Kakawakin te Maeu

E reitia: “I namakina te tangira ma te boutoka ae korakora mai irouia au utu nte uoote. E bon rang rootai. [Au] bitiobi ao au beretitenti irouia Kairake n Ataeinaine e rakanako ae a karaoia n kaotan aia boutoka ma aia tangira. … I a tia n noora bain te Uea … n kairirai ma au utu. … Te uoote ae aekakin ae I mena iai bon te utu ae a kainanoia aomata ni kabane, riki n aron te kairake n ataeinaine ae rinanon ae I mena iai.”

Ngaia ma ana utu ao ana utu n te uoote a butimwaea ma te tangira natina te mwane ni Beberuare ae nako.

E taekinna Beretitenti Russell M. Nelson, “Oin taben ana Aro te Uea ae koaua man maeu n taainako bon te mwakuri … ae barongaaki n kawaria natin te Atua n tatabemania… [kawarakia ma te tangira-nanoanga] nakon temanna, n aiaron ae E a tia ni karaoia.”

Ngkana te aine ae tuai n mare e kunea bwa ea kariaria natina ae aki kantaningaia, raoraoma ibukin te marurung, reimauruan te tamnei, te mamaa, te tabetabe n te karekemwane, titiraki ibukin te reirei, te aki koaua nte mare, ao ai bon te nanokawaki n aki koron ana iango a kona, n tain te maraki ma te aki kakoaua, ena kaira te aine ae katuua te iango nakon touan mwaneka aika ana uota te maraki ma te nanokawaki.

Nakoia ake a ongora are a tia n rinanon te maraki ae korakora ma te nanokawaki n karaoan ke n irekereke ma kabwakakin tetei, taiaoka n uringa: E ngae ngke tiaki konaa n ibita kanoan taai ake ngkoa, Te Atua e kona n kamaoa te tai are ngkoa. Te kabwarabure e konaa n roko rinanon te kakai n Ana mwakuri n kamaiu ngkana ko rairaki Nakoina ma te nanorinano ao n rairanano.

Iai uoua taeka aika aki toki n iriiri ma mimitongin te bungiaki: te maiu ao te rinerine. Te Maiu bon te kabanea n kakawaki n Ana babaire ae tamaroa Tamara are I karawa, ao n ana babaire ti kawakina ao ti kateimatoa te maiu; ao ti rinea reitanakoan te maiu ngkana ea bungiaki. Ti kawakina naba te bwaintangira n rinean te itiaki—ni buoka kakorakora rineanakin te raoiroi are e kariaia te Atua ae uota te maiu ae akea tokina.

Ngkana te aine ao te mwane a rinanon taai n aki koaua, kaitaraki n rinerine aika kanganga, ara taeka, baira, ao nanora—maiun tamneira, namakin, ao te karekemwane—a kona ni kakabwaiaia n namakina ana tangira Te Tia Kamaeu ao, n buokiia n kauki mataia n tamnei, n aron ana taeka Beretitenti Henry B. Eyring, man “aron are n aia iango bwa a noori” nakon “are aki konaa ngkai n noori.”

E taekinna Beretitenti Dallin H. Oaks: “Arora n nakon kabwakakia ataei e aki boboto iaon atatai aika kaokaki bwa e moa mai ia maiun te aomata. … Ma e kamatoaki n ara atatai ae … ni kabane natin Te Atua aika tamnei ana ruo nakon te aonnaba aio ibukin bukina ae mimitong, ao rikia n aomata anne e kaman waaki imwain reken te maiu ao ena teimatoa ibukin taai aika imwaira n aki toki.”

Ana taeka te Uea ibukin are e tuai bungiaki, n bwananaki rinanon te Moan Beretitentii ao te Kooram n Abotoro n te Tengaun ma Uoman, e aki bitaki ao e kamatoai aia taeka burabeti rinanon roronako, n anga te kamatata ae mai karawa bwa tera ae e a tia te Uea n tuangiira.

“Ana Ekaretia Iesu Kristo ibukiia Aika Itiaki ni Boong aika Kaitira iaon kakaawakin maiun te aomata. Ma ngaia are, te Ekaretia e totokoa kabwakakiia ataei iroun te aomata ke aanga nako, ao n reireinia membwa bwa a na aki iangoia, ke ni karaoia, ni kaungaa, ni kaboaki ibukina, ke ni karaoi taian booboo akanne.

“Te [Uea] e kariaia ibukin aika konaa n tarariaoaki … ngkana:

• Te bikoukou e reke man te mwakuri n tautau ae aonikai ke te karikira, ke

• Te tia bwai n aoraki ae konabwai e na iangoa bwa maiun ke marurungin te tina e mena inanon te kabuanibwai ae kakaiaki, ke

• Te taokita ae mwaatai e baireia bwa te teei ae tuai bungiaki iai te kakaiaki ae korakora nakoina are e na karika aki maiuna imwin bungiakina.”

E reitia Te Moan Beretitenti: “Kabwakakia ataei bon te bwai ae rang kakaiaki. [Inanon taai aika aki rang ririki aikai] e riai n baireaki tii ngkana ae e kamatoaa raoi te aomata are irekereke iai rinanon te tataro” ma te maroro ma tabemaang.

Tenibwi te ririki n nako, Ana burabeti te Uea a kanakoa te katanoata nakon te aonnaba. Inanona taeka aikai:

“Ti … katanoata riki bwa e a tia te Atua n tua bwa te mwaaka ae tabu ibukin te aro ni kariki ana ti kabongaki imarenan te mwaane ao te aine, ake a tia ni mareaki iaan te tua bwa te mwaanenumwa ao te ainenumwa.

“Ti katanoata aron te maiu ae mamate are e karikaki iai bwa e karaoaki n te mimitong ae tabu. Ti kamatoa tabun te maiu ao kakawakina n Ana babaire te Atua ae akea tokina.”

Karikirakean ma kawakinan te maiu ae e tuai ni bungiaki bon tiaki te koaua n tautaeka Ma bon te tua n karaoan ae riai ae kamatoaki iroun te Uea rinanoia Ana burabeti.

Te rongorongo mairoun Beretitenti J. Reuben Clark Jr., ae beku ngkoa nte Moan Beretitenti, e kabwarabwaraia ara kairake n boong aikai nte aro ae tamaroa: “Kairake nte Ekaretia a baki ibukin bwain nako te Tamnei; a ingainga n kan reiakina te euangkerio, ao a tangiria n etina, ae aki renganaki. A kan ataa rongorongon … ara koaua; a kan karekea aia kakoaua iaon [te] koaua. Bon taan … titiraki, taan ukoukora te koaua.” Tia mamaroro riki ma te onimaki ao te tangira nakoia ara kairake inanon mwengara, ao imarenara inanon ara Bootaki n Aine ao ara bootaki n mwane, ibukin Ana tua te Atua iaon tuan te itiaki, tabun te maiu, ao tararuakin are e tuai n bungiaki ma tinaia.

Te titita temana e koroboki nakou rongorongon te bwai ae rinanona te bwii tabun ririki n nako: Ngke 17 au ririki … I kunea bwa I bikoukou n akea ana boutoka raou. I namakina te mama ma te kaokoroaki [ma I] aki te roko n iangoa [kabwakakin natiu]. … [Iai] au utu ae tangirai ma au bitiobi, are I aki toki n kakawaria ibukin kairaikiu. … I rairaki nakon Te Atua. I kamatebwaia booki aika tabu … ao n tataro [ao n] karekea te korakora rinanon au Tia Kamaiu ao te mwakuri n rairanano. … I karekea te kaeka [nakon au tataro] ae I aki konaa n kakewea. … E kauruaki nano, ma I ataia bwa nna riai n kanakoanatiu te aine ibukin te tabetabe. … I tataro ibukin te ninikoria [ao]namakina Ana tangira Te Tia Kamaeu rinanon te rairanano, I ataia bwa te Atua … e kaekai tataro ao e kakorakoraira.”

Taanga aika a tatangira a tabeka te teei ao a reireinna te euangkerio. Ngkai ao ea tia n mare ni karekea oin ana utu ae tamaroa.

N taai tabetai, te kanganga ma te kainano n aki ataakin bwaai aika ana riki e kona n raona kawakinan te maiu.

N aki maan n nako taanga aika kairake ae Kathy ao Ngai ti tangiriia a korea taekan natiia ae a kariariaa.

Te karo e korea: “[Ngke kainnabau e] tokara ana ka-10 nwiiki n bikoukou ti kunea bwa natira ae miterio rikina iai irouna kanikinaean te trisomy 21, ae rang ataaki bwa te Down syndrome. Ti namakina te kairoroaki … maiirouia taan bwainnaoraki bwa tina iangoa kabwakakina. Tabeua te wiiki imwiina ti kunea … bwa natira ae tuai n bungiaki aei … e na kainanoa te korokoro nakon buroona inanon ana moan ririki n maiu. Rinanon te mwakoro aio ti tataromwaaka ibukin ana buoka, … ti namakina te kabebeteaki rinanon tamneina. Ti karekea te kaotioti ao te oota bwa natira te aine aio bon natin Tamara are I karawa ae rianako ao iai nanona ae korakora n mena n ara utu ao n ruo nakon te aonnaba.”

Tinan tetei aio e koreia: “[Ti] bon rang kubanako, ti minotaki, ao ni koauana ti rang rawawata nte rongorongo aei. … Ngke ai 14 au wiiki n bikoukou, tia kunea bwa natira iai aki nakoraoi buroona aika a bati, teuana mai buakona e na rang taraa n kamamate. Ti kawariia taokita ma taan rabakau aika bati inanon au 10–18 wiiki n bikoukou. … Ao n katoa ara tai n kaitibo aikai, ti tuangaki bwa ti tangiria n reitinako ke ti na kabwaka. … Te Tia Kamaiu e kamaoa buroou ao e anganai namakinan te rau ao te ingainga ibukin natira te aine aei. … [Tamara are I Karawa] e a tia n kaota nakoiu ana babaire ae tamaroa ibukiu n te tai teuana ma teuana [ao] I onimakinna.”

A butimwaea natiia te aine ma te kukurei teuana te wiiki n nako. Bon natiia ao natina n aki toki.

Te Onimaki ae aki kai bwaka ao te ninikoria bon oin aron ana reirei Iesu Kristo.

Rinanon ririki aika bati, I tia n karekea te konaa n kaitibo ma mwane ao aine aika ukora ma te nanorinano okiran kawain te berita ae tabu ma aia nakoanibonga ma kakabwaia n te tembora imwiin ririki aika a bati imwin buan rikiia nmembwa.

N te tai teuana, Ao nna maroro ma temanna te mwane n tei ibukin te Moan Beretitentii ibukin kaokakin ana nakoanibonga ao ana kakabwaia nte tembora.

Imwiin mareakina nte Tembora, ao imwiin reken natiia aika teniman, teuare te mwane e aki kawakina ana berita nakon kainnabana ao nakon ana berita aika a tabu. Te aine ae tuai n iein e bikoukou irouna ao n tangiria n kabwaka natina.

Kainnaban te buumwane aei ae kakaonimaki e bubutia te aine arei bwa e na bungia natina ao e berita bwa ena kaikawa tetei anne ngkana e bungiaki, ma ake oin natina.

Te aine are tuai iein e karaua n iangoia ao n kariaia bwa enaaki kabwaka natina.

Ai 10 te ririki ngkai. Te aine ae nanorinano aio e tekateka imatau e tia n tangira teteinimwane are bungiaki n ai aron oin natina ao n tuangai ana kekeiaki kainnabana n kaeti arona ao n tangiria man tabe ibukina ma ana utu. E tang te karo ngke e taetae.

E kanga te aine ae kakannato iroun te Atua n kawakina tetei n aiaron ae natina, e ngae ngke ena kona n riki bwa kauringan ana bure kainnabana nakoina? Ni kanga? Bukina bwa e kunea korakorana iroun Iesu Kristo ao e kakoaua kakawakin te maiu, mimitongin te maiu. E ataia bwa tetei are e tuai n bungiaki bon natin te Atua, akea ana bure ao n itiaki.

Tariu ao mwaneu aika kam tangira, keerikakin tangiraia ataei aika a tuai n bungiaki nte aonnaba e riki bwa te raraoma. Te Atua e kakawaki irouna te maiu. Bon Ana mwakuri ao Mimitongina bwa e na uota te aki mamate ao te maiu ae akea tokina nakoia Natina. Ngkai ngaira ana reirei Iesu Kristo, e kakawaki iroura te maiu. “Ane a na ataingkami aomata ni kabaneia ba au reirei ngkami n aei, ngkana kam i tangitangiri ” Ti bia tibwa ara tangira riki ae korakora nakoia are a kainanoira riki. I kaota au tangira ibukimi ao ana tangira Tamara are I karawa ibukia Natina aika a roko nakon te aonnaba. N aran Iesu Kristo, amen.