Buoka mai Karawa ibukin te Maiu Aei

Rinanon te Burabeti Iotebwa Timiti, e kaotii bwaai tabeua te Uea ibukin aron maiura imwaain te maiu aei. Ikekei ti maeka bwa natin te Atua aika tamnei. Ibukin nanon te Atua ni buokiia natina bwa a na rikirake, E baireia ni karaoa te aonaaba are ti na karekea iai rabwatara, reiakinaki rinanon bwaai ake ti rinanona, karikirakea anuan maiu mai karawa, ao ni kaotia bwa ti kona ni kawakina ana tua te Atua. Ao naake a tau a na karekea “te mimitong i aon atuuia n aki totoki” (Aberaam 3:26).

Ni karaoan aron te babaire mai karawa aei, E rinea Ana Rikitemanna te Atua bwa ara Tia Kamaiu. Ao Rutibero, are e iangoa kabuaan inaomatan te aomata n rinerine, e riki bwa Tatan ao e “teweakinako.” Imwiin kanakoana nakon te aonaaba ao n aki karekea te maiu n rabwata, e anganaki Tatan te kariaia ni kakatai “ni mwamwanaia ao ni kamatakia aomata,ao ni kairia nakon te tautaekanaki n ana kantaninga, ni kabane ake aki kan ongo ni bwanan te [Atua]” (Mote 4:4).

Ae booraoi nakon ana babaire te Atua ibukin rikirakeia natina ibukiia bwa a na rinanon te “kakaitara ni bwaai ni kabane.” (2 Nibwaai 2:11). N ai aron aki rikiraken ana mwatireti rabwatan te aomata ke tararuaana n akean kaitaraan te tua n katikitikin te aonaaba, ai aron naba te rikirake n rabwata ae kainnanoa te aomata bwa e na kaitaraa ana kariiri Tatan ao kakaitara n te maiu aei. Te kabanea ni kakawaawaki n rikiraken te tamnei bon te kainibaire n rinerine i marenan te raoiroi ao te buakaka. Ake a rinea te raoiroi a na rikirake nakon tiaia mai karawa. Ake a rinea te buakaka—n aroia ake a karaoi kaririaki n te maiu aei—a kainnanoa te ibuobuoki ni kamaiu, are e a tia ni baireia ni katauraoia te Atua n tangira.

E a tia, ana ibuobuoki te Atua ae korakora ni kataurao te Tia Kamaiu, Iesu Kristo, are e na korakai ni kaboamwi ao ni karekea kabwaraanbure irouia ake a rairananoia man aia bure. E kabwarabwaraaki n te nanoana ao te Mwakuri ni Kamaiu ae mimitong anne bwa bukin tera te onimaki bon te moan tua n reirein te euangkerio. Ana Mwakuri ni kamaiu e “kakoroa bukin mangautiia maate” (Aramwa 42:23), ao e “karaoa [taian] mwakuri ni kamaiu ibukin buren te aonaaba” (Aramwa 34:8), ni kamaiunai ara bure man te rairannano ao man mwaakan te Tia Kamaiu ni buokiira man buakakan te maiu aei.

I aon riki mimitongin kamaiunaan bure ake a kabwaraaki, e katauraoi bwaaintituaraoi tabeua riki ana babaire te Tama ao te Nati ni kamanoira, ao n totokoira man te bure n te moan tai. Maiura aio e moa n taainako ma te karo ao te tina. N iangoana, iai te karo ao te tina, ma aia bwai n tituaraoi ni kaira rikirakera. Ngkana akea te karo ao te tina, akeaia bon kanoan te kakaaitara ae ti riai n tokanikai mai iai.

Ana babaire Tamara are i Karawa e katauraoi buoka tabeua ake a na kairiira rinanon mwananga n te maiu aei. N na taetae i aon aua. Taiaoka tai wareka au numbwa are aua, bwa a irekereke buoka aikai. Ae kakawaki riki, iai riki kamanomano n nanoanga i rarikin aikai.

Te Moan, N na marooro n Otan ke Tamnein Kristo. N ana reirei ae korakora n ana boki Moronaai, e taekina ana taeka tamana Moronaai bwa “tamnein Kristo a bane n anganaki aomata, bwa aonga n ataa te raoiroi ma n te buakaka” (Moroni 7:16). Ti wareka te reirei ae aron aei ni kaotioti ni boong aikai:

“Ao te Tamnei e anga te oota nakoia aomata ni kabane ake a roko nakon te aonaba; ao te Tamnei e kaotaia aomata ni kabane n taabo nako n te aonaba, ake a ongo nakon bwanaan te Tamnei” (Reirei ao Berita aika Tabu 84:46).

Aio riki: “Bwa Tamneiu e kanakoaki nakon te aonaba bwa e na kaotaia ake a nanorinano ao a raraoma, ao e na kabuakakaia naake a buakaka” (Reirei ao Berita aika Tabu 136:33).

E kabwarabwarai kiibu aikai Beretitenti Joseph Fielding Smith: “E aki kitaniia aomata te Uea (ngke a bungiaki nakon te aonaaba aio) n aki konabwai, a ukora te ota ao te koaua, ma te aomata … e bungiaki ma inaomatana ni karekea te kairi, kaetieti, ana reirei Kristo ke Otan te Koaua.”

Te kauoua n buoka aika a korakora aika a katauraoaki iroun te Uea bwa a na buokiira n rinea ae eeti bon kaetieti aika mwaiti inanon koroboki aika tabu bwa kanoan te babaire ni kamaiu (te babaire ni kakukurei). Kairiiri aikai bon tuua, otenanti, ao berita aika tabu.

Tuua a kaota kawain Tamara are i Karawa are e mwakenna ibukin rikirakera nakon te maiu ae akea tokina. Aomata ake a iangoia bwa tuua kanga ana kawai te Atua ni katuaaia are e bon taku, a aki oota n ana babaire te Atua n tangira ao ni kakukurei. N te kawai anne, ti kona ni karekei reitakira ma te Tia Kamaiu aika a kainnanoaki ao n tau ibukin rikiraken mwaakana ni buokiira ni kawaira nakon te tia are E baireia ibukira ni kabane. E tangiriia natina ni kabane te Atua bwa a na oki nakon te abanuea ae tiretio, ake a maeka iai te Atua ao te Tia Kamaiu, ao ni karekea te maiu are a reke irouia ake a maeka n mimitongin te tiretio.

Otenanti ao berita bon kanoan te tua are e kaota te kawai nakon te maiu ae akea tokina. Otenati, ao berita aika a tabu are ti karaoia ma te Atua, bon kawai ao katantan aika a kakawaki n te kawai anne. I tangiria ni iangoa te tibwanga n te berita ae tabu ae kaotaki arona n ana babaire te Atua, ana kakabwaia ae te kabanea n rietata a bon anganaki naake a kaman berita ni kawakina ana tua ao ni kawakin berita akanne.

Tein ana buoka te Atua ibukin karaoan rinerine aika a eti bon kakoaua mairoun te Tamnei ae Raoiroi. Te Tamnei ae Raoiroi bon te kateniman n te Utu n Atua. Tabena ae kaotaki n koroboki aika tabu, bwa te kakoaua ibukin te Tama ao te Nati, n reireia nakoira, bwaai ni kabane ao n kauring i nanora bwaai ni kabane ao n kairiira nakon koaua ni kabane. A mwaiti rongorongo n koroboki aika a tabu ni kaota te koaua ni mwaakan te Tamnei ae Raoiroi, n aron te kakoaua n tamnei ni kaekaan te titiraki ibukin te koaua n Ana Boki Moomon. E riai n aki kamangaoaki kaotan te koaua ma ana bwaintituaraoi te Tamnei ae Raoiroi, are e katokaaki imwiin te bwabetito.

Teuana te kawai ae moan te raoiroi n ana buoka te Atua ibukiia natina aika a kakaomaki bon te bwaintituaraoi ae te Tamnei ae Raoiroi. Kakawakin te bwaintituaraoi aei bwa e kaota koauana bwa e katokaaki imwiin te rairainnano ao te bwabetito n te ran, ao i mwiina, [e kabwarabwaraaki n koroboki aika tabu] e roko kabwaraan am bure n te ai ao te Tamnei ae Raoiroi.” (2 Nibwaai 31:17). Aomata ake a karekea kabwaraan aia bure—ao ni kakaboui kaitiakaia ni katoa bong man te rairannano ni katoa bong ao ni maiu ni kaineti nakon berita ake a karaoia rinanon te otenanti n toa—a tau ibukin ana berita te Tamnei ae Raoiroi, Tamnein te Uea, “e na memena …irouia ” (Reirei Ao Berita Aika a Tabu 20:77).

Ngaia are e reireia Unimwaane Joseph F. Smith bwa te Tamnei ae Raoiroi e na ”kaotai aia iango aomata ni kaineti nakon ana bwai te Atua, ni karekea rairakia man karaoan nanon te Tama, ao ni mwakuria n te koaua bwa te rao n te maiu, n riki bwa te kakoaua ao te kairi nako nanon koaua ni kaoniia ni katoabong ma te kimwareirei, ma aroia ni karaoa ae raoiroi nakoia aomata ni kabaneia, n rinanon te kairua nakon karoan te kairua, n akoi ao n nanoanga, rinanon te maraki ao te ibuobuoki. Ake iai irouia te bwaintituaraoi aei, te bwaeao ae bati boona, a karekea reitinakon takaia imwiin te raoiroi. N akean ana buoka te Tamnei ae Raoiroi,” e taekinna n ana kabanea n taeka Beretitenti Smith, “akea temanna ae kona n nakonako ni kaineti inanon te kawai ae irariki.”

Ma buoka aika mwaiti man korakora ni kairiira i nanon ana borau n te maiu aei, e kananokawaki ae a mwaiti aika a teimatoa n aki tauraoi ibukin aia tai ni kaitibo ma ara Tia Kamaiu ao Ara Tia Kabooira, Iesu Kristo. Ana kaikonaki irouia kiibono ake tengaun, ae tataekinaki n te mautangatabu aei, e kaotaki iai bwa ibuakoia ake a kaoaki bwa a na kaitibo ma ngaia, bon ti iterana ae a na tauraoi.

Ti atai ni kabane katooto n te aki tauraoi: mitinare ake a oki ake a urua rikiraken tamneia man aia aki kakaonimaki, kairake ake a kamangaoa rikirakeia n tamnei man kararoakiia n reirei ao waakin te Ekaretia, mwaane ake a taotaona katabuaia nakon te Nakoanibonga ae te Merekitereka, mwaane ao aine—tabetai kanoaia moan bwaeoniia ao kaaro aika a kakaonimaki—ake a kitana kawain te berita ni karaoan ao kawakinan berita n te tembora ae tabu.

A mwaiti n aron kabwaka ake a riki ngkana a kabwaka membwa ni iriira waakin karikiraken te maiu n tamnei n te tataro, kamatebwaian booki aika a tabu, ao kakaraoan te rairannno. Ni kaitaraan anne,tabeman a mwanuokin kabouan aia berita aika tabu ni katoa wiiki man aki kanakin te toa. A taku tabeman bwa e aki reke kainnanoia man te Ekaretia; akanne ake a kaibibita aia taratara bwa kainnanoia n taai aika i mwaaia man are e katauraoia te Uea n ana reirei aika mwaiti ao taai ibukin aia beku aika a kakawaki nakoia tabeman.

Te nanorinano ao te onimaki iroun te Uea bon katokan te mwaninganako. N aron ae reireia Ana Boki Moomon, te Uea “e bon kakabwaiaia ma ni kanakoraoa aroia ake a kawenea aia onimaki irouna” (Helaman 12:1). Onimakinan te Uea bon kainnanoana ae onoti irouia ake a tirobaea ana tua te Atua ao aia reirei Ana burabeti ni kaitarai kukune aika a boou ao wanawanan te aomata.

I a tia n tataekina mwaitin buoka n te maiu aei mairoun Tamara are i Karawa ae tatangira are e a tia n buokiia iai natina n oki Nakoina. Tabera n te babaire mai karawa aei bon te onimaki iroun te Atua ao n ukora ao ni kabonganai ibuobuoki aikai, riki Ana Mwakuri ni Kamaiu Natina ae Tangiraki, ara Tia Kamaiu ao te Tia Kabooira, Iesu Kristo. I tataro bwa ti na reireia ao n maiuakini reirei aikai, n aran Iesu Kristo, amen.