Kokoaua nakon te Onimaki Are A Nabeia Ara Karo ma Nanoia

Ngke I kawara te Nashville Tennessee Tembora ibukin rinanoakin te tembora, I kakatonga ni karaoa mwanangau ngkai bon mwakoron tibwangau, n rinanoa ana auti te Uea ae moan te tamaroa aei. E anaaki nanou ma bannan Mary Wanlass ae e aranaki Carry On ae tine iaon te oo inanon ana aobiti te meituren.

Aei te karaki iakuun te korobanna:

“I Missouri n1862 Mary Wanlass ae 14-ana ririki ni maiu e berita nakon tinana te kauaei ae e a kaan mate bwa e na kakoaua raoi bwa tamana ae mwauku [ao aman tarina ma mwaanena aika a uarereke a na bon roko raoi] n te Valley i Great Salt Lake. … E kairiia taian kao mwaane Mary ao e katii ranin mammaia kao aine ake a kokooka te waekon are [e wene tamana iaona, ao] e tararuaia raoi … tarina ma mwaanena. Imwiin mwanangaia n te bong ae koraki, e kamwarakeia ana utu man rikoan aroka aika a kakanaki, uee ao taian berries. Oin kairan kawain neiei bon tii kaetieti ake e a tia ni karekei ni mwanangana nako maeo ‘ni karokoa a riki naang bwa maunga.’

“A roko [i] Utah Valley n Tebetembwa, n tia ni mwananga inanon tain te tiburing ao te tiamwa. E aki maan imwiin maekaia ana utu i Utah County ao e a mate tamana, ike ea iein Mary imwiina ao ni kaikawaia [oin] ana utu.”

Aei bon karakinan te ataeinnaine ae 14-ana ririki ae onimaki man korakora are e na kona ni buokiira ni bong aikai n “tii waakinako.”

“Tii waakinako,”—ke n aron rairana n taetaen abau Dutch, Gewoon Doorgaan—bon aia kibu ni koora tinau ma tamau ae a keiaki ni maiuakin inanon maiuia.

Au karo ma butikara bon bwaeoniia n ara utu. A tia n rinanon oin aia “tawaana,” n aroia naake a roko n te Ekaretia, ana nanai te Uea, ni katoa bong. Bon akea irekereken aia karaki ma taekan te kao ao taian waekon ma iai mwiina ae ti te arona are riki iaoia rooro n taai aika a na roko.

A butimwaea te euangkerio ao a bwabetitoaki ngke a roko n aia ririki kairake n ikawai. Au karo aika uoman aikai a rinanon kangaanga inanon ataeia. E ikawairake tamau iaon te aba ae Java Indonesia. N tain ana ka II ni Buaka te Aonaaba, e kairoroaki ao ni kamaenakoaki mairouia ana utu ao ni kamatawarikaki n aia tabo buure, ike e a rinanon kangaanga ae e a riaon kabwarabwaraana inanon uarerekena.

E ikawarake tinau inanon te mweenga are a kaman raure ana karo ao e a rootaki n te bora ni baki ao kakorakain ana ka II ni Buaka te Aonaaba. N taai tabetai e a kakaea angan reken kanana ao e a kana ueen te aroka ae te tulip. Ibukin ana mwakuri tamana, ao raurena ma tinana, n tabetai ao e boni kangaanga irouna ae e na kakoaua Tamara are i Karawa bwa bon te Tama ae tatangira.

A kaitibo au karo n tain ana waaki ni kakukurei te Ekaretia imwiin baireana bwa N n mare ao ni kabaeaki n te Bern Switzerland Tembora. Inanon aia tai n tataninga n te tabo n turein, ngkai a tia ni kabongana aia mwane ae bon tau ibukin mwanangaia nakon te tembora, a iango ngkana e na tau aia mwane ibukin boon baike a kainnanoi ma iai aia onimaki bwa a na nakoraoi bwaai ni kabane. Ao E bon nakoraoi!

A moanna ni kaikawaiarake aia utu man aia auti ae mangori ae teuana ruuna inuukan Amsterdam. Imwiin ririki aika a mwaiti ni uauatiaakin aia kunnikai ni baia, n tokin te tai ao e a tau aia kawakin mwane ibukin kabooan aia mitiin n uaati. Imwaain ae a nako ni boobwai, e kawariia te bitiobi ao ni butiia ibukin aia angabwai nakon katean te autinibootaki i Amsterdam. A baireia bwa a na anga ni kabane aia mwane are a kawakinna ibukin boon aia mitiin ni uaati ao a teimatoa ni uauaati ni baia.

N aroia utu ti rinanon tabeua kangaanga, n aroia naba utu tabeman. Ti a riki ni korakora ao n nano riki ara onimaki iroun te Uea Iesu Kristo, n aron Aramwa ngke e tibwaua ana karaki nakon natina Ereman, ike e tuangnga bwa e tia ni “boutokaaki iaan kakatai ma kangaanga n aekaia nako” ibukina bwa e katuka ana onimaki iroun te Uea Iesu Kristo.

A kanga uoman aomata ake a rinanon kakatai aika a rangi ni mwaiti inanon ataeia are a riki bwa kaaro aika a tamaroa n aron ae I kantaningaia? E bebete te kaeka: a butimwaea te euangkerio ma nanoia ni koaua ao ni maiuakin aia berita aika tabu ni karokoa te bong aei!

Imwiin te maan ae raka iaon 65 aia ririki n iein, tinau, are e rootaki n te aoraki ae te Alzheimer, e mate n Beberuare. Tamau, n ana ririki ae 92 e teimatoa ni maiu ao ni maeka n te auti, e roko ni kakawaria n angin te tai ni karokoa are e a bon mate. N tabetai e taku nakoia tariu ao mwaaneu aika a uarereke bwa te bwai are e rinanona ae kakamaku bon te kaembwa iaon Indonesia n ana ka II ni Buaka te Aonaaba e a tia ni katauraoia n tararua buuna ma te taotaonaki n nano n ririki aika a mwaiti ngke e mamaara ao n aki konamaki man aorakina ae buakaka ao te bong ane e katauaki anne n anga nwiokoana n tararua nakoia tabeman ngkai e aki kona ni manga mena irarikina. A teimatoa n aia kibu ni koora n “Tii waakinako,” ni karekea te kaantaninga ae kororaoi iroun Kirsto n tabekakirake n te kabanea ni bong ao ni maeka Mangaia n te mimitong n aki toki.

Aia onimaki ma aia koaua e anga te korakora ao te uangannano ibukiia rooro ake a na roko imwiia.

N te kaawa are e ikawairake iai kainnabau, ana karo, bon aomata aika a tamaroa are aki toki n nanako n taromauri, a butimwaea te euangkerio ngke taanga n ataei ma kainnabau are bon natiia te aine ae uoua ana ririki ao bon tii natiia n te tai anne. Aia babaire ni kan riki bwa kaain Ana Ekaretia Iesu Kristo ibukiia Aika Itiaki ni Boong aika Kaitira iai mwiina ae korakora iaon maiuia ngke a aki butimwaekai irouia kaain te kaawa ao irouia aia utu. E anaa te ririki ae maan, taeka n tangira nakoia kaain te utu, ao te mwakuri n ibuobuoki nakon te kaomiuniti imwaain are a butimwaeaki n te tokin te tai.

N te tai teuana ngke e beku taman kainnabau bwa te bitiobi, iai te bwai teuana ae kaairua bukinana iai ao e a kamotiraaki n te tai ae waekoa. E rootaki n te maraki ai tinau ao e tuanga buuna ngkana a na bon teimatoa naba n nanako n taromauri. E kaeka bwa eang ao a na bon teimatoa n nanako n taromauri ngkai bon tiaki aia aro aomata ma bon ana Ekaretia Iesu Kristo.

E bon maan imwaain ae e otinako te koaua ao e a karaoaki te kabwarabure. Baikara nako bwaai ni kararawata ake a keiaki inanona a reke bwa korakoraia ao ni kamatoatoaa aia onimaki.

Bukin tera ngkai tabeman mai buakora aki kakaitau n aia onimaki ao aia koaua ara karo ake a bane n tia n rinanon kangaanga ao n teimatoa ni kakaonimaki? Tao ti taku n ara iango bwa akea aia atatai ibukin bwaai? A aki ao a bon aki burebureaki! A rangi ni mwaiti bwaai ake a rinanona ma te Tamnei ao a kona n tibwaua aia koaua ma te Burabeti Iotebwa Timiti, “I ataia, … ao I aki kona ni kakewea.”

Ko aki tangira te anene are taekaia ana taanga ni buaka Ereman, are e reke n Aia Boki n Anene Ataei?

E ngae ngke bon tiaki aei bukina, n aron are e rinanona tinanu ngke te teei ngaia, ko kona n riki bwa temanna mai buakoia “kaaro aika a tamaroa ake a tangira te Uea” ao n anga te banna ni katooto ae tamaroa nakoia tabeman.

Ti namakinna bwa e koaua aei ngkana ti aneneia? Ko namakinna bwa ngkoe “kanga ana taanga ni buaka Ereman” ao bwa ko na “riki bwa ana mitinare te Uea ni uota te koaua nakon te aonaaba”? I a tia n namakinna n taai aika bati ngke e aneneaki te kuna aei n tain aia bootaki kaain te FSY ao te roronrikirake.

Ke tera ae ti namakinna ngkana ti anenea te kuna n taromauri “Koaua nakon te Onimaki”?

Nakoia te rooro ae rikirake n taabo ake kam mena iai ao te aro raa are kam mena inanona, taiaoka reirei ao karekea te korakora man aia onimaki ao kakoaua naake a roko imwaaimi. E na buoki ngkami n ataia n te aro are kam na kona ni karekea ke ni karikirakea ami koaua, e riai karaoan te anganano bwa “e uotii kakabwaia mai ikarawa te anganano.”

N iangoan te anganano are e na kakabwaia raoi maium, taiaoka iangoia ao tataroakina taekan ana kakao ara burabeti ae tangiraki, Beretitenti Russell M. Nelson, ngke e taku “ataeinimwaane “ni kabane ake kam tau man konabwai katauraoi ngkami ibukin te mwakuri ni mitinare. Ataeinimwaane aika kaain te Ekaretia, bon tabeia n te nakoanibonga te mwakuri ni mitinarei. …

“Ngkami … ataeinaine ake kam tau man konamaki, e tamaroa te mwakuri ni mitinare, ma e bon nakoimi, baireana.”

Ko kona n riki bwa te mitinare n ibuobuoki ke n anga reirei. Aekaki ni mitinare aikai a anga te kouru ae ti te arona n uotiia tamnei nakon Kristo, n tatabemaniia n oin aia kawai ae onoti ao ni mwaakaroiroi.

N aekakin mwakuri n ibuobuoki aika uoua aikai, ko kaotia nakon te Uea bwa ko tangiria, ao ko tangiria bwa ko na kinaa riki. Uringnga, “bwa e na kangaa te aomata ni kinaa te toka are e tuai ma ni beku irouna, ae te iruwa nakoina, ao e raroa nako man ana iango ma ana kaantaninga?”

Ngaira ni kabane, ngkana ngaira te moan rooro inanon te euangkerio ke te kanimaua, ti riai ni bon titirakiniira, Tera karakinan te onimaki, korakora, ao te motinnano ibukin te tiretio are N na bwaatinna nakon te rooro are imwiina?

Ti na bane n reitinako inanon ara kekeiaki ni kinaa raoi ara Tia Kamaiu Iesu Kristo, ao ni Karaoia bwa boton maiura. Boni Ngaia te bwaa are ti riai ni kateitei iaona bwa ngkana a roko taai ni kangaanga, ti na kona n tei ni matoatoa n aki kamwaingingaki.

Ti riai ni“koaua nakon te onimaki are a kawakinna raoi ara karo, koaua nakon te koaua ike a mate iai naake a tiringaki ibukin aia koaua, nakon ana tua te Atua, tamnei, te nano, ao te bai, ni kakaonimaki ao ni koaua are ti na teimatoa nako iai.” N aran Iesu Kristo, amen.