Te Kimwareirei Rinanon te Berita n Iriiria

N te bong teuana inanon 2023, E mwakuri Uyanga Altansukh i meangin te kaawa ae bubura i Mongolia ae Darkhan ngke e a roko n kawaria te beretitenti n te Mongolian Mition. Aikai ana taeka neiei:

“I nooria ao ai aron ae iai te oota ae otamwaaka i moana. E bon rang akoi ao n kaunga nakoia ake irarikina, ao e rotaki iai nanou. Imwain ae kitaniira, Ao I titirakinna tabeua titiraki. Tabebong imwiina, ao e okirai n au tabo n mwakuri ao n tuangai ngkana I kona n roko n taromauri. Ngai irou e na bon rang ibuobuoki anne. I raraoma n iangoan taai aika ana roko ibukiia natiu, ngkai kanga e a kararaoma man onrake ara tabo are ti maeka iai n waaki aika aki raraoi. I tangiriia natiu bwa a na riki n ai aron te mwane aio ma te oota iaon moaia, n tibwatibwa te kakukurei nakoia kain rarikiia.

“N te bong teuana ao a reireinira mitinare tuan te kabuanibwai. A onrake n te unga n nano natiu, ‘Tinara, Ti riai n kabwaka ara kabuanibwai.’ I a konaa n noora aia onimaki natiu n te tai anne. Imwain kainakin te Ekaretia, Ao I matakuakina te maungatabu ni kabuta ao n ongora iroun Beretitenti Russell M. Nelson. E katanoatai tembora aika a boou ni katobibia te aonnaba, ao e taekina te tembora ae boou ae e na kateaki i Ulaanbaatar, Mongolia. I taonaki n te kimwareirei ao a bwaka ranin matau, e ngae ngke I aki ataa bukina. Man te kimwarerei aio, I a kona iai n ataia bwa e a tabe n rikirake au onimaki ao au koaua.”

Uyanga, n aroia mirion aomata, bon kaain te ikotaki ae korakora irouia tibun iteraera ni kakatauraoi imwain kauaokin Iesu Kristo. E a tia neiei n moana mwanangana i aon kawain te berita ao n tia n riki bwa ana reirei Kristo. Tera nanon te riki bwa ana reirei Kristo? I kakaitau n te taeka n Tiaban ibukin te taeka ae reirei—deshi—de nanona te tari ae uarereke, ao shi nanona te ataei.

E katereterea Iesu Kristo, “I mena n te moan ma te Tama, ao bon ngai te Moan bungiaki.” Bukina bwa Antai Nga ia ao tera ae E a tia ni karaoia, ti taromauria, ti kamoamoaa, ti anga te karietataki Nakoina, ao ti Iriria. E a tia Kristo ni kabooira, ao ti teimatoa n kakaitau n Ana mwakuri n kamaiu ae akea tokina.

Bon ngaira Tamara are i Karawa ae tatangira ngkai ngaira natina. E kororaoi ana tangira ibukira. Ana mwakuri Iesu Kristo e kaota bannan ana tangira te Atua ibukira. “Ba E tangiriia aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.”

N ara ukeuke n kan atai bwaai aika ti tuai n atai, tabetai ti na kona n okira ara taneiai n maeura ae mamate, ke bwai aika ti bon atai. Te katooto, ti kona n reiakina teutana aron te Atua te Tama rinanon arora n karo n irekerekera n ara utu. E ngae n anne, ti na riai n karaurau ni kabonganan te katooto aio n ara kakatai n ataa aron Tamara are I karawa. Anuan nako te Atua te Tama e riaon ni kabane kabwakan nako aroaron te aomata ae bwaka. Te Atua te Tama bon te Tama ae kororaoi. E kororaoi ana tangira, e nanoanga, e tataonakinano, e ataibwai, ao ni mimitong. Ti kona n onimakinna ni koaua. Ana tangira Kristo e kaota bannan ana tangira te Atua te Tama ao bon ngaia kaotan te tangira anne.

Iesu Kristo bon ngaia te banna n katooto ae nanonaki. Inanon Kristo, ti kona n mataata raoi n anuan maiun te Tama ao Ana babaire. Rinanon Kristo, ti anganaki te mwaaka ni kona n tokanikai iaon kabwakan te rabwata ao ti kona n riki n ai aron te Tama.

N ai aron raoi Tamara are I karawa, e kororaoi ana nanonanga ao ni momotiraoi Iesu Kristo. A aki kauntaba anua n atua aikai ae te tituaraoi ao te nanoanga. A rangin tangiraoij. Te tituaraoi ao te nanoanga a kaai n kaota bannan te Atua n tangiria Natina. Ti kona n onimakina te Atua te Tama ao Iesu Kristo bukina bwa A tituraoi ao n aki inanonano nakoira ni kabaneira.

A katiteuanaaki te Atua te Tama ao Natina Iesu Kristo n te aro ae tamaroa n aia mwakuri ao aia tangira. Bukina bwa a tangiriira te Atua ao Iesu Kristo, ti anganaki te tibwanga ao te kona n riki bwa taan iriiria ni koaua aika ti karaoi berita aika tabu ma Ngaiia. Man karaoan aio, e karababaaakii iai ara reitaki ma Kristo: “Ao ngkai, ibukin te berita ae tabu are kam a tia ni karaoia, kam na aranaki bwa natin Kristo, natina mwaane, ao natina aine; bwa taraia, n te bong aio ao e a tia ni manga bungia tamneimi; bwa kam taekinna bwa a bitaki nanomi rinanon onimakinan arana; mangaia ae kam a bungiaki irouna ao kam a riki bwa natina mwaane ao aine ngkami.”

Ngkai taan iriria ngaira, ngkana ti karaoi ao n kawakina ara berita aika tabu ti na kakabwaiaki ma te mwaaka n tamnei. Ti bane n katiteuanaki nakon Kristo ao te Atua te Tama n ara reitaki ae onoti aio ao ti na kona n namakina Aia tangira ao kimwarereia n te aro are e tii kaokoroaki nakoia ake a karaoi ao n kawakini berita. Ara konabwai n namakina Ana tangira Te Atua ae bwanin, ke n teimatoa inanon Ana tangira, e boboto iaon nanora ma ara mwakuri aika itiaki.

N Ioane mwakoro 15, mwakoro 9, ti wareka iai aio, “N aron te Tama ae tangirai, ngaia ae I tangiri ngkami.” Ao ngkanne ti anganaki te kakao, “Reitinako inanon au tangira.”

N te kibu are imwiina, ti anganaki te kawai n reitanako Ana tangira, ”Ngkana ko kawakina au tua, ko na kabaeaki n au tangira; n aron ae I kawakina ana tua Tamau, ao e kabaeai n ana tangira”

Ti noora ngkanne kakawakin kawakinan tuua n te kibu 11: “Bwaai aikai I a tia n taekinna nakoimi, au kimwareirei I katikua iroumi, bwa e na kaonaki ami kimwareirei”

Rinanon ara berita ni koaua n iriria, ti na kona n otaa riki n aron te Atua ao te kimwareirei are e tangiria ibukiia Natina n kabaneia bwa ana namakinna. Ti na moanna naba n oota n reirei ake a taraa ni kaminonano n te moantai. Te katooto, E kanga te Atua n karekea te kimwareirei ae tabwanin ngkana tabeman ibuakoia Natina a rinanon te karawawataki ae bati? E kuneaki kaekana inanon ana taratara te Atua ao inanon Ana babaire ae tamaroa. E noorira man moan rikirakera ni karokoa mimitongin ara konabwai n te tai ae imwaira. E tia n katauaraoa te kawai, rinanon Natina Iesu Kristo, ibukira n kabaneira, Natina, bwa ti na tokanikai iaon te maraki, te karawawataki, te bure, te raraoma ao te maroaa inanon te maiu aei. E katauraoa te kawai ao te rinerine ibukira te Atua.

Katooto mai irouia ake a tia n rinanon te kimwareirei rinanon iriirana e na kona n buokira n oota n te iango aei. Tao kam a tia n ongongo te taeka ae ti tokin kukureira n aron kukurein natira ae te kabanea n aki kukurei. I nooria bwa aio e aki tangiraki bwa te bwai ae na riki. Iai kanoan tinau ae 94-ana-ririki aika a maiu ae raka i aon 200 mwaitiia. E na bon bae n riki, ae temanna mai ibuakoia akana 200 e na konaa n aki kukurei. Ngkana te taeka aei e koaua, ao Tinau e na mena inanon te aki kukurei ae teimatoa, ma E bon aki. Naake a kinaa a ataia bwa e rang kukurei tinau.

Ngkai I tangiria n manga tibwaua teuana te bwai I rinanona. Inanon Tianuare n 2019, I kaoaki ma kainnabau ae Debbie nakon ana aobiti Beretitenti Nelson. E katena ana kaintekateka n kaniia ma ngaira, ao tia tekateka n kan boo bubuan waera. Imwiin anganakira weteara ae ti mena ngkai iai, e bita ana kaintekateka Beretitenti Nelson n kaitara Debbie ao n kabanea ana tai ma ngaia. E bon rang akoi, e tatangira, e rau ao n onrake n te kimwareirei, n ai aron te karo ke te tibu ae tamaroa. E taua bain Debbie ao n bubuia, ni karaua nanona bwa a na bane n nakoraoi bwaai ni kabane ao e na kakabwaiaaki ara utu. N taraana iroura n te tai arei bwa ngaira taian kabanea n kakawaki n aomata nakoina ao e bane ana tai nakoira. Ti kitana ana aobiti n bwakantaain te Kanimabong anne ma namakinan te rau, te tangiraki ao te kimwareirei.

N te Moanibong ti noora n te rongorongo. Bwa inanon te bong are e kabanea ana tai iai ma ngaira Beretitenti Nelson, e motirawa temanna natina te aine man te aoraki ae te kaentia. Ti bon rang kubanako. A taonaki nanora ngkai ti rainanoanga ma ngaia ao ana utu. A onrake naba nanora n te karabwarabwa n arona n ai aron Kristo n anganira ana tai inanon ana tai n nanokawaki ibukin natina ae e mamara.

Ngke ti iangoa te bwai ae ti rinanona, ti bon titirakinira, “E kanga n rangi n akoi, n tatangira ao n kimwareirei n te tai ae rang karawawataki iai?” Kaekana bwa bukina e bon e ataia. E ataia bwa e a tia n tokanikai Kristo. E ataia bwa e na manga bon ikotaki ma natina te aine aio n te maiu are akea tokina. Te kimwareirei ao te taratara ae akea tokina e roko man kabaeakira nakon te Tia Kamaiu man karaoan ao kawakinan berita aika tabu ao ni katotongan Kristo.

E reireia Beretitenti Nelson: “N aron te kawai anne te Tia Kamaiu e anga te rau are “aki kona n ataki teutana’ [I-Biribi 4:7], E anga naba buburan, korakoran te namakin ao mwaitin te kimwareirei are N na aki kakoaua ana koaua te aomata ke kabwarabwaraan te rabwata ae mamate. Te katooto, e taraa n aki kona n reke namakinan te kimwareirei ngkana e taonaki n te aoraki ae akea tokina am ataei, ke ngkana e bua am mwakuri ke e kamwaneko buum. Ma anne raoi te kimwareirei ae anga te Tia Kamaiu.”

Ngkana ti karaoi ao n kawakin berita aikai, ti na onikaki nakon karekean te nano ni kan buokia tabemwaang bwa a na namakina te kukurei ao te tangira are ti namakinna n ara berita n reitakira. Ti kona n riki bwa kain te mwakuri ae te kabanea n kakawaki n te aonnaba n te bong aei—ikotakiia te baronga are Iteraera. Ti na kona n buokiia natin Te Atua nakon Kristo. N aron are e reireia te burabeti ae Iakobwa, “Ao kam na kakabwaiaki; ngkai kam a tia ni kakaonimaki ni mwakuri ma Ngai inanon au nne ni kurebe, ao n tia ni kaawakin au tua, ao kam a tia ni manga karekea te uaanikai arei ngkoa nakoiu, … kam na kimwareirei ma ngai ibukin uaan au nne ni kurebe.”

Ngkana ti kabaeira bwa ti na karaoi mwakuri n aroia ana reirei aika a kabaeaki, inanon ara konabwai are ti mena inanona, e na kakorakoraaki reitakira ma te Tama ao te Nati, ao e na rikirake kimwareireira, ao e na karababaaki ara taratara ae akea tokina. Ao ti na kanuanganaki ma te mwaaka ao n namakina te kimwareirei n te aro are e a tia n katauaki ibukia ana reirei te Atua n te berita. N aran Iesu Kristo ae tabu, amen.