Ana Mwakuri ni Kamaiu Iesu Kristo E Katauraoa te Kabanea ni Korakora ni Kamaiu

Ana Mwakuri ni Kamaiu Iesu Kristo E Katauraoa te Kabanea ni Korakora ni Kamaiu. E anganai te mwiokoaki Beretitenti Russell M. Nelson bwa N na katabua te Casper Wyoming Tembora n te ririki ae nako. Bon te taneiai ae e kakaawaki, e ringa te nano, ao e karikirakea te maiu n tamnei. E kaota raoi kakaawakin te tembora ni kamaiuia natin te Atua rinanon ana Mwakuri ni Kamaiu te Tia Kamaiu.

Taian titeiki n aonon te Casper Wyoming Tembora a kaaira Mwakoron te kawai are e kabonganaaki irouia taian bwaeoniia ibukia Aika Itiaki ni Boong aika Kaitira i marenan 1847 ao 1868. N au katauraoi ibukin katabuan te tembora, I manga wareki tabeua rongorongon ni ikawai n te kawai irarikin te Karanga ae Platte ni kaan ma Casper n reitinako nakon te Salt Lake City. E a tia ni kakabonganaaki te kawai aei irouia bubua ni ngaa taan roko ni maeka mai maeao. Te moan bwai ae I katuruturua bon mwaitiia bwaioniia irouia Aika Itiaki ni Boong aika Kaitira ae raka i aon 60,000 ake a tia ni mwananga n te kawai aei.

Angiia ara bwaeoniia a roko n aenikaa aika a kokookaki, ma e nakon 3,000 aika a mwananga man 10 kambwana n aenikaa. Waniua man kambwana n aenikaa aikai a katabwenai kawai aika a kauringaaba ma tokanikai aika a rinako ao tabeman aika a mate iai. Te kambwana n aenikaa ae Te Willie ao Martin n 1856 bon taian kabanea n rootaki n te mwananga .

I rinanoa rongorongon te kambwana n aenikaa ae te Willie ao Martin man te tai are e moa iai buakakan kanoan te bong. I rootaki n atai taian kangaanga ake a kaitarai n te mwananga rinanon te Karanga ae te Sweetwater, Martin’s Cove, Rocky Ridge, ao Rock Creek Hollow.

Between Storms, by Albin Veselka

I bon tuai n rin i nanon te Casper Tembora i mwain te katabu. Ngke I moan rin n te tembora, e katikaki au taratara nakon korotamneian te aenikaa ae e atuunaki Between Storms. E aki nanonaki n te korobanna aio kaotan taian karuanikai ake a tia n riki. Ngke I tabe n taraia, I iango, “E koaua te korobanna; angiia taan mwananga n aenikaa ake bwaeoniia a bon aki rinanon taian karuanikai. ” I aki konaa n taona au namakin bwa te bwai ae riki anne kanga aiaron waakin te maiu ae tabangaki. N tabetai ti mena i marenan kangaanga ao n tabetai i marenan taian nang ao otaan taai.

Heaven’s Portal, iroun Jim Wilcox

Ngke I a manga taraa te korobanna i aon te o, ae atuunaki Heaven’s Portal, I iangoia bwa te korobanna ae kaota te ingabong n te tiamwa ae e aranaki bwa te “Devil’s Gate,” ma te karanga ae te Sweetwater ae weneraoi man itiaki ae raanga iai, e tei ibukin tamaroan ana karikibwai te Uea, tiaki tii taian kangaanga ake a kaitarai bwaeoniia i nanon tain te mwaitorotoro anne.

Imwiina I a taraa mooa, i akuun te taibora ni karekea te kariaia, I noora korobannan te Tia Kamaiu ae tamaroa. E waekoa n taonai namakinan te kakaaitau n nooran aio. N te aonaaba ae rangi n tamaroa, bon iai naba kangaanga aika a korakora. Ngkana ti nakon Iesu Kristo, te Tia Kamaiu n te aonaaba, E kamaiuira man angibuakan te maiu rinanon Ana Mwakuri ni Kamaiu ni kaineti ma ana babaire te Tama.

I bon irou, te moan ruu n rin n te tembora bon te katauraoi ae kororaoi ibukin te otenanti n ruun te tembora are e na karekea nakoira otenanti ibukin te karietataaki, karaoan berita aika a tabu, ao ni butimwaea ao n rinanon ana kakabwaia n Ana Mwakuri ni Kamaiu te Tia Kamaiu. E boboto i aon ana babaire ni kakukure te Taman i aon ana mwakuri ni kamaiu te Tia Kamaiu.

Te bwai are a rinanona te bwaeoniia e katauraoia Aika Itiaki ni Boong aika Kaitira ma te rongorongo ni kawai ae okoro ao te rongorongo ae korakora man kairaki n te tamnei. Irouia tabeman, te mwaing ae anaa te tai ae maan aei e riki man taumatoaan kanakoaia mai Missouri ao Nauvoo. Irouia tabeman, e moa man te tai are e katanoata iai Beretiteti Bringham Young babairean aenikaa ni kokooki, are e na kanakoraoa riki te mwananga. E booraoi riki aenikaa nakon kaa aika a kookaki n taian aoti ao kaao mwaane aika a bubura .

E taku te mitinare ae Millen Atwood i Engiran, bwa ngke e katanoataaki bairean te aenikaa, “e waekoa ni butinako ao n reke taekana, ao aonrake nanoia Aika Itiaki ma te kimwareirei ao te kukurei n nano.” A mwaiti ake a tia n “tataro ni katoabong, ni katoa tairiki, bwa a aonga n reke aia tai ni kaitiboaki ma tariia ao mwaneia ake n [taian] maunga.”

A mwaiti irouia Aika Itiaki n aia aenikaa aika a rinanon karawawata ma a aki reke ni waaki ni kabuanibwai aika a korakora. Ma uoua kambwana n aenikaa aika, te Willie company ao te Martin, ake a rinanon te baki, te mwaitorotoro ae korakora, ao a mwaiti aika a mate.

Angiia taan mwananga aikai ake a borau mai Liverpool, Engiran, ni Meei 1856 i aon uowa kaibuke. A roko n tain katauraoan aenikaa n te tabo ae Iowa i nanon Tuun ao Turai. N aki tabe ma kaetieti, a mwananga nako kambwana aikai ni kaea Salt Lake Valley n rangi n rimwii n raabanen tain bwakan baan aroka.

E moan ataa aron te kabuanibwai nakon kambwana aikai Beretitenti Bringham Young n 4 Okitobwa, 1856. N te bong are i mwiina e tei i mataia kaain te Ekaretia i Salt Lake City ao n taku, “A mwaiti tarira ao mwaanera aika a rianna ma aia aenikaa, … ao a riai ni karokoaki ikai; ti riai ni kanakoa te ibuobuoki nakoia … imwain rokon tain te mwaitoro.”

E tuangiia bitiobi bwa a na katauraoa 60 tiim n aoti, 12 ke e raka riki aenikaa, ao 12 te tan (10,886 kg) ni burawa ao e taku, “Naako ao uotiia mai aomata akanne.”

E nakon te mwaiti ae 1,100 mwaitia bwaeoniia ni bootaki man te kambwana ni aenikaa ae te Wiilie ao Martin. E nakon 200 mairouia Aomata aika Itiaki aikai aika a mate i nanon tain te mwananga. N akean rokon te ibuobuoki n taina, a na mwaiti riki aika a na bua maiuia.

E roko buakan te mwaitoro tao uoua te wiiki i mwiin te moan ibuobuoki are e mwananga mai Salt Lake City. E kabwarabwaraaki n rongorongoia kaain te kambwana ni mwananga ae te Willie ao Martin korakoran te kangaanga i mwiin rokon te angibuaka. E kaotaki naba n te rongorongo te kimwareirei ae korakora ngke a roko taan ibuobuoki n te kamaiu.

Ni kabwarabwaraan rokoia, e taku Mary Hurren: “A waanako ranimataia i aon tabaia mwaane, ao a mwaie ni kimwareirei ataei. N te tai ae waekoa ngke a kataia n taua angin te bwai are a taonaki iai aomata, a katorobubua ni kabane i aon te tinoo ao ni karabwa te Atua.”

Uoua te bong i mwiina, a mwananga kaain te Willie n rinanon te kabanea ni kangaanga ni kawai, n riaon te Rocky Ridge, i nanon te buaka n te mwaitorotoro. A tibwa roko naake man te kabanea ni kurubu n te aoa 5:00 n ingabong n te bong are imwiina. Tengaun ma teniman ake a mate ao n taunaki n ruanimate aika a kabaitiaki karaoaia.

N 7 n Nobembwa, a kaan kaain te kambwana ae te Willie ma Salt Lake Vally, ma n te ingabong anne, bon iai naba teniman aika a mate. A tibwa roko imwiina kaain te kambwana ae te Willie i Salt Lake, ike a butimwaeaki raoi nako nanon mwengaia kaain te Ekaretia.

N te bong naba anne, a bon tiku naba n te raroa ae 325 te maire (523 km) i aon kawaia te kambwana ae te Martin, n reitinako n rootaki man te mwaitoro ao aki taun te amwarake. Tabeua te bong imwaina, a toua nanon te Karanga ae Sweetwater ao n roko n te tabo ae aranaki ngkai bwa te Martin’s Cove, are a taku bwa a na mano iai. E taku temanna te bwaeoniia, “Bon te kabanea ni buakaka n touan te karanga i nanon te mwananga.” Tabeman mairouia taan ibuobuoki—n aron tibutoruu te unimwaane, ae David Patten Kimball, are ai tibwa 17 ana ririki, ni ikotaki ma raoraona aika kairake aika, “George W. Grant, Allen Huntington, Stephen Taylor, ao Ira Nebeker—a kabanea te aoa ae mwaiti n te ran ae mwaitorotoro,” n ninikoria n buokiia kaain te kambwana n toua nanon te Karanga ae Sweetwater.

Ngkai e rangi ni bati n anai nano te bwai ae riki aei, ao ngkai I reiakina riki taekaia taan ibuobuoki, I reiakinna bwa ni kabane ngaiia a bon iriira te burabeti ao ni karaoa tabeia ni kamaiuia Aomata aika Itiaki ake a rootaki. Bon taian ninikoria ni kabane taan ibuobuoki aikai, ao aiaroia naba taan kitana abaia.

N kamatebwaian te karaki, I kakaaitau n te reitaki ae kakaawaki ao te nonori mai karawa n te taratara ae abwabwaki irouia taan kitana abaia. John ao Maria Linford ao natiia teniman mwaane bon kaain te kambwana ni mwananga ae te Willie. E mate John tabeua te aoa imwain rokoia taan ibuobuoki. E tuanga Maria bwa e rangi ni kukurei ni karaoan te mwangana aei irouia. “N na bon aki roko i Salt Lake,” e taku, “ma ngkoe ao natira mwaane kam na roko, ao I aki nanokawaki ni bwaai ni kabane ake ti a tia n rinanona ngkana a ikawai rake natira ao ni katei aia utu i Tion.”

E katauraoa te kakimototo aio Beretitenti James E. Faust: “N ninikorian aroia bwaeoniia n aenika, ti reiakina te koaua ae korakora. Ni kabane aomata a na rinanon te kaitiakaki n te ai, ao bwaai aika akea manenaia ao kakaawakia ni maiura a na kona ni maranako n aron te bwai ae akea manenana ao kaotamwakaa ara onimaki, ni kamanoa, ao ni kakorakora. Taraan ae bati nooran te rootaki, korakai, ao te uruaki n nano irouia aomata, ni ikotaki ma naake a ukeuke mwaaka ni karaoa te eti ao n kakaonimaki. Ma aio bon te rinanon te kaitiakaki bwa a aonga n riki n aiaron te Atua.”

N karaoan ana Mwakuri ni Kamaiu ao Mangautina, e urua “ana kabaebae te mate” te Tia Kamaiu, ni karekea te tokanikai i aon te mate” ibukiia aomata ni kabaneia. Ibukia ake a tia n raira nanoia man taian bure, E a tia ni katoka iaona buakakaia ma riaoan tua irouia, ao ni kaboia, ao ni kakoroa bukin te moti.”

N akean te Mwakuri ni Kamaiu, ti aki kona ni kamaiuira man te bure ao te mate. Ngkai e kona karaoan te bure ni korakora mwakurina i nanon kataakira, a ibetaotao kangaangan te maiu man taian kaairua, babaire aika a buakaka, mwakuri aika a bubuaka mairouia tabeman, ao bwaai aika a mwaiti ake itinakun ara konaa.

Tataekina Au Euangkerio e taku: “Ngkai ti katan i aon Iesu Kristo ao Ana mwakuri ni Kamaiu, E kona ni buokira bwa ti na tokanikai i aon katakira, aoraki, ao te maraki. Ti kona ni kaonaki n te kimwareirei, te rau, ao te raunnano. Bwaai ni kabane ake a katanginano ibukin te maiu a kona ni kaetaki rinanon Ana Mwakuri ni Kamaiu Iesu Kristo.”

N tain te Itita aei, a na bane nanora i aon te Tia Kamaiu ao Ana mwakuri n anga karea. E katauraoa te kaantaninga ao te oota n te tai ae mwaiti iai kanga te nanokawaki ao te botu. E taekinna Beretitenti Gordon B. Hinckley, “Ngkana e taraaki aron rongorongon kawai, … [bon] akea … te bwai ae tamaroa, ae rianako, ao ae korakora nakon kaotan te akoi .”

I tibwai teniua iango ake I taku bwa a bootau nakon ara bong.

Te moan, tai kamwinibaea kakaawakin karaoan are ti kona ni karaoia ni buokiia tabeman man kangaangan nakon te rabwata ao te maiu n tamnei.

Te kauoua, butimwaea ana Mwakuri ni Kamaiu te Tia Kamaiu ma te kukurei. Ti riai ni kabane ni keiaki ni kaota te kimwareirei ao te kukurei e ngae ngkana ti kaitarai kangaangan te maiu. Ara kouru bwa ti na maiu n te aro ae ti kaota iai te kekeiaki mwaaka n aaro ni kabane. I a tia n noora toau ae kakaawaki irou, ae Mary, bwa e karaoa aio ni maiuna ni kabane. I kakaaitaku n tamaroan arona n reitaki ae kakorakora e ngae ngkana ti kaitara ma kangaanga i nanon ririkin maiura.

Au kateniua n reirei bwa ko na kaokoroa te tai teuana n reitinako n kakaonimaki n taraa raoi ana Mwakuri ni Kamaiu te Tia Kamaiu. A mwaiti kawai ni karaoan aei i nanon ara taratara n aomata n te aro. Ma, te roroko ni bootakin te toa ao kanakin te toa bon te kabanea ni kakaawaki riki.

N aron kakaawakin anne bon te nanakon te tembora n te tai ae angaraoi. E karekea ururingan ana Mwakuri ni Kamaiu te Tia Kamaiu te Tembora ao aron te tokanikai i aon bwaai. Ao ae rangi ni kakaawaki riki, e karekea nakoira te ibuobuoki n tamnei te nanakon te tembora ibukiia ara mate aika a tangiraki ao ara bakatibu ake ti aki ooia.

N ara maungatabu ae nako, e katuruturua te reirei Beretiteti Russell M. Nelson, ngke e kangai, “a buokira kakabwaia man te [Tembora] … ni katauraoia aomata ake a na buoka te aonaaba ni katauraoia ibukin Kauokin te Uea!”

Ti na riai n aki mwaninga taian anga karea ao katooto mairouia te roro ae rikirake, ma ara kakaaitau, karabwarabwara, ao nebonebo a riai ni boboto i aon te Tia Kamaiu n te aonaaba ao Ana angakarea ni kamaiu. I kakoauaa bwa te kiing nakon ana babaire ni kakukurei te Tama bon te Mwakuri ni Kamaiu ae karaoia ara Tia Kamaiu, ae Iesu Kristo. E maiu ao ni kaira Ana Ekaretia. Ana Mwakuri ni Kamaiu Iesu Kristo E Katauraoa te Kabanea ni Korakora ni Kamaiu. N aran Iesu Kristo, amen.