“Ane a Na Ataingkami Aomata ni Kabaneia Ba Au Reirei Ngkami”
Ara tangira ibukin te Atua ao Natina bon te koaua ae korakora nakon te aonaaba ae aio bon ana Ekaretia te Tia Kamaiu.
Inanon ririki aika mwaiti n nako Ngai ao Titita Uchtdorf ti mwananga rinanon Tiaman maiaki. Bon imwain te Itita, ao ti kaoa raoraora ae moan te raoiroi, ae tiaki kaain te Ekaretia, bwa e na raoniira n ara bootaki n Taromauri n te Tabati. Ti rang n tangira raoraora aei, ngaia ae bon akea ara kangaanga n tibwaia nakoina ara namakin ibukin te Tia Kamaiu ao Ana Ekaretia ao ni kaoia bwa a na roko n noria! E butimwaea te kakao ao e raoniira n taian bootaki n te mwaanga ae uakaan.
Ngkana ko a tia ni kaira raoraom nakon te taromauri n te moan tai, ko kona ni kabotaua ma te namakin are irou ni ingabongin te Tabati anne. I tangiria bwa a na bane n nakoraoi bwaai ni kabane. Raoraora arei bon te aomata ae bubura ana reirei, ao ni korakora te maiu n tamnei irouna. Au kantaninga bwa bobotaki ake a karaoaki n te mwaanga aei e na angan neiei te nano korakora ao ni kaota raoi te Ekaretia.
A botaki kaain te mwaanga n tabeua ruun te titoa n te kauoua ni burooa are a kabooa tangoakina. Ngkana tina roko iai, ti na toua te kaintamwarake mai buki, n rirarikin te tabo ae nako mai iai boiarara ake a roko man kaako ake a kawakinaki iai.
Ngke e a waaki te bootaki n toa, ao I iangoa raoraou aei n ana moan tai n rinanon te aekaki aei, ao n raraoma ni bwaai tabeua ake I noori. Tao te katooto iai, te anene, e kaokoro tangina ma are irouia kaain te Tabaenako kuaea. E kona n ongo teaba kaberoroia ataei n tain te botaki n toa. A karaoi aia kabanea n tamaroa taan taetae, ma e oti ae a bon tuai mwaatai n taetae i mataia te koraki. I tekateka n aki mwengaraoi n tain te bootaki, ma au kantaninga bwa e na nakoraoi riki te Reirei n Tabati.
Ma e aki.
Rinanon nako te ingabong anne ao I raraoma bwa ai tera ana iango raoraora aei ibukin te ekaretia are ti a tia ni kairia nako iai.
Imwiina, ngke ti buti n okira mweengara, I rairaki n taetae nakon raoraora. I tangiria ni kabwarabwara ae ti aio te kabanea ni uarereke ni mwaanga ao e aki tei ibukin te Ekaretia ae bwanin. Ma I mwain ae n na taetae, ao e rimoa n taetae.
“E rangi n tamaroa te bwai are karaoki,” e taku.
I aki kona ni kabwarabwara aron kukureiu.
E reitianako, “I rang ni mimi n aron aia reitaki i marenaia kaain ami taroramauri. A taraa n ae a roko man katei aika kakaokoro, ma e teretere bwa iai te tangira I bon irouia. Aio te bwai ae I taku bwa e tangiria Kristo bwa e na riki n Ana Ekaretia.”
Eng, I waekoa n raira nanou man kateiu ni momotikitaeka. I a tia n tangira kanga tamnein te bootaki n taromauri ae nakoraoi bwa e aonga n anaaki iai nanon raraou aei. Ma te bwai are a tia ni kaotia kaain te mwaanga aei bon te nano ae kororaoi n aia tangira, aia akoi, taotaonaki n nano, ao aia mwamwanano.
Bwa e aonga n Rikirake te onimaki n te Aonaaba
Tariu ao mwaneu aika kam tangiraki, raou aika kam tangiraki, I tangira ana Ekaretia Iesu Kristo Ibukiia Aika Itiaki ni Boong aika Kaitira. Bon ana Ekaretia te Tia Kamaiu ae koaua ao e maiu, ao e reirei kaokan bwaninin ana euangkerio Iesu Kristo. E mena ikai mwaakan te nakoanibonga ao kariaia. E kaira te Ekaretia aei Iesu Kristo rinanoia Ana toro aika E a tia ni weteia ao n anganiia te kariaia, ao iroun te burabeti ae maiu, are bon Beretitenti Russell M. Nelson. E a tia te Tia Kamaiu n anganiia Aika Itiaki ni Boong aika Kaitira te mwakuri ae onoti ni ikotiia natin te Atua ao ni katauraoa te aonaaba ibukin Kauaokin te Tia Kamaiu. I kaota au koaua bwa a koaua bwaai aikai ni kabane.
Ma e kakawaki bwa ti na uringnga bwa n aia moan tai aomata n ira ana waaki ana Ekaretia Iesu Kristo, ao aki moa iangoa te kariaia n te nakoanibonga ke otenanti ke ikotakin Iteraera. Te bwai ae ana noria moa, iaon bwaai ni kabane, bon aron aia namakin ngkana a mena ibuakora ao n noori arora nakoia raora nako.
“Kam na itangitangiri,” E taku Iesu. “Ane a na ataingkami aomata ni kabaneia bwa Au Reirei Ngkami.” N tainako, ana moan kakoaua te aomata iroun Iesu Kristo e reke ngke e namakina te tangira irouia ana reirei Iesu Kristo.
E taekinna te Tia Kamaiu bwa E kaoka Ana Ekaretia bwa e aonga n rikirake te “onimaki anne … n te aba.” Ngaia ae, ngkana a roko aomata nakon ara bootaki n Taromauri, e tangiria te Tia Kamaiu bwa ana korakora riki aia onimaki Irouna ngkana a okirikaaki! Te tangira ae a namakinna ara koraki ibuakora e buokiia ni kaniira nakon Iesu Kristo! Anne bon ara kouru n tainako ngkana ti ikotaki.
Ngkana iai ae ukora te onimaki ae korakora riki iroun Kristo ke te reitaki ae kaan riki nakon te Atua e riai n namakinna ae mena ni mweengana n Ana Ekaretia Iesu Kristo ibukiia Aika Itiaki ni Boong aika Kaitira. Kaoakiia raoraora nakon ara bootaki e kona n ae ti tebo ma ae ti tataneiai ni kaoia nakon mweengara.
Te Kaantaninga ao Are Riki
Ngkai, I tabe n ataia ae I kabwarabwaraa tein te kaantaninga. Ti kuri aki rangi n taneiai n ataa aron tein te kantaninga, n te maiu n rabwata aei. Ao “ni karokoa te bong ae namataki” e na iai n tainako te marena imarenan te kaantaninga ao te bwai are riki. Ngaia, are tera ae ti riai ni karaoia ngkana te Ekaretia e aki namakinaki bwa bon aei te bong ae nakoraoi? Tao ngkana, tera bukina, ae ara uoote e aki karikirakea te onimaki ke te tangira ae kororaoi? Ke ngkana e namakinaki ae tiaki tau nako iai?
Teuana te bwai ae ti riai n aki karaoia bon kakeaan ara onimaki iaon te bwai are kororaoi!
Taekan atuun te iteraniba n Ana Boki Moomon e raonaki ma te taeka ae kakawaki aei: “Ngkana iai kaairua,” e taekinna, “bon aia kairua aomata; mangaia ae, kam na aki kabuakaka ana bwai nako te Atua.”
E kona te boki—ke te ekaretia ke te aomata—n iai “kaairuaia” ao “aia bure” ao n teimatoa n riki bwa ana mwakuri te Atua?
Au kaeka e takaruaeaki eng!
Ngaia ae, ngkai ti kekeiaki n irii ana kainibaire te Uea aika rietaata, ti riai naba ni bwaina te taotaonaki n nano imarenara. Ti bane n iai ara mwakuri aika ti waaki inanona, ao ti bane n onimakina te Tia Kamaiu ibukin ara waaki aika ti karaoi. Anne e koaua ibukira ngaira n tatabemaniira nako, ao e koaua ibukin abanuean te Atua iaon te aba.
E kaoira te Uea tiaki ti ibukin kainakin Abanueana ma n ingainga naba ni katabeaki ni kateana . E noora te aomata te Atua aika “ti teuana nanoia ao teuana aia iango.” N riki n ti teuana nanora, ti riai n iai nanora aika itiaki ao, anne e kainnanoa te bitaki n nano ae korakora.
Ma e aki nanonaki anne ni bita nanou ni katiteboa ma are iroum. Ke e nanonaki ni bita nanom ni katiteboa ma are irou. E nanonaki n ae ti bane ni bitii nanora bwa a na titebo ma te Tia Kamaiu.
Ngkana ti tuai n roko ikekei, uringnga, bwa man ana ibuobuoki te Uea, ao akea te bwai ae kangaanga.
Taum ao Arom N Riki bwa Kaaina
Ao ngkana ko namakinna ae ko aki tau nako iai, taiaoka n ataia bwa iai raom n taainako. Ti tuai bane n tia n rinanon waakin te maiu ngke ti namakinna ae kanga irua ngaira inanon te ru? I a tia n rinanon aei ae raka iaon teuana te tai. Ngke 11 au ririki, a kairoroaki au utu bwa a na kitana mweengara ao ni mwaing nakon te tabo ae ti aki tataneiai iai. A bane ni kaokoro bwaai man are I tataneiai iai mangaia. Ao een bwanaau e kaotia nakoia ataei ake tabeman ae I kaokoro n aron are a tataneiai iai. N te tai are I a rang kainnanoa iai te iraorao ao te katiteuanaaki, I namakina te maroa ao te katinanikuaki.
Ikai i aon te aba, angiin kakaokoro aika ti noori—taian kaokoro aika a kabonganai tabeman ibuakora ni kaokoroia imarenaia—n irekereke ma bwain te aonaaba, aron tarakim, abam, te taetae, te kunnikai, katei, ao a mwaiti riki. Ma te “Atua e aki tarai bwaai n aron aia taratara aomata. Aomata a tarataraa tinanikun temanna, ma e tarataraa te nano te Uea.”
Man Ana taratara, iai teuana te karinan ae kakawaki riki nakon tarakim ake tabeua: natin te Atua. Ao ti bane n rin n te karinan aei.
Ni bon arona ti kan mena ibuakoia aomata ake a taratara, taetae, a mwakruri, ao a iango n ai arora. Iai nnen anne.
Ma n ana Ekaretia te Tia Kamaiu, ti ikotiia ni kabane natin te Atua aika iai nanoia ni kan ikotaki ao n ukoukora te koaua. Tiaki ibukin teira, waakira iaon tuua n te tautaeka, ara katei, ke kaain te bootaki teuana are ngaia ti botaki iai. Tiaki rongorongora ae ngaia ae ti katiteuanaaki iai. Bon ara botoniango, ara tangira ibukin te Atua ao tangiraia kaain rarikira, ara motinnano nakon Iesu Kristo ao Ana euangkerio ae kaokaki. Ti “temanna ngaira inanon Kristo.”
Te katiteuanaaki ae ti uaiakinna bon tiaki kateakiia aomata n te tabo ae titebo, bon karekeaia aomata bwa ana taraa te tabo ae titebo—nakon Iesu Kristo. Ti katiteuanaki tiaki ibukin te tabo are ti a tia ni mena iai ma ae ti kataia n nako iai, tiaki ibukina bwa antai ngaira ma ae ti ukoria n riki nako iai.
Anne raoi bon Ana Ekaretia ni koaua Kristo.
Te Rabwata ae ti Teuana
Ngkana ko tangira te Atua, ngkana ko tangiria ni kan ataa te Atua man irakin Ana Rikitemanna, ngkanne ngkoe kaaina. Ngkana ko kekeiaki ni kawakin ana tua te Tia Kamaiu—e ngae ngke ko aki kororaoi iai—ngkanne ko bon tau ni kaaina Ana Ekaretia Iesu Kristo ibukiia Aika Itiaki ni Boong aika Kaitira.
Ao e na kanga arom ngkana ko kaokoro ma aomata ake irarikim? Anne e aki karikiko bwa ko na aki tau—e karikiko bwa mwakoron rabwatan Kristo ae kainnanoaki. A kainnanoaki aomata ni kabane n rabwatan Kristo. E karekei bwaai te taninga ae aki kona n reke iroun te mata. Te ranga e karaoi bwaai aika e aki kona ni karaoi baai.
Tiaki nanona bwa am mwakuri ko na bitiia aomata ni kabane bwa katotongam. Ma e nanonaki bwa iai te bwai ae kakawaki ae ko na anga—ao iai te bwai ae kakawaki ae ko na reiakinna!
Teuana te Bwanaa
Ni katoa tai n te maungatabu ni kabuta, ti kakabwaiaaki n taian anene aika a rooti nanora mairouia kaain te kuaea aika a tarena. Ngkana ko kakauongo, ko kona ni kunea bwa aki bane taan n anene n anenei nooti aika titebo. N tabetai te itera teuana e kanakoa te moan bwanaa, n tabetai manga te ee teuana. Ma a bane ni kanakoa te bwanaa ae tangiraoi, ao a bane ni katiteuanaaki. Ni kabane kaain te kuaea titebo aia kouru ae kakawaki: ni kamoamoa te Atua ao ni kabanei nanora Nakoina. A riai n iai aia iango ao nanoia ae boboto iaon te kantaninga mai ieta. Ao ngkana e riki anne, a na riki bwa te bwanaa ae titeuana.
Ngkana ko tuai n riki bwa kaain Ana Ekaretia Iesu Kristo ibukiia Aika Itiaki ni Boong aika Kaitira, ti kaoko bwa ko na raoniira ngkai ti kimwareirei n anenea Ana “tangira ni kabomwi” te Tia Kamaiu. Ti kainnanoi ngkami. Ti tangirii ngkami. E na nakoraoi riki te Ekaretia ma am kekeiaki ni beku ibukin te Uea ma Natina.
Ngkana ko a kaman tia ni kaotia, rinanon te bwabetito, rinanon karaoan berita aika tabu ma te Atua, nanom ni kan “kaaina ana nanai te Atua, ao n aranaki bwa ana botanaomata,” ko rabwa ibukin kainakin te mwakuri ae mimitong aei ao ibukin am ibuobuoki ni karaoa Ana Ekaretia Iesu Kristo n aron are e tangiria te Tia Kamaiu.
N aron are I reiakinna mairoun raoraou i Tiaman, ara tangira ibukin te Atua ao Natina bon te koaua ae korakora nakon te aonaaba ae aio bon Ana ekaretia ni koaua te Tia Kamaiu.
E na kakabwaiaira te Atua ni maiuakina ana kaantaninga ara Tia Kamaiu, te Tia Kabooi Maiura, ao te Mataniwi are e a tia ni karaoia ibukira ma te botumwaaka—bwa aonga n ataia ni kabane ae ngaira bon Ana reirei. I a atong baikai n aran Iesu Kristo ae tabu, amen.