“Okirai ngkai … Bwa N na Kamarurung Ngkami”

Ti maeka ngkoa n te mwenga ae otabwaniniaki n aroka aika totooa. Irarikin te kawai n rinnako bon te aroka ae te Willow ae rang tamaroa. Ma te kananokawaki n te tairiki teuana n tain te angbuaka ae korakora, e karanganakoa te willow. E tara n kananokawaki n wene iaontano ma wakaana aika otirake.

I a tauraoi ni kamaeua au tao te iti ao ni koreia bwa te aia ngke a biri nakoiu kainrarikiu ni katokai. E booai ngkai I a kataua taekan te aroka arei, ao n kairoroira bwa ti na aki tewenakoa. E kaota nakoira teuana wakaan te aroka aei ae teimatoa n tebo iantano ao e tuangira ngkana ti tabekia n kaetia, korei mwangana, n ribanaia, ao a na manga matoa wakaana.

I raraoma man aki kakoaua ae te aroka, ae a bwaka ma n reke n te kanganga e na konaa n manga okira arona n maeu. I kataia n kaotaa ae ngkana tao e manga okira maeuna, e na bon aki konaa n kaitara te angibuaka are imwiina. Ma n ataakin ae kainrarikira aio e kakoaua bwa e na kona n maeu te aroka, tia waaki ma te kantaninga.

Ao te bwai ae riki imwiina? Imwiin tabeua te tai, ti a konaa n noorikainikinaa bwa e a reke te maeu ngkai e a moanna n matoa wakaana. Ngkai, ai 12 te ririki imwiina, te aroka aio e tei n maeureirei man tikiraoi, ma wakaana aika a matoatoa, n tei n manga katamaroa taraan te aba.

Inanon kaitiboou ma Aika itiaki n katobibia te aonnaba, I kauringaki taekan te aroka ae te willow aei are e karekea te kantaninga ngke e a taraa n akea te konaa. Tabemang ae iai ngkoa aia koaua n te euangkerio ae matoa man maeureirei n airon te Willow. Ngkanne, n bukina aika a onoti irouia, koaua akanne a tabe n mamaara, n uotaki nakon buan te onimaki. Tabemang a keiaki n kamatoaia ma wakaaia aika a kan kounako man tanon te euangkerio.

Ma taainako n taainako, I kakorakoraaki man karakinaia aika a mwaiti aika a rineia bwa a na kaboua rikia n reirei ao n okira Mwengaia n te Aro. Man aki kaakan aia onimaki ao koaua n aron aia aika akea bongaia, a kaeka ana wirikiriki te tamnei n kakao n tangira bwa a na oki.

N kaean te maungatabu n te titeiki i Korea ae tibwatibwa iai temanna ae tibwa oki: “I karabwaia taari n aia tauraoi n butimwaea mamaran au onimaki ao mamarau, ibukin karokoaia irou, ao ibukiia kain te aro are teimatoa aia akoi nakoiu. Iai naba ngkai raraou aika tuai n manga roroko. Ao e kangare, bwa aki toki n tuangiia imarenaia bwa ana oki nakon te ekaretia ni kaoka aron aia onimaki. N au iango ao ni kabaneia a kainanoa te onimaki.”

Nakoimi ake kam kainanoa te onimaki, ti kaoi ngkami bwa kam na oki. I berita bwa ami onimaki ana konaa n kakorakoraaki ngkana kam taromauri ma aika Itiaki.

Temanna te mitinare ngkoa mai Aberika e koroboki nakon te tia kairiri n te ekaretia, n kabwarabure ao n bubuti kabwaran ana bure man aki nanoraoina n ana reirei iaon teuana katein te aba, are e karika kitanakin te aro irouna. N ana tibwatibwa ma te nanorinano: “E kananokawaki, aki nanoraoiu 15 te ririki n nako ae anganai boona ae rang rawawata. A bua bwaai aika mwaiti mai irou—n nakon are I kona n iangoia. I rootaki nte maemae man te urubwai ae I kariki inanon kawaiu, ma iaon bwaai n kabane aikai I kukurei ngkai I a manga kunea kawaiu n oki.”

Nakoimi n kabane ake kam noori bwai aika a bua mai iroumi, ti kaoi ngkami n oki bwa kam aonga n manga katonga riki uaan te euangkerio ae kakukurei.

Te titita n United States e kitana te Aro inanon ririki aika bati. Rongorongon okina e airi ma te reirei ae korakora nakoia kaaro ma utu ake a rootaki man kitanan te koaua irouia ake a tangiria. E koreia:

“I kona n karinani n ae mwaiti bukin ae I toua nako kawaiu man te Ekaretia, te euangkerio, ao n arona ma au utu. Ma a aki rang kakawaki. I aki karaoa teuana au rinerine ae bubura bwa N na kitana te Ekaretia—I karaoa te rinerine ae nakon te ngaa mwaitina. Ma teuana te bwai ae I bon ataia bwa au karo a karaoa teuana aia rinerine ae bubura, ao a teimatoa nako iai. A rineia bwa a na tangirai.

“I aki konaa n kataui mwaitin raninmata aika a bwaro, ma mwaitin tairiki n kataratara, ke mwaitin te tataro ae nako man te nano n taekinaki ibukiu. Aki weteai n buure ake I karaoi; ma, a weteai man bureu. A aki anganai namakinan ae I aki butimwaeaki n mwengaia ke n tain bootaki n utu; namakin akanne bon mai irou. Ma irarikina anne, a teimatoa n butimwaeai. Tao a nooria bwa e tabe n memere te ota mai irou. Ma a ataia bwa te aomata are ngai ngkoa bon tii nuun are I konaa n bitaki nako iai.

“N ai aron kangangan otinakou man te Ekaretia, ai aron kawaiu n manga oki. Ma te bwai teuana ae e aki kanganga bon te okirikaaki nakon namakinan te mwenga ae nneu n koaua.”

Au rongorongo n te bong aei bon nakoia n kabane ake a tia n namakina te tamnei ae raoiroi ma a raraoma ngkana iai te kawai n oki ke te tabo ibukimi n Ana Ekaretia ae kaokaki Iesu Kristo. Bon nakoia naba n kabane ake a kamatoaia ke naake a kaririaki bwa a na kamawaia.

Te rongorongo aio tiaki te kakatai, ao tiaki te katekebuaka. Bon te kakao, ae nako ma te tangira ao te nano ae kororaoi n butimwaai ngkami n okira mwengami n tamnei.

I tataro bwa kam na namakina ana kakoaua te tamnei ae raoiroi ngkai kam na ongo te kakao n tangira aio ma te berita ae mimitong mai iroun ara Tia Kamaeu, Iesu Kristo:

“Kamaki okirai ngkai, ma n rairinanomi man ami bure, n rairaki, bwa I aonga ni kamarurung ngkami?”

Ni katoa wiiki a mwaiti aika kaeka nakon ana kakao te Tia kamaeu bwa a na okira rikia bwa reirei ao a kakaonimaki inanon te Ekaretia, n ukokora ma te nanorinano ana kamarurung Iesu are e beritanna. Ao n kaokoro ma kario aika a kona n butanako, e raka mwaitia ara kairake aika a rineia bwa a na tiku n kakorakoraia ao n karikirakea aia onimaki iroun Iesu Kristo.

Ngke tabeman mai ibuakoia ake a iriira Iesu i kaberenaum a kunea bwa e matoatoa ana reirei ao a rineia bwa a na kitanna, E rairaki nakoia ana Abotoro ao n tuangiia, “Kam nna kitanai naba ngkami?”

Aio te titiraki ti na riai n bane n kaekaa ngkana ti kaitara ma kataakira aika a onoti. Ana kaeka Betero nakon Iesu ae kakawaki man mataata “Antai ae ti na nakoina”? taekan te maeu ae akea tokina iroum.”

Ngkai ko iangoa ana kakao Te tia Kamaeiu n oki nakoina, tera ae ko reiakinna man karakinan te aroka ae te willow?

1. Te kawai n oki e teimatoa n aki bebete man kamwengabuaka, ma e bon riai. Ngkana ara Willow e kateaki n kaokaki, a bane ni koreaki mwangana nako. E bon aki beebete. Ngaira naba ti na namakina te mamaara ngkana ti kanakoi arora ake rimoa ao n taonaki kainikatongara. N kamatoa ami onimaki iaon Iesu Kristo ao Ana euangkerio—botona ao wakaana—ana anganiko te kantaninga ao te ninikoria n anaa ami moan mwaneka n oki.

2. E anaa ririki aika a bati ara willow bwa e na manga okira korakorana ao tikiraoina. Ngkai ao e a korakora riki ao n tamaroa riki nakon mai imwaina. Taotaona nanom ngkai a rikirake am onimaki ma am koaua. Aio e irianaki ma aki butimwaean te aki nanoraoi ma taeka aika aki iangoiaki raoi n aron “Ko a bon memena iaa inanon ririki akekei?”

3. Te willow e bon aki kona n maeu n akean tararuakina ma ribanakina. Kona konaa n ribana am onimaki ma am koaua ngkana ko amwarake n te taibora n toa n katoa wiiki ao ngkai ko taromauri n ana auti te Uea.

4. N ai aron te Willow are e kainanoa otan taai ibukin mwangana ma baana bwa a na manga bwebwerake, ai aron naba am koaua ae e na bwebwerake ngkana ko kateimatoa am kanamakin ma am kakoaua nakon te tamnei. Reirei mai iroun Amureki, n kabwarabwara ana tai n aki kakaonimaki n taekinan, “I weteaki n te tai ae mwaiti ao I aki kan ongo.”

5. Kain rarikiu e noora te willow n arona ae e na riki iai. Ai aron naba te Uea n ataa am konaa n rikim n atua ao tera ae kona n riki nakon am onimaki ma am koaua. E aki kona ni bwara nanona iroura. Rinanon ana Mwakuri n Kamaeu Iesu Kristo, ni kabane ake a uruaki a kona n kamarurungaki.

I kakoaua bwa iai te kimarimari i karawa iaoia ake a okirikaaki. Ko kainanoaki, ao ko tangiraki. I kakoaua bwa Iesu Kristo bon ara tia Kamaeu ao E kamarurungiia naake a oki Nakoina ma te rau ao te kimwareirei ae bati. Baina aika a nanoanga aki rukumaki bwa a ukinako man aroraki nakoim. E tuai n oimwi ibukim bwa ko na oki. Ma te tangira ae korakora inanora, ti butimwaiko n okira mwengam. N aran Iesu Kristo, amen.