Iesu Kristo bwa e kamaiuai. I riai n aki kabuaa maiu ibukin taian kangaanga ake a roko i rou. E anganai te kaantaninga te babaire ni kamaiu bwa I kona ni manga noora tibu te unaine n te bong teuana, ibukina bwa e aki toki te maiu ngkana ti mate. I kainnanoia n iriira te Tia Kamaiu bwa I aonga ni kona ni manga nooria.

Imwiin maten tibu te unaine, e mwaing nako rarikiu ai tariu ao n riki bwa te tia kawakinai. Bon raoraou aika a tamaroa ai tariu nako, ma e bon teimatoa ni kangaanga te bitaki. I riai n reiakina taian beku ni kabane are e kakaraoia ngkoa tibu te unaine. I riai ni bon uti irou ibukin te reirei ao n karaoi au mwakuri n te auti.

E aki toki n marooro au bitiobi ibukin taekan te toronibwai, ngaia are I ukoukora taekana n te Gospel Library. E buokai n reiakinai bwa N na tei i bon irou.

I bon teimatoa n rereitaki ma tamau. N te bong teuana, ao ti un. I rangi ni kekeiaki iai, ma n te tai ae tawe ao e reke mwanangau nakon te tembora ma kairake. “Ma ngke I a rin n te tembora, I namakina te rau. E toki iangoan taian kangaanga ake ni mweengau. I aki iangoa taekan uniu are e riki ma tamau. I iangoi bwaai ake I kona ni karaoia ni buokia iai. I iangoa arou bwa N na riki bwa te banna ni katooto ae tamaroa. I iangoa taekan te maiu are akea tokina, n aron kabaeakiu ma au karo n te tembora n te bong teuana. I baireia bwa N na kabwara au bure nakon tamau ibukin uniu ma ngaia.

I a tia n reiakinna bwa N na kabanea au iango n taainako i aon Iesu Kristo ao Tamara are i Karawa. I karekea korakorau mai Rouia, ao I uringnga bwa A memena irarikiu ni kawakinai.

E buokai te babaire ni kamaiu, riki Ana Mwakuri ni Kamaiu te Tia Kamaiu, n tokanikai i aon au iango ni bakabure. E buokai n namakina te rau i nanon maiu. E anganai te kaantaninga bwa I kona ni kaitiboaki ma tibu te unaine n iteran te rabuna are teiterana n te bong teuana.

Iesu Kristo bon te kaantaninga n waakin maiu e ngae ngke a bati au kangaanga. Bon akea tokin ana tangira i bukiu. Bon otan taai i nanon maiu. Ngkana e bong buaka ke ni kakarau, E memena ikekei. Bon Ngaia au Tia Kamaiu. Bon Ngaia mweengau. Bon Ngaia maiu. E buokai ni waaki nako. Bon ngaia teuana bukina ae I tangiria ni maiu.