Maungatabu ni Kabuta
Matoan te Nano i Matan te Atua
Maungatabu ni Kabuta Eberi 2025
11:59

Matoan te Nano i Matan te Atua

Iroun Beretitenti Russell M. Nelson

Beretitenti n ana Ekaretia Iesu Kristo ibukiia Aika Itiaki ni Boong aika Kaitira

Ngkai ti botumwaka n ukoria bwa e na kaonaki maiura n te tangira ae kororaoi ao te raoiroi, e na rikirake matoan nanora ni kaniia te Atua.

Tariu ao mwaaneu aika kam tangiraki, I kakaitau ngkai I taetae nakoimi n te bong aei, n tain te maungatabu ni kabuta ae kakawaki aei. E rikirake n aki raoiroi au taratara. Kam rabwa ibukin mataatami ngkai I kanakoa au marooro.

Ti maeka n te tai n rikirake ae kakawaki n ana Ekaretia Iesu Kristo ibukiia Aika Itiaki ni Boong Aika Kaitira. I kaonaki n te kimwareirei ngkai I nori taian rikirake n taabo aika mwaiti.

E rangi ni kaungaaki riki nanou irouia ara kairake. E korakora mwaitiia ni karaoi mwakuri ni ibuobuoki. A ukoukori aia bakatibu ao ni karaoi otenanti n te tembora. E koro mwaitiia ara ataeinimwaane ao ataeinaine aika kanakoi aia beeba ibukin te mwakuri ni mitinare. Te roro ae rikirake a teirake bwa taan iriira Iesu Kristo aika nanomatoa.

Beretitenti Nelson ma tibuna te ataeinaine.

N aki maan n nako I kaitibo ma tibutoru te ataeinaine ae tibwa bungiaki. Ngke I iangoi kakaewenako ake e na rinanona inanon maiuna, I namakina te nano ae korakora ni kan buokia ni katea ana onimaki iroun Iesu Kristo. E rangi ni kakawaki maiuakinan Ana euangkerio ibukin kukureina n taai aika a na roko.

Ngaia, n arora n tatabemaniira, ti na kaitarai kakaewenako. Ti na bane n rinanon te aoraki, te uruaki n nano, te kataaki, ao kabuanibwai. Taian kakaewenako aikai a kona n roota onimakinara i bon iroura. Ma, taan iriira Iesu Kristo a kona ni karekei kawai n te onimakinaki ae kaokoro.

Ngkana ti karaoi ao ni kawakin berita aika tabu ma te Atua, ti kona ni karekea matoan nanora are e reke man te Tamnei. E tuanga te Burabeti ae Iotebwa Timiti te Uea bwa e kona matoan nanora ni “korakora i matan te Atua” Iangoa te rau ni karekean matoan nanora i matan te Atua!

Ngkana I taetae iaon karekean kamatoaan nanora i matan te Atua, I kananona kamatoakira ni kaniia te Atua n te tai aei! I nanona te tataro ma te nanomatoa bwa e ongo iroura Tamara are i Karawa ao e atai kainanora nakon ae ti bon ataia. I nanona ae karekean te nanomatoa bwa E rangi n tangiriira nakon are ti kona ni iangoia, bwa e kanakoia anera bwa raora ma naake ti tangiriia. I nanona ae te nanomatoa bwa E ingainga ni buokiira n roota konabwaira ae rietaata.

Ao ngkai, ti na kanga ni karekea kamatoaan nanora ae aekan anne? E kaekaa te titiraki aei te Uea ma taeka aikai: “E riai nanom … n onrake n te tangira ae kororaoi nakoia aomata ni kabane … ao e riai te raoiroi ni katamaroa am iango n aki toki; ; ngkanne matoan nanom e na korakora imatan te Atua.”

Iai arona raoi! N are e bon taekinna te Uea, te tangira ae kororaoi ao te raoiroi e kauka te kawai ni karekean matoan nanora i matan te Atua! Tariu ao mwaneu, ti kona ni karaoa aio! Matoan nanora e kona raoi ni korakora i matan te Atua, n te tai aei!

Ti a iangoa te tangira ae kororaoi ao te raoiroi.

Te moan, te tangira ae kororaoi. Uoua te ririki n nako, I anga au bubuti, ngkai taan iriira Iesu Kristo n te berita, bwa ti na riki bwa taan raoi. I a manga kaoka are I a tia n taekinna ngkoa; “E aki kona ni kairoro te un. Te riribai e aki karikirakea aron temanna. Te aki boraoi n iango e aki kairi nakon katokan te kangaanga ae mairoun te tamnei.”

Te tangira ae kororaoi nakoia aomata ni kabane bon kanikinaeaia taan raoi! E bon riai bwa ti na karekea te tangira ae kororaoi n ara waaki nako, ibuakoia te botanaomata ke bon ti ngkoe. I karabwaia naake a tia n taua au reirei are mai imwaina i nanoia. Ma ti kona ni karaoa riki ae tamaroa.

E a kakamaaku te kairiribai ae riki ngkai ibuakoia te botanaomata ao i aon bwaai n reitaki. Taeka ni kairiribai bon bwaai ni buaka aika a kamamate. E totokoa te Tamnei ae Raoiroi te itabaraaraa bwa e na n riki bwa raoraora n tainako

Ngkai ana reirei Iesu Kristo ngkaira, ti riai ni katanea te kawai bwa taan raoi. Ngkana e riki te tangira ae kororaoi bwa mwakoron aroarora, ti na kabuaa kan kamemerean aroia tabeman. E na toki arora ni motikitaekaia tabeman. Ti na karekea te tangira ae kororaoi ibukiia aomata nako. E bon kakawaki te tangira ae kororaoi nakoia aomata nako nakon rikirakera. Te tangira ae kororaoi bon aan te anua ae mairoun te Atua.

Ti a butiia Tamara are i Karawa bwa e na kaoni nanora ma te tangira ae kororaoi—riki nakoia naake e matoatoa tangirakiia.—bwa te tangira ae kororaoi bon te bwaintangira mairoun Tamara are i Karawa ibukiia taan iriira ni koaua Iesu Kristo. Te Tia Kamaiu bon Uean te Raoi. Ti na riki bwa Ana bwai ni mwakuri ibukin te rau.

Ngkai, ti a marooro iaon te raoiroi. E tuangiira te Uea bwa ti na katamaroa ara iango n aki toki ma te raoiroi. Iangoa te kakorakora ae ko na karekea nakon am iango aika tamaroa ngkana ko kairia ma te raoiroi. E kariki bwaai ni kabane te raoiroi bwa a na nakoraoi ao ni kakukurei! Ni iterana teuana, iangoia bwa tera ae na riki ngkana ko kaaira te raoiroi nakon te iango ae aki tamaroa, te iango ni bangaomata, ke te iango ae kananokawaki. E na kabuanakoi iango akanne te raoiroi. Te raoiroi e na kainaomatako man te nanououa, ao iango aika karawawata.

Tariu ao mwaneu, ngkai e a rikirake ni buakaka te aonaaba, ti riai n rikirake n rangi ni itiaki. A riai ara iango, taetae, ao ara mwakuri n aki bwaka man karaoan te raoiroi ao ni kaonaki n Ana tangira Iesu Kristo nakoia aomata ni kabane. Reken taai aika a korakora aika imwaira bon arora n riki bwa Ana aomata te Atua nakon are e kantaningaira iai.

Te nebonebo ni katoa tai n Ana auti te Uea e karikirakea konabwaira ibukin te raoiroi ao te tangira ae kororaoi. Ngaia are, ara tai n te tembora e karikirakea matoan nanora i matan te Uea. Kamwaitan ara tai n te tembora e na buokiira ni katauraoira ibukin Kauaokin ara Tia Kamaiu, Iesu Kristo. Ti aki ataa te bong ke te aoa ibukin Rokona. Ma I bon ataia bwa e anganai te kairi te Uea ni kauringiira bwa ti na katauraoi ibukin te “bong ae kakanato man ni kakamaaku.”

Ngkai ti botumwaka n ukoria bwa e na kaonaki maiura n te tangira ae kororaoi ao te raoiroi, e na rikirake matoan nanora ni kaniia te Atua. I kaoi ngkami bwa kam na euta mwanekami ma nanomi ni koaua n rikirake ni kamatoa nanomi i matan te Uea. Imwina, ngkai ti nakon Tamara are i Karawa ma rikiraken matoan nanora, ti na kaonaki n te kimwareirei ae mwaiti, ao e na rikirake am onimaki iroun Iesu Kristo. Ti na moanna n namakina mwaakan te tamnei ae e riaon ara kantaninga ae korakora.

Ti kakaitau nakon te Uea ibukin kabirimwakan katean tembora inanon ririki aikai. N te bong aei, i aan Ana kaetieti, ti katanoatai babaire ibukin kateakin 15 tembora n taabo aikai:

  • Reynosa, Mexico

  • Chorrillos, Peru

  • Rivera, Uruguay

  • Campo Grande, Brazil

  • Porto, Portugal

  • Uyo, Nigeria

  • San Jose del Monte, Philippines

  • Nouméa, New Caledonia

  • Liverpool, Australia

  • Caldwell, Idaho

  • Flagstaff, Arizona

  • Rapid City, South Dakota

  • Greenville, South Carolina

  • Norfolk, Virginia

  • Spanish Fork, Utah

I kakoaua bwa Iesu Kristo, te Tia Kamaiua Iteraera, e kaira, Ana Ekaretia aei. E katauraoia bwa e na manga oki. Ti a katauraoira naba nakon butimwaeana. Man aio I tataro n aran Iesu Kristo, amen.

Bwaai aika a na taraaki

  1. Te atibu ae uarereke are e noria Taniera te burabeti ni miina ibukin boong aika kaitira e “rabino nako ni kaonrakea te aonaba” (taraa Taniera 2:31–45; Reirei ao Berita aika Tabu 65:2).

  2. Reirei ao Berita aika Tabu 121:45.

  3. “Bwa N na rimoami. N na mena i angataimi ao n angamaingimi, ao Tamneiu e na mena inanomi, ao au anera a mena i buakomi, n tabekiko rake.” (Reirei ao Berta aika Tabu 84:88).

  4. Reirei ao Berita aika Tabu 121:45, e kaairaki ma katuruturuana; taraa naba kibu 46.

  5. Russell M. Nelson, “Peacemakers Needed,” Riaona, Meei 2023, 98.

  6. N rineia bwa ko na kakauntaeka ma tabeman bon rineakin ae ko na maeka n akea a na kairiiri te Tamnei ae Raoiroi.

  7. Ti na karekea te tangira ae kororaoi “nakoia aomata ni kabane, ao nakon te mwenga ae onimaki” (Reirei ao Berita aika Tabu 121:45).

  8. E nanonaki n aei te tataro “ma korakoran nanomi ni kabane” (Moronaai 7:48).

  9. Taraa Moronaai 7:48.

  10. Taraa Itaia 9:6.

  11. Ngke e reirei Iotebwa Timiti, “Ngkana [ti] tangiria n nakon te tabo are e maeka iai te Atua, [ti] riai n riki n ai Arona, ke ni iai iroura tuua nako ake iai iroun te Atua” (Teachings of Presidents of the Church: Joseph Smith [2007], 72). N aron aio, e anga ana kairoro te Abotoro ae Bauro bwa “ti na tai maku ni kaniia te kaintokauea are e akoaki te aba iai, bwa ti aonga n anganaki te nanoangaaki, ao ti aonga ni karekea te akoaki n ara tai ni kainano” (I-Ebeto 4:16).

  12. Taraa Mataio 24:36–37.

  13. Maraki 4:5; taraa naba Tebania 1:14-18.

  14. E a tia n tuangiira te Uea bwa ti na “uringa te onimaki, te raoiroi, te atatai, te taubaang, te taotaonakin nano, te akoi imarenami, te aro n Atua, te tangira ae kororaoi, te karinanoia, [ao] te nanomatoa” (Reirei ao Berita aika Tabu 4:6). Ngkana ti karaoia, e na rikirake matoan nanora, ao imwina, ni bon oin Ana taeka, ngkana ti bubuti, ti na anganaki. Ao ngkana ti karebwerebwe, e na kaukaki nakoira. (Taraa Reirei ao Berita aika Tabu 4:7.)

  15. Are ti na rinanon te taneiai are a rinanona ana aomata te Uea Beniamina: “Ao a onrake n te kimwareirei, ngkai e a reke irouia kamaunaan aia bure, ao n reke naba raun nanoia, ngkai e korakora aia onimaki iroun Iesu Kristo” (Motiaea 4:3).