Kawain Kairakira mai Karawa
Ngkai ti kabotoi maiura iaon Iesu Kristo, ti na kunea kawaira nakon mweengara, n teimatoa ao ni kimwareirei ni karokoa te toki.
E bita maiu Iesu Kristo ngke I bwabetitoaki n au ririki ae 26 n au tabo ae tangiraki Frutillar, Chile. N te tai anne, au mwakuri e uotai rinuukan marawa, karaanga, ao nei aika a tamaroa i Chile Patagonia. Imwiin bwabetitoau, I noora maiu ao au mwakuri n te aro ae boou ao n okoro, ni kina ni koaua bwa “bwaai ni kabane a kaotia bwa iai te Atua.”
N te karikibwai, ika aika tiamon a bungiaki n te karaanga. Iai aia tai ae, a riai n uaua i nanon te karaanga bwa a na roko n te marawa, are a karekea iai kanaia ao aroia ae tau ibukin rikirakeia.
Ma te marawa bon te tabo naba ae kakamaaku ake a tataninga iai mannikakaang ao taan kamwane a kataia ni kamwaneia ika n aia matau aika a katotonga te amwarake ma aki karikirakei aroia. Ngkana a kona n tokanikai iaon kangaanga aikai ika aika salmon, a na bon tauraoi ni kabonganai kawain kairakiia ae mwakaroiroi n oki nakon te tabo are a bungiaki iai, ni kaitarai kakaewenako aika a boou ao ake a taneiai iai. A tia taan rabakau ni kamatebwaia aroia iika aikai ni mwamwananga inanon ririki ao a kunea bwa a kabongana te mwabe ae maekineti, n aekan te GPS, bwa e na kairiia nakon tokin kawaia are bon ngaia raoi.
Ti kona n oki ni kabane nakon mwengara i karawa are ti bon roko mai iai. N ai aroia ika aika tiaamon, iai oin ara mwabe ae maekineti, ke Otan Kristo,are e na kairiira nako ikekei. E reirei Iesu nakoia Ana reirei, “Boni Ngai te kawai, te koaua, ao te maiu: akea ane e nako n te Tama, bwa ti i Rou.”
Ngkai ti kabotoi maiura iaon Iesu Kristo, ti na kunea kawaira nakon mweengara, n teimatoa ao ni kimwareirei ni karokoa te toki. E reirei Beretitenti Nelson bwa “te kimwareirei are ti namakinna e karako rekerekena ma aron maiura ao ake ti kabotoi maiura iaona.”
Arora mai Karawa ao Tokin Kawaira
Man te katanoata nakon te Utu ti warekia bwa “ngaira [n tatabemaniira] bon naati mwaane ao aine aika tamnei aika a tangiraki iroua ara karo ake i karawa, ao, n aron anne, iai arora ae kakawaki mai karawa ae tokin kawaira. … Imwain te maiu n rabwata, a ataia naati mwaane ao aine aika tamnei ao a taromauria te Atua bwa Tamaia ae Akea Tokina ao a butimwaai Ana babaire are Natina a kona ni karekei rabwata ao n rinanon waakin aonaaba n rikirake nakon te kororaoi ao n atai aroia mai karawa bwa taan ababa n te maiu ae akea tokina.”
Imwain bungiakin Iesu Kristo nakon n te maiu aei, E kaoti nakon Mote ao e taetae nakoina n tei ibukin te Tama. E tuanga Mote bwa iai te mwakuri ae korakora ibukina ae na karaoia. N tain te boowi anne, e weteia te Uea “natiu” tabeua te tai.
Imwiin anne, e roko Tatan ni kaririia, ni kangai, “Mote, natin te aomata, taromauriai.”
E kaekaa te kariiri aei Mote n uringa rikina mai karawa, e kangai, “Antai ngkoe? Bwa nooria, Ngai natin te Atua.” E kainaomata Mote te koaua man te kaririaki.
Tariu ao mwaneu, a bon koaua kariiriaki n te maiu aei. A rangi ni katikitiki, ma a ukoukora ti teuana te takete: ni katikiira nako man kawain te ran ae maiu are e kairiira nakon Tamara ao te maiu ae akea tokina.
I ata aron koauan te kariiri n te maiu ae mamate aei. N te Tabati teuana, ngke I moan rairaki, I reireiniia kain te nakoanibonga ngke e a riki naba te kauntaeka. I kataia ni kabanea au angareirei. E a maraki nanou ao I namakinna bwa ngai ae I moan karikia. I nako n otinako n aki taetae, ma au iango bwa N na aki manga okira te aro tabeua te tai.
N te tai naba anne, e tei i rarikiu temanna te nakoanibonga ae raraoma. E kaoai ma te tangira bwa N na kabotoa au iango iaon Kristo ao tiaki iaon te bwai ae riki n te kiraati. N uringakin te bwai ae riki aei ma teuaei, e taekinna nakoiu bwa e ongo te bwanaa ae tuangnga, “Nako rimwiina, e kakawaki teuanne irou.”
Raou aika kam tangiraki, ngaira ni kabane ti kakaawaki irouna. E reirei Beretitenti Nelson bwa, “ibukin ara berita ma te Atua, E na bon aki kua n Ana mwakuri ni buokiira, ao ti na bon aki kabuaa Ana nanomatoa n nanoanga nakoira.” Rikira mai karawa ao reitakira n ara berita aika a tabu ma te Atua e karekea nakoira te ibuobuoki mai karawa.
Kainnanoan te Karikirakeaki
N ai aron te ika are e kainnanoa kamwarakeana i taari bwa e na rikirake, ngaira ti kainnanoa naba karikirakeara n te maiu n tamnei n totokoa bakitaian tamneira. Te tataro, koroboki aika tabu, te tembora, ao rorokora ni bootakin te Tabati a kakaawaki ni maiun tamneira.
N Nobembwa 1956, E bwabetitoaki Ricardo Garcia i Chile, n riki bwa te moan membwa n te Ekaretia i abau. Te bongina imwain matena, e taekinna nakoia ana utu ao raraona, “N ririki aika a bwakanako a kaoai mitinare bwa N na kukurei n raonaki irouia au utu. Bon te mwaane ae I kukurerei ngai. Tuangiia aomata i Chile bwa e kakukurei te euangkerio.”
Imwiin karikirakeana n ana euangkerio Iesu Kristo, e kabanea maiuna Ricardo ni beku ibukin te Atua ao kain rarikina ma te tangira. Ana banna ni katoto n riki bwa ana reirei e a tia ni kakabwaiaia rooro ma rooro, n raonaki ma ngai. E reireia te burabeti Iotebwa Timiti bwa “te mwaane ae kaonaki n ana tangira te Atua, e aki rauaki n ti kakabwaiaia ana utu, ma n te aonaaba ae bwanin, e ingainga ni kakabwaiaia reeti n aomata ni kabane.”
Okiran Mweengara i Karawa
Inanora ngaira n tatabemaniira bon kan okiran mweengara i karawa, ao Iesu Kristo bon kawain kairakira mai karawa. Bon ngaia te Kawai. Ana anga karea n anganano e karekea nakoira te kona ni karaoi berita aika a tabu ma te Atua. N te tai are ti karaoa iai te berita ae tabu, ti na inimaki ni kaitarai kariiri ake a kamaenakoira ma te Atua. Kangaanga, aki raunnano, kariiri, ao karawawata a na katai ara onimaki ao korakoran maiun tamneira. Bubuti buokam. E mataata Iesu Kristo ao e tauraoi n tainako ni kabebetei uotara.
Uringnga bwa E kinaaki bwa “te aomata ae nananokawaki, ao e ata naba te rawawata.” E reirei te Tia Kamaiu, “Ami bwai i aon te aba te rawawata: ma kam na kabebetei nanomi; I a tia ni kataea ana kai te aonaaba.” Ana anganano ni kamaiu e karekea kabwaraan ara bure n te aro are E aki manga uringii.
Ti kona n aki mwaninga ara bure bwa kanoan ara atatai n te maiu aei ngaia are ti na uringnga n aki manga kaokiokii. Ma, ti na ururingnga ngkai ti kana te toa n te taromauri ni katoa Tabati. E kakaawaki te otenanti aei bwa mwakoron ara nebonebo ao rikirakera n te maiu n tamnei. E roko te kimwareirei ngkana ti ataia bwa aio tiaki ti te bong teuana. “Te Tabati e karaoaki ibukiia aomata,” ma te kantaninga bwa e na anganiira te motirawa man te aonaaba ao n kaboui rabwatara ao tamneira.
Ti ururingnga naba ngkana ti nakon te tembora—ana auti te Uea. Tembora a anganiira te atatai ae nano riki iroun Iesu Kristo bwa boton te berita are e kairiira nakon te maiu ae akea tokina, “te kabanea ni korakora … n ana bwaintangira te Atua”.
Kawaran te tembora e a tia n anganai te mwengaraoi ao te kantaninga ae korakora ibukin tokin kawaira ae akea tokina. I a tia n rinanon te reitaki ma aomata n iteran te rabuna aika uoua. I a tia n noori kakai ni kamaiu ni maiuia natira aika uarereke, uoman mai ibuakoia ake a maiu n aki nooraki aorakiia ake a na kainnanoa te tararua ni katoabong ni karokoa tokin te maiu.
A kukurei ara utu ngkai ti tibwatibwa iaon taekan te babaire ni kakukurei. A kaota moaia ni kukurei natiu ngkana a ongo anne, te kakaitau nakon Iesu Kristo, a na kauarerekeaki “rawawataia n te tai ae uarereke.” Ti rang tangiriia natira, ao ti ataia bwa n te bong teuana, n aron are e reireia Beretitenti Jeffrey R. Holland, a na “tei imatara ni mimitongaki ao n tamaroa, kororaoi n rabwataia ao n aia iango.” E uotiira ara berita ni kaniira nakon te Atua ni karaoi ake a kangaanga karaoia, n tokanikai ni kaririaki ao nanououa ma te oota ao te rau.
Te kakaitau nakon Iesu Kristo, iai te kantaninga ao matoan aan bukin reitinakon te itangitari, tataro, ao ni boutokaia naake ti tabeakiniia.
I ataia E maiu. E kinaira ao E tangiriira. Bon Ngaia te kawai, te koaua, ao te maiu n te aonaaba.
I kaoi ngkami ni kabane n te bong aei bwa ti na kabotoi maiura iaon Iesu Kristo ao Ana reirei. E na buokiira karaon aei n totokoi kataaki, aki kukurei, ao te maneang. Ti na tei kaanga tembora—n tabu, matoatoa ao e teimatoa. Ti na tokanikai iaon kangaanga, ao ti na roko ni mweengara, n teimatoa ao ni kimwareirei ni karokoa te toki. N aran Iesu Kristo, amen.